Sipas Tabakut, ekonomia shqiptare është kthyer në një “gjueti shtrigash” ndaj atyre që punojnë, ndërsa të dhënat e fundit buxhetore tregojnë një zhvendosje të rrezikshme të barrës fiskale.

Ajo thekson se të ardhurat nga tatimi mbi punën përbëjnë tashmë rreth 20% të totalit të të ardhurave në buxhet, duke u kthyer në burimin kryesor të financimit publik.

Në të njëjtën kohë, deputetja vëren se të ardhurat nga konsumi janë në rënie, një sinjal që sipas saj tregon qartë se qytetarët po shpenzojnë më pak, për shkak të rritjes së çmimeve dhe uljes së fuqisë blerëse.

Tabaku kritikon modelin ekonomik aktual si joproduktiv dhe të orientuar drejt investimeve që, sipas saj, janë të keqmenaxhuara dhe të korruptuara, pa krijuar vlerë të shtuar për ekonominë.

“Kemi një model që nuk prodhon, që nuk nxit sektorët me produktivitet të lartë dhe që ka shteruar burimet e tij”, thekson ajo.

Më tej, ligjvënësja demorkate nënvizon se ekonomia është kthyer në një sistem që favorizon një pakicë të privilegjuar, ndërsa shumica e qytetarëve përballen me taksa më të larta mbi punën dhe me mungesë mundësish.

Sipas saj, kjo situatë po dëmton drejtpërdrejt klasën e mesme dhe po nxit largimin e qytetarëve nga vendi.

Në përfundim, Tabaku bën thirrje për ndryshim të modelit ekonomik, duke e cilësuar situatën si një emergjencë jo vetëm ekonomike, por edhe demografike për Shqipërinë.

The post Jorida Tabaku: Investime të korruptuara dhe të keqmenaxhuara, modeli aktual po godet klasën e mesme appeared first on Albeu.com.

Sipas Tabakut, Shqipëria ndodhet sot në një udhëkryq të dytë historik. Në fillim të viteve ’90 vendi ishte në një udhëkryq për demokracinë dhe integrimin europian, ndërsa sot përballet me një udhëkryq ekonomik që po i detyron qytetarët të largohen sërish masivisht nga vendi.

Duke iu referuar të dhënave të Eurostat, Tabaku theksoi se vetëm gjatë vitit 2024 rreth 44 mijë shqiptarë janë larguar drejt vendeve të Bashkimit Europian, ndërsa në periudhën e pandemisë 2021–2022 vendi ka humbur rreth 180 mijë qytetarë për shkak të emigrimit.

Deputetja e opozitës nënvizoi se fenomeni është veçanërisht alarmant, për shkak se rreth 60% e atyre që largohen janë të rinj, të cilët sipas saj nuk shohin mundësi reale për të ndërtuar jetën në Shqipëri.

“Janë të rinjtë që përballen me koston në rritje të jetesës, me çmime që rriten çdo ditë dhe me të ardhura gjithnjë e më të ulëta. Janë të rinjtë mbi të cilët bien taksat më të larta dhe që përballen me mungesë mundësish ekonomike”, u shpreh Tabaku.

Sipas saj, problemi nuk lidhet vetëm me tregues ekonomikë, por me mënyrën se si funksionon sistemi në vend.

Tabaku argumentoi se Shqipëria ka sot një sistem që nuk vlerëson meritokracinë dhe garën e ndershme, ndërsa ekonomia është përqendruar në pak duar, duke kufizuar mundësitë për bizneset dhe investimet.

“Ka një ekonomi të kapur në pak duar dhe një mungesë gare që reflektohet në çdo sferë, nga ekonomia te administrata publike. Kjo është arsyeja kryesore pse të rinjtë largohen dhe pse bizneset mbyllen”, theksoi ajo.

Gjithashtu, Tabaku shtoi se rënia e investimeve dhe ftohja e ekonomisë nuk janë zhvillime të papritura, por rezultat i një ndryshimi strukturor që ka ndodhur ndër vite në modelin ekonomik të vendit.

