Kryeministri Hristijan Mickoski bëri të ditur se inflacioni vjetor në Maqedoninë e Veriut gjatë korrikut ishte 2,3 për qind, ndërsa çmimet me pakicë u rritën me 1,8 për qind.

Sipas tij, mesatarja e inflacionit në Bashkimin Evropian ishte 2,93 për qind, çka, siç theksoi Mickoski, e vendos Maqedoninë e Veriut nën nivelin mesatar evropian. Ai shpjegoi se BE-ja është partneri më i madh tregtar i vendit, ndaj kjo shifër është e rëndësishme për krahasim.

Mickoski iu referua edhe situatës së vitit 2022, kur vendi drejtohej nga qeveria e LSDM-së dhe BDI-së. Ai tha se në atë periudhë inflacioni ishte dyshifror dhe herë pas here arrinte deri në 20 për qind, ndërsa në korrik ishte mbi 14 për qind, përkatësisht rreth 14,7 për qind. Sipas tij, në atë kohë mesatarja e BE-së ishte dy herë më e ulët se inflacioni në Maqedoninë e Veriut.

“Në korrik, inflacioni në Maqedoni, pra rritja vjetore e çmimeve, ishte 2,3%, ndërsa çmimet me pakicë në markete u rritën me 1,8%. Në Bashkimin Evropian mesatarja ishte 2,93%. E përmend Evropën sepse BE-ja është partneri ynë më i madh tregtar. Ju kujtohet viti 2022, kur qeverisnin LSDM-ja dhe BDI-ja dhe kur inflacioni me dy shifra arrinte herë pas here deri në 20%; atëherë na thoshin se ishte i importuar. Në atë periudhë, mesatarja evropiane ishte dy herë më e ulët se inflacioni në vendin tonë. Sot, te ne ai është gjysma e mesatares evropiane”, deklaroi Mickoski.

Ai shtoi se renditja e Maqedonisë së Veriut në rajon ka ndryshuar ndjeshëm. Duke krahasuar 12 vende — Slloveninë, BeH-në, Kroacinë, Malin e Zi, Kosovën, Shqipërinë, Serbinë, Rumaninë, Bullgarinë, Greqinë, Turqinë dhe Maqedoninë — kryeministri tha se në korrik të vitit 2022 vetëm Turqia, Rumania dhe Bullgaria kishin rezultate më të dobëta, ndërsa vendi renditej i nënti. Tani, sipas tij, Maqedonia e Veriut është e dyta, me të gjitha vendet e tjera pas saj. “Kjo është diferenca mes kësaj qeverie dhe asaj. Në atë kohë inflacioni ishte mbi 14%, mendoj 14,7% ose diçka e tillë, ndërsa tani është 2,3%”, përfundoi Mickoski.

The post Mickoski: Inflacioni në Maqedoninë e Veriut gjatë korrikut ishte më i ulët se mesatarja e BE-së appeared first on Albeu.com.

Enti Shtetëror i Statistikave njoftoi se indeksi i kostos së jetesës, përmes të cilit matet inflacioni, në korrik u rrit me 0,1 për qind krahasuar me qershorin e këtij viti.

Rritja më e theksuar, prej 4,4 për qind, u evidentua në sektorin e transportit. Shtrenjtim u regjistrua gjithashtu te rekreacioni dhe kultura, banimi dhe shërbimet hotelierike.

Nga ana tjetër, ushqimet dhe pijet joalkoolike shënuan uljen më të madhe, me 1,1 për qind, ndërsa rënie pati edhe te orenditë dhe pajisjet për amvisëri.

Krahasuar me të njëjtën periudhë të një viti më parë, kostoja e jetesës në korrik ishte 2,3 për qind më e lartë, kurse çmimet me pakicë u rritën me 1,8 për qind.

The post ESHS: Inflacioni mujor në korrik arriti 0,1%, ndërsa kostoja e jetesës u rrit 2,3% në nivel vjetor appeared first on Albeu.com.

Kryeministri i Maqedonisë së Veriut, Hristijan Mickoski, deklaroi në përgjigje të një pyetjeje të një gazetari për ecurinë e inflacionit në vend dhe krahasimin me shtetet e tjera, se Maqedonia ka normën më të ulët të inflacionit në rajon.

Sipas tij, vendi po përballet me një periudhë tejet të vështirë. Ai theksoi se aktualisht ka dy luftëra në zhvillim, të cilat i cilësoi serioze. Mickoski shtoi se, bazuar në informacionet më të fundit që ka marrë, lufta në Gjirin Persik po nis sërish të përshkallëzohet, ndërsa po vazhdon edhe lufta në Ukrainë. Në këtë situatë, ai tha se sfida kryesore mbetet sigurimi në kohë dhe në sasi të mjaftueshme i energjisë për qytetarët dhe bizneset.

Mickoski u shpreh gjithashtu se, në aspektin statistikor, vendi ka çmimin më të ulët të karburanteve. Ai pranoi se mund të ketë zëra që e lidhin këtë me nivelin e pagave dhe me çmimin e benzinës dhe naftës, por nënvizoi se ky është një produkt i bursës. Sipas tij, kjo nuk varet as nga logjika sipërmarrëse dhe as nga politikat e qeverisë, pasi bëhet fjalë për një produkt të tregut bursier, ku të gjithë furnizohen nga i njëjti treg aksionesh. Ai shtoi se thelbësore është mënyra se si menaxhohet situata nga ai moment e deri te përdorimi nga qytetarët, duke theksuar se kështu ka ndodhur për dekada.

Duke folur për kundërshtarët politikë, ai tha se këtë pyetje do t’ua linte atyre që, sipas tij, vijojnë të jetojnë në një moçal politik, si opozita dhe struktura të caktuara që në Manastir përpiqen të krijojnë opinion publik përmes audiencës. Ai shtoi se, kur u jepet mundësia të bëjnë diçka, për fat të keq jo vetëm që nuk veprojnë, por edhe kthehen pas. Për këtë arsye, sipas Mickoskit, ata do të mbeten gjithmonë margjinalë politikë.

Sa i përket inflacionit, Mickoski tha se ai është një nga segmentet që shfaqet në periudha të tilla sfiduese. Ai theksoi se në qershor vendi arriti nivelin më të ulët të inflacionit në krahasim me të gjitha shtetet e rajonit. Po ashtu, ai u shpreh veçanërisht i kënaqur që inflacioni për ushqimin është rreth 2.5%, për këpucët dhe veshmbathjet rreth 2.1%, pra nën 3%. Nga ana tjetër, ai sqaroi se deri në 3.4% ndikojnë duhani, produktet e duhanit dhe alkooli, si edhe shërbimet e transportit për shkak të çmimeve të larta të karburantit, tha Mickoski.

The post Mickoski: Në qershor, Maqedonia regjistroi inflacionin më të ulët në rajon appeared first on Albeu.com.