Ndërsa Kupa e Botës 2026 vijon ende, deri në këtë pikë 13 përzgjedhës kanë humbur vendin e punës. Shkaqet kanë qenë të ndryshme: disa janë shkarkuar menjëherë pas një ndeshjeje, të tjerë janë larguar pas eliminimit, ndërsa në disa raste pesha nuk ka ardhur vetëm nga rezultatet, por edhe nga klima e krijuar rreth skuadrës.

Ja cilët janë trajnerët që janë ndarë deri tani nga kombëtaret e tyre në Botërorin 2026, që po zhvillohet në Shtetet e Bashkuara të Amerikës, Kanada dhe Meksikë.

Roberto Martinez (Portugali)

Pas disfatës 1-0 kundër Spanjës në fazën e 1/8-tës, Roberto Martinez bëri të ditur largimin nga stoli i Portugalisë. Ai tha se kishte ardhur me objektivin për të fituar Kupën e Botës dhe se, pa e arritur këtë, nuk kishte kuptim të vijonte. Kështu u mbyll periudha e tij trevjeçare e gjysmë, ku veçohet fitimi i Ligës së Kombeve 2025 dhe dy kualifikime në çerekfinale, por pa shkuar në asnjë finale në pesë turne madhorë si trajner.

Sabri Lamouchi, Herve Renard (Tunizi)

Botërori i Tunizisë u shndërrua në një rrëmujë të plotë. Sabri Lamouchi u largua nga detyra pas humbjes 5-1 përballë Suedisë. Në vendin e tij erdhi Herve Renard, por as ai nuk mundi të përmbysë situatën, pasi skuadra u mund edhe nga Japonia dhe Holanda. Me përfundimin e aventurës së Tunizisë, edhe Renard zgjodhi të largohej.

Javier Aguirre (Meksikë)

Mandati i Javier Aguirre përfundoi pas humbjes 3-2 ndaj Anglisë në fazën e 1/8-tës. Largimi i tij ishte parashikuar më herët, teksa Rafael Marquez ishte bërë gati për ta pasuar. Aguirre u nda me kombëtaren me ndjenjë krenarie, pasi e drejtoi Meksikën drejt paraqitjes së saj më të mirë në Kupën e Botës pas shumë vitesh.

Steve Clarke (Skoci)

Menjëherë pasi Skocia u eliminua në fazën e grupeve, Steve Clarke paraqiti dorëheqjen, edhe pse vetëm pak javë më parë kishte zgjatur kontratën. Ai largohet si tekniku më i suksesshëm i epokës moderne të futbollit skocez, duke rikthyer përfaqësuesen në Kampionatin Evropian dhe në Kupën e Botës pas dekadash mungese.

Hong Myung-bo (Koreja e Jugut)

Për Hong Myung-bo, aventura mori fund pas daljes në fazën e grupeve. Përtej rezultateve jo bindëse, ai hasi edhe kritika të forta publike dhe kërcënime, ndërsa emërimi i tij kishte qenë i diskutueshëm që në nisje.

Ronald Koeman (Holandë)

Eliminimi nga Maroku me penallti solli fundin e qëndrimit të Ronald Koeman. Fillimisht ai mbrojti vendimet e veta taktike, por të nesërmen vendosi të japë dorëheqjen. Tekniku holandez pranoi zhgënjimin për dështimin në Botëror dhe theksoi se kishte ardhur momenti për ta mbyllur mandatin.

Carlos Queiroz (Gana)

Carlos Queiroz mori drejtimin e Ganës vetëm disa muaj përpara Kupës së Botës dhe arriti ta çojë ekipin në fazën eliminatore për herë të parë që nga viti 2010. Sidoqoftë, pas humbjes me Kolumbinë në 1/16-tën e finales, portugezi njoftoi se po largohej, duke kërkuar më tepër investime për zhvillimin e futbollit në vend.

