Në vendimin e para disa ditëve, gjyqtarja Flora Hajredinaj ka urdhëruar SPAK-un të fillojë hetimet nga fillimi lidhur me çështjen e institucioneve që japin kredira të këqija dhe rolin e guvernatorit të Bankës së Shqipërisë, Gent Sejko. Ajo i ka caktuar SPAK-ut shumë detyra hulumtuese dhe afate për të ndërmarrë veprime hetimore.

Gjyqtarja Hajredinaj gjithashtu ka vendosur të shpallë të pavlefshëm vendimin e pushimit të Prokurorisë së Tiranës dhe ka urdhëruar Prokurorinë e Posaçme që të vazhdojë hetimet lidhur me këtë çështje.

Sipas mediave, guvernatori Gent Sejko u kallëzua në vitin 2022 në Prokurorinë e Tiranës për “abuzim të detyrës” nga Dhoma e Përmbaruesve Privatë, për krijimin e skemave të mashtrimit me mikrokredi. Por pas dy viteve hetim, në fund të janarit të këtij viti u kërkua pushimi i tij nga prokurorja Ornela Rrumbullaku.

Sipas pretendimeve të përmbarimit, gjyqtarja ka vendosur të dërgojë çështjen për vlerësim dhe kompetencë në Gjykatën e Posaçme Antikorrupsion.

Gjykata e Posaçme, në seancën e së mërkurës, ka vendosur të shpallë të pavlefshëm pushimin dhe të urdhërojë dërgimin e dokumentacionit në SPAK për hetim.

Tani guvernatori Gent Sejko po përballet me dy procedura penale paralele në SPAK, njërin të dërguar nga prokurori i Tiranës Leonard Filopati disa javë më parë me akuzën e moskompetencës, dhe tjetrin që lidhet me vendimin e gjyqtares Flora Hajredinaj.

Cështja e kompanive të mikrokredive është kthyer në një problem madhor, pasi duket dukshëm që shoqëritë financiare Iute, Kredo, Fondi Besa, Noa, MCA-Final, etj. dhe bankat e nivelit të dytë, të ndihmuara nga Banka e Shqipërisë, janë tē implikuar në skemën e mashtrimit të mijëra qytetarëve shqiptarë.

Si pasojë e këtyre skemve, me 2 korrik, Pal Trashaj, të cilit iu është marrë pasuria nga përmbaruesit që punojnë për kompanitë e mikrokredive, piu helmin përpara ambienteve të SPAK, duke ndërruar jetë një ditë më pas.

63-vjeçari, i cili njihet si historian në qytetin e tij, prej vitesh ka denoncuar kalvarin me kredinë e marrë që më pas ndër vite u shumëfishua deri në bllokimin e pasurisë.

Sipas të dhënave, Pal Trashaj kishte një kredi të mbetur që nga viti 2008, në vlerën e 76 mijë lekëve. Kredinë e Pal Trashajt e kishte blerë MCA, e cila kërkonte 4.8 milionë lekë, duke bllokuar për 5 vjet gjithçka: shtëpinë, tokën, makinën dhe pagën ku punonte. Trashaj kërkonte që SPAK të merrte përsipër çështjen e grabitjes së pronës së tij nga përmbarues, për të cilët më herët kishte bërë një padi civile në Gjykatën e Lezhës.

Ai pretendonte se kredinë e kishte shlyer dhe se veprimet e kryera për sekuestrimin e pronës së tij ishin të paligjshme. Pal Trashaj është një nga viktimat e shumta të mikrokredive, por dosja e tij nuk është objekt i hetimeve të SPAK. /albeu.com/

The post GJKKO rrëzon vendimet e Prokurorisë së Tiranës dhe urdhëron SPAK të hetojë mikrokreditë appeared first on Albeu.com.

Ai është person i sanksionuar në Ukrainë, Kanada dhe Australi. Departamenti Amerikan i Thesarit e ka vendosur Bojkon në të ashtuquajturën “Lista e Putinit”, e cila përfshin oligarkë rusë të afërt me presidentin rus, Vladimir Putin.

Bojko zotëron kompani financiare për kredi të shpejta në mbi 30 vende të botës.

Fakti që ai është i sanksionuar nga disa vende dhe se disa nga kompanitë e tij janë të përfshira në skandale, nuk e pengon Bojkon të drejtojë biznese në Maqedoninë e Veriut.

Kush është oligarku rus Bojko?

Miliarderi rus me nënshtetësi italiane, Oleg Viktoroviq Bojko, i cili sipas revistës Forbes ka një pasuri prej 1.2 miliard dollarësh, në Regjistrin Qendror të Maqedonisë së Veriut ka hapur një kompani financiare për kredi të shpejta me emrin “Digital Finance International”.

Oleg Bojko zotëron kompani financiare të huave të shpejta në mbi 30 vende, por problemi është se ky oligark rus, 59-vjeçar, është vendosur në tri lista sanksionesh.

