Ayyoub Bouaddi mund të kishte qenë pjesë e Francës në çerekfinalen e Kupës së Botës ndaj Marokut në Boston, nën drejtimin e Didier Deschamps dhe në të njëjtin formacion me lojtarë si Adrien Rabiot dhe Kylian Mbappé.

Megjithatë, 18-vjeçari do të zbresë në fushë në krahun e kundërt, pasi ka vendosur të përfaqësojë Marokun ndaj vendit ku ka lindur dhe është formuar.

Ndeshja merr kështu një peshë të veçantë për mesfushorin, i cili tashmë do të përballet me Francën në një duel me domethënie të madhe personale.

I lindur në Senlis, rreth një orë në veri të Parisit, Bouaddi ka kaluar nëpër të gjitha ekipet e moshave të Francës. Madje, kur ishte vetëm 17 vjeç, ai mbante shiritin e kapitenit te përfaqësuesja U21 e Francës.

Për një kohë të gjatë, synimi i tij kishte qenë të luante për përfaqësuesen që fitoi Kupën e Botës në vitin 2018. Disa muaj më parë ai kishte refuzuar edhe një ftesë nga Maroku për Kupën e Kombeve të Afrikës, pavarësisht insistimit të ish-trajnerit Walid Regragui që ta bindte të zgjidhte vendin e origjinës së prindërve të tij.

Por gjashtë muaj më pas, Bouaddi vendosi të mos priste më për një hapësirë në nivelet më të larta të futbollit ndërkombëtar. Ai nuk donte të humbiste Kupën e Botës 2026.

Deschamps kishte kohë që e ndiqte nga afër talentin e Lille. Trajneri i Francës e kishte parë që në momentin kur debutoi si profesionist me klubin francez, në moshën 16-vjeçare.

Po ashtu, ai e kishte vëzhguar edhe në tetor të vitit 2024, kur Bouaddi, pikërisht në ditëlindjen e tij të 17-të, udhëhoqi mesfushën kundër Real Madridit në Ligën e Kampionëve.

Sidoqoftë, hapësirat në mesfushën e Francës ishin shumë të kufizuara për shkak të konkurrencës së fortë. Deschamps preferoi emra si N’Golo Kante, Warren Zaïre-Emery, Manu Kone, Adrien Rabiot dhe Aurelien Tchouameni.

“Në mesfushë kemi shumë talente dhe Didier nuk dëshiron të bllokojë askënd”, deklaroi Guy Stephan, asistenti i Deschamps, kur u pyet për mungesën e Bouaddit në kombëtare.

“Nëse ju pyes se cilin lojtar do të hiqnit për t’i bërë vend Bouaddit, nuk jam i sigurt se do të merrnit të njëjtën përgjigje”, shtoi ai.

Ndonëse Franca ka një repart të jashtëzakonshëm në këtë zonë të fushës, shumëkush në vend e konsideron humbjen e një lojtari si Bouaddi si një gabim serioz. Mesfushori i Lille vlerësohet si një nga elementët më premtues të brezit të tij dhe tashmë ka dhënë sinjale të forta edhe në arenën ndërkombëtare.

Zinedine Zidane, i cili pritet të marrë drejtimin e Francës pas Kupës së Botës, bëri gjithashtu një përpjekje për të hyrë në kontakt me Bouaddin.

Sipas burimeve të ESPN, disa javë më parë Zidane e telefonoi lojtarin dhe i shprehu vlerësimin për cilësitë e tij, por pa i garantuar dot një vend në kombëtaren franceze.

“Bouaddi ka lirinë të zgjedhë se për cilin vend dëshiron të luajë. Nuk kam folur me të, nuk është kjo mënyra si veproj unë”, kishte deklaruar më herët Deschamps.

Tekniku francez kishte sqaruar gjithashtu se një futbollist ftohet në kombëtare vetëm kur vlerësohet se ka ardhur momenti i duhur dhe kur mendohet se mund të japë ndihmë për ekipin.

