Rıza Çalimbay është trajneri me më shumë paraqitje në stolin e një skuadre në historinë e Superligës turke, me mbi 600 ndeshje të drejtuara në këtë kampionat.

Edhe si futbollist, ai ndërtoi një karrierë të jashtëzakonshme. Çalimbay regjistroi më shumë se 500 paraqitje dhe fitoi tetë trofe, pjesën më të madhe të tyre me fanellën e Besiktasit.

Në një intervistë për Telegrafin, ish-trajneri i Besiktasit foli për forcën dhe cilësinë e Kosovës, rëndësinë e përballjes për të dyja përfaqësueset, si dhe faktorët që mund të përcaktojnë fituesin.

Çalimbay e nisi analizën e tij me një paralajmërim për Turqinë, duke theksuar se Kosova është dukshëm më e organizuar dhe më cilësore se Rumania.

“Kosova është një ekip shumë më i organizuar dhe më cilësor se Rumania. Për këtë arsye, Turqia nuk do ta ketë aspak të lehtë, përkundrazi, do të përballet me një sfidë shumë të vështirë, veçanërisht nëse ndeshja zhvillohet në transfertë. Nëse Kosova nënvlerësohet si një ekip i vogël, kjo mund të sjellë pasoja negative për Turqinë”, deklaroi fillimisht Çalimbay për Telegrafin.

Sipas tij, avantazhi i Kosovës shtohet edhe më shumë nga fakti se kjo ndeshje do të luhet para tifozëve të saj.

“Kosova ka lojtarë shumë të talentuar, disa prej të cilëve luajnë edhe në kampionate evropiane. Kjo e rrit edhe më tej nivelin e skuadrës. Për më tepër, mundësia për t’u kualifikuar në Kupën e Botës është jashtëzakonisht e rëndësishme për Kosovën. Duke luajtur në shtëpi dhe përpara tifozëve të vet, ajo do të japë maksimumin.”

“Pritet që mbështetja e tifozëve të jetë shumë e madhe. E dimë se do të jenë të pranishëm shumë shqiptarë dhe tifozë nga diaspora, duke krijuar një atmosferë të jashtëzakonshme. Kjo ndeshje mund të marrë përmasat e një finaleje të vërtetë dhe në asnjë mënyrë nuk duhet konsideruar e lehtë.”

Trajneri 63-vjeçar vlerëson se përballja do të jetë e ekuilibruar dhe se përqendrimi maksimal do të jetë vendimtar për të dyja skuadrat.

“Ndryshe nga Rumania, këtë herë Turqia do të ketë përballë një kundërshtar më të fortë. Për këtë arsye, duhet të marrë të gjitha masat e nevojshme. Për mendimin tim, është një ndeshje e balancuar, e cila kërkon përqendrim maksimal nga të dyja ekipet. Do të jetë një sfidë shumë e vështirë për të dyja palët.”

Çalimbay veçoi disa prej futbollistëve më të rrezikshëm të Kosovës, mes tyre Vedat Muriqin, Hadergjonajn dhe Fisnik Asllanin.

“Kosova ka lojtarë të mirë, si Vedat Muriqi, Hadergjonaj dhe Fisnik Asllani. Ka të paktën katër ose pesë futbollistë shumë cilësorë që duhet të merren në konsideratë.”

“Kjo do ta vështirësojë ndeshjen për të dyja skuadrat. Të dyja ekipet duhet të jenë të kujdesshme si në mbrojtje, ashtu edhe në sulm.”

“Kosova ka lojtarë shumë të rrezikshëm, sidomos në repartin ofensiv. Për këtë arsye, mbrojtja e Turqisë duhet të jetë jashtëzakonisht e vëmendshme gjatë gjithë ndeshjes”, u shpreh ai.

Në fund, Çalimbay shprehu respektin dhe mirënjohjen e tij për Kosovën, duke theksuar se bashkëpunimi sportiv mes dy vendeve duhet të forcohet më tej.

“Kosova është shumë pranë nesh, një vend që e duam shumë. Në aspektin e futbollit duhet të kemi gjithmonë marrëdhënie të afërta, të bashkëpunojmë më tepër, të marrim lojtarë dhe trajnerë nga njëri-tjetri dhe të bëjmë gjëra të bukura së bashku”, përfundoi ai.

Ndeshja Kosovë-Turqi do të zhvillohet të martën mbrëma, me fillim nga ora 20:45.

Mbulimi special i kësaj ngjarjeje mundësohet nga DFK Group, Daakonn Investments, Voom, Patos Kosova dhe 99esim.

The post Rıza Çalimbay për Telegrafin: Kosova është shumë e fortë, Turqia nuk do ta ketë të lehtë appeared first on Albeu.com.