Në fund të reagimit të saj, deputetja e PD theksoi se zgjidhja kërkon një ndryshim të thellë të sistemit ekonomik dhe të mënyrës së funksionimit të shtetit.

“Këtë duhet të ndryshojmë: një sistem ekonomik që sot është peng i pak duarve dhe që po i detyron shqiptarët, veçanërisht të rinjtë, të largohen nga vendi”, u shpreh Tabaku.

The post Emigrimi masiv i shqiptarëve/ Jorida Tabaku: Vendi në udhëkryq të ri, sistemi i kapur po detyron të rinjtë të largohen nga atdheu appeared first on Albeu.com.

Sipas Tabakut, “barra më e madhe për biznesin e ndershëm është vetë shteti”, duke theksuar se problemi nuk lidhet vetëm me rritjen e taksave, por me një sjellje selektive dhe diskriminuese ndaj sipërmarrjes së ndershme.

Gjithashtu, ajo argumenton se ndryshimet e shpeshta të ligjeve, miratimi i akteve të veçanta për interesa të caktuara dhe favorizimi i sektorëve apo kompanive të përzgjedhura, kanë prishur rregullat e tregut dhe kanë dëmtuar konkurrencën e lirë.

“Sa më korrekt të jesh me shtetin, aq më shumë goditesh prej tij. Kjo është taksa e të ndershmëve”, shprehet Tabaku, duke akuzuar administratën tatimore, doganat dhe inspektoratet për presion të shtuar ndaj bizneseve transparente, ndërkohë që sipas saj, ekonomia është përqendruar në pak duar përmes tenderave, koncesioneve dhe favoreve të njëanshme. Në fokus të reagimit të saj është edhe raporti i investitorëve të huaj në Shqipëri, i cili – sipas Tabakut – ka ulur vlerësimin për klimën e biznesit nga 100 në 45 pikë, duke evidentuar problematikat që lidhen me pasigurinë ligjore dhe selektivitetin në ekonomi.

Deputetja demokrate paralajmëron se çdo investitor i huaj që vendos të mos vijë në Shqipëri apo të largohet prej saj, përkthehet në më pak vende pune, më shumë korrupsion dhe produkte me cilësi më të dobët për qytetarët. “Një investitor që largohet, shkon në rajon. Shqipëria humbet punësim, humbet konkurrencë, humbet zhvillim”, thekson ajo.

Tabaku bën thirrje për një ndryshim rrënjësor të qasjes ndaj ekonomisë, duke theksuar nevojën për ndërtimin e “një ekonomie për shumicën e shqiptarëve dhe jo për pak interesa”.

Sipas saj, rikthimi i besimit të investitorëve të huaj dhe vendosja e rregullave të barabarta për të gjithë janë parakusht për zhvillim të qëndrueshëm dhe për një ekonomi tregu funksionale.

Në përfundim, ajo e cilëson situatën aktuale si një ekonomi të kapur, që shërben vetëm për pakicën, ndërsa kërkon angazhim të përditshëm për të rikthyer konkurrencën, transparencën dhe drejtësinë në klimën e biznesit në Shqipëri.

The post Jorida Tabaku: Klima e investimeve në rënie, Shqipëria po humbet besimin e investitorëve të huaj appeared first on Albeu.com.

“Së fundmi, me një shpejtësi të jashtëzakonshme – me shpejtësinë e atyre që duan t’i shpëtojnë ligjit, të mbrojnë veten nga hetimi – në Parlamentin e Shqipërisë është duke u diskutuar ligji për Qeverisjen Elektronike”, – shprehet Tabaku në video.

Sipas saj, projektligji krijon një strukturë të re biznesi që do të operojë dhe mirëmbajë të gjithë sistemet dhe të dhënat e Republikës së Shqipërisë, duke përfshirë databaza shtetërore, të dhëna personale, dosje hetimore dhe sisteme të ndjeshme si TIMS.

