Prokurori i Prokurorisë Speciale të Kosovës, Valdet Gashi, ka dhënë detaje nga aktakuza në mungesë ndaj 35 të pandehurve për krime lufte në Prekaz të Poshtëm. Ai tha se çështja më e vështirë gjatë hetimeve ka qenë përcaktimi i njësive serbe të përfshira në këto veprime.

Sipas Gashit, në aksionet ku janë kryer krimet në Prekaz të Poshtëm kanë marrë pjesë Departamenti i Sigurisë Publike të Serbisë, Ministria e Punëve të Brendshme, Departamenti i Sigurisë Shtetërore të Serbisë dhe, në kuadër të këtij të fundit, edhe Njësia Speciale e Serbisë.

Ai bëri të ditur se në operacion ka pasur edhe njësi të tjera, përfshirë Njësinë e Posaçme Policore, Njësinë Speciale Antiterroriste dhe departamente në kuadër të Ministrisë së Brendshme të Serbisë.

Gashi deklaroi se Njësia për Operacione Speciale është udhëhequr nga Milorad…

Ndërkohë, ‘Legija’ e kishte për detyrë, me kërkesën e tij speciale, që ta sulmonte drejtpërdrejt shtëpinë e familjes së Shaban Jasharajt.

Prokurori theksoi se personat e përfshirë në aktakuzë kanë pasur pozita menaxhuese në njësitë ku kanë vepruar.

“Pika më e rëndësishme është identifikimi i këtyre njësive, ndërsa pikërisht ky ka qenë edhe problemi më i madh”, tha Gashi.

Ai sqaroi se aktakuza ndaj 35 të pandehurve nuk lidhet vetëm me krimet e kryera ndaj familjes së ngushtë të Shaban Jasharajt. Sipas tij, rasti përfshin viktimat dhe sulmet e ndodhura në të gjithë lagjen Jasharaj, në fshatin Prekaz i Poshtëm.

Në bazë të provave të mbledhura, numri i viktimave është 26 persona, tha Gashi.

Prokurori deklaroi gjithashtu se, sipas informacioneve të deritanishme, të 35 të pandehurit për krime lufte në Prekaz të Poshtëm janë gjallë.

“Nëse pas publikimit të emrave vjen ndonjë informacion se një person nuk është gjallë, natyrisht që, sipas ligjit, kemi mundësi ta tërheqim nga aktakuza. Megjithatë, bazuar në informacionet që kemi, të gjithë këta persona janë gjallë”, tha ai.

Aktakuza është ngritur në mungesë, pasi Prokuroria Speciale ka vlerësuar se janë shterur mundësitë për sigurimin e të pandehurve dhe sjelljen e tyre në procedurë penale.

The post Krimet e Serbisë në lagjen Jasharaj, Gashi: Identifikimi i njësive ishte sfida kryesore appeared first on Albeu.com.

Kryeprokurori i Prokurorisë Speciale, Blerim Isufaj, bëri të ditur se hetimet për sulmin ndaj familjes Jasharaj nga Prekazi në vitin 1998 pritet të përfundojnë në një afat të afërt.

Gjatë një konference për media të hënën, Isufaj theksoi se bëhet fjalë për një çështje të ndjeshme, e cila sipas tij kërkon kujdes dhe maturi.

“Hetimet në rastet që lidhen me lagjjen dhe familjen Jashari, së shpejti do të finalizohen”, tha Isufaj.

Ai shtoi se përfundimi i hetimit pritet të ndodhë shumë shpejt, por nuk dha më shumë hollësi përtej faktit se procesi është drejt fundit. “Hetimi do të përfundojë shumë shpejt, pastaj të shohim. Ky hetim është shumë sensitiv, shumë i ndjeshëm dhe kërkon maturi. Thjesht, ne po e bëjmë atë punë. Nuk mund të them asgjë më tepër, përveçse hetimi është në përfundim”, u shpreh Isufaj.

Në prezantimin e një përmbledhjeje të punës së Prokurorisë Speciale gjatë vitit të fundit, ai veçoi edhe dy operacione të rëndësishme që lidhen me krimet e luftës.

“Vlen të përmendet se këtë vit janë realizuar dy operacione të rëndësishme lidhur me krimet e luftës. Në këtë drejtim, në rastet që lidhen me Masakrën e Reçakut janë arrestuar pesë persona si të dyshuar për krime të luftës. Po ashtu, pesë persona janë arrestuar si të dyshuar për rastin e Syriganës në Skenderaj”, tha Isufaj.

The post Isufaj njofton se hetimet për rastin e Jasharajve pritet të mbyllen së shpejti appeared first on Albeu.com.