Në krahun tjetër, Maroku u tregua shumë më i drejtpërdrejtë me të.

Mohamed Ouahbi i ofroi Bouaddit siguri për një rol të rëndësishëm dhe përfshirje në Kupën e Botës 2026. Madje, ai i premtoi se do të ishte pjesë e formacionit dhe e projektit të ri të “Luanëve të Atlasit”.

Pikërisht kjo i mjaftoi 18-vjeçarit për të marrë vendimin përfundimtar.

Ashtu si disa futbollistë të tjerë të lindur në Francë me rrënjë marokene, edhe Bouaddi vendosi të luajë për vendin e prindërve të tij.

Tashmë ai do të matet me Francën në çerekfinale, ndërsa kundërshtari i tij vjen në këtë përballje si një prej favoritëve kryesorë të turneut.

“Les Bleus” kanë shfaqur stabilitet dhe forcë gjatë garës, ndërsa treshja sulmuese Kylian Mbappé, Ousmane Dembélé dhe Michael Olise ka bërë diferencën.

Përballë tyre do të jetë një Marok i etur dhe i mbështetur te një brez i ri futbollistësh, mes të cilëve spikat edhe Ayyoub Bouaddi, i vendosur të provojë se zgjedhja e bërë prej tij ka qenë e duhura.

Për 18-vjeçarin, kjo sfidë nuk përfaqëson thjesht një çerekfinale të Kupës së Botës, por një takim me të kaluarën dhe një shans për të hapur një kapitull të ri në rrugëtimin e tij profesional.

The post Bouaddi i tha po Marokut, edhe pse u kërkua nga Deschamps dhe u telefonua nga Zidane, tani sfidon Francën appeared first on Albeu.com.

Federata Meksikane e Futbollit e ka zyrtarizuar Rafael Marquez si trajner të përfaqësueses së Meksikës për ciklin e Kupës së Botës 2030.

Legjenda e Barcelonës, i cili në karrierën e tij luajti si mbrojtës, do të vendoset në krye të kombëtares pasi të përfundojë mandati i Javier Aguirre. Gjatë Kupës së Botës 2026, Marquez ishte pjesë e stafit të tij në rolin e ndihmëstrajnerit.

Bëhet fjalë për një lëvizje të menduar prej kohësh nga federata. Më 1 gusht 2024, Federata Meksikane kishte njoftuar se Aguirre do ta udhëhiqte ekipin në Kupën e Botës 2026 dhe se më pas drejtimin do ta merrte Rafael Márquez.

Dalja e Meksikës nga Botërori 2026 në fazën e 1/8 së finales i hapi rrugë zbatimit të planit të trashëgimisë, i cili ishte hartuar dy vite më parë.

Tani, Marquez do të ngarkohet me misionin për të ndërtuar një skuadër konkurruese dhe për ta përgatitur Meksikën për Kupën e Botës 2030, me objektivin që ta rikthejë kombëtaren mes ekipeve më të forta në arenën ndërkombëtare.

Marquez vlerësohet si një nga emrat më të mëdhenj në historinë e futbollit meksikan. Në periudhën e tij si futbollist, ai pati sukses të madh me Barcelonën, fitoi shumë trofe dhe për shumë vite ishte lider i kombëtares së Meksikës.

The post Rafael Márquez merr drejtimin e Meksikës pas Aguirre, federata zyrtarizon planin për Botërorin 2030 appeared first on Albeu.com.

Pas rrugëtimit të “Dragonjve” në Kupën e Botës, Kerim Alajbegovic është kthyer në Gjermani, pasi arriti të lërë gjurmë në historinë e këtij kompeticioni me fanellën e Bosnjës dhe Hercegovinës.

Në moshën 18-vjeçare, ai mbërriti në Koln, ku e prisnin qindra mbështetës boshnjakë të mbledhur për ta përshëndetur. Pritja u shoqërua me emocione të forta, ndërsa në nder të talentit të ri tifozët interpretuan këngën e njohur “Ljiljane” të Halid Besliqit.