“Ligji i qeverisjes elektronike krijon një biznes i cili do të ketë në dorë të operojë, të mirëmbajë të gjithë sistemet, të gjithë të dhënat e Republikës së Shqipërisë. Çfarë do të thotë kjo? Nëse deri dje një individ po e kryente këtë në mënyrë jo ligjore, tashmë është ligjëruar ta bëjë këtë”, – thekson ajo.

Tabaku e lidh këtë zhvillim me hetimet e mëparshme për menaxhimin e tenderave në fushën e teknologjisë, duke argumentuar se në vend që të ketë auditim dhe transparencë, po krijohet një mekanizëm i ri që formalizon atë që më parë ishte nën akuzë.

“Në qoftë se deri dje një grup i strukturuar kriminal menaxhonte tenderat, i ndante tenderat, tashmë do ta bëjë këtë në mënyrë ligjore, nëpërmjet ligjit që po debatohet”, – deklaron Tabaku.

Ajo paralajmëron se rreziku shkon përtej tenderave: bëhet fjalë për aksesin dhe kontrollin mbi të dhënat personale të qytetarëve dhe informacionin strategjik të shtetit.

“Nëse deri dje të dhënat personale të shqiptarëve ishin të rrezikuara… sot janë të ligjëruara që t’i kenë e t’i fusin duart tek të dhënat e shqiptarëve”, – shprehet ajo.

Në përfundim, Tabaku e cilësoi situatën si një shenjë të qartë të kapjes së shtetit.

“Ky është shtet i kapur. Këtë duhet ta ndryshojmë. Nuk na duhet një Republikë e të Korruptuarve. Nuk na duhet një qeveri e të korruptuarve. Na duhet Republika e Shqipërisë, të drejtat që kanë e që duhet të kenë qytetarët e Shqipërisë”, – përfundon ajo.

The post “Po ligjërojnë kapjen e shtetit”/ Jorida Tabaku: Nuk na duhet një Republikë e të korruptuarve appeared first on Albeu.com.

Tabaku thekson se euro ka prekur minimumet historike të kursit të këmbimit, ndërsa në vitet e fundit vlera e saj ka rënë me rreth 40%.

Sipas saj, ndonëse për shumë qytetarë kursi i këmbimit mund të duket si një koncept abstrakt, efektet e tij janë tashmë të prekshme në përditshmëri.

“Zhvlerësimi i euros po ndikon drejtpërdrejt në çmime, në eksporte, në punësim dhe në mbijetesën e bizneseve shqiptare. Çdo retorikë e qeverisë për nxitjen e eksporteve është e pavlefshme, për sa kohë ekonomia po goditet nga ky fenomen”, – shprehet Tabaku.

Sipas deputetes demokrate, dy sektorët kryesorë që po vuajnë më shumë janë prodhimi fason dhe bujqësia, sektorë që deri dje mbështeteshin te eksportet dhe sot po humbasin tregjet ndërkombëtare.

Ajo paralajmëron se zhvlerësimi i euros po e bën të pamundur që produktet shqiptare të konkurrojnë jashtë vendit, duke reduktuar të ardhurat e fermerëve dhe duke rrezikuar vendet e punës në industrinë fason, ku punësohen rreth 175 mijë persona.

Tabaku e lidh drejtpërdrejt këtë situatë me kriminalizimin e ekonomisë dhe futjen e parave të pista, të cilat, sipas saj, po deformojnë tregun dhe po prodhojnë pasoja të pakthyeshme për ekonominë reale.

“Ky ndikim po shkon drejtpërdrejt në xhepin e qytetarëve dhe po sjell pasoja katastrofike. Nuk ka asnjë mekanizëm që ta rekuperojë dëmin që po i bëhet sot ekonomisë nga pastrimi i parave”, – thekson ajo.