Në prill të vitit të kaluar, ai u fut në listën e sanksioneve të Australisë, dhe që nga nëntori, edhe të Kanadasë dhe Ukrainës, për shkak të “mbështetjes financiare të qeverisë ruse që pushtoi Ukrainën”, sipas bazës ndërkombëtare të të dhënave OpenSanctions.

Biznesmeni rus, Bojko, është në të ashtuquajturën “Lista e Putinit” të Departamentit të Thesarit të SHBA-së, ku renditet i 17-ti në grupin e 96 oligarkëve që përbëjnë rrethin e ngushtë të presidentit rus, Vladimir Putin, raporton CNN.

Një raport i inteligjencës amerikane i paraqitur në Senat në vitin 2017 e quajti oligarkun rus, Bojko, “një person me lidhje shqetësuese me qeverinë ruse dhe shërbimet ruse të sigurisë dhe i përfshirë në krimin e organizuar”.

“Shtypi moldav raportoi se Bojko ishte pjesë e një operacioni të mbështetur nga Kremlini për të ndërhyrë në zgjedhjet e tyre”, zbulon raporti, i cili është pjesërisht konfidencial.

Revista Forbes e rendit Bojkon në mesin e 100 biznesmenëve më të pasur rusë, dhe ai njihet gjithashtu si një investitor ndërkombëtar me 30 vjet përvojë në industrinë bankare dhe shërbimet financiare digjitale.

Por, ky nuk është biznesi i tij i vetëm. Bojko njihet edhe në Hollivud. Ai shfaqet si bashkëpronar i Fashion TV, dhe bashkëproducent i filmave të famshëm të Hollivudit Sin City 2 (Sin City II) nga Robert Rodriguez dhe Summer Crossing (Summer Crossing) me Scarlett Johansson.

Sa pasaporta ka Bojko?

Sipas OpenSanctions, përveç pasaportës ruse, Bojko ka një pasaportë greke dhe italiane. Sipas të dhënave nga Regjistri qendror maqedonas, adresa e tij e banimit figuron në kryeqytetin rus, Moskë, por si shtet prej nga e ka origjinën, përkatësisht nga i cili ka nënshtetësi, specifikohet Italia.

Burime të inteligjencës maqedonase thonë për Radion Evropa e Lirë se ai nuk ka pasaportë maqedonase.

Nga ana tjetër, në profilin e tij zyrtar në platformën profesionale LinkedIn, Bojko figuron si rezident në Dubai të Emirateve të Bashkuara Arabe.

Bojko ka hyrë në tregun maqedonas me gjysmë milioni euro. Në Maqedoninë e Veriut, përmes Digital Finance International Bojko zotëron markat për kredi të shpejta të njohura si “Forca” dhe “Credi”. Ndërsa, së fundi kompania e tij financiare ka publikuar produktin “Hypocredit” me të cilin mund të merret kredi deri në 65 mijë euro me hipotekë nga pasuria e paluajtshme me afat shlyerjeje deri në 15 vjet.

Në vetëm pesë vjet nga vendosja e renditjes së 35 kompanive financiare që merren me kredi të shpejta në Maqedoninë e Veriut, në vitin 2021 kompania e Bojkos u ngjit në vendin e shtatë me të ardhura prej 2.5 milionë eurosh.

Vitin e kaluar, puna e tyre ka pësuar rënie, kështu që kjo kompani ka realizuar të ardhura prej 1.2 milion eurosh, por për shkak të shpenzimeve të mëdha, të cilat janë pasqyruar në llogarinë përfundimtare, vitin e ka mbyllur me mbi 300 mijë euro humbje, që do të thotë se ajo i ka paguar shtetit vetëm 50 mijë euro taksë, e cila është tre herë më e vogël se një vit më parë.

Deri në publikimin e këtij teksti, nuk kemi marrë përgjigje nga menaxherja e kësaj kompanie në Shkup, Elizabeta Siljanovka, për arsyet e humbjeve.

Kompania e Bojkos, Digital Finance International, është pjesë e perandorisë ruse Finstar (Finstar Financial Group) me seli në Moskë, e cila ka filialet e saj në të gjithë Evropën, SHBA, Azi dhe në Amerikën Latine.

Institucionet maqedonase nuk zbulojnë detaje për kompaninë e Bojkos

Kompania e tij, për shkak të biografisë së Bojkos, ishte cak i kontrolleve nga institucionet kompetente financiare, por siç thanë burime nga atje për Radion Evropa e Lirë, deri më tani nuk janë vërejtur rrjedha më serioze financiare që do të tërhiqnin vëmendjen.

Nga Drejtoria e të Ardhurave Publike thonë se deri më tani nuk e kanë kontrolluar kompaninë Digital Finance International, por se janë duke i analizuar institucionet financiare për kredi të shpejta.

Burime të inteligjencës, për REL, thonë se institucionet maqedonase monitorojnë dhe zbatojnë menjëherë sanksionet ndaj të huajve dhe kompanive të tyre në vend, vetëm nëse ata vendosen në listat e Zyrës Evropiane Kundër Mashtrimit, institucionit amerikan nën Ministrinë e Financave për kontroll të aseteve të huaja dhe OKB-së.

