Arsenali vijon të punojë për përforcimin e mesfushës dhe, krahas transferimit të pritshëm të Bruno Guimaraes, po shqyrton mundësinë për të afruar edhe një futbollist tjetër.

Kapiteni i Newcastle United është përfolur gjatë gjithë verës për një kalim te kampionët e Anglisë. Mediumi francez L’Equipe raporton se klubet kanë arritur një marrëveshje paraprake me vlerë rreth 90 milionë euro, ndërsa diskutimet vazhdojnë për bonuset dhe komisionet e agjentëve.

Mundësinë që marrëveshja të zyrtarizohet brenda pak ditësh e përforcon edhe fakti se Guimaraes nuk pritet të udhëtojë me Newcastle në kampin stërvitor parasezonal në La Manga.

Mikel Arteta mendon se braziliani, së bashku me Declan Rice, Martin Zubimendi dhe Mikel Merino, mund të krijojë një repart mesfushor të frikshëm.

Megjithatë, planet e klubit londinez nuk përfundojnë me Guimaraesin. Sipas mediumit gjerman Fussballdaten, mesfushori defensiv japonez Kaishu Sano është vendosur në krye të listës së objektivave të Arsenalit, i cili tashmë ka kontaktuar përfaqësuesit e lojtarit për të biseduar rreth një transferimi të mundshëm.

Për 25-vjeçarin e Mainz interesohen gjithashtu Liverpooli, Tottenhami dhe Newcastle. Klubet angleze janë bindur nga kontributi i tij në aspektin defensiv, teknika dhe energjia që i mundëson të mbulojë distanca të mëdha gjatë ndeshjeve.

Mainz besohet se e ka vlerësuar kartonin e Sanos nga 50 deri në 60 milionë euro. Kontrata e futbollistit me klubin gjerman është e vlefshme deri në vitin 2028.

Sano u transferua te Mainz në vitin 2024, pas eksperiencave të mëparshme në Japoni me Machida Zelvia dhe Kashima Antlers. Ai regjistroi gjithashtu tri paraqitje për Japoninë në Kupën e Botës 2026.

Në rast se transferimi përmbyllet, japonezi pritet ta nisë si pjesë e rotacionit. Arsenali do të konkurrojë sezonin e ardhshëm në katër gara: Ligën Premier, Ligën e Kampionëve, FA Cup dhe Carabao Cup.

The post Arsenali synon dy përforcime në mesfushë, pas Guimaraesit shfaqet një kandidat i papritur appeared first on Albeu.com.