Sebastian Beccacece (Ekuador)

Pas humbjes ndaj Meksikës në fazën e 1/16-tës, Sebastian Beccacece u largua me mbylljen e kontratës së tij. Argjentinasi e la skuadrën pasi e kishte kualifikuar në Botëror dhe e kishte çuar në raundin eliminator për herë të parë në 20 vjet.

Miroslav Koubek (Çeki)

Pas përfundimit të Çekisë në vendin e fundit të grupit, Miroslav Koubek u nda nga kombëtarja. Sipas vetë trajnerit, vendimi u ndikua edhe nga klima e krijuar nga mediat, pavarësisht faktit se ai e kishte rikthyer ekipin në Kupën e Botës pas dy dekadash.

Marcelo Bielsa (Uruguai)

Dihej paraprakisht se Marcelo Bielsa do të largohej pas Botërorit, por eliminimi i shpejtë dhe konfliktet me lojtarët e bënë fundin e tij edhe më të hidhur. Argjentinasi e pranoi se nuk arriti të sillte rezultatet që priteshin prej tij.

Jamal Sellami (Jordani)

Jamal Sellami e çoi Jordaninë në Kupën e parë të Botës në historinë e saj dhe mori gjithashtu shtetësinë jordaneze. Megjithatë, pas tre humbjeve në fazën e grupeve, ai vendosi të largohej, duke mbyllur një periudhë historike për futbollin e vendit.

Julian Nagelsmann (Gjermani)

Pas eliminimit të Gjermanisë nga Paraguai me penallti, Julian Nagelsmann njoftoi dorëheqjen, ndonëse mediat gjermane raportuan se në të vërtetë bëhej fjalë për një shkarkim të kamufluar. Pas afro tre vitesh në krye të përfaqësueses, ai largohet, ndërsa si pasues pritet Jurgen Klopp.

Trajnerët që mund të largohen së shpejti

Kjo listë mund të zgjatet në një kohë shumë të shkurtër. Hugo Broos ka sinjalizuar dorëheqjen pas eliminimit të Afrikës së Jugut, Zlatko Daliç duket pranë fundit të ciklit të tij me Kroacinë, ndërsa Vladimir Petkoviç ndodhet nën presion të fortë në Algjeri dhe largimi i tij shihet vetëm si çështje kohe.

The post Botërori 2026 ka sjellë deri tani 13 largime trajnerësh, Roberto Martinez mbyll listën e fundit appeared first on Albeu.com.

Pas dështimit të përfaqësueses gjermane në Kupën e Botës 2026, Julian Nagelsmann është larguar nga posti i trajnerit të kombëtares së Gjermanisë.

Vendimi është marrë nga Federata Gjermane e Futbollit, sipas raportimit të gazetës Bild, ndërsa konfirmimi erdhi edhe nga Fabrizio Romano.

Nagelsmann mori drejtimin e Gjermanisë në verën e vitit 2023, me synimin për t’i dhënë fund serisë së rezultateve zhgënjyese të ekipit, ose të paktën dështimeve në turnetë madhorë. Ai arriti ta ndryshonte këtë vetëm pjesërisht në Kampionatin Evropian dy vjet më parë, ku Gjermania u ndal në çerekfinale nga Spanja, që më pas u shpall kampione e Evropës.

Kjo Kupë Bote shihej si momenti kur “Elf” duhej të rikthehej në nivelin e tij më të lartë, sidomos pasi dy turnetë e fundit i kishte mbyllur me eliminim që në fazën e grupeve. Për një skuadër katër herë kampione bote, ky bilanc ishte zhgënjyes, por nën drejtimin e Nagelsmannit në këtë Botëror, përmirësimi ishte vetëm i vogël.

Në fazën e grupeve, Gjermania fitoi ndaj Kuraçaos me rezultatin 7-1 dhe ndaj Bregut të Fildishtë me 2-1, përpara se të mposhtej nga Ekuadori 1-2. Më pas, në ndeshjen e parë të fazës eliminatore kundër Paraguait, pas barazimit 1-1, gjermanët u eliminuan me penallti 4-5.