Në përfundim, Tabaku nënvizon se rënia e euros nuk është thjesht një tregues financiar, por rreziku real që po thellon varfërimin e shqiptarëve, po shkatërron prodhimin vendas dhe po minon të ardhmen ekonomike të vendit, në mungesë të një reagimi serioz nga qeveria.

The post Rënia e euros/ Jorida Tabaku: Po varfëron shqiptarët dhe po shkatërron prodhimin vendas! Pastrimi i parave po dëmton rëndë ekonominë appeared first on Albeu.com.

Sipas Tabakut, ndryshe nga Italia, ku institucionet publike të investimeve funksionojnë si banka zhvillimi që menaxhojnë rrezikun financiar dhe financojnë projekte strategjike, në Shqipëri AIC po përdoret për të marrë prona publike dhe për t’ua kaluar ato subjekteve private, pa garë dhe pa transparencë.

Reagimi i plotë:

Mbi Korporatën e Investimeve: Gjysmë të vërtetat mbi Italinë dhe e vërteta e Shqipërisë

Së fundmi, Kryeministri denjoi të bëjë disa komente mbi Korporatën Shqiptare të Investimeve (AIC). Me një vetëbesim që synon të bindë publikun përmes retorikës, ai deklaroi se kjo korporatë qenka një kopje e suksesshme e modelit italian të investimeve.

Nuk është hera e parë që Kryeministri përdor fjali të gjata dhe gjuhë të spërdredhur për të paraqitur gjysmë-të-vërteta si fakte të plota. Por në këtë rast, mjafton një krahasim i thjeshtë për të kuptuar se pretendimi nuk qëndron.

Në fakt, nga deklaratat e tij nuk është e qartë as se cilit institucion italian i referohet, sepse një “Korporatë Italiane Investimesh” me funksionet e AIC nuk ekziston.

Nëse Kryeministri e ka fjalën për Cassa Depositi e Prestiti (CDP), atëherë krahasimi bie menjëherë. CDP është bankë publike zhvillimi, e krijuar rreth 170 vite më parë, që menaxhon kursimet e qytetarëve italianë dhe vepron nën mbikëqyrje të rreptë bankare, rregulla strikte të prokurimit publik dhe kontroll të plotë institucional. Ajo financon projekte, por nuk administron, nuk tjetërson dhe nuk zhvillon pronë publike.

Nëse, nga ana tjetër, Kryeministri i referohet Agenzia del Demanio, institucionit që menaxhon pronat e shtetit italian, edhe ky krahasim nuk qëndron. Demanio administron dhe rikonstrukton pronën publike për funksione institucionale, sociale apo kulturore, por nuk hyn në pazare ndërtimi, nuk negocion përqindje me privatë dhe nuk e shndërron pronën publike në biznes spekulativ.

Pra, cilindo model italian të marrë si referencë Kryeministri, rezultati është i njëjtë: në Itali funksionet janë të ndara qartë me ligj. Banka financon, agjencia administron pronën; ndërsa në Shqipëri ato janë përqendruar në një ent të vetëm, pa garë dhe pa llogaridhënie.

Dallimet janë thelbësore. Në Itali, institucionet funksionojnë si banka publike që menaxhojnë para dhe rrezik financiar, ndërsa Korporata Shqiptare e Investimeve nuk menaxhon fonde, por merr prona publike me vendime qeverie dhe i fut ato në marrëveshje ndërtimi me privatë. Ndërsa institucionet publike europiane veprojnë përmes prokurimit publik dhe konkurrencës së hapur, AIC shmang garën dhe krijon privilegje të drejtpërdrejta për partnerë të përzgjedhur.

Po aq i rëndësishëm është edhe roli i shtetit. Në Europë, ndërhyrja publike bëhet aty ku tregu dështon – për banesa sociale, zona të varfra apo infrastrukturë strategjike. AIC bën të kundërtën, duke ndërhyrë aty ku tregu funksionon më së miri dhe duke krijuar konkurrencë të pandershme të sponsorizuar nga shteti. Ndërkohë, qeveria shqiptare është njëkohësisht edhe lojtari që ndërton, edhe arbitri që firmos për veten, ndërsa rreziku financiar i kësaj skeme nuk shfaqet sot në buxhet, por u lihet shqiptarëve si faturë për nesër.