Futbollisti foli edhe për eksperiencën e tij të parë në një Kupë Bote, të cilën e përshkroi si një ngjarje që do ta mbajë mend gjatë në karrierën e tij.

“Hera e parë ishte absolutisht fenomenale. Nuk mund t’u besoja lojtarëve me të cilët po luaja dhe me të cilët ndaja dhomën e zhveshjes. Ishte një ndjenjë e mrekullueshme të luaja për vendin tim”, deklaroi ai.

Alajbegovic u ndal gjithashtu te goli i realizuar kundër Katarit, të cilin e cilësoi si një çast historik si për veten, ashtu edhe për kombëtaren.

“Të shënosh një gol në Kupën e Botës është diçka e veçantë për çdo lojtar. Ajo ishte ndeshja më e rëndësishme për ne në grup dhe është një ndjenjë e jashtëzakonshme kur mund të shënosh për atdheun tënd”, u shpreh Alajbegović.

Edhe pse ende shumë i ri, sulmuesi anësor u shndërrua në një nga figurat kryesore të Bosnjës në Botëror. Ai realizoi në fitoren 3-1 ndaj Katarit dhe u rendit si golashënuesi i tetë më i ri në historinë e Kupës së Botës.

Jo vetëm kaq, por Alajbegovic regjistroi edhe një arritje tjetër të veçantë, duke u bërë lojtari më i ri që ka shënuar nga jashtë zonës së penalltisë në historinë e Kupës së Botës.

Falë talentit dhe paraqitjeve të tij, 18-vjeçari po konsiderohet tashmë si një nga shpresat më të mëdha të futbollit boshnjak për të ardhmen.

The post Kerim Alajbegovic pritet me ovacione në Koln, tifozët boshnjakë i rezervojnë festë pas paraqitjes historike në Kupën e Botës appeared first on Albeu.com.

Didier Deschamps ka zgjedhur të mos përfshihet në debatet që u ndezën pas suksesit të Argjentinës ndaj Egjiptit në raundin e 16-të të Kupës së Botës 2026, duke insistuar se vëmendja duhet të qëndrojë te loja dhe jo te vendimet e arbitrave.

Gjatë konferencës për shtyp në prag të çerekfinales me Marokun, një pjesë e madhe e pyetjeve u përqendrua te gjykimi, pasi sulmuesi i Egjiptit, Ziko, e kishte cilësuar turneun si “të manipuluar” pas largimit të ekipit të tij nga Argjentina.

Megjithatë, trajneri i Francës nuk dha asnjë koment për këto akuza dhe u mjaftua duke thënë se shpreson që arbitrat të kryejnë detyrën e tyre në mënyrën më profesionale të mundshme.

“Shpresoj që gjyqtari të jetë po aq i mirë sa ishin zoti Letexier dhe asistentët e tij në një ndeshje tjetër”, deklaroi ai.

Deschamps rrëzoi edhe idenë se Franca vazhdon të ketë pakënaqësi me arbitrimin që prej finales së Kupës së Botës 2022.

“Gabimet e vetme janë ato të lojtarëve. Në çdo ndeshje ka situata që mund të shkojnë në njërën anë ose në tjetrën. Ankesat gjithmonë varen nga ana në të cilën je”, u shpreh Deschamps.

Ai e uli në minimum edhe faktin që sfida do të gjykohet nga një trupë arbitrash nga Argjentina.

“Kundërshtari im është Maroku, jo gjyqtari. Ai është aty për të zbatuar rregullat e lojës sa më drejt që të jetë e mundur”, theksoi ai.

Sa i përket përballjes së ardhshme, Deschamps paralajmëroi se Maroku do të jetë një provë dukshëm më e fortë se Paraguai, rivali i kaluar i Francës.

“Në çerekfinale niveli i kundërshtarit rritet edhe më shumë. Do të duhet të jemi efektivë si në sulm, ashtu edhe në mbrojtje”, tha trajneri i “Gjelave”.