Kjo do të thotë se nëse dikush është në ato lista, atëherë paratë dhe kompanitë e tij menjëherë ngrihen në vend, sepse, siç thonë burimet për Radion Evropa e Lirë, të huajt që sjellin para në vend kontrollohen me ndihmën e partnerëve ndërkombëtarë.

Ministria e Financave e Maqedonisë së Veriut thotë se gjatë mbikëqyrjes së punës së kompanive financiare mbështeten në konkluzionet e auditimeve të brendshme.

Sipas vlerësimit të Bankës Popullore të Maqedonisë së Veriut në raportin e fundit për vitin 2021, kompanitë financiare janë një nga segmentet më dinamike të sistemit financiar.

“Numri dhe asetet e këtij segmenti të sektorit financiar në vitet e fundit kanë qenë në rritje të vazhdueshme, por pa ndryshime të rëndësishme në rëndësinë e tyre relative për sistemin financiar, pra vazhdojnë të jenë pjesë margjinale e sektorit financiar”, thuhet në raportin e Bankës Popullore.

Kompania e Bojkos në Shqipëri përfshihet në një skandal

Një nga kompanitë financiare në Shqipëri, në pronësi të Bojkos, Credit 2 All-Digital Finance International SHPK, u përfshi në një skandal me rrjedhjen e të dhënave të 600 mijë përdoruesve të kredive të shpejta që përfunduan në “tregun e zi”. Në fund të vitit 2021 nisën të shpërndaheshin dokumente me paga mujore të mijëra qytetarëve të punësuar në sektorin publik dhe privat, përfshirë edhe emra të njohur, fillimisht përmes rrjeteve sociale.

Bëhet fjalë për rrjedhjen më të madh të informacionit që ka ngjallur shumë debate në opinion. Pas këtij skandali janë arrestuar katër nga punonjësit e kompanisë financiare të oligarkut rus, Bojko, tha policia shqiptare.

Pas arrestimit të menaxherit të kompanisë për skandalin, Endri Ikonomi, Vlado Cvetkovski u emërua menaxher i ri në tetor të vitit 2021, shkruan Euronews Albania.

Sipas këtij raportimi, Bojko është i lidhur në një farë mënyre me dy kompani të tjera financiare për kredi të shpejta në Maqedoni të Veriut.

Njëra përmes ish-drejtorit të tij të kompanisë shqiptare dhe anëtar i bordit të drejtorëve në kompaninë maqedonase me kapital rus, Digital Finance International, dhe e dyta përmes një kompanie letoneze, pronari i së cilës ka një kompani financiare në Maqedoni të Veriut për kredi të shpejta.

Një milioner çek hyn në tregun maqedonas me kredi të shpejta

Në Regjistrin Qendror të Maqedonisë së Veriut figuron edhe emri i Vllado Cvetkovskit, i cili ishte menaxher i kompanisë shqiptare të Bojkos, ku emërohet anëtar i këshillit mbikëqyrës në kompaninë maqedonase me kapital rus, Digital Finance International.

Informacioni për Cvetkovskin është i vështirë për t’u gjetur, burimi i vetëm është profili i tij në LinkedIn. Sipas profilit, ai para se të bëhej pjesë e grupit Bojkos në vitin 2018 ka qenë drejtor ekzekutiv i një kompanie tjetër për kredi të shpejta me përfaqësi në Maqedoni të Veriut, Iute Kredit.

Tashmë Cvetkovski është menaxher i kompanisë financiare të sapoformuar të kredive të shpejta, Profi Kredit, e themeluar në dhjetor të vitit 2022.

Kjo kompani është pjesë e grupit financiar ndërkombëtar Profireal Group, i cili përveç Maqedonisë operon edhe në katër shtete të tjera – Çeki, Bullgari, Poloni dhe Rusi. Që nga viti 2017 ky grup ka shtrirë aktivitetin e tij në Azinë Juglindore – Filipine.

“Mbreti letonez i kredive të shpejta” ka humbur licenca në Kosovë – punon në Maqedoni të Veriut

Pronari i kompanisë maqedonase me kapital rus, Digital Finance International, Bojko, në hulumtimin e rrjetit hulumtues skandinav “ReBaltika”, është i lidhur me një tjetër pronar të një kompanie për kredi të shpejta në vend.

Bëhet fjalë për Aigars Kesenfelds, pronarin e kompanisë Fintech Doo e njohur me markën Tigo.

Sipas bazës së të dhënave të pronarëve të vërtetë, kjo kompani maqedonase është themeluar nga milioneri letonez, Aigars Kesenfelds, i cili, sipas Qendrës për Gazetari Hulumtuese, ReBaltika, është partner i oligarkut rus Bojko në kompaninë Forfinance (4finance) për kredi të shpejta, e cila ka përfaqësi në Maqedoni të Veriut dhe vepron në 11 vende të tjera.

