Ministrja e Mjedisit, Fitore Pacolli, bëri të ditur se Inspektorati i MMPH-së, së bashku me IHMK-në, ka kontrolluar aktivitetin e operatorit SH.P.K. “Drena” në Skenderaj, i cili prodhon lëngjet “RUKO” dhe produktet e bylmetit “Drena”.

Gjatë inspektimit u konstatua se për linjën e prodhimit të lëngjeve kompania përdorte katër puse vetanake dhe konsumonte deri në 10 mijë litra ujë në ditë. Ujërat e ndotura derdheshin pranë lumit Klina, pa pasur Leje Ujore të lëshuar nga Ministria.

Për këtë arsye, shfrytëzimi i ujit për këtë linjë është pezulluar dhe aktiviteti nuk mund të vijojë derisa operatori të pajiset me Leje Ujore.

Shkelje janë evidentuar edhe në linjën e përpunimit të qumështit. Për shkak të mungesës së një impianti për trajtimin e ujërave të përdorura, “Drena” është dënuar me gjobë prej 3 mijë eurosh dhe është urdhëruar të instalojë e të vërë në funksion impiantin.

Pacolli theksoi se bizneset vendore duhet të mbështeten në zhvillimin e tyre, por njëkohësisht janë të detyruara të veprojnë në përputhje me ligjin dhe të ruajnë pasuritë natyrore të Kosovës.

The post Drena” ndalon shfrytëzimin e ujit në Skenderaj pas inspektimit të MMPH-së appeared first on Albeu.com.

Inspektorati Mjedisor ka rrënuar sot pesë objekte pa leje, të ngritura në pronë publike pranë Liqenit të Radoniqit.

Njoftimin, të shoqëruar me pamje nga aksioni, e ka publikuar në Facebook ministrja në detyrë e Mjedisit, Fitore Pacolli.

Ajo ka theksuar se hapësirat natyrore dhe pronat publike do të mbrohen me vendosmëri, duke bërë të ditur se ndërhyrje të ngjashme do të organizohen edhe në të ardhmen.

Në postimin e saj të plotë, Pacolli shkroi:

“Pesë ndërtime të ngritura në pronë publike pranë Liqenit të Radoniqit janë shembur!

Inspektorati Mjedisor ka rrënuar sot pesë objekte të ndërtuara pa leje në pronë publike te Liqeni i Radoniqit. Ne do t’i mbrojmë me vendosmëri pronat publike dhe hapësirat tona natyrore.

Aksione të këtij lloji do të vijojnë, me synimin që ligjshmëria të vendoset në çdo cep të Kosovës dhe të ruhen pronat ujore, burimet e ujit të pijshëm, si dhe natyra e bukur e Kosovës.

Uji përbën një pasuri që duhet ruajtur për qytetarët dhe brezat që do të vijnë.”

The post Fitore Pacolli publikon pamje nga shembja e objekteve pranë Liqenit të Radoniqit: Aksionet do të vazhdojnë appeared first on Albeu.com.