Ky dallim nuk është teorik. Ai është konkret dhe ka emër.

Me një vendim të Këshillit të Ministrave, qeveria ia kaloi godinën e ish-shkollës jetimore “Zyber Hallulli” Korporatës Shqiptare të Investimeve. Një pronë publike me funksion social iu hoq fëmijëve jetimë përmes një firme qeveritare, pa debat publik dhe pa transparencë. Korporata e Investimeve veproi jo si institucion shtetëror, por si një pronar i keq: hoqi fëmijët nga godina, i zhvendosi në periferi dhe e nxori pronën nga funksioni i saj social.

Në një shtet europian, një veprim i tillë do të ishte i paimagjinueshëm. Prona publike do të rikonstruktohej, jo të shkatërrohej; funksioni social do të ruhej; fëmijët do të ishin prioritet, jo pengesë për një projekt ndërtimi.

Në Shqipëri ndodhi e kundërta. Fëmijët u larguan. Funksioni social u zhduk. Dhe prona publike u fut në logjikën e zhvillimit imobiliar, ku sot flitet për ndërtimin e një godine të madhe, me shumë gjasa një kullë tjetër, në shërbim të interesave të një pakice.

Kjo është diferenca thelbësore. Në Itali, prona publike ruhet dhe i shërben interesit publik. Në Shqipëri, përmes Korporatës së Investimeve, shteti po reduktohet në një biznes ordiner ndërtimi.

Dhe Italia, kësaj radhe, nuk mund të jetë as justifikimi dhe as alibia.

The post Jorida Tabaku: Korporata e Investimeve po përdoret për dhënie pronash publike appeared first on Albeu.com.

Sipas ligjvënëses, Lala mori një bullizim të hapur nga kreu i mazhorancës.

Tabaku nënvizon se; “sulmet ndaj gazetarëve janë arratisje nga llogaridhënia e qeverisë”.

Gjithashtu, ajo shton se sjellja e kreut të mazhorancës nuk është rastësi.

Postimi i Tabakut:

“Sulmet ndaj gazetarëve nuk janë debat. Janë arratisje nga llogaridhënia.

Kur Kryeministri bullizon gazetarët pse pyesin për korrupsionin qeveritar, problemi nuk janë pyetjet. Problemi është pushteti që ka humbur qetësinë sepse nuk ka përgjigje.

Kjo sjellje nuk është rastësi. Të dhënat ndërkombëtare konfirmojnë se degradimi i lirisë së medias në Shqipëri është sistematik. Sa më shumë ngushtohet laku i drejtësisë rreth qeverisë, aq më agresive bëhet gjuha ndaj medias.

Për këtë arsye, çdo ndryshim i propozuar në Kodin Penal për mbrojtjen e gazetarëve dhe fjalës së lirë është vetëm minimumi. Sepse këto kërkojnë një kulturë politike llogaridhënëse që sot nuk e kemi; një kulturë që pranon debatin e jo arrogancën; një kulturë që respekton mendimin ndryshe dhe nuk e sulmon atë!

Demokracia nuk dobësohet nga pyetjet e vështira. Ajo vdes nga heshtja që imponon pushteti.

Gazetarët janë zëri i publikut. T’i sulmosh ata, do të thotë t’i mbyllësh veshët shoqërisë për të mos dëgjuar të vërtetën”.

The post Sulmet ndaj gazetarëve janë arratisje nga llogaridhënia/ Jorida Tabaku: Sjellja e Ramës, jo rastësi appeared first on Albeu.com.

