Një marrëveshje prej 9 milionë eurosh mes Ipswich Town dhe Wrexham për sulmuesin e kombëtares shqiptare, Anis Mehmeti, ishte arritur gjatë merkatos së verës, por vetë lojtari vendosi ta bllokonte transferimin. Kështu ka rrëfyer gazetari Anton Cicani, i cili hodhi dritë mbi atë që ndodhi prapa kuintave të këtij operacioni.

I ftuar në një emision sportiv, Cicani shpjegoi se klubi i Championship kishte rënë dakord me Ipswich për shifrën e kartonit, por Mehmeti nuk pranoi të rikthehej në kategorinë e dytë të futbollit anglez. Sipas gazetarit, dëshira e madhe e lojtarit mbetet të provojë veten në Premier League, një objektiv që ai nuk ishte i gatshëm ta sakrifikonte me një kalim në një divizion më të ulët.

Ky qëndrim i sulmuesit duket se ka ndikuar edhe në marrëdhënien me drejtuesit e Ipswich-it. Cicani shtoi se bordi i klubit e ka vënë në dijeni trajnerin se nuk janë të interesuar ta shohin Mehmetin të aktivizohet në elitë. Megjithatë, tekniku i ekipit nuk ka shfaqur asnjë rezervë ndaj tij, madje e hodhi në fushë në një ndeshje miqësore kundër Arsenalit, ku shqiptari la shenjë duke shënuar menjëherë pas inkuadrimit.

Pavarësisht përfoljeve të shumta për një largim të mundshëm gjatë verës, Mehmeti vijoi të jetë pjesë e Ipswich Town. Megjithatë, realiteti i pesë javëve të para të kampionatit tregon se ai ende nuk e ka realizuar ëndrrën për të luajtur në Premier League. “Kjo është situata në të cilën ndodhet Anis Mehmeti. Nuk mund ta parashikoj se çfarë do të sjellë afati i janarit,” përfundoi Cicani.

The post Refuzimi i Mehmetit për kalimin në Championship, Cicani zbulon prapaskenat e marrëveshjes 9 milionëshe me Wrexham appeared first on Albeu.com.

Ipswich Town do të luajë sot në Liverpool përballë Evertonit, në një transfertë të vështirë të javës së 5-të të Premier League. Takimi nis në orën 16:00.

Pasi realizoi kundër Arsenalit në “Carabao Cup”, sulmuesi i Kombëtares shqiptare, Anis Mehmeti, ka mundësi të mëdha të regjistrojë sot debutimin e tij në Premier League me fanellën e Ipswich Town.

Ekipi i drejtuar nga Gary O’Neil do të jetë mysafir i Evertonit, ndërsa Mehmeti mund të përmbushë ëndrrën për të luajtur në elitën e futbollit anglez.

The post Anis Mehmeti pranë debutimit të ëndërruar në Premier League pas golit kundër Arsenalit appeared first on Albeu.com.

Ipswich Town do të luajë pas pak minutash kundër Arsenalit në raundin e 1/16-ave të Kupës së Ligës (Carabao Cup), ndërsa trajnerët e të dyja skuadrave kanë bërë publike formacionet titullare.

Në përbërjen e Ipswich bie në sy aktivizimi nga minuta e parë i sulmuesit të Kombëtares, Anis Mehmeti. Futbollisti shqiptar, i cili ishte mbajtur për një periudhë të gjatë jashtë skuadrës nga trajneri Gary O’Neil, do të ketë mundësinë të dëshmojë aftësitë e tij përballë Arsenalit.

Paraqitja në këtë takim mund të ketë rëndësi të madhe për Mehmetin. Një performancë pozitive mund t’i sigurojë ftesën e trajnerit të Shqipërisë për ndeshjet e Ligës së Kombeve ndaj Bjellorusisë dhe San Marinos. Rolando Maran do ta publikojë listën të premten, pas 3 ditësh.

The post Anis Mehmeti merr lajmin e madh nga Ipswich Town, tri ditë para publikimit të listës së Kombëtares appeared first on Albeu.com.

Ipswich Town ka vendosur të vijojë bashkëpunimin me Anis Mehmetin, një vendim që u bë publik pak ditë më parë. Sulmuesi shqiptar kishte shprehur dëshirën për të qëndruar te skuadra, ndërsa klubi anglez ka zgjedhur të llogarisë te kontributi i tij.

Ekipi i sapongjitur në Premier League ka dorëzuar pranë federatës listën me 25 lojtarët e gatshëm për pjesën e parë të sezonit. Në këtë grup përfshihet edhe futbollisti matjan.

Gjatë merkatos, për shërbimet e yllit të Kombëtares shqiptare u interesuan disa klube të Championship-it. Milwall, Birmingham City, Derby County dhe Wrexham ishin skuadrat e përmendura si destinacione të mundshme, por Mehmeti e kishte marrë vendimin e tij dhe tashmë e ardhmja e tij lidhet me Ipswich Town.

Mbetet për t’u parë nëse sulmuesi do ta bindë trajnerin për ta aktivizuar dhe nëse do të arrijë të lërë pas krahëve tri javët e para të kampionatit. Në këtë periudhë, ai nuk u përfshi as në stol, ndërsa tani pritet të tregojë vlerat e tij për të kaluar nga tribuna në fushë.

The post Ipswich Town konfirmon Anis Mehmetin, sulmuesi shqiptar pjesë e listës së Premier League appeared first on Albeu.com.

