Atletico Madridi ka reaguar me tone të forta ndaj zhvillimeve që lidhen me Julián Álvarez dhe interesimin e Barcelonës për sulmuesin argjentinas.

MARCA raporton se drejtuesit e klubit nga Madridi janë të zemëruar me mënyrën se si është menaxhuar kjo çështje. Sipas tyre, situata i ka shkaktuar Atletico-s dëm financiar dhe ka cenuar njëkohësisht imazhin e klubit.

Burime nga brenda Atletico-s janë shprehur: “Lojtari po portretizohet si viktimë, por viktimat e vetme në rastin Julián jemi ne”.

Pavarësisht këmbënguljes së vazhdueshme të klubit katalanas, pozicioni i madrilenëve mbetet kategorik: Álvarez nuk do të transferohet te Barcelona.

Drejtuesit e Atletico Madridit sqarojnë se refuzimi nuk lidhet me aspektin financiar, por me një çështje parimi.

“Ka 0% shanse që ta shesim te Barça. Kjo situatë nuk ka të bëjë me paratë, por me dinjitetin”, raportohet të kenë deklaruar zyrtarët e klubit.

Në vlerësimin e tyre, gjatë muajve të fundit janë përhapur “gënjeshtra dhe gjysmë të vërteta”, ndërsa Atletico është pala që po pëson pasojat më të mëdha.

Klubi madrilen synon gjithashtu të plotësojë ankesën e paraqitur më herët. Në versionin e përditësuar pritet të përfshihen edhe veprimet që Atletico pretendon se janë kryer nga Barcelona dhe nga përfaqësuesi i futbollistit, Fernando Hidalgo.

Atletico thotë se i propozoi Álvarezit një marrëveshje të re në mars, përmes së cilës ai do të bëhej futbollisti më i paguar në skuadër. Paga e tij do të kalonte nga 7 në 10 milionë euro, por sulmuesi e refuzoi ofertën.

Sipas pretendimit të klubit, ishte përcaktuar edhe data 20 qershor si afati i fundit për paraqitjen e një oferte prej 150 milionë eurosh, pa llogaritur komisionet. Megjithatë, një propozim i tillë nuk mbërriti asnjëherë në zyrat e Atletico Madridit.

Megjithëse marrëdhëniet janë tensionuar, Atletico thekson se Álvarez do të vazhdojë ta ketë mbështetjen e klubit për gjendjen e tij shëndetësore.

Argjentinasi aktualisht ndodhet jashtë skuadrës pasi nuk ndihet mirë. Klubi i ka vënë në dispozicion stafin mjekësor dhe synon që ai të rikthehet në ekip vetëm pasi të jetë plotësisht i gatshëm.

Nga ana tjetër, Atletico nënvizon se problemet e shëndetit mendor kërkojnë trajtim serioz dhe se përdorimi i çështjeve të tilla brenda një përplasjeje për transferim është i papranueshëm.

Përfundimisht, vendimi i Atletico Madridit nuk ka ndryshuar: Julián Álvarez nuk do t’i shitet Barcelonës.

The post Atletico Madridi mbyll derën për transferimin e Alvarez te Barcelona: “Mundësitë janë 0% appeared first on Albeu.com.

Arsenali ka nisur kontaktet për transferimin e Julian Álvarez, duke komunikuar javën e kaluar si me drejtuesit e Atlético Madridit, ashtu edhe me përfaqësuesit e sulmuesit argjentinas.

Sipas The Athletic, klubi madrilen mund ta shqyrtojë largimin e 26-vjeçarit para përfundimit të afatit kalimtar, por vetëm nëse në tavolinë mbërrin një ofertë rreth 150 milionë euro.

Një burim pranë drejtimit të Atléticos ka bërë të ditur se kjo shumë shihet si kushti kryesor, praktikisht i vetmi që mund ta bindë klubin të heqë dorë nga ylli i tij argjentinas.

Deri tani, Arsenali nuk ka dorëzuar një propozim zyrtar prej 150 milionë eurosh. Në Madrid, ndërkohë, ka dyshime se skuadra londineze do të pranonte të investonte një shumë kaq të lartë për Álvarezin.

Interesimi i “Topçinjve” lidhet me mundësinë që sulmuesi të transferohet në Ligën Premier, megjithëse pengesa më e madhe mbetet vetë qëndrimi i lojtarit.

Álvarez raportohet se dëshiron të vazhdojë karrierën në Spanjë, por pozita e tij te Atlético Madrid është vështirësuar pas reagimit të tifozëve në ndeshjen kundër Villarrealit, ku ai u prit me fishkëllima nga tribunat.

Incidenti mund të ndikojë në vendimin e sulmuesit për të ardhmen. Nëse Arsenali synon ta mbyllë transferimin gjatë kësaj vere, duhet të marrë në konsideratë kërkesën prej 150 milionë eurosh, ndërsa mbetet e paqartë nëse klubi anglez do të jetë gati të shkojë deri në këtë shifër.

The post Arsenali interesohet për Julian Álvarezin, Atlético Madrid vendos kushtin prej 150 milionë eurosh appeared first on Albeu.com.