Eliminimi solli reagime të forta nga tifozët dhe opinioni publik, ndërsa nuk munguan as thirrjet që Nagelsmann të largohej vetë. Ai nuk pranoi të jepte dorëheqjen, por tani është shkarkuar nga detyra.

Në total, Nagelsmann e drejtoi Gjermaninë në 37 ndeshje, duke regjistruar 23 fitore, 6 barazime dhe 8 humbje, me golavarazh 90:43.

The post Gjermania i jep fund bashkëpunimit me Julian Nagelsmannin, Jurgen Klopp në krye të listës për pasuesin appeared first on Albeu.com.

Humbja ndaj Paraguait në penallti me rezultatin 5-4 dhe dalja e parakohshme nga Kupa e Botës kanë lënë një shije të rëndë në kampin gjerman, por njëherazi kanë shtyrë diskutimet për një rilindje para Kampionatit Evropian 2028.

Në vend po fitojnë terren idetë për një ndryshim rrënjësor, që do të përfshinte një trajner të ri dhe një brez të freskët lojtarësh, me synimin për ta kthyer “Mannschaft”-in mes ekipeve më të forta në Evropë dhe në botë.

Një nga temat kryesore është edhe e ardhmja e pankinës. Në Gjermani po qarkullon gjithnjë e më shumë bindja se largimi i Julian Nagelsmann është i pashmangshëm, ndërsa si pasuesi më i mundshëm përmendet emri i Jürgen Klopp.

Nëse DFB vendos të hyjë në një revolucion të plotë, atëherë figura si Antonio Rudiger, Leon Goretzka, Pascal Gros dhe Leroy Sane mund të mbeten jashtë projektit të ardhshëm.

Pas largimit përfundimtar të legjendës Manuel Neuer dhe me Oliver Baumann që po i afrohet fundit të rrugëtimit të tij ndërkombëtar, Gjermania po sheh drejt një gjenerate të re portierësh.

Jonas Urbig, Noah Atubolu dhe Mio Backhaus konsiderohen si e ardhmja e portës gjermane, ndërsa Urbig shihet si kandidati kryesor për vendin e portierit numër një, nëse arrin të sigurojë rolin e titullarit te Bayern Munich.

Edhe prapavija pritet të pësojë lëvizje. Krahët e mbrojtjes ishin ndër dobësitë më të dukshme të Gjermanisë në Botëror, ndaj Josha Vagnoman dhe Philipp Treu po përmenden si alternativa të reja.

Në krahun e majtë, Nathaniel Brown ka fituar mbështetjen e tifozëve, ndërsa Luca Netz mund të marrë një mundësi nëse vazhdon paraqitjet e mira me klubin.

Në zemër të mbrojtjes, Jonathan Tah dhe Nico Schlotterbeck pritet të vazhdojnë të jenë dyshja mbi të cilën do të mbështetet skuadra.

Edhe mesfusha shihet si një repart kyç për të ardhmen. Joshua Kimmich pritet të spostohet sërish në këtë zonë, ku mund të krijojë një dyshe me Aleksandar Pavlovic.

Për këtë repart, Gjermania ka edhe opsione të tjera si Felix Nmecha, Assan Ouedraogo dhe Tom Bischof, të cilët vlerësohen si pjesë e projektit afatgjatë të kombëtares.

Pavarësisht një Botërori jo shumë bindës, te Jamal Musiala dhe Florian Wirtz vazhdon të mbështetet pesha kryesore e skuadrës, pasi cilësia e tyre nuk vihet në diskutim.

Në repartin ofensiv nuk mungojnë alternativat, ku përmenden Lennart Karl, Said El Mala, Kevin Schade dhe Jamie Leweling.

Ndërsa për rolin e sulmuesit qendror po afrohen Nicolo Tresoldi dhe Dzenan Pejcinovic, me Kai Havertz dhe Nick Woltemade që vijojnë të jenë gjithashtu në planet e ekipit.