Teksa Ipswich Town përballet me Manchester United në javën e dytë të Premier League, mesfushori i Kombëtares shqiptare, Anis Mehmeti, mbetet edhe një herë plotësisht jashtë skuadre, pa zënë as një vend në pankinë.

Përjashtimi i tij i dytë radhazi nga trajneri Gary O’Neil konfirmon se 25-vjeçari nuk bën më pjesë në projektin e klubit anglez. Por situata duket edhe më kritike.

Burime nga Anglia raportojnë se skuadrat e interesuara për shërbimet e tij, si Birmingham dhe Wrexham, janë të dekurajuara nga qëndrimi i lojtarit, i cili vijon të shpresojë për një mundësi të re te Ipswich Town.

Në këto rrethana, me Mehmetin që refuzon transferimin dhe vazhdon të përjashtohet nga O’Neil, ekziston një rrezik real që ai të qëndrojë jashtë veprimit deri në afatin kalimtar të janarit, një ndërprerje e detyruar prej pesë muajsh.

The post Nga mungesa në ekip te rreziku i një pauze 5-mujore, skenari më i zi për yllin e Kombëtares appeared first on Albeu.com.

Ipswich Town është aktivizuar fuqishëm në ditët e fundit të merkatos verore dhe pritet të zyrtarizojë së shpejti dy afrime. Bëhet fjalë për mesfushorin qendror Exequiel Palacios nga Bayer Leverkusen dhe sulmuesin Tammy Abraham nga Aston Villa.

Këto lëvizje pakësojnë ndjeshëm mundësitë e Anis Mehmetit për të luajtur një rol të rëndësishëm te Ipswich Town. Mesfushori shqiptar mund të largohet madje gjatë kësaj merkatoje verore, teksa për të kanë nisur të shfaqen disa alternativa.

Nëse Ipswich Town vendos ta largojë Mehmetin, 25-vjeçarit do t’i ndërpritej ëndrra për të debutuar dhe për të pasur vazhdimësi në Premier League. Pikërisht mundësia për të luajtur në elitën angleze ishte arsyeja kryesore që ai u largua nga Bristol City në Championship, por situata nuk po zhvillohet sipas pritshmërive.

The post Ipswich Town pranë dy përforcimeve, zbehen shpresat e Anis Mehmetit për Premier League appeared first on Albeu.com.

Një situatë e pazakontë po shoqëron sulmuesin e Shqipërisë, Anis Mehmeti. Pas transferimit gjatë merkatos së dimrit nga Bristol City te Ipswich Town, ku pritej të kishte një rol të rëndësishëm, 25-vjeçari nuk u përfshi në skuadër për përballjen ndaj Sunderland.

Arsyet e mungesës së tij nuk janë bërë të qarta. Ndërkohë, prej 2 muajsh Mehmeti nuk ka publikuar asgjë në Instagram dhe aktiviteti i tij në “story” ka qenë thuajse i papërfillshëm, në ndryshim nga periudha e mëparshme.

Veprimi i tij në rrjetet sociale ka shtuar pikëpyetjet. Sulmuesi shqiptar ka hequr të gjitha postimet që lidhen me kohën kur aktivizohej te Bristol City, si edhe ato që kishin të bënin me Kombëtaren shqiptare.

Mungesa e minutave dhe izolimi i tij i dukshëm kanë krijuar pasiguri edhe për Shqipërinë. Kombëtarja do të përballet gjatë muajit shtator me Bjellorusinë dhe San Marinon, në kuadër të Ligës së Kombeve.

The post Anis Mehmeti në hije te Ipswich Town, alarm për Kombëtaren para sfidave në Ligën e Kombeve appeared first on Albeu.com.

Sezoni i ri i Premier League do të nisë më 22 gusht dhe tashmë kanë mbetur vetëm pak ditë deri në start. Përveç klubeve që synojnë trofeun më prestigjioz të futbollit anglez, interes të veçantë pritet të tërheqin edhe skuadrat e sapongjitura në elitë.

Një prej tyre është Ipswich Town, që të shtunën do të debutojë kundër Sunderland. Pjesë e ekipit është edhe sulmuesi i Kombëtares shqiptare, Anis Mehmeti, i cili po pret mundësinë e artë për të treguar vlerat e tij.

Ndërkohë, shqiptari është përfshirë së fundmi në zërat e merkatos, me një kalim të mundshëm te Birmingham City. Klubi garon në Championship, kategorinë e dytë për nga rëndësia në Angli. Sipas “Transferfeed”, 25-vjeçari konsiderohet një alternativë për skuadrën, ndërsa huazimi i tij nga Ipswich për një sezon shihet si një mundësi.

Një skenar i tillë lidhet me pikëpyetjet rreth minutazhit të Mehmetit. Media në fjalë raporton se, nën drejtimin e trajnerit Gary O’Neil, futbollisti shqiptar mund ta ketë të vështirë të sigurojë minutat e nevojshme për të shpërthyer.

Për momentin, gjithçka mbetet vetëm në nivel interesi, pasi nuk ka ende asnjë zhvillim konkret. Vetë Mehmeti e ka vëmendjen të përqendruar te sfida e debutimit.

Anësori i majtë është i lidhur me Ipswich Town me kontratë deri në qershor të vitit 2029, ndërsa “Transfermarkt” e vlerëson kartonin e tij në 15 milionë euro.

The post Anis Mehmeti në radarët e klubit të Championship-it, pak ditë përpara debutimit në Premier League appeared first on Albeu.com.