Tekniku francez bëri të ditur gjithashtu se FIFA nuk e ka pranuar ankesën e Francës për kartonin e verdhë të Michael Olise në fitoren ndaj Paraguait, ndaj anësori i Bayern Munichut do të mbetet me ndëshkimin në fuqi.

“Situata e kartonit të verdhë nuk ka ndryshuar. Këtë mëngjes morëm njoftimin nga FIFA”, bëri të ditur Deschamps.

Në përfundim, ai mori në mbrojtje kapitenin Kylian Mbappé, duke nënvizuar se sulmuesi francez nuk ndikohet nga komentet ndaj tij.

“Kylian është i fortë dhe asgjë që thuhet nuk e prek atë. Ai vazhdon të bëjë punën e tij”, përfundoi trajneri i Francës.

Franca do të ndeshet me Marokun në çerekfinalen e Kupës së Botës 2026, me objektivin për të hyrë mes katër ekipeve më të mira të turneut.

The post Deschamps shmang polemikat për arbitrimin: Për ne ka rëndësi vetëm fusha appeared first on Albeu.com.

Michael Oliver është mes arbitrarëve që rrezikojnë të mos marrin më ndeshje për të drejtuar në Kupën e Botës, nëse njëra nga dy përfaqësueset përkatëse arrin në fazat vendimtare të turneut.

Ai bën pjesë në listën prej 52 gjyqtarësh të përzgjedhur nga FIFA për Botërorin, ndërsa arbitri tjetër anglez i përfshirë në këtë garë është Anthony Taylor.

Oliver është caktuar të ndajë drejtësinë në çerekfinalen mes Spanjës dhe Belgjikës, një takim që mund të rezultojë edhe i fundit për të në këtë edicion të Botërorit.

Sipas rregullores, ai nuk mund të arbitrojë ndeshje ku është e përfshirë kombëtarja e vendit të tij, pasi gjyqtarëve nuk u lejohet të drejtojnë sfida me pjesëmarrjen e përfaqësueses së tyre.

Megjithatë, analisti i BBC Sport, Dale Johnson, thekson se Oliver nuk mund të caktohet as në ndeshje ku luan Argjentina, për shkak të situatës gjeopolitike mes Mbretërisë së Bashkuar dhe Argjentinës në lidhje me ishujt Falkland.

Lufta e Falklands u zhvillua për 10 javë në vitin 1982 mes Mbretërisë së Bashkuar dhe Argjentinës, pasi trupat argjentinase pushtuan dhe morën nën kontroll ishujt Falkland.

Përplasja mori fund pas 74 ditësh luftime, më 14 qershor 1982, kur forcat argjentinase u dorëzuan pasi ushtria britanike rimori kontrollin e Stanley, kryeqytetit të ishujve. Pas kësaj, ishujt iu kthyen administrimit britanik.

Në këtë konflikt u vranë 649 ushtarakë argjentinas dhe 255 ushtarë britanikë. Po ashtu, 777 pjesëtarë të forcave britanike mbetën të plagosur, ndërsa humbën jetën edhe tre civilë britanikë.

Nëse të dyja kombëtaret shkojnë deri në atë pikë, Anglia dhe Argjentina, kampionia në fuqi, do të ndesheshin në gjysmëfinalet e Kupës së Botës.

Në një situatë të tillë, Oliver dhe Taylor do ta humbnin automatikisht mundësinë për të drejtuar finalen e Botërorit në New Jersey.

I njëjti rregull do të zbatohej edhe për arbitrat argjentinas Yael Falcon Perez, Dario Herrera dhe Facundo Tello.

Ka edhe gjyqtarë të tjerë që mund të mbeten pa ndeshje të mëtejshme për të drejtuar, për shkak se kombëtaret e tyre vazhdojnë të jenë ende në garë në turne:

Espen Eskas (Norvegji)

Alejandro Hernandez Hernandez (Spanjë)

Jalal Jayed (Marok)

Francois Letexier (Francë)

Clement Turpin (Francë)

Sandro Scharer (Zvicër)

The post FIFA në ngërç: konflikti i vitit 1982 mund t’u mbyllë rrugën këtyre gjyqtarëve drejt finales së Botërorit appeared first on Albeu.com.