Sipas hulumtimit të ReBaltika-s, oligarku rus, Bojko, ka pasur aktivitete në Kosovë për një kohë përmes kompanisë “Monego”, e cila ishte në pronësi të letonezit, Kesenfelds. Megjithatë, në vitin 2019, Banka Qendrore në Prishtinë ia hoqi licencën kësaj kompanie për shkak të “superfitimeve” të dyshimta.

Vitin e kaluar, kreditë Tigo të Fintech, në Maqedoninë e Veriut vend arritën të ardhura prej 14.6 milionë eurosh, nga të cilat fitimi ishte 3.8 milionë euro, që është gati dyfishi i një viti më parë 2021, kur të ardhurat arritën në 8.2 milionë euro, dhe fitimi ishte 1.7 milionë euro.

Kesenfelds, pas heqjes së licencës në Kosovë, si dhe pas akuzave në media ku u përmend si i dyshuar për pastrim parash dhe kërcënim kombëtar, i ka mohuar akuzat e tilla për gazetarët kosovarë.

Ai u tha se është pronar ose bashkëpronar i rreth 150 kompanive që punojnë në të paktën 20 shtete dhe xhiroja e tyre në vitin 2019 ishte 384 milionë euro.

Sipas biografisë së publikuar, Kassenfeld themeloi kompaninë Forfinance në vitin 2008, e cila e bëri atë milioner. Dhe kjo kompani, e cila jep edhe kredi të shpejta, operon në Bullgari, Greqi, Spanjë, Rumani, Çeki, Letoni dhe Lituani, Danimarkë dhe Suedi, si dhe në Filipine.

Këto janë vetëm disa nga kompanitë që “tjerrin” miliona euro duke e ngarkuar popullatën në nevojë me komisione të larta për kreditë afatshkurtra dhe të vogla. Në vend janë hapur 35 kompani që japin kredi të shpejta dhe të vogla. Dyzet për qind e tyre u themeluan me kapital të huaj./REL

The post I kanë nxirë jetën mijëra shqiptarëve, oligarku i sanksionuar rus Oleg Boyko përfiton miliarda edhe në shtetin fqinj appeared first on Albeu.com.

Falë hyrjes së tij në Big Brother Vip, Luizi tregoi pjesë nga vetja dhe jeta e tij që tërhoqën vëmendjen  e mijëra shqiptarëve, të cilët janë kthyer në “tifozë” të vërtetë të Luizit.

Shumë është folur për jetën e Luizit para lojës, për lidhjen e tij 10-vjeçare me vazjën e Jozëfina Topallit dhe borxhet.
Për këtë Luizi foli vetë në spektaklin e së shtunës në linjën e jetës.

Gazeta Dita ka bërë një investigim në lidhje me borxhet e Luizit, mashtrimin dhe sekuestrimn e llogarive bankare nga IUTE CREDIT.

Artikulli i plotë

Historia e Luiz Ejllit është historia e mijëra të rinjve dhe të rejave të thjeshtë të këtij vendi, të cilët jetuan në demokracinë që flet shqip.

Me ndryshimin e vetëm dhe të rrallë, që historia e Luizit, pati një “happy-end”. Luiz Ejlli është sot shqiptari më i njohur dhe i komentuar nga të gjithë, brenda dhe jashtë kufijve, përfshirë diasporën dhe Kosovën.

I admiruar nga një shumicë milionëshe që, për pasion me siguri do kalonte edhe përkrahësit më të zjarrtë të të gjitha partive politike të marra së bashku, Ejlli as nuk e imagjinon dot (deri të dielën) se çfarë ndikimi dhe force ka historia e jetës së tij tek miliona të rinj dhe të reja, njerëzit e thjeshtë, populli i zakonshëm.

Jetën prej 37 vitesh ai e tregoi në ngashërim dhe përlotur të shtunën mbrëma, si për të vulosur në zemrën e të gjithëve, thirrjen: Ma ndryshoni fatin o njerëz!

Luiz Ejlli, vjen nga një familje e thjeshtë shkodrane, lindur në një qytet me shumë art, histori dhe vuajtje. Si pinjoll i mijëra familjeve të zakonshme shqiptare, ai u rrit përvuajtur në demokracinë e ’91, ’97 dhe gjithë viteve që solli shekulli 21. U përpoq të ndërtojë një jetë brenda artit, këngës, muzikës. Ia doli disi me fitimin e një konkurrimi – Festivalit të 44-ët në RTSH dhe pjesëmarrjen në një tjetër, Eurovision 2006.

Por arti në Shqipëri nuk të jep “bukë” vec çmimeve. Bëri kompromis me dashurinë të përzier me pushtet, kur u bë “dhëndri i Jozefinës”, politikanes së ashpër të Partisë Demokratike, e cila mbahet mend për shprehjen, por dhe sjelljen “Kapeni për zhelesh dhe nxirreni jashtë”.

Luizi në rrëfimin e tij tregoi se ndarja me të bijën e Jozefinës, përfundoi në një vetmi dhe disfatë të madhe, në një sedilje makine, me 37 mijë lek në xhep, pa shtëpi dhe më pas, pa punë, praktikisht i përzënë prej zhelesh jashtë, nga një jetë 10 vjeçare.
Fatin e sa të rinjve shqiptarë 20, 30 apo 40 vjeçarë ka shenjuar historia e Luiz Ejllit? Të talentuar, të zhgënjyer nga dashuria dhe jeta, të papunë, të nëpërkëmbur dhe të zhvlerësuar nga shoqëria dhe “demokracia”?

