Ish-presidentja Vjosa Osmani ka publikuar komunikatën e LDK-së lidhur me vendimin e marrë në Hagë, duke theksuar se Ushtria Çlirimtare e Kosovës mbetet simboli më krenar i historisë moderne të popullit shqiptar.

Në postimin e saj thuhet se UÇK-ja do të mbetet e tillë “dje, sot e përjetësisht”.

Sipas deklaratës, Serbia gjenocidale vrau mbi 13 mijë njerëz gjatë luftës në Kosovë. Rreth 10 mijë prej viktimave ishin civilë të masakruar, ndërsa mbi 1500 persona vazhdojnë të rezultojnë të zhdukur me dhunë dhe të prehen në varreza masive.

Komunikata nënvizon gjithashtu se dhunimet seksuale, torturat çnjerëzore, vrasjet e fëmijëve dhe krimet e tjera të rënda të kryera nga Serbia ende nuk kanë marrë përgjigje nga drejtësia ndërkombëtare. Në të njëjtën kohë, thuhet se Serbia vazhdon t’i mohojë këto krime dhe t’i shpërblejë autorët e tyre.

Sipas mesazhit, populli i Kosovës u ngrit për t’u përballur me këto krime dhe për të mbrojtur shtëpitë e tij. UÇK-ja përshkruhet si ushtria e popullit të Kosovës dhe si betimi i përgjakur i njerëzve të shtypur që synonin çlirimin e atdheut.

“Sot dhe përgjithmonë, do ta mbrojmë drejtësinë e luftës sonë çlirimtare. Shteti i pavarur e sovran i Kosovës është amaneti ynë i përbashkët”, përfundon deklarata.

The post Osmani pas vendimit të Hagës: UÇK-ja është krenaria më e madhe e historisë sonë moderne appeared first on Albeu.com.

Ish-presidentja Vjosa Osmani u shpreh se shpreson që të gjithë 18 deputetët e Lidhjes Demokratike të Kosovës do të votojnë Bekim Sejdiun për postin e Presidentit.

Sipas deputetes së LDK-së, mbështetja për këtë kandidaturë përbën një vendim në interes të shtetit, ndërsa ajo tha se dëshiron të mbetet optimiste për votën e të gjithë deputetëve të partisë.

“Tash kemi takim të Grupit Parlamentar dhe shpresoj shumë. Ky është një vendim në interes shtetëror, ndërsa kandidatura e Bekim Sejdiut i bën nder Kosovës”, deklaroi Osmani, duke nënvizuar se kandidati është propozuar nga LDK-ja.

E pyetur lidhur me qëndrimin e deputetit Avdullah Hoti, Osmani tha se kandidatura e Sejdiut është në përputhje me vendimet e strukturave të LDK-së.

“Besoj që mund të flisni me të. Unë nuk mund të flas në emër të tij, por po e përsëris: kandidatura e Prof. Dr. Bekim Sejdiut i bën nder të gjithë Kosovës. Ajo jo vetëm që përmbush të gjitha kriteret e përcaktuara unanimisht në mbledhjen e fundit të Grupit Parlamentar, por respekton edhe vendimin e fundit të Kuvendit të LDK-së, i cili i ka kërkuar kryetarit të bëjë çmos që Kosovës t’i sigurojë institucione. Në të njëjtën kohë, kjo kandidaturë i jep vendit mundësinë për të vijuar punët e rëndësishme në mbrojtje të demokracisë, të Kushtetutës dhe për forcimin e aleancave”, tha ajo.

Osmani theksoi se Sejdiu duhet të marrë votën e të gjithë deputetëve.

“Si LDK kemi bërë kompromis duke e vendosur gjithmonë interesin e Kosovës mbi çdo interes individual apo partiak. Tani, çdo deputet i Kuvendit të Kosovës, jo vetëm ata të LDK-së, ka përgjegjësi historike që vendit t’i sigurojë institucione stabile”, u shpreh ajo.

The post Osmani: Besoj se të 18 deputetët e LDK-së do ta mbështesin Sejdiun për President, kandidatura u propozua nga ne appeared first on Albeu.com.