Gjatë takimit me shefen e diplomacisë së Bashkimit Evropian, Kaja Kallas, në selinë e OKB-së në New York, kryeministri i Kosovës, Albin Kurti, ngriti shqetësimet për aktgjykimin ndaj ish-drejtuesve të UÇK-së dhe kërkoi mbështetje evropiane për vendosjen e përgjegjësve të sulmit në Banjskë para drejtësisë.

Kurti deklaroi se me përfaqësuesen e lartë të BE-së bisedoi për vendimin e shkallës së parë të Dhomave të Specializuara, duke e cilësuar procesin si të karakterizuar në tërësi nga mungesa e transparencës.

“Shpreha shqetësimin tim të thellë për dënimet e rënda dhe të padrejta ndaj ish-drejtuesve të UÇK-së, në aktgjykimin e shkallës së parë të Dhomave të Specializuara, pas një procesi pa transparencë në tërësinë e tij”, ka shkruar Kurti.

Sipas kryeministrit, procedura gjyqësore ende nuk ka përfunduar dhe Kosova do të angazhohet që procesi, bashkë me verdiktin, të korrigjohet në fazën e apelit.

Kurti tha se UÇK-ja u krijua si reagim ndaj represionit, vrasjeve, masakrave dhe spastrimit etnik të kryer nga Serbia. Ai e përshkroi luftën e saj si një përpjekje të drejtë dhe të pastër për liri, ndërsa Serbinë e cilësoi si agresore me plan gjenocidal.

Ai rikujtoi se gjatë luftës qindra mijëra qytetarë u dëbuan nga shtëpitë e tyre dhe mijëra të tjerë u vranë. Po ashtu, përmendi rreth 20 mijë gra e burra që konsiderohen viktima të dhunës seksuale të përdorur si armë lufte, duke theksuar se shumë prej krimeve të forcave serbe nuk janë ndëshkuar ende.

Një tjetër çështje e diskutuar ishte sulmi në Banjskë. Kryeministri kërkoi ndihmën e BE-së për ushtrimin e presionit ndaj Serbisë, në mënyrë që përgjegjësit të përballen me drejtësinë. Ai kujtoi se më 24 shtator bëhen 3 vjet nga sulmi, gjatë të cilit u vra rreshteri Afrim Bunjaku.

“Ndërkohë, Millan Radoiçiq dhe pjesëtarët e tjerë të grupit terrorist paramilitar, të cilët po mbrohen nga presidenti i Serbisë, teksa i ofrojnë mbrojtje dhe shërbime, duhet të përballen me drejtësinë në Kosovë. Për këtë kërkova përkrahjen e BE-së që t’i bëjnë trysni Serbisë”, ka deklaruar Kurti.

Gjatë bisedës u trajtua edhe situata e shqiptarëve në Luginën e Preshevës. Kurti theksoi se ata përballen me diskriminim, mungesë të të drejtave të barabarta dhe përfaqësim të ulët në institucionet shtetërore. Fshirjen e adresave të tyre ai e quajti “spastrim etnik administrativ”.

Duke iu referuar rrugës evropiane, Kurti kritikoi orientimin e Serbisë drejt Rusisë dhe Kinës. Ai tha se Beogradi largohet nga vlerat demokratike, ndërsa vazhdon të shfaqë interes për fondet e Bashkimit Evropian.

Për Kosovën, kryeministri nënvizoi se orientimi drejt integrimit evropian dhe euroatlantik mbetet i palëkundur. Në këtë kuadër, ai kërkoi që vendit t’i jepet statusi i kandidatit.

“Jemi tërësisht të linjëzuar me politikën e jashtme dhe të sigurisë të Bashkimit Evropian, kemi shënuar përparim të rëndësishëm në pothuajse të gjitha fushat dhe jemi të gatshëm të punojmë edhe më shumë, andaj përgjigjja e duhur dhe e domosdoshme e Brukselit do të ishte dhënia e statusit të vendit kandidat për anëtarësim”, ka shkruar Kurti.

Ndërkohë, më 16 shtator, Trupi Gjykues i shpalli fajtorë të katër të akuzuarit dhe i dënoi me një total prej 81 vjetësh burgim.

Hashim Thaçi dhe Jakup Krasniqi morën nga 25 vjet burgim, Kadri Veseli u dënua me 18 vjet, ndërsa Rexhep Selimi me 13 vjet. Në këto dënime është përfshirë edhe koha e kaluar në paraburgim.

The post Kurti i kërkon BE-së të ushtrojë trysni ndaj Serbisë për sulmin në Banjskë appeared first on Albeu.com.