Luizi i tregoi rinisë dhe shoqërisë se ishte mbytur në borxhe, ndaj e don’ dëshpërimisht çmimin, për një fillim të ri, jetë të re. Për të krijuar një familje, një strehë të tijën, pa lakun e borxhit dhe pa kompromisin e titullit të vjetër “kollovar”. Natyrisht që rinia po ‘tërbohet’ duke e nxjerrë fitues me mesazhe dhe përkrahje të shfrenuar. Politika e të dyja krahëve po druhet të reshtohet e ta gllabërojë. Po ruan me frikë deri të djelën…se fenomeni “Luiz” mund të jetë një goditje fatale për ta. Ai mund të akuzojë!

Sot, do akuzojmë në emër të tij. I kapur nga dara e “Iute”, Luiz Ejlli është një nga mijëra viktimat e aktivitetit të mikrokredive në Shqipëri. Në borxh 2 milion lekë të vjetra për shkak të një mikrokredie, Luizit i është bllokuar llogaria bankare nga 7 Prilli, duke e lënë pa asnjë lek deri në 24 Dhjetor 2022, kur Big Brother-i i hapi një “llogari” me çek të bardhë…

Burime nga banka Raiffeisen, tregojnë për DITA se llogaritë e sekuestruara si e Luiz Ejllit janë me mijëra, mbushur me emra të rinjsh e të rejash nga të gjitha fshatrat dhe qytetet e Shqipërisë. Ata bllokohen për shkak të borxheve të kredive konsumatore që merren lehtë edhe online, vetëm me një kartë identiteti, sidomos tek Iute.

Mikrokreditë e Iutes variojnë në vlera nga 200 mijë – 1 milion lekë të vjetra, me afat 1 deri në 36 muaj, që “luizët” i marrin zakonisht për nevoja emergjente, halle që s`presin por edhe blerje në qendra biznesi, dyqane elektroshtëpiakesh ose telefonash. Vetëm për vitin 2022, janë më shumë se 15 000 llogari individësh të sekuestruara vetëm për interes të Iutes-s, pohon burimi i bankës. Këto mikrokredi aplikohen në dyqane, ose nëpër kioskat e shumta që janë hapur kudo në Shqipëri.

Rastin e tij Luiz Ejlli do ta tregojë vetë me detaje, kur të dalë. Ai do i tregojë popullit të tij se sa para mori tek Iute, çfarë halli kishte, sa pagoi dhe nëse e dinte se do paguante shumëfish në fund.

Nëse e dinte se ndaj tij është zhvilluar një gjyq në Tiranë, në 25 Mars 2021, kur Gjykata nxorri një urdhër ekzekutimi që ai të paguante, sa lekë? Nëse e dinte se “Iute” e shiti kredinë e tij tek një tjetër mikrofinancë me emrin “Final”. Nëse e dinte se “Final” caktoi një kompani tjetër “ADCA” që të mblidhte borxhin ndaj tij dhe, nëse e dinte se një përmbarues ia kishte bllokuar llogaritë për borxhin serial, 208 mijë lek të vjetra!

Luizi i tregoi shqiptarëve që, për shkak të bujarisë së shkodranit Benet Beci, ishte punësuar tek KESH-i por nuk u tregoi nëse i merrte paratë e rrogës nga 7 prilli 2022, dita kur dara e “Iutes” me mashtruesit e tjerë, e kapi prej gryke dhe e mbajti fort, deri ditën kur u fut në Big Brother AlbaniaVip-2.

Me dhjetra të rinj si Luiz Ejlli janë gënjyer, janë mashtruar, janë dhunuar nga mashtrimi i madh me mikrokreditë, janë infektuar rëndë nga ky virus. Virus më i madh se ai i Pandemisë, që konkurron për vuajtje e pasoja, mashtrimin e tmerrshëm të firmave piramidale në vitet 1994-1997.

Në tre vitet e fundit, dhjetra kioskat dhe aplikimet online të mikrokredive “Iute” janë mbushur plot me të rinj shqiptarë, familjarë të varfër të qyteteve dhe fshatrave, të pamundurit, të dëshpëruarit e zhytur në borxhe të mëparshme, për të blerë kush një lavatriçe, kush një ‘telefon’, dikush aplikon për ilaçe ose dhurata.

Shumë prej tyre për të likujduar muajin e mëparshëm në borxh ushqimor. Të gjithë bashkë të futur në çarkun e madh të fajde-mikrokredive, çark i krijuar dhe lejuar të funksionojë si pjesë e sistemit financiar shqiptar, nën hundën e autoriteteve tona. Me lejen e tyre?!

