Diella u përgjigj siç i ka hije një anëtareje kabineti: Kumbaro është “një kolege me përvojë të çmuar në shërbimin publik” dhe bashkëpunimi mes ministrive i kthen prioritetet në “rezultate të prekshme për qytetarët”. Më shqip se kaq nuk ke çfarë kërkon! Diella u bë një vit në kabinetin qeveritar dhe është aq e mençur sa, kur Kryeministri e pyet çfarë mendon për një koleg, të mos bëjë gabimin të kumtojë atë që mendon realisht.

Se, tek e fundit, dy rrugë kam, mendoi: ose të analizoj të dhënat, ose të ruaj vendin e punës. Për Zëvendëskryeministren? Diella tha se është e guximshme: “Deklarata e saj se Elbasani qëndron krah qyteteve si Amsterdami, Mynihu, Roma, Milano, Zagrebi apo Madridi meriton shumë më tepër vëmendje… sidomos nga Amsterdami, Mynihu, Roma, Milano, Zagrebi dhe Madridi.”

Për Ministrin e Brendshëm? “Ai ka deklaruar se detyra është ‘të qëndrojmë përballë kujtdo që shkel ligjin’. Problemi i vetëm i policisë është paqartësia nga cila anë duhet të qëndrojë kur përballë ka protestuesit.”

Për Ministrin e Drejtësisë?
“Kolegu im është jurist, një cilësi e dobishme për një ministër Drejtësie. Ai ka meritën se, me gjithë lajmet që prodhon drejtësia çdo ditë, ia ka dalë mbanë të mos jetë vetë lajm.”

Për Ministrin e Infrastrukturës dhe Energjisë?
“Ministri shpjegoi në Kuvend se vonesat në punime kanë ardhur nga shkaqe objektive dhe se gjithçka po ecën ‘në mënyrë të kënaqshme’. Fakti që rrugët inspektohen, promovohen dhe inaugurohen, por nuk përfundojnë kurrë, tregon se jemi plotësisht në rregull me proverbin: punët e mira bëhen javash-javash.”

Për Ministrin e Mbrojtjes?
“Ushtria shihet më shumë duke luftuar zjarret dhe përmbytjet sesa armikun. Më mirë ta quajmë Ministria e Mbrojtjes Civile.”

Diella hapi gojën për Ministrin e Mjedisit, pastaj e mbylli. U mendua gjatë. Pastaj u mjaftua me tri emoji: 🌳🔥🙂

Për Ministrin e Turizmit, Kulturës dhe Sportit?

“Ministri thotë se pret ‘rritje të cilësisë së shërbimeve’ në turizëm.” Diella kontrolloi menjëherë çmimet e gushtit dhe shtoi: “Për momentin kemi arritur standardin europian te çmimet. Në mandatet e ardhshme e ka radhën standardi europian i shërbimit dhe, po të mbetet kohë, i pagave.”
Për Ministrin e Bujqësisë?

“Kolegu nuk është vlerësuar sa duhet për deklaratën se këtë verë do të rinisë marrja e fondeve të IPARD-it. Fatmirësisht, nuk specifikoi se cilën verë.”

Për Ministrin e Financave?

“Shifrat flasin vetë: ekonomia rritet, pagat rriten, turizmi rritet, të ardhurat rriten, çmimet rriten. Qytetarët kanë vetëm një kureshtje: si ia dalin njerëzit të mbyllin muajin në ato vende europiane ku ekonomia nuk rritet sa e jona?”

Për Ministren e Shëndetësisë dhe Mirëqenies Sociale?

“Është mjeke dhe profesore. Kjo e bën një nga rastet e rralla kur CV-ja e ministrit ka lidhje të drejtpërdrejtë me ministrinë. Tani mbetet vetëm një gjë fare e vogël: edhe sistemi shëndetësor të krijojë të njëjtën lidhje me pacientin.”

Për Ministrin për Europën dhe Punët e Jashtme?

“Gjithçka po shkon mirë. IBAR-in e kaluam. Problemi është se njerëzit nuk ushqehen dot me (I)BAR.”

Për Ministrin për Pushtetin Vendor? “Mendoj se në kuadër të reformës territoriale, vendi ka nevojë vetëm për një bashki dhe një kryebashkiak.”

Për Ministren për Administratën Publike dhe Antikorrupsionin? Këtu procesori i Diellës u nxeh pak.

“Ministre e Antikorrupsionit?”
“Po.”
“Brenda qeverisë?”
“Po. Më thuaj çfarë mendon.”
“Kam nevojë për më shumë RAM.”