Pas një tjetër goditjeje të rëndë në Kupën e Botës, Gjermania duket e gatshme të hapë një kapitull të ri, me shpresën që Euro 2028 të shënojë rikthimin e saj mes elitës së futbollit evropian.

The post Pas zhgënjimit në Botëror, Gjermania mendon epokën e re me Klopp dhe objektivin Euro 2028 appeared first on Albeu.com.

Pas eliminimit zhgënjyes nga Kupa e Botës, pozita e Julian Nagelsmann si trajner i Kombëtares së Gjermanisë është futur seriozisht në diskutim.

Sipas Bild, krerët e Federatës Gjermane të Futbollit (DFB) i kanë paraqitur trajnerit 38-vjeçar mundësinë që të largohet me dorëheqje, ndonëse kontrata e tij përfundon pas dy vitesh.

Të enjten, Nagelsmanni zhvilloi një takim që zgjati tre orë me drejtuesit më të lartë të DFB-së. Në këtë mbledhje morën pjesë presidenti Bernd Neuendorf, Hans-Joachim Watzke, Rudi Völler dhe Andreas Rettig, ndërsa në qendër të bisedimeve ishte e ardhmja e përzgjedhësit pas disfatës ndaj Paraguait në raundin e 16-të të Kupës së Botës.

Federata i ka lënë kohë trajnerit që të vendosë vetë nëse do të heqë dorë nga detyra. Në rast se Nagelsmanni nuk pranon të japë dorëheqjen, atëherë DFB mund të zbatojë klauzolën që parashikon ndërprerjen e kontratës.

Nëse ndodh kjo, federata gjermane do të duhet t’i paguajë Nagelsmannit afërsisht 7 milionë euro si kompensim për mbylljen e parakohshme të marrëveshjes.

Vendimi përfundimtar pritet të merret jo më vonë se në fillim të javës së ardhshme. Ndërkohë, Jurgen Klopp vazhdon të lakohet si kandidati kryesor për të marrë vendin e Nagelsmannit në stolin e Gjermanisë.

The post DFB i hap rrugë largimit të Nagelsmannit, shkarkimi mund t’i kushtojë miliona federatës appeared first on Albeu.com.

Gjermania i dha fund në mënyrë të papritur rrugëtimit të saj në Kupën e Botës, pasi u mund nga Paraguai me penallti në raundin e 1/8 së finales.

Koha e rregullt dhe shtesat u mbyllën me rezultatin 1:1, ndërsa nga pika e bardhë paraguajanët dolën fitues me shifrat 4:3. Njeriu më i pafat i mbrëmjes për “Pancerët” ishte Jonathan Tah, që gaboi penalltinë vendimtare në serinë e gjashtë.

Më herët kishin dështuar edhe Kai Havertz dhe Nick Woltemade, megjithatë humbjet e penalltive nga Antonio Sanabria dhe Fabian Balbuena i mbajtën përkohësisht gjermanët në garë.

Në zhvillimin e ndeshjes, Paraguai kaloi i pari në avantazh me Julio Enciso në minutën e 42-të, ndërsa Gjermania reagoi në minutën e 54-të, kur Havertz realizoi golin e tij të tretë në këtë turne për të rikthyer baraspeshën.

Pavarësisht përpjekjeve, skuadra gjermane nuk arriti të shënonte golin e fitores as gjatë kohës së rregullt dhe as në vazhdime.

Rasti më i afërt erdhi në minutën e 102-të, kur Jonathan Tah e dërgoi topin në rrjetë, por VAR-i e anuloi golin për një faull të mëparshëm.

Pas përfundimit të takimit, Nagelsmann shpërtheu ndaj këtij vendimi. “Një skandal i plotë”, u shpreh ai, ndërsa eksperti i arbitrimit i ZDF, Thorsten Kinhöfer, e përshkroi vendimin si “absolutisht të pakuptueshëm”.

Pas këtij eliminimi, Julian Nagelsmann u pyet për vazhdimësinë e tij në krye të kombëtares gjermane.

