Elbasani dhe Vllaznia ndanë nga një pikë në përballjen e javës së dytë të “Abissnet Superiore”. Ndeshja, e luajtur në stadiumin “Elbasan Arena”, u mbyll në barazim 1-1. Pas takimit, trajneri i skuadrës verdheblu, Ivan Gvozdenovic, analizoi paraqitjen e ekipit të tij.

“Ndoshta mund të flasim për fat vetëm nëse marrim në konsideratë 5 minutat e fundit. Nëse e shohim ndeshjen që nga starti, nuk jam dakord me këtë vlerësim. Është e vështirë të parashikoj se ku mund të renditet Elbasani, por besoj se do të jemi në pjesën e sipërme të tabelës. Nga fillimi deri në fund, ne ishim skuadra më e mirë dhe e kontrolluam ndeshjen. Ajo që na penalizoi ishte mungesa e golit në rastet e pastra që krijuam. Kjo ka peshë, sidomos ndaj një ekipi si Vllaznia. Edhe kundërshtari pati momente të mira, ndërsa goli i dytë erdhi pas një gabimi naiv nga ana jonë. Ende jemi një skuadër naive dhe e butë; duhet të dimë të jemi më të ‘pistë’, gjithmonë brenda rregullave.

Shkodra u shfaq më mirë në pjesën e parë sa i takon tranzicionit pozitiv. Ne patëm mundësi me Hebajn dhe Nikajn, por duke qenë një derbi, ishte e vështirë të kishte shumë raste shënimi. Vllaznia na kapi në kundërsulm. Për një moment u ndikuam edhe emocionalisht, por nuk u dorëzuam dhe arritëm të shënonim për ta barazuar ndeshjen. Duke parë rastet, mund të kishim marrë edhe fitoren, pasi krijuam më shumë mundësi se Vllaznia, por në 5 minutat e fundit u treguam naivë. Ky është vlerësimi im. Në të dyja pjesët e menaxhuam mirë qarkullimin e topit. Duhet të përmirësojmë finalizimin dhe shfrytëzimin e rasteve, ndaj do të punojmë për t’i rregulluar këto aspekte.

Ne u përgatitëm për të fituar, megjithatë edhe një pikë në një ndeshje të tillë është rezultat i mirë. Pavarësisht kësaj, jam i mërzitur. Sa u përket golave të pësuar pas tranzicioneve negative, ke të drejtë dhe do të punojmë pikërisht në këtë drejtim. Si goli i parë, ashtu edhe i dyti erdhën në situata të tilla, por ndoshta më shqetëson më shumë i dyti. E kishim topin në këmbë, por nuk e menaxhuam siç duhet mes nesh. Goli i parë ishte meritë e Vllaznisë”, deklaroi Gvozdenovic.

The post Ivan Gvozdenovic pas barazimit me Vllazninë: Elbasani dominoi, por duhet të bëhet më i ashpër brenda rregullave appeared first on Albeu.com.

Elbasani rikthehet në arenën europiane pas 20 vitesh dhe të martën do të luajë sfidën e parë ndaj BATE Borisov, e vlefshme për kualifikueset e Conference League. Takimi nis në orën 20:00 dhe do të luhet në stadiumin “Elbasan Arena”, aty ku verdheblutë synojnë të shfrytëzojnë avantazhin e fushës për të dalë me një rezultat pozitiv.

Në prag të këtij takimi ka folur trajneri i ekipit, Ivan Gvozdenovic, i cili u ndal te gjendja e skuadrës, përgatitjet dhe pritshmëritë për përballjen europiane.

Duke komentuar situatën në grup, ai tha se nga skuadra janë larguar 12 lojtarë, por theksoi se në këtë moment nuk ka vend për shumë diskutime mbi arsyet, pasi vëmendja është e gjitha te ndeshja e rëndësishme e nesërme ndaj BATE Borisov.

Për sa i përket gjendjes së futbollistëve, Gvozdenovic u shpreh se ekipi është gati dhe se kjo do të shihet në fushë. Sipas tij, ndoshta do të duhej edhe një javë më shumë në fazën përgatitore, por kjo është situata që duhet përballuar. Ai shtoi se Elbasani ka një skuadër të mirë, me lojtarë me eksperiencë, të cilët dinë si t’i menaxhojnë forcat deri në minutat e fundit, apo edhe në të 95-tën, në varësi të shtesës.

Sa i përket mundësive për të kaluar më tej, trajneri nënvizoi se gjithçka nuk vendoset në ndeshjen e nesërme. Ai kujtoi se janë dy ndeshje dhe më pas ajo e datës 16, duke theksuar se kualifikimi mbetet i hapur dhe se skuadra do të provojë gjithçka në fushë për të marrë një rezultat pozitiv.

Në analizën për kundërshtarin, Gvozdenovic e cilësoi BATE Borisov si një skuadër të fortë dhe me emër të madh. Sipas tij, kundërshtari ka më shumë eksperiencë dhe hyn me një motivim tjetër në ndeshjen e nesërme. Ai theksoi gjithashtu se kampionati dhe Europa janë dy kompeticione të ndryshme, ndaj është i bindur se BATE do të luftojë shumë fort në fushë.

Nëse Elbasani arrin të sigurojë kualifikimin, trajneri e konsideron atë një dhuratë shumë të bukur për skuadrën, tifozët, qytetin dhe lojtarët.

The post Gvozdenovic para duelit me BATE Borisov: Është një skuadër me emër, por Elbasani do të japë maksimumin për një rezultat pozitiv appeared first on Albeu.com.