Pas rimarrjes së kompetencave, kryebashkiaku Erion Veliaj, ka kërkuar krijimin e një task-force që do të verifikojë materialet e përdorura në sistemet kapot.

Vëmendja kryesore do të përqendrohet te certifikimi i tyre për qëndrueshmërinë ndaj zjarrit.

Për godinat që përfitojnë nga Programi i Fondit të Komunitetit, përdorimi i materialeve të certifikuara për sistemin kapot dhe përmbushja e standardeve të sigurisë nga zjarri janë kushte të detyrueshme.

Ky program financon 50% të vlerës së përcaktuar për punime si instalimi i ashensorit, izolimi i tarracës dhe vendosja e sistemit kapot.

Ndërkohë, për pensionistët dhe familjet që marrin ndihmë ekonomike, Bashkia mbulon të gjithë, pra 100%, koston e ndërhyrjeve.

Bashkia e Tiranës, u bën thirrje banorëve të pallateve që kërkojnë rikonstruksion të fasadës, izolim të tarracës ose vendosje ashensori, të paraqesin aplikimet në Programin e Fondit të Komunitetit.

Programi i Fondit të Komunitetit, është një prej nismave të ndërmarra nga kryebashkiaku Erion Veliaj, për të ndihmuar banorët në përmirësimin e kushteve në pallate dhe në hapësirat e përbashkëta.

The post Bashkia e Tiranës jep leje për vendosjen e ashensorëve në pallatet e vjetra appeared first on Albeu.com.