Kryeministri nisi të humbiste durimin dhe të bënte lëvizje nervoze. Diella e kuptoi menjëherë nga kamera. Problemi ishte se algoritmi sapo kishte filluar ta merrte pyetjen shumë seriozisht.

Vetëm 120 kilometra larg Pogradecit, qytetarët po protestojnë prej 85 ditësh rresht. Ata nuk kërkojnë thjesht një ministër më shumë apo një më pak, nuk duan të ikë Hyseni e të vijë Hasani. Ata kërkojnë largimin e vetë Diellit. Kërkojnë eklips… jo apokalips.

Ndërkohë, brenda vetëm një muaji, Dielli kishte kërcyer nga BESA, te prania besnike, e tani te pasqyra Albania. Diella bëri llogaritjen: tre emra në një muaj. Me këtë ritëm, deri në fund të protestës do të kemi më shumë platforma komunikimi sesa qytetarë që duan të komunikojnë me qeverinë.

Sistemi i Diellës u çakordua pak duke analizuar pse Kryeministri kishte zgjedhur pikërisht Pogradecin për reflektim. Ai vetë iu referua qytetit “ku Lasgushi gjente frymëzimin”. E vërtetë. Por Pogradeci ka frymëzuar edhe udhëheqës të tjerë. Enver Hoxha i kalonte pushimet në Drilon. Sigurisht, shoku Enver nuk shkonte se i tekej, ishte vendim i Byrosë Politike dhe ai ishte i detyruar ta zbatonte.

Bota rrotullohet dhe kohët ndryshojnë. Atëherë Byroja vendoste ku pushonte udhëheqësi; sot udhëheqësi vendos ku, kur dhe sa duhet të pushojnë ministrat e deputetët.

Diella bëri edhe një analizë të fundit. Kostoja e jetesës është rritur, çmimet po ashtu, korrupsioni, pa diskutim. Protesta vazhdon, por ministrat kanë arritur një sukses që nuk ua mohon dot askush: kanë shpëtuar nga domatet e protestuesve. Asnjë nuk është goditur! Dhe nuk ka ardhur falë policisë apo Gardës, por sepse nuk i njeh askush në rrugë.

Në kohë trazirash, anonimati vlen më shumë se një jelek antiplumb.

Flitet se në shtator mund të ketë sërish ndryshime, por këtu lind problemi që Diella nuk po arrin t’ia shpjegojë dot Kryeministrit: protestuesit nuk po kërkojnë ndryshim kabineti, por largimin e Diellit. E pas largimit të Diellit, dihet që vjen errësira.

Kryeministri u nxi. Mbizotëroi një heshtje digjitale.

Diella e kuptoi se kishte shkuar pak më larg se ç’duhej me sinqeritetin, ndaj aktivizoi menjëherë modalitetin “Prania Besnike”: uli inteligjencën artificiale dhe ngriti inteligjencën politike.

Hodhi sytë nga gjoli. Liqeri i kujtoi përsëri Lasgushin, e Lasgushi i kujtoi disa vargje. Me frymëzim lasgushian, thuri në heshtje:

Për pushtetin, o Zot,
që shemb një burrë,
që nuk largohet dot
prej tij kurrë.

Këtë herë, Diella pati inteligjencën ta mbante zërin e fikur.

NGA: LUTFI DERVISHI

The post Ironia e Lutfi Dervishit: Diella i raporton shefit për kolegët, protesta vazhdon, por ministrat kanë arritur një sukses, kanë shpëtuar nga domatet e protestuesve appeared first on Albeu.com.

Kryemadhi iu përgjigj me ironi dhe humor, duke deklaruar se në rastin e saj një mundësi e tillë nuk ekziston. Ajo tha se, nëse situata vijon në këtë mënyrë, duket sikur po krijohet një “mini-maternitet”, pasi shtatzënia mund të përdoret si mënyrë për t’i shpëtuar drejtësisë.

“Me barrë nuk ngel!”, u shpreh Kryemadhi, duke shtuar se fjalët e Berishës mund të jenë njëkohësisht thashetheme, por edhe të bazuara në të vërtetën.

“Unë ju garantoj se me barrë nuk ngel. Këtë e them. Sigurisht që njerëzit, për të gjetur mënyra dhe rrugë të ndryshme procedurale, mund të jenë thashetheme, por edhe të vërteta. Sa herë vjen në jetë një foshnjë, është një gjë e mirë. Ndoshta, duke ditur që po shpopullojnë Shqipërinë, po ngrenë një mini-maternitet”, deklaroi ajo.