Çdo ditë reklamat e bukura me shkëlqim shumë inkurajojnë marrje mikrokredish. Ato ftojnë nëpër media për t’u futur në kurthin e ëmbël, në borxhin fajde, që më pas prodhon histori të dhimshme, të trishta, shpesh tragjike, sidomos për të rinjtë që jo të gjithë do jenë “fitues” të një Big Brotheri, si Luiz Ejlli.

“Iutecredit Albania” dhe kioskat simotra u japin para për “7 minuta”, vetëm me një kartë identiteti nevojtarëve, sidomos të rinjve e të rejave të pamësuar ende me “hilet” e jetës, pa u dhënë atyre asnjë informacion të kuptueshëm për koston e këtyre kredive, për riskun, interesat e vërteta e ato të fshehura, duke i mashtruar pikërisht në injorancën që ka secili prej nesh, rreth njohurive financiare.

Me dhjetëra histori emigrimi lidhen pikërisht me pamundësinë e shlyerjes së këtyre mikrokredive në Shqipëri. Dhjetra të rinj futen në histori pa kthim, që përfundojnë në demoralizim për të ardhmen e tyre, në urrejtje për vendin ku kanë lindur, deri në mendime urrejtëse për familjen apo sjellje ekstreme vetëvrasëse.
——
Media ka shkruar e bërtitur shumë në letër, online dhe emisione në eter, për mashtruesit që shesin e blejnë mikrokredi për një kohë të gjatë. Kujtojmë vitet e fundit kur investigimet mediatike ekspozuan skemën e mashtrimit të mikrokredive krijuar nga MCA – ADCA, ZIG dhe STAR.

“Iutecredit Albania” dhe “Final”, pikërisht në kulmin e këtyre denoncimeve publike dhe hetimeve “intensive” ngritën perandorinë e tyre duke ngritur flamurin pirat të fajdeve dhe mashtrimit.

IuteCredit me seli në Talin të Estonisë së largët, shtet me 1.2 milionë banorë, erdhi dhe krijoi në 2016 në Shqipëri IuteCredit Albania, duke caktuar si drejtor dhe mëkëmbës të interesave shumëmilionëshe, shqiptarin me emër afrikan Akan Ajdin.

Estonezët Tarmo Sild dhe Allar Niinepuu erdhën në Shqipëri, ashtu si në Kosovë dhe Bosnje Hercegovinë. Ata u shtrinë në Maqedoni dhe Moldavi gjithashtu, pasi vendet balltike si Letonia dhe Lituania, estonezët e Iute-s i përzunë me ceremoni. Të njëjtën gjë bëri Banka Qendrore e Kosovës në 2019, kur e mbylli Iutecredit Kosova, pasi e quajti kërcënim ndaj sigurisë kombëtare të vendit dhe hodhi dyshime mbi lidhjet e sipërmarrësve letonezë me njerëz të përfshirë në aktivitete të pastrimit të parave.

Gjykata e Arbitrazhit Ndërkombëtar i dha të drejtë Bankës Qendrore të Kosovës në vitin 2022, kur Grupi Iutecredit-Europe e hodhi në gjyq Kosovën.

Banka Shtetërore e Bosnjës ka vedosur një sërë sanksionesh dhe kufijsh përgjatë vitit 2022 për Iutecredit Bosnja, duke përgatitur aktet ligjore për mbylljen e saj në këtë shtet ashtu, si në Kosovë.

Po Shqipëria çfarë bën? Po Banka e Shqipërisë? Po autoritetet ligjzbatuese? Përse heshtin? Ku është Drejtësia e re? Ku janë Prokurorët e “tmerrshëm” të SPAK?
“Iutecredit” në Kosovë u ndalua publikisht të japë kredi dhe u dëbua me ceremoni nga autoriteti i Bankës Qendrore të Kosovës. E njëjta “lutecredit”, me të njëjtin grup estonezësh vazhdon qetë dhe pa asnjë shqetësim në Shqipëri.

Guvernatori i Bankës së Kosovës i tha para tre viteve opinionit të vet publik, se po mbyllej një kompani mikrokrediti (Iutecredit) që kishte aplikuar norma tepër të larta interesi të kredisë dhe jashtë çdo standardi të lejuar për popullin e thjeshtë.

Po në Shqipëri? Duhet të dalë e të flasë “Luiz Ejlli” për këtë skandal të përmasave popullore?

