Deputeti i Partisë Demokratike të Kosovës, Përparim Gruda, deklaroi se institucionet e Kosovës po poshtërohen, ndërsa qytetarët po përballen me seanca të pakuptimta. Ai i bëri këto komente në një konferencë të përbashkët me deputetin Arian Tahiri, pas konstituimit të Kuvendit dhe votimit të Qeverisë “Kurti 4”.

Gruda tha se PDK-ja vendosi të largohej nga seancat pasi, sipas tij, u shkelën jo vetëm afatet kushtetuese, por edhe ato të përcaktuara nga vetë Lëvizja Vetëvendosje.

“Kur kuptuam se, përveç shkeljes së afateve kushtetuese dhe atyre të vendosura nga Vetëvendosje, institucionet po poshtërohen e po fyhen, ndërsa qytetarët po tallen përmes seancave të pakuptimta, vendosëm të tërhiqemi dhe të përdorim të vetmin mjet që mund ta përdorim në demokraci, Gjykatën Kushtetuese të Kosovës. Për këtë arsye vendosëm të mos marrim pjesë më në seanca”, deklaroi Gruda.

Sipas tij, PDK-ja nuk e ka tërhequr propozimin për kandidaten e saj për postin e nënkryetares së Kuvendit dhe, në mungesë të këtij propozimi, Kuvendi nuk mund të konsiderohet i konstituuar.

Gruda theksoi se letra e dorëzuar nga partia e tij nuk përmban tërheqje të kandidaturës, por vetëm njofton largimin e përkohshëm nga procesi deri në vendimin e Gjykatës Kushtetuese.

“Partia Demokratike e Kosovës nuk ka hequr dorë nga propozimi i kandidates së saj për nënkryetare të Kuvendit. Letra që kemi dorëzuar sot nuk nënkupton tërheqjen e propozimit, por largimin tonë të përkohshëm nga procesi derisa të vendosë Gjykata. PDK-ja nuk e ka refuzuar kandidaturën për nënkryetare të Kuvendit”, tha ai.

Ai shtoi se, meqë propozimi nuk është refuzuar, Kuvendi nuk ka mundur të konstituohet dhe se procesi i zhvilluar sot është jashtë afateve dhe përcaktimeve kushtetuese, pasi mungon nënkryetarja e propozuar nga PDK-ja.

“Nëse Vetëvendosja mund ta konstituojë Kuvendin pa nënkryetaren tonë, sepse ne nuk marrim pjesë në dy seanca, në fakt vetëm në një, pasi kjo është seanca e parë ku nuk kemi qenë, atëherë si mund të pretendojë se ka të drejtë të propozojë kryetarin e Kuvendit, kur ka munguar për dy muaj në Kuvend? Ajo ka munguar përtej afatit kushtetues dhe përtej afatit politik që e ka përcaktuar vetë. Pse Vetëvendosjes duhet t’i njihet e drejta për të propozuar kryetar Kuvendi kur e shkel Kushtetutën kaq hapur, ndërsa neve mund të na mohohet një e drejtë pse mungojmë një ditë në seancë? A duhet të mblidhet Kuvendi vetëm kur i intereson Vetëvendosjes, apo ekzistojnë rregulla? Ne jemi një shoqëri me rregulla, funksionojmë si shtet dhe Kuvendi duhej të ishte mbledhur brenda afateve”, u shpreh Gruda.

Deputeti tjetër i PDK-së, Arian Tahiri, deklaroi se procesi i konstituimit të Kuvendit ka hyrë në një fazë ku nevojitet qartësi kushtetuese.

Ai bëri të ditur se të gjitha zhvillimet nga seanca konstituive dhe votimi i qeverisë së re do t’i përcillen për interpretim Gjykatës Kushtetuese.

Legjislatura e njëmbëdhjetë e Kuvendit të Kosovës u konstituua të dielën përmes votimit të nënkryetarëve, sipas kryetares së Kuvendit të Kosovës, Albulena Haxhiu.

Në seancën e sotme, Kuvendi zgjodhi Kujtim Shalën e LDK-së nënkryetar, ndërsa nga komuniteti jo serb u zgjodhën Emilja Rexhepi dhe Tanja Vujoviq nga Lista Serbe.

PDK-ja nuk ishte e pranishme në sallën plenare, ndërsa si rrjedhojë ishte tërhequr propozimi i Vlora Çitakut për postin e nënkryetares.

Një ditë më herët, të premten, ishte zgjedhur Ardian Gola si nënkryetar.

Po ashtu, gjatë ditës së sotme u votua edhe Qeveria “Kurti 4”, e cila mori 62 vota për në një seancë të jashtëzakonshme.

The post Gruda: PDK-ja e mban ende propozimin për nënkryetaren e Kuvendit appeared first on Albeu.com.

Tre persona të tjerë u plagosën gjithashtu në sulm, duke përfshirë një kandidat për këshillin e qytetit të Celaya, Adrián Guerrero.

Sekretariati i Sigurisë Publike Federale të Meksikës, tha të martën se Guerrero aktualisht konsiderohej i zhdukur, duke korrigjuar deklaratën e mëparshme se ai kishte vdekur pas lëndimeve të marra në të njëjtin sulm.

Autoritetet thanë se hetuesit dhe ekspertët e mjekësisë ligjore, ishin në vendngjarje duke mbledhur informacione për të gjurmuar vrasësit.

Vdekja e Gaytán, është e fundit në një varg vrasjesh që kanë ndodhur në prag të zgjedhjeve të përgjithshme në Meksikë, të cilat pritet të mbahen më 2 qershor.

Gaytán kishte bërë fushatë për Morena-n, partinë e presidentit meksikan Andrés Manuel López Obrador.

Lopez Obrador të martën dënoi sulmin, duke thënë: “Këto ngjarje janë shumë për të ardhur keq, sepse ata janë njerëz që po luftojnë për të mbrojtur demokracinë, të cilët janë në rrugë, duke treguar fytyrat e tyre, duke luftuar për të tjerët dhe dhemb shumë që kjo ndodh në vendin tonë”.

Morena tha se ndjente keqardhje të thellë për “vrasjen frikacake të koleges tonë”.

“I dërgojmë ngushëllimet tona dhe gjithë solidaritetin familjes, miqve dhe të dashurve të saj. Ne kërkojmë që zyra e prokurorit të Guanajuato dhe autoritetet përkatëse të hetojnë, të arrestojnë përgjegjësit dhe të sjellin drejtësi”.

Dhuna politike zakonisht rritet rreth sezonit zgjedhor në Meksikë, dhe ky vit po formohet si më i dhunshmi në mandatin gjashtëvjeçar të Obradorit, sipas analistëve të konsultuar nga CNN.

Sipas shoqatës për marrëdhëniet publike “Integralia”, nga shtatori deri në mars, të paktën 12 kandidatë u vranë dhe qindra raportuan akte dhune ndaj tyre.

The post E rëndë, vritet gjatë fushatës kandidatja për kryebashkiake appeared first on Albeu.com.