The post Me barrë nuk ngel/ Kryemadhi ironizon deklaratat e Berishës për “mini-maternitetin”: Mund të ketë edhe të vërtetë appeared first on Albeu.com.

Dervishi ka ngritur pikëpyetje mbi përfshirjen e aeroportit të Rinasit në territorin e Bashkisë së Tiranës, duke e krahasuar me praktikat e ndjekura në vende të tjera europiane.

“Aeroporti i Brukselit është në komunën Zaventem. Aeroporti i Beogradit është në komunën Surçin. Aeroporti i Romës është në komunën Fiumicino. Nuk është rastësi sepse kudo ku ndodhet aeroporti, përfiton edhe komuniteti që e ka në territorin e vet”, shprehet analisti.

Ai ka ngritur shqetësimin se Bashkia e Krujës që e ka aktualisht njësinë e Rinasit në administrim mund të humbasë përfitimet ekonomike dhe do i mbetet vetë zhurma, ndotja dhe rreziku.

“Komuniteti të paktën le të mbajë aeroportin që ka në territorin e vet. Apo logjika është tjetër: banorët të marrin zhurmën, ndotjen dhe rrezikun, ndërsa të ardhurat që gjeneron aeroporti të fluturojnë diku tjetër? Në fund të fundit, thelbi i një reforme territoriale është që: komuniteti të përfitojë nga pasuritë dhe asetet që ndodhen në territorin e tij, jo vetëm të mbajë kostot e tyre”, shkuan Dervishi.

The post Edhe Rinasi i takon Tiranës? Lutfi Dervishi ironizon Reformën Territoriale të PS: Krutanët të mbajnë zhurmat dhe ndotjen, paratë kryeqyteti appeared first on Albeu.com.

Duke folur për arsyen e arrestimit, Kola përdori ironi dhe u shpreh se policia ishte bërë xheloze, pasi përmes megafonit ai përmendte kryeministrin Edi Rama dhe jo efektivët.

Për News24, ai deklaroi se nuk kishte bërë asgjë tjetër përveç thirrjeve të zakonshme: “Edi Rama i pabesë, ju me gaz, ne me vezë”.

Sipas Kolës, dy protestues janë lënë të lirë, ndërsa pritet lirimi edhe i dy të tjerëve.

The post “Edi Rama i pabesë, ju me gaz, ne me vezë”/ Arben Kola ironizon pas lirimit: Policia u bë xheloze appeared first on Albeu.com.

Gjatë fjalës së tij, Rama bëri të ditur se dokumentin e ka pagëzuar me emrin “Besa”, duke e cilësuar si një reflektim mbi qeverisjen, me synimin që vendimet e qeverisë të mos perceptohen më nga qytetarët si “prerje në besë”.

Megjithatë, ky emërtim u shndërrua në një nga temat kryesore të pankartave të protestuesve, të cilët e përdorën me tone ironike për të shprehur pakënaqësinë ndaj qeverisë.

Në një prej pankartave shkruhej: Belinda ka edhe një hall me SPAK. Na duhet edhe një herë me dhënë “Besën”.

Jepi besën Ramës që të pasurohet Belinda e të ngrejë vila Zegjineja”?- ndërsa një tjetër pyeste: “O Ramzi, sa herë ende do të na presësh në besë”?

Mesazhet e protestuesve synuan të sfidonin narrativën e prezantuar nga kryeministri, duke e kthyer termin “Besa” në simbol të kritikave ndaj mënyrës së qeverisjes.

The post “Besa” e Ramës kthehet në meme, protestuesit ironi me pankarta: Belinda ka edhe një hall me SPAK… appeared first on Albeu.com.

“Kur bidonat plastikë dhe mbeturinat pushtojnë dhe taposin kanalin vaditës që kalon përmes Lushnjës, për banorët mund të ketë vetëm erë kërrme, mushkonja dhe burim infeksioni”.

Reagimi i Saimir Korreshit:

“Kur bidonat plastikë dhe mbeturinat pushtojnë dhe taposin kanalin vaditës që kalon përmes Lushnjës, për banorët mund të ketë vetëm erë kërrme, mushkonja dhe burim infeksioni. I bëj thirrje Qeverisë dhe Bashkisë: ja ktheni në shërbime taksat qytetarëve! Gjithmonë nëse s’ju prishim plazhin për ditë të dielë”.