Kupa e Botës 2026 ka sjellë një kthesë të fortë në garën për Topin e Artë, pasi paraqitjet në turneun më prestigjioz të futbollit botëror po ndikojnë tashmë drejtpërdrejt në renditjen e favoritëve.

Sipas përqindjeve të bëra publike, pesë kandidatët kryesorë për trofeun prestigjioz janë tashmë të qartë.

Harry Kane – 22.27%

Kapiteni i Anglisë vijon të mbajë vendin e parë në këtë garë. Performanca e tij shumë e mirë me klubin, e shoqëruar me paraqitje të qëndrueshme në Kupën e Botës me përfaqësuesen angleze, e mban atë në krye të listës.

Kylian Mbappe – 19.30%

Francezi i njohur ka përmirësuar dukshëm pozitat e tij falë nivelit të lartë të treguar në këtë turne. Me shtatë gola të realizuar, Mbappe po e shtyn Francën drejt fazave përmbyllëse të Kupës së Botës dhe është afruar ndjeshëm me Kane në betejën për çmimin individual.

Michael Olise – 12.06%

Lojtari i krahut po kalon një Botëror shumë të mirë me Francën. Pas paraqitjeve pozitive në futbollin e klubeve, Olise ka ruajtur të njëjtin ritëm edhe me kombëtaren, duke u kthyer në një nga figurat më të rëndësishme të fazës sulmuese franceze dhe duke hyrë mes pretendentëve më seriozë.

Ousmane Dembele – 12.06%

Futbollisti i Paris Saint-Germain mbetet ende pjesë e kësaj gare falë aftësive të tij personale dhe rolit që ka pasur në lojën e Francës. Megjithëse krahasuar me periudhën para nisjes së turneut shanset e tij kanë rënë disi, Dembele vazhdon të konsiderohet një emër me peshë në këtë renditje.

Lionel Messi – 10.34%

Ylli argjentinas është rikthyer në mënyrë të bujshme mes pretendentëve kryesorë për Topin e Artë. Me Argjentinën ai ka shënuar tetë gola dhe ka dhënë një asistim në këtë Botëror, çka i ka rritur ndjeshëm mundësitë për të synuar trofeun e nëntë në karrierë.

Përpara startit të Kupës së Botës, gjasat e Messit llogariteshin vetëm në 0.97 për qind, por paraqitjet e tij me Argjentinën kanë ndryshuar ndjeshëm peshën e kandidaturës së tij.

Nëse Argjentina e vijon marshimin drejt trofeut, atëherë Messi mund të ketë një shans real për të fituar për herë të nëntë çmimin individual më të rëndësishëm në futboll.

Mes emrave të tjerë që përmenden në këtë garë janë edhe Erling Haaland me 6.59 për qind, Khvicha Kvaratskhelia me 4.83 për qind, Jude Bellingham me 4.26 për qind, Declan Rice me 3.45 për qind, Cristiano Ronaldo me 2.79 për qind, Vinicius Junior me 2.13 për qind, Julian Alvarez me 1.08 për qind dhe Raphinha me 0.89 për qind. //

The post Messi hyn sërish në garën për Topin e Artë, publikohen pesë emrat më të favorizuar appeared first on Albeu.com.

Edhe pse Franca po paraqitet shkëlqyeshëm në Kupën e Botës, prapaskenat në grumbullimin e “Gjelave” nuk duken aspak të qeta.

Ndërsa skuadra franceze po bëhet gati për sfidën e madhe çerekfinale kundër Marokut, pas suksesit të vështirë 1-0 ndaj Paraguait në Filadelfia, fokusi është zhvendosur nga loja në fushë te situata në stol.

Sipas raportimeve të Get French Football News, mesfushori i PSG-së, Warren Zaïre-Emery, po ndihet “gjithnjë e më i frustruar” për shkak të mungesës së hapësirave për të kontribuar në këtë turne.