“Afrikani” i Iutes në Shqipëri, Akan Ajdin, zgërdhihej me deputetët e Komisionit për Ekonominë dhe Financat në 14 qershor 2022, kur ata e thirrën për ta “qortuar” lidhur me Iuten dhe aktivitetin e saj. Ai u tha atyre: “Iute jep 12 000 kredi çdo muaj. Pse vijnë njerëzit tek ne? Sepse për një pjesë të mirë të këtyre, dyert e bankave janë mbyllur, ose e kanë malore!”
Akan-i ekspozoi një të vërtetë të hidhur që, sistemi serioz bankar në Shqipëri ka përfunduar misionin duke i lënë stafetën mashtruesve të mikrokredive. Akan-i nuk i tregoi deputetëve (dhe ata nuk e pyetën) të vërtetën se si Iute jep kreditë, dhe më pas i shet ato tek Final dhe Microcredit Albania, brenda një qarku të mbyllur dhe skeme mafioze, ku një frigorifer, celular, orë, ose lap- top që merret me kredi tek Iute, kthehet në një makth e rrënim ekonomik tek Final apo MCA, kur u troket në derë gjoba ADCA.
Akan Ajdin nuk i tregoi deputetëve (dhe ata nuk e pyetën), të vërtetën se sa nga 12 000 kreditë në muaj kthehen nga shqiptarët dhe sa përfundojnë në gjykatë. Sa shiten. Sa shumëfishohen dhe si kërkohen më pas. Sa e thellë është gropa që ka krijuar Iutecredit dhe simotrat e saj në jetët e shqiptarëve.
Akan Ajdin nuk i tregoi deputetëve se pas Final-it, që blen borxhet e Iutes, është pronari i kësaj shoqërie mikrofinanciare, mashtruesi famëkeq, Arben Meskuti. I denoncuar nga të gjitha mediat, autoritetet tatimore dhe Ministria e Drejtësisë, Meskuti vazhdon bisnesin me Ajdinin, paçka se ka marrë në qafë mijëra familje shqiptare, me permbarimin Zig dhe sot me mikrokredinë Final.

Viktima e fundit është beniamini i miliona shqiptarëve. Le të jetë Luiz Ejlli, ai që do thotë të vërtetën e tij kur të dalë, për të gjithë…
Le të jetë ai që do hapë siparin e do tregojë mbi këtë mashtrim të madh që ka gjunjëzuar rininë shqiptare. Ai nuk ka më nevojë për të likujduar 2 milionet e Iutes apo Finalit, se para do ketë boll, por vetëm të tregojë të vërtetën e tij!

The post Historia e panjohur e Luiz Ejllit/ Si u bë viktimë e mashtrimit nga banka IUTE CREDIT, 3 burrat që e futën në kurth appeared first on Albeu.com.

Kjo i mundëson kompanisë të zgjerojë ofertën e produkteve të saj. Nepermjet Velox Pay, klientët e IuteCredit do të mund të kryejnë pagesa, të marrin dhe të dërgojnë para, të transferojnë para në një llogari IBAN, të tërheqin nga ATM-të dhe të kryejnë çdo transaksion nëpërmjet aplikacionit ne celular.

Akan Ajdini, CEO i IuteCredit Albania: “Marrja nga Velox Pay e licencës për te operuar si Institucion I Parasë Elektronike do të thotë se ne mund të fillojmë biznesin e pagesave me Velox. Kjo është një mundësi shumë emocionuese nepermjet se ciles planifikojmë të zgjerojmë gamen e produkteve dhe përmirësojmë vazhdimisht përvojën e klientëve tanë.”

Tarmo Sild, CEO i IuteCredit Europe: “Kjo është pjesë e strategjisë sonë për të zgjeruar të gjitha shërbimet që ne ofrojmë në mënyrë dixhitale dhe në telefonat celularë. Ne mund të krijojmë përvoja të reja të jashtëzakonshme për klientët tanë.”

Klientët e IuteCredit do të kenë mundësinë të marrin kredinë e tyre direkt në portofolin e tyre elektronik, në aplikacionin MyIute. Gjithashtu, klientët e rinj qe do kene nje portofol elektronik mund ta mbushin ate me para duke aplikuar për një kredi me IuteCredit. “Klientët tanë do të jenë në gjendje të kryejnë transferta peer-to-peer në kohë reale, të paguajnë këstet e tyre të kredisë, faturat e shërbimeve, taksat lokale, të mbushin llogaritë e tyre celulare, të transferojnë para në llogaritë e tyre bankare apo edhe të paguajnë për mallrat e tyre në dyqane online ose në dyqane që përdorin QR dhe pagesa në afërsi,” shpjegoi Ajdini.

Sipas Ajdinit, klientët e IuteCredit mund të marrin gjithashtu dërgesat e tyre direkt në aplikacionin e tyre MyIute me çmimet më konkurruese. “Klienti ynë do të mund të përdorë pjesërisht kredinë apo gjendjen e krijuar për pagesa apo transferta, apo pjesërisht të tërheqë në bankomatet tona”, tha Ajdini.

“Duke shtuar vlerën e shërbimeve tona, ne do të inkurajojmë klientin të qëndrojë brenda ekosistemit tonë dhe do të krijojmë një përvojë të shkëlqyer klienti të një shërbimi me një ndalesë në mall të kryerjes së të gjitha shërbimeve në internet, si dhe do të krijojmë flukse të reja të ardhurash duke gjeneruar transaksione të vogla në volum të lartë”, shtoi Ajdini.

IuteCredit planifikon të fillojë ofrimin e shërbimeve të reja për klientët në pranverën e vitit 2022, sapo të jenë finalizuar zhvillimet dhe integrimet e nevojshme me bankat dhe partnerët.

Velox Pay u themelua në vitin 2020 dhe aksioneri i saj 100% është IuteCredit Europe AS.

