Lutfi Haziri, nënkryetar i LDK-së, deklaroi në emisionin “Click” të RTV21 se aktualisht në këtë parti nuk është hapur procedurë për zgjedhjen e një kryetari të ri.

Reagimi i tij erdhi pas shprehjes së gatishmërisë nga Hykmete Bajrami për të garuar për drejtimin e LDK-së. Haziri theksoi se brenda partisë nuk ekziston një proces i tillë.

“Nuk ka garë. Në LDK nuk është hapur një proces i tillë dhe, nëse nuk ka proces, atëherë nuk ka proces. Me këtë po e mbyll këtë çështje. Nuk dua të flas për këtë temë”, u shpreh Haziri.

Sipas tij, LDK-ja përqendrohet te ajo që është e realizueshme, jo vetëm te synimet e dëshirueshme. Kjo, siç la të kuptohet ai, lidhet me rrethanat dhe nivelin e përkrahjes që mund të ketë një proces brenda partisë.

“Lutfi Haziri gjithmonë do të jetë në LDK. Në asnjë rrethanë dhe në asnjë proces politik nuk kam kryqëzuar”, shtoi ai.

The post Haziri mohon se LDK-ja ka nisur procesin për zgjedhjen e kryetarit, pas kandidaturës së Bajramit appeared first on Albeu.com.