Tabaku rikujtoi se prej më shumë se një viti, ajo ka depozituar në Kuvend një ligj të plotë për screening-un e investimeve të huaja direkte (FDI), të hartuar me mbështetjen dhe ekspertizën e SHBA-së dhe BE-së, por që u rrëzua nga maxhoranca.

Sipas saj, sot qeveria vjen me një version të cunguar të të njëjtit ligj, vetëm pasi krizat e korrupsionit kanë nxjerrë në pah rrezikun real që vjen nga mungesa e filtrave seriozë.

“Djalli fshihet gjithmonë në detaje”, theksoi Tabaku, duke vënë në dukje se ligji i propozuar nga qeveria parashikon që analiza e sigurisë së investitorëve të huaj të bëhet nga vetë qeveria, një qasje që ajo e konsideron thellësisht problematike, në një moment kur AKSHI është vënë në qendër të akuzave publike si grup i strukturuar kriminal.

Një tjetër problem madhor, sipas Tabakut, është fakti se ligji i qeverisë fokusohet vetëm tek sektori i medias, duke lënë jashtë sektorë jetikë për sigurinë kombëtare si infrastruktura, energjia, teknologjia e informacionit dhe projektet Smart City.

Ajo ngriti shqetësimin se pa një analizë të thelluar dhe të pavarur, askush nuk garanton që investitorët, nënkontraktorët apo burimet e financimit në këta sektorë vijnë nga vende dhe interesa të sigurta.

Deputetja demokrate paralajmëroi se një strukturë e akuzuar për korrupsion dhe abuzim, e cila sot ka në dorë të dhëna sensitive si ato të Gjendjes Civile dhe E-Albania, nesër mund të administrojë edhe tenderë që lidhen drejtpërdrejt me sigurinë publike, si kamerat e qyteteve.

“Ky nuk është thjesht një ligj për integrimin europian”, u shpreh Tabaku.

“Është një çështje normash, standardesh dhe vlerash. Dhe shqiptarët nuk kanë arsye të besojnë se këto mund të garantohen nga një qeveri që po zhytet çdo ditë e më shumë në afera korrupsioni”.

Në përfundim, Tabaku ritheksoi se Shqipëria ka nevojë për një ligj serioz, gjithëpërfshirës dhe të besueshëm për kontrollin e investimeve të huaja, jo për zgjidhje formale dhe gjysmake që rrezikojnë sigurinë kombëtare dhe besimin e partnerëve ndërkombëtarë.

The post Jorida Tabaku: Një qeveri e akuzuar si grup i strukturuar kriminal premton të ruajë Shqipërinë nga rreziku jashtëm (VIDEO) appeared first on Albeu.com.

Gjatë diskutimit nen për nen të projektbuxhetit, Tabaku artikuloi shqetësime thelbësore që sipas saj tregojnë mungesë vizioni dhe mungesë mbështetjeje për shtresat në nevojë.

1. Minimumi jetik nuk njihet nga qeveria, pavarësisht kërkesave të Avokatit të Popullit

Tabaku theksoi se, edhe pse Avokati i Popullit ka kërkuar dy herë miratimin e minimumit jetik, buxheti nuk e njeh këtë të drejtë themelore. Ajo rikujtoi se kostot e jetesës kanë arritur në rreth 90 mijë lekë, ndërsa mbështetja shtetërore mbetet simbolike. Sipas saj, kjo është dëshmi se qeveria nuk e merr parasysh realitetin ekonomik të familjeve shqiptare.

2. Asnjë politikë e re për pensionet – pensionistët nuk përballojnë rritjen e çmimeve

Sipas Tabakut, ky është viti i 13-të radhazi që qeveria nuk propozon asnjë reformë serioze për pensionistët. Shpërndarja e bonusit në 12 muaj nuk sjell asnjë ndryshim real dhe nuk kompenson rritjen e çmimeve me 30–60% në një dekadë. Edhe të ardhurat e rritura nga TVSH, sipas saj, vërtetojnë që rritja e kostos së jetesës njihet vetëm në faturat e qeverisë, por jo në politikat sociale.