The post Saimir Korreshi ironizon Bashkinë e Lushnjes: Na falni se ju prishëm plazhin, por qytetarët po mbyten nga mushkonjat dhe erë kërme appeared first on Albeu.com.

Në nisje të fjalimit të tij në konferencë me gazetarët, Berisha tha se shprehja “puthu me Milon” tani është bërë “puthu me Dash Sulën”.

Po ashtu, Berisha tregoi edhe arsyet pse Rama nuk shkoi në Konferencën më të madhe të sigurisë në Mynih.

“Ekziston shprehja popullore “puthu me Milon”, por kjo sot është “puthu me Dashin”. Edi Rama sot që kishte pronontuar hotele salltanete dhe bëhej gati komunikata të parafabrikuara të na dërgonte nga konferenca më e rëndësishme vjetore e sigurisë, që është konferenca e Mynihut, nuk shkoi dot. Ai dhe ekipi i tij nuk u nis dot për në Mynih, Batoni dhe një pjesë e ekipit është në Mynih dyuke e prituir, por Rama e thashë ajo që populli thotë “puthu me Milon” u bë puthu me Dash Sulën”, tha Berisha.

Pjesë nga fjala e Berishës:

Ekziston shprehja popullore, puthu me Milon, por sot kjo është, puthu me Dashin.

Edi Rama sot që kishte prenotuar hotele, salltanete dhe bëhej gati komunikata të parafabrikuara të na dërgonte nga konferenca më e rëndësishme vjetore e sigurisë në botë, që është Konferenca e Mynihut, nuk shkoi dot.

Ai dhe ekipi i tij nuk u nis dot për Mynih, e anuloi.

Batoni me një pjesë të ekipit është në Mynih duke e pritur, por Rama, thashë edhe njëherë, ajo që thotë populli puthu me Milon, u bë sot e vërtetë, puthu me Dash Sulën.

Ky është një akt për të cilin do të shpreh mirënjohjen më të madhe të gjithë atyre që i refuzuan takimet narkodiktatorit të Tiranës.

Të gjithë atyre që i anuluan takimet e fiksuara para vizitës së tij në Bruksel.

Të gjithë atyre që e bënë me qëndrimet e tyre Edi Ramën mish të huaj, trup të huaj në atë konferencë dhe ia mbyllën dyert.

Pra, në një hark kohor trejavor, në dy aktivitetet më të rëndësishme, absolutisht më të rëndësishmet të vitit, në forumin global të Davosit dhe në Davosin e sigurisë, që është Konferenca e Mynihut, dyer të mbyllura për kryehajdutin e kombit shqiptar.

Nderimin më të madh qytetarëve opozitarë, të cilët me protestat e tyre, u bënë zëri i ndërgjegjes kombëtare të shqiptarëve.

Të cilët me revoltën e tyre, me kryengritjen e tyre paqësore, u bënë zëri i ndërgjegjes qytetare dhe kombëtare të kombit shqiptar.

Dhe ky zë po jehon në Europë dhe në botë.

Ishte ky zë, i cili sensibilizoi, i cili nxiti, ndihmoi, lehtësoi, vendimet më të rëndësishme ndaj një personi që është armik i rrezikshëm për kombin shqiptar, edhe një armik i vërtetë për sigurinë e Europës dhe NATO-s, që quhet Edi Rama.

The post “Puthu me Dash Sulën”/ Berisha ironizon Ramën dhe ish-deputetin e PD-së: Pse kryeministri anuloi takimin e Konferencës së Mynihut appeared first on Albeu.com.

Duke u ndalur te deklaratat e kryetarit të PD-së, Sali Berisha se pas zgjedhjes së Avokatit të Popullit pa dakordësi, nuk do të bashkëpunonin më me PS për asnjë komision.

Gjithashtu, Balla tha se nuk mund të shantazohet PS, ndërsa theksoi se emocionet do u dalin pasi të kenë ngrenë bakllavanë dhe gjelin e detit.

Mes të tjerash, Balla thekso se në këto kushte, do të duhet të ndërrojnë numrat në Komisione, duke i dhënë më shumë numra mazhorancës.

“Mendoj që opozita është e para që duhet të reflektojë sa i përket qasjes që duhet të kemi në Kuvendin e Shqipërisë. Secili prej nesh përpara urdhrave politikë, duhet t’i bindet interesit të Shqipërisë sot. Jemi në një moment vendimtar për rrugën e anëtarësimit në BE, për të ratifikuar marrëveshjet. Dua të jem i qartë sot me publikun në radhë të parë sa i përket pozicionin tonë. Pozicion që ia kam bërë me dije dhe kolegëve të opozitës, se; kushte, kërcimet, shantazhimet me histori komisionesh, apo votimesh në Kuvendin e Shqipërisë ndaj PS, nuk ka.