“Jo, nuk është në duart e mia. Jam gati të vazhdoj nëse ata e duan këtë. Nëse jo, atëherë duhet të ma thonë”, deklaroi ai për MagentaTV.

Më vonë, në një prononcim për ZDF, trajneri pranoi se zhgënjimi ishte i madh, por nënvizoi se mbetet i gatshëm të vazhdojë punën.

Emocionet nuk i fshehu as Kai Havertz pas daljes nga turneu.

“Nuk kam shumë për të thënë, jam pa fjalë. Kjo është Kupa ime e dytë e Botës dhe i kam zhgënjyer njerëzit në të dyja rastet. Turneu i fundit nuk solli asgjë. E vetmja gjë që mund të them është: Më vjen keq. Të gjithë jemi të zhgënjyer. Është një ndjenjë e tmerrshme t’i zhgënjesh të gjithë përsëri”, tha sulmuesi gjerman.

Dalja kundër Paraguait shënon një tjetër goditje të rëndë për Gjermaninë, që edhe kësaj here i jep lamtumirën Kupës së Botës shumë më herët nga sa ishte parashikuar.

The post Nagelsmann pas daljes tronditëse të Gjermanisë nga Kupa e Botës: Jam i gatshëm të vazhdoj appeared first on Albeu.com.

Pamjet televizive pas ndeshjes e treguan trajnerin e Gjermanisë duke iu afruar zyrtarëve të takimit, teksa qartësisht nuk ishte i pajtuar me atë që kishte parë. Biseda e tij me ekipin e gjyqtarëve la të kuptohej se pakënaqësia kishte arritur kulmin.

Kjo skenë pasqyroi në mënyrë të plotë një sfidë ku thuajse çdo vendim i rëndësishëm shkaktoi debate të forta.

Ekuadori kishte reaguar më herët edhe ndaj golit të parë të Gjermanisë për 1-0, duke pretenduar se Aleksandar Pavlovic e kishte ndalur topin me faull para finalizimit nga Leroy Sane.

Më vonë, Gjermania u mendua se kishte fituar një penallti, por vendimi u anulua pas rishikimit nga VAR-i, pasi gjatë aksionit u evidentua një faull nga Sane.

Edhe Joshua Kimmich u pa tejet i zemëruar gjatë lojës për një vendim pranë vijës anësore. E gjithë kjo vetëm sa e shtoi kaosin në një ndeshje që në teori duhej t’i jepte Gjermanisë qetësi taktike, por që përfundoi gjithnjë e më e çrregullt.

Fakti që Nagelsmann u përball menjëherë me gjyqtarët pas përfundimit të sfidës tregon sa shumë e tronditën zhvillimet e mbrëmjes.

Edhe pse kamerat e para e paraqitën atë çast si një bisedë të zakonshme në fushë, një gjë mbetet e qartë: paraqitja e arbitrimit ndaj Ekuadorit do të vazhdojë të diskutohet gjatë.

The post Nagelsmann shpërthen pas duelit me Ekuadorin, i del përballë gjyqtarëve sapo mbyllet sfida appeared first on Albeu.com.

Edhe pse Gjermania e kishte siguruar paraprakisht vendin e parë në Grupin E, ai theksoi se skuadra nuk ra në vetëkënaqësi përpara kësaj sfide.

“Ju lutem ndaloni së bëri këtë budallallëk, sinqerisht. A nuk donin lojtarët të jepnin gjithçka? Sigurisht që donin,” deklaroi ai pas përfundimit të ndeshjes.

Tekniku gjerman pranoi se pas golit të shpejtë të Leroy Sane, ekipi humbi kontrollin dhe nuk ishte në gjendje të gjente sërish ritmin e duhur në lojë.

“Pas golit filluam të bënim gabime pozicionale dhe u bë e vështirë. Nuk kishim strukturë të vërtetë me topin dhe asnjë mënyrë për të lehtësuar presionin,” shpjegoi Nagelsmann.