Kosova ndodhet vetëm një ndeshje larg një arritjeje historike, kualifikimit në Kampionatin Botëror 2026. Për ta realizuar këtë synim, megjithatë, përfaqësuesja kosovare duhet të kalojë pengesën e quajtur Turqi.

Për këtë përballje ka folur në një intervistë ekskluzive për Telegrafin trajneri i njohur turk dhe ish-futbollisti Hamza Hamzaoglu.

Hamzaoglu ka një karrierë të pasur si trajner, ndërsa veçanërisht mbahet mend për sezonin 2014/2015, kur në krye të Galatasarayt fitoi brenda një edicioni kampionatin, Kupën e Turqisë dhe Superkupën.

Aktualisht, ai është pjesë e klubit arab Al Shabab, ku ushtron detyrën e ndihmës-trajnerit.

Telegraph: Si e vlerësoni paraqitjen e Turqisë në këtë cikël kualifikues për Botëror dhe cilët futbollistë kanë barrën kryesore në ekipin kombëtar?

“Turqia ka arritur deri në këtë fazë me sukses. E kaloi pengesën e Rumanisë, edhe pse nuk ishte aspak e lehtë. Tani e pret finalja e plejofit kundër Kosovës, me një vend në Kupën e Botës në lojë, dhe sipas mendimit tim, Turqia është favorite në këtë takim.”

“Nëse nuk ndodh diçka e papritur, besoj se Turqia do të kualifikohet. Sidoqoftë, futbolli na mëson se favoritët nuk fitojnë gjithmonë. Kosova është një skuadër e disiplinuar, e re dhe dinamike, me shumë lojtarë që aktivizohen në klube të mira evropiane. Kjo do t’ia vështirësojë punën Turqisë.”

Telegraph: Cila është pika më e fortë e Turqisë dhe cilët lojtarë mbajnë peshën kryesore të ekipit?

“Forca kryesore e Turqisë është përvoja e futbollistëve, pavarësisht moshës së tyre të re. Një tjetër avantazh është se shumë prej tyre kanë luajtur së bashku për një kohë të gjatë. Në skuadër ka lojtarë me përvojë nga ndeshje të nivelit të lartë, përfshirë Ligën e Kampionëve dhe Ligën e Evropës, si dhe futbollistë me shumë eksperiencë në ligat kryesore evropiane.”

“Sipas filozofisë së Montellës, ekipi ka përqafuar një mënyrë loje pa një sulmues fiks. Kjo i ka mundësuar të krijojë ekuilibër mes një mbrojtjeje të fortë dhe një sulmi efikas. Për Turqinë, çdo ndeshje në të cilën arrin të luajë sipas stilit të saj është e mundur të fitohet.”

“Lojtarët që kanë barrën kryesore janë Ugurcan (Cakir), Abdulkerim (Bardakci), Hakan Calhanoglu, Kenan Yildiz, Arda Guler dhe Baris Alper. Një kontribut të madh në mesfushë jep edhe Ismail Yuksek, i cili ndihmon repartin defensiv me përkushtimin dhe sakrificën e tij.”

Telegrafi: Si e vlerësoni Kosovën si kundërshtar në finalen e plejofit?

“Në vitin 2014, kur isha ndihmës-trajner i përfaqësueses së Turqisë, zhvilluam një ndeshje miqësore në Kosovë. Që prej asaj kohe, Kosova ka shënuar përparim të vazhdueshëm dhe çdo vit është bërë më e fortë, duke zhvilluar ndeshje efektive edhe ndaj kundërshtarëve të fuqishëm. Si trajner me origjinë ballkanike, kjo më gëzon shumë.”

“Kosova ka disa lojtarë të njohur në Turqi. Në mesin e tyre janë Vedat Muriqi, portieri Muric nga Adana Demirspor, Hadergjonaj dhe Aliti nga Alanyaspor, si dhe Milot Rashica nga Besiktas. Gjithashtu, te Hoffenheimi kam vërejtur Asllanin dhe Hajdarin, të cilët më kanë bërë përshtypje.”

“Një ndër pikat më të forta të Kosovës është disiplina, ndërsa trajneri i saj, Franco Foda, di ta nxjerrë maksimumin nga futbollistët. Pikërisht disiplina taktike do të jetë arma kryesore e Kosovës përballë Turqisë.”

“Në një ndeshje të tillë, më shumë gjasa për të triumfuar do të ketë skuadra që tregohet e duruar, ruan disiplinën taktike dhe bën më pak gabime. Uroj sukses për të dyja ekipet.”

Mbulimi special i kësaj ngjarjeje ofrohet nga DFK Group, Daakonn Investments, Voom, Patos Kosova dhe 99esim.

/Telegraph/

The post Hamza Hamzaoglu për Telegrafin: Kosova mund t’i krijojë probleme të mëdha Turqisë appeared first on Albeu.com.