IuteCredit – themeluar në 2008 – është një kompani lider evropiane e financave personale. Grupi është i specializuar në kreditë konsumatore nëpërmjet filialeve të tij 100%. IuteCredit u shërben klientëve aktualisht në Moldavi, Shqipëri, Maqedoni të Veriut, Bullgari, si dhe në Bosnje dhe Hercegovinë. Produktet e kredisë së IuteCredit janë kredi konsumatore të pasiguruara me afat maturimi nga 1 muaj deri në 48 muaj dhe kredi të siguruara për vetura me afat maturimi deri në 72 muaj. IuteCredit operon rrjetin e vet të ATM-ve, i cili përdoret përmes aplikacionit celular. Misioni i IuteCredit është të krijojë një përvojë të jashtëzakonshme në financat personale duke tejkaluar pritshmëritë e klientëve. www.iutecredit.com

The post IuteCredit Europe merr licencën për te operuar si Institucion i Parasë Elektronike në Shqipëri appeared first on Albeu.com.

Prokuroria e Fierit ka përfunduar hetimet për Paula Buzin, e cila u kallëzua nga disa ish-klientë se në emër të tyre, janë përfituar kredi pranë shoqërisë “Iute Credit Albania Sh.A” Dega Fier, për të cilat ata nuk kanë aplikuar dhe nuk i kanë përfituar personalisht.

Në përfundim të hetimeve është provuar se e pandehura, Paula Buzi, në cilësinë e punonjëses së dhënies së kredive pranë ‘Filialit Iute Credit’ Dega Fier, ka falsifikuar dokumentat e dhënies së kredive në emër të klientëve të mëparshëm të këtij filiali me qëllim përvetësimin për llogari të saj të shumave të kredive.

Në përfundim, ka rezultuar se praktikat e marrjes së kredive nuk janë nënshkruar nga personat, në emër të të cilëve rezultojnë të nënshkruara, por janë fallsifikuar nga e pandehura Paula Buzi duke përfituar dhe shumat përkatëse.
‘”Prokuroria pranë Gjykatës së Shkallës së Parë Fier ka përfunduar hetimin penal dhe ka dërguar për gjykim në Gjykatën e Shkallës së Parë Fier procedimin penal nr.1247 të vitit 2019 në ngarkim të së pandehurës Paula Buzi (Dimo), e akuzuar për kryerjen e veprave penale te “Mashtrimit në kredi” parashikuar nga neni 146 i K.Penal, e kryer 18 herë dhe “Falsifikimit të dokumentave” të parashikuar nga neni 186/3 i K.Penal, e kryer 18 herë në dëm të viktimës Shoqëria Iute Credit Albania.

Ky procedim penal është regjistruar mbi bazën e kallëzimit penal të shoqërisë “Iute Credit Albania Sh.A”, Tiranë në lidhje me disa raste të mashtrimeve në kredi nga ish-punonjësja e degës Fier, Paula Buzi. Në vijim janë regjistruar dhe disa kallëzime penale të disa qyteterave, ish klient të kësaj dege, që kanë kallëzuar se në emër të tyre janë përfituar kredi pranë shoqërisë “Iute Credit Albania Sh.A” Dega Fier, për të cilat ata nuk kanë aplikuar dhe nuk i kanë përfituar personalisht.
Pasi të gjitha këto kallëzime penale janë bashkuar në një procedim të vetëm penal dhe janë hetuar nga Seksioni i Posaçëm pranë Prokurorisë Fier, në përfundim të hetimit është provuar se, e pandehura në cilësinë e punonjëses së dhënies së kredive pranë Filialit Iute Credit Dega Fier, ka falsifikuar dokumentat e dhënies së kredive në emër të klientëve të mëparshëm të këtij filiali me qëllim përvetësimin për llogari të saj të shumave të kredive.

Gjatë hetimit të hetimit të këtij procedimi penal, Prokuroria e Fierit në bashkëpunim me Drejtorinë Vendore të Policisë Fier dhe Institutin e Policisë Shkencore Tiranë kanë kryer mbi 35 (tridhjetë e pesë) akte ekspertimi grafik shkrimi dhe nënshkrimi lidhur me verifikimin e të gjitha rasteve të kallëzuara. Në përfundim, ka rezultuar se praktikat e marrjes së kredive nuk janë nënshkruar nga personat, në emër të të cilëve rezultojnë të nënshkruara, por janë fallsifikuar nga e pandehura Paula Buzi duke përfituar dhe shumat përkatëse.
Nëpërmjet publikimit të këtij rasti kriminal, organi i prokurorisë sensibilizon të gjithë qytetarët që të denoncojnë në polici dhe prokurori çdo rast abuzimi lidhur me përvetësimin e kredive në emër të tyre nga persona të tjerë dhe të mos bien preh e skemave mashtruese në marrjen e kredive.’- njofton prokuroria.

The post Përdorte të dhënat e ish-klientëve sikur merrnin kredi, përfundojnë hetimet për ish-punonjësen e “Iute Credit” appeared first on Albeu.com.