Ai mbrojti gjithashtu rotacionet dhe zgjedhjet taktike, duke nënvizuar se ndryshimet në formacion kishin qenë të planifikuara.

Tashmë, Gjermania e ka përqendrimin te faza e 1/8-ve, ku katër herë kampionët e botës synojnë të rikthehen fuqishëm në garë.

The post Nagelsmann kundër kritikave: Është budallallëk të dyshohet motivimi ynë appeared first on Albeu.com.

Nagelsmann vendosi të grumbullonte sërish Groß dhe solli disa fytyra të reja dhe të kthyera. Mes tyre, bie në sy thirrja e parë e Yann Aurel Bisseck. Mbrojtës i Interit, i cili ka luajtuar tetë ndeshje për Gjermaninë U-21, mund të bëjë debutimin e tij me ekipin kombëtar të të rriturve.

Një tjetër rikthim i rëndësishëm është ai i Leon Goretzka, mesfushorit të Bayern Mynihut, i cili ka munguar në kombëtare që nga 21 nëntori 2023, kur Gjermania humbi 2-0 ndaj Austrisë në Vjenë. Goretzka, i lënë jashtë skuadrës për Kampionatin Evropian në vendlindje verën e kaluar, tani do të ketë mundësinë të tregojë vlerën e tij.

Përballja e parë mes Italisë dhe Gjermanisë do të luhet në “San Siro” në 20 mars, ndërsa ndeshja e kthimit do të luhet në Dortmund në 23 mars.

The post Nations League: Nagelsmann publikon listën e Gjermanisë për sfidën kundër Italisë appeared first on Albeu.com.

“Ishte një lojë e egër! 20 minutat e para ishin më të mirat e turneut, pastaj stuhia, më pas menduam se ishim prapa dhe pastaj kaluam në avantazh. Kai bëri shumë mirë nga pika e bardhë. Stadiumi na mbështeti shumë”.

“Kur ndryshuam në mbrojtje me tre, ishte shumë më stabile. Kishte raste në pjesën e parë ku ne ishim të paqëndrueshëm dhe Eriksen gjeti hapësira. Ne ishim shumë më mirë pas pjesës së parë dhe është gjithmonë mirë të mbash portën e pastër”.

“Nuk ishte një ndeshje e lehtë. Danimarka bëri shumë mirë dhe ne ishim në një fazë të mirë të ndeshjes(në fillim). Ne u përpoqëm shumë. Megjithatë, përmes vështirësive, si kundër Zvicrës, ia dolëm, me ndihmën e turmës”.

“Ka gjithmonë hapësirë ​​për t’u rritur. Isha shumë i kënaqur me 20 minutat e para, por ne duhet të sigurohemi që të qëndrojmë të durueshëm dhe të mbajmë topin. Nëse mund të vazhdojmë të bëjmë atë që bëmë në fillim, atëherë do të jetë e vështirë të na mposhtin”.

The post Nagelsmann: Nuk ishte e lehtë, fituam një ndeshje të egër appeared first on Albeu.com.

“Ky është një vendim nga zemra. Është një nderi madh të jem trajner i kombëtares”, ka thënë Nagelsmann në një njoftim.

Ky njoftim vjen vetëm disa javë para se Gjermania të jetë pritëse e Kampionatit Europian 2024, që do të zhvillohet në muajin qershor dhe korrik.

“Së bashku, ne duam që të kemi një Kampionat Europian të suksesshëm në shtëpi”, është shprehur Nagelsmann.

“Vendimi i trajnerit për të rinovuar kontratën deri në Botërorin e vitit 2026 ka çuar një ‘sinjal të fortë’, ka thënë presidenti i Federatës, Bernd Neuendorf.

Ky njoftim i jep fund një herë e përgjithmonë spekulimeve për një rikthim të mundshëm të teknikut gjerman tek Bayern Munich.

The post Nuk ka rikthim te Bayern Munich, Nagelsmann rinovon kontratën me kombëtaren e Gjermanisë appeared first on Albeu.com.