3. Çështja e pronave e bllokuar – vetëm 20% e dosjeve të shqyrtuara, shkelje e të drejtës kushtetuese

Tabaku ngriti alarmin edhe për pronat dhe dosjet e të përndjekurve politikë. Vetëm 20% e tyre janë trajtuar, ndërsa ligji i pronave është rrëzuar nga Gjykata Kushtetuese. Sipas saj, situata aktuale përbën shkelje të qartë të së drejtës së pronës dhe rendit juridik.

4. Rritja e pagës minimale sjell barrë të re për bizneset dhe punonjësit, pa rritur cilësinë e jetesës

Deputetja demokrate tha se rritja e pagës minimale sjell një efekt shtesë prej 150–180 milionë euro për bizneset dhe punëmarrësit, kosto që nuk kompensohet me politika lehtësuese. Masat e qeverisë, sipas saj, nuk ndikojnë në përmirësimin e jetës së punësuarve, por vetëm shtojnë barrën fiskale.

5. “Paqja Fiskale” cenon barazinë para ligjit dhe favorizon informalitetin

Tabaku u ndal tek nisma e qeverisë për “Paqen Fiskale”, që sipas saj prek 200 mijë tatimpagues me 1.7 miliardë euro borxhe, ndërsa qeveria synon të mbledhë vetëm 400 milionë. Ajo deklaroi se kjo amnisti cenon barazinë para ligjit dhe nxit mosshlyerjen e detyrimeve. Tabaku kërkoi transparencë të plotë për përfituesit: kompanitë me tendera, me koncesione, apo subjekte të hetuara nga SPAK.

Tabaku nënvizoi se për këto pesë arsye thelbësore, opozita do të votojë kundër projektbuxhetit 2026, i cili, sipas saj, nuk është në interes të shumicës së qytetarëve shqiptarë dhe nuk adreson sfidat sociale dhe ekonomike të vendit.

The post Opozita kundër Buxhetit 2026/ Jorida Tabaku rendit 5 arsyet: Rritja e pagës minimale, barrë për bizneset dhe punonjësit, masat e qeverisë nuk përmirësojnë jetesën e qytetarëve appeared first on Albeu.com.

Tabaku ka ironizuar premtimet e përsëritura prej 13 vitesh të Ramës, duke i cilëson si një tallje me të moshuarit shqiptarë.

“Sipas Kryeministrit, pensionet do të rriten me 1,800 lekë në qytet dhe 600 lekë në fshat. Kjo do të thotë vetëm 60 lekë në ditë, një kafe në qytet apo 20 lekë në fshat. Çfarë mund të bëjë një pensionist me një kafe më shumë në ditë”? – shprehet Tabaku.

Gjithashtu, Tabaku thekson se pensionistët janë ndër shtresat më të goditura nga kriza ekonomike dhe inflacioni, me çmime të rritura me 30 deri në 60 për qind për produktet bazë të jetesës, barnat dhe shpenzimet e përditshme.

“Pas gjithë këtyre rritjeve, qeveria ofron një lëmoshë, jo një zgjidhje. Pensionet sot janë lëmoshë, jo politikë sociale. Shqipëria ka nevojë për një skemë të re, të qëndrueshme dhe me dinjitet për të moshuarit e saj”, thekson ajo.

Më tej, Tabaku shprehet se reforma e pensioneve duhet të marrë në konsideratë shpopullimin, emigracionin dhe plakjen e popullsisë, duke e trajtuar çdo qytetar me dinjitet dhe jo me fjalë boshe.

“Qeveria mund të shpërndajë kafe falas, por nuk mund të blejë dinjitetin e pensionistëve”, përfundoi Tabaku.

The post Rama tha se do rrisë pensionet, ironzion Jorida Tabaku: Një kafe 60 lekë në ditë nuk mjafton për dinjitet (VIDEO) appeared first on Albeu.com.