20-vjeçari ishte parashikuar të kishte një peshë të rëndësishme te kampionët në fuqi të botës, sidomos pas një sezoni mbresëlënës në nivel klubesh, por deri në këtë pikë ai ka mbetur jashtë planeve.

Po ashtu, thuhet se Zaire-Emery po e përjeton “me vështirësi” këtë realitet dhe ndjen edhe një lloj “hutimi” pse nuk është zgjedhur, pavarësisht formës së tij shumë të mirë me klubin.

Megjithëse Franca ka avancuar me një ecuri perfekte deri në çerekfinale, një prej talenteve më të mëdhenj të saj raportohet se po i afrohet pikës së thyerjes për shkak të rolit që ka në Amerikën e Veriut.

Deri tani, mesfushori nuk ka marrë asnjë minutë në pesë ndeshjet që Franca ka zhvilluar në këtë Botëror.

Paraqitjet e tij të pjekura dhe cilësia në lojë e kishin kthyer në një titullar të padiskutueshëm në “Parc des Princes”, ndaj pranimi i një roli kaq të vogël me kombëtaren po rezulton edhe më i vështirë.

Didier Deschamps ka zgjedhur të mbështetet te dysheja e mesfushës Manu Kone dhe Adrien Rabiot, sidomos pas mungesës së Aurelien Tchouameni.

Në të njëjtën kohë, shokët e tij te PSG-ja, Bradley Barcola, Desire Doue dhe Ousmane Dembele, kanë pasur një rol të rëndësishëm në repartin sulmues të Francës.

The post Ylli francez humbet durimin në stol, rritet pakënaqësia në kampin e “Gjelave” gjatë Botërorit appeared first on Albeu.com.

FIFA ka rrëzuar kërkesën e Federatës Franceze të Futbollit për të shfuqizuar kartonin e verdhë të marrë nga Michael Olise në ndeshjen kundër Paraguait.

Vendimi është konfirmuar edhe nga trajneri i Francës, Didier Deschamps, gjatë konferencës për shtyp para ndeshjes me Marokun.

“Këtë mëngjes morëm vendimin e FIFA-s. Kartoni mbetet”, deklaroi Deschamps.

Olise u ndëshkua në kohën shtesë të fitores 1-0 të Francës ndaj Paraguait, pas një ndërhyrjeje ndaj Matias Galarzas.

Sipas argumentit të Federatës Franceze, lojtari nuk kishte pasur kontakt me kundërshtarin, ndaj u kërkua nga FIFA anulimi i kartonit, por kjo ankesë nuk u miratua.

Mesfushori ofensiv francez do të zbresë në çerekfinalen e Kupës së Botës kundër Marokut duke rrezikuar pezullimin, pasi një tjetër karton i verdhë do ta linte jashtë një gjysmëfinaleje të mundshme.

Kjo situatë shton një problem më shumë për Francën në prag të një prej ndeshjeve më të rëndësishme të turneut, pasi Deschamps duhet të menaxhojë me kujdes mundësinë që Olise të mungojë nëse skuadra arrin kualifikimin në gjysmëfinale.

Ky vendim vjen pak kohë pasi FIFA kishte pranuar një tjetër ankesë dhe kishte anuluar kartonin e kuq të Folarin Balogun, sulmuesit të kombëtares së Shteteve të Bashkuara të Amerikës.

The post FIFA nuk e heq kartonin e verdhë të Michael Olise, Franca mbetet me shqetësim para sfidës me Marokun appeared first on Albeu.com.

Jordan Henderson, mesfushori me përvojë i Anglisë, ka kaluar me sukses një ndërhyrje kirurgjikale pasi pësoi një dëmtim të pazakontë në kyçin e dorës gjatë festimeve për kalimin e kombëtares së tij në çerekfinale të Kupës së Botës.

Lëndimi ndodhi në stadiumin “Azteca”, kur Anglia festoi triumfin 3-2 ndaj Meksikës. Ish-kapiteni i Liverpoolit, që tani është pjesë e Brentfordit, mësohet se u rrëzua aksidentalisht mbi një panel reklamues LED dhe si pasojë dëmtoi rëndë dorën.