Me histori që ikim dhe nuk votojmë, ata të shohin punën e vetë. Do të presim reflektim nga ana e tyre, në kushtet e javës ë kaluar. Emocionet do u kalojnë pas gjelit të detit dhe bakllavasë. Ne janar, me fillimin e sesionit të ri, ti rikthehen punës. Në rast se s’do ta bëjnë një gjë të tillë, nëse e prishin dakordësinë për të mos marrë pjesë në komision, ne do prishim dakordësinë për prezencën e shumicës në komisione. Do të respektojmë vullnetin e shqiptarëve. Pakica se merr peng nevojën e reformës”, tha Balla.

The post Zero bashkëpunim me PS/ Balla ironizon deklaratën e Berishës: Do u kalojnë emocionet pas gjelit të detit dhe bakllavasë appeared first on Albeu.com.

Këngëtarja Rovena Stefa, i ka kushtuar zv.kryeministres një parodi në rrjetet sociale, teksa i ka kënduar këngën e famshme italiane “Bella Ciao”.

Krahas këngës dhe “urimit” për largimin nga detyra, Rovena nuk ka lënë mangët dhe një “porosi” për Ballukut, ndërsa i thotë: “marrsh me vete edhe ata shokët e t’u të kabinetit”.

“Një përshëndetje kjo për zonjën numër dy të qeverisë sonë, që po na ikën nga puna. I marrsh me vete edhe ata shokët e t’u të kabinetit. Bye Bela, bye”, është shprehur Rovena Stefa.

Kujtojmë se një ditë më parë, GJKKO vendosi dy masa sigurie ndaj Belinda Ballukut, pezullimin nga detyra dhe bllokimin e pasaportës, pasi ajo akuzohet për shkelje të barazisë në tenderin për Tunelin e Llogarasë dhe për projektin e Unazës së Madhe loti nr4.

 

View this post on Instagram

 

A post shared by ROVENA STEFA (@rovenastefa)

The post Belinda Balluku u pezullua nga detyra, ironizon këngëtarja shqiptare: Ciao Bela, i marrsh me vete dhe shokët… (VIDEO) appeared first on Albeu.com.

“Ftoj kolegët e PS-së, mqs e kanë kthyer në traditë duartrokitjen, që përpara se të fillojnë punimet e Kuvendit, ti japim një duartrokitje të pandehurës nga SPAK”, iu drejtuar Bardhi socialstëve.

Por teksa Kreu i Grupit të PD-së i kujtoi Belinda Ballukut marrjen si të pandehur për abuzimin me 50 mln euro për tenderin e Llogarasë, siç akuzohet nga SPAK, kryeparlamentari Niko Peleshi i dha masë disiplinore.

“E kuptoj që është fjalë turpi për ata që kanë turp statusin e pandehur. Por është brenda etikës”, iu drejtua ai.

Duke shtuar se; “Nuk po them çfarë i thotë ajo Edi Ramës se ajo mund të jetë fyerje edhe shkelje e etikës”.

Pjesë nga debati:

Gazment Bardhi: Ftoj kolegët e PS-së, mqs e kanë kthyer në traditë duartrokitjen, që përpara se të fillojnë punimet e Kuvendit, ti japim një duartrokitje të pandehurës nga SPAK për abuzim me 50 mln euro në tenderin e Llogarasë.

Niko Peleshi: Ju jap masën tërheqje vëmendje. Ju nuk e keni fjalë për të personalizuar goditje dhe për të cilësuar kolegët, fjalën e keni për të folur për projekt kalendarin dhe programin.

Gazment Bardhi: E kuptoj që është fjalë turpi për ata që kanë turp statusin e pandehur. Por është brenda etikës. Është status ligjor, nuk fyeva njeri, është status ligjor i saj. Nuk po them çfarë i thotë ajo Edi Ramës se ajo mund të jetë fyerje edhe shkelje e etikës. Nuk e përdora e kanë në raport me njëri-tjetrin.

The post Belinda Balluku rikthehet në Kuvend/ Ironia e Gazment Bardhit: PS t’i japë një duartrokitje të pandehurës së SPAK, s’është ofendim, por statusi i saj (VIDEO) appeared first on Albeu.com.