Fillimisht, 36-vjeçari mori ndihmën e parë në një spital në Mexico City. Më pas, ai u dërgua me aeroplan në Kansas City, ku është vendosur kampi bazë i përfaqësueses angleze, për t’iu nënshtruar operacionit.

Ky dëmtim i ka mbyllur pjesëmarrjen në fushë në këtë Kupë të Botës, megjithatë Henderson ka zgjedhur të mbetet pranë shokëve të skuadrës deri në fund të turneut.

Anglia do të luajë të shtunën çerekfinalen ndaj Norvegjisë, ndërsa Henderson e konfirmoi në rrjetet sociale se operacioni kishte përfunduar me sukses.

“Operacioni përfundoi! Tani të përgatitemi për gjënë e madhe të shtunën. Faleminderit stafit që u kujdes për mua në Institutin Ortopedik në Kansas City, si dhe veçanërisht tre kirurgëve që kryen operacionin”, ka shkruar Henderson.

The post Jordan Henderson operohet me sukses pas dëmtimit të veçantë në Kupën e Botës appeared first on Albeu.com.

Zlatan Ibrahimovic ka përcjellë një mesazh të qartë për përfaqësuesen e Argjentinës, duke theksuar se Lionel Messi nuk mund të vazhdojë të mbajë i vetëm peshën e ekipit, edhe pse në Kupën e Botës ka dhuruar paraqitje mbinjerëzore.

Në ndeshjen dramatike që Argjentina e fitoi 3-2 ndaj Egjiptit, ylli i Inter Miamit ishte në nivelin e tij më të lartë. Megjithatë, sipas Ibrahimovicit, pjesa tjetër e skuadrës duhet të japë më tepër për t’ia bërë më të lehtë barrën kapitenit.

Messi tregoi sërish pse vlerësohet si më i miri i të gjitha kohërave, duke udhëhequr Argjentinën drejt një përmbysjeje të jashtëzakonshme ndaj Egjiptit në fazën e 1/8 së finales të Botërorit.

Kur argjentinasit po humbnin 2-0 në Atlanta, ishte Messi ai që vuri në lëvizje rikthimin me asistin për golin e Cristian Romero. Më pas, ai realizoi vetë golin e barazimit, ndërsa më vonë kontribuoi edhe në aksionin që i hapi rrugën golit të fitores nga Enzo Fernandez në kohën shtesë.

Kjo paraqitje mahniti edhe Ibrahimovicin, i cili edhe një herë vuri në pah mentalitetin e jashtëzakonshëm të ish-shokut të tij te Barcelona.

Në një prononcim për Fox Sports, suedezi u shpreh se te Messi u vu re një transformim i madh pikërisht në çastin kur Argjentina po rrezikonte eliminimin.

“Mund ta shihni se diçka ndryshoi. Ai ndezi një tjetër marsh (pas rezultatit 2-0). U shndërrua në një bishë dhe askush nuk mund ta ndalte”.

“Mund ta shihni sa shumë do të thotë kjo për të. Mund të ketë fituar gjithçka, sa herë që ka fituar Topin e Artë, por ai ende kërkon më shumë”.

Pavarësisht atmosferës festive pas vërshëllimës së fundit, kur një Messi i emocionuar u përqafua nga bashkëlojtarët, Ibrahimovic nuk i kurseu vërejtjet për pjesën tjetër të skuadrës argjentinase.

“Për të qenë pak kritik, bashkëlojtarët e tij duhet të ngrihen më shumë dhe ta ndihmojnë. Ai është në një nivel tjetër”.

“Nëse Messi vazhdon kështu deri në fund, askush nuk do të befasohet. Por ai ka nevojë për ndihmë”, përfundoi suedezi.//

The post Ibrahimovic i dërgon sinjal Argjentinës: Messi s’mund ta mbajë i vetëm skuadrën appeared first on Albeu.com.