Mineralet e lëndët djegëse, tekstilet e këpucët si dhe materialet e ndërtimit e metalet kanë ndikuar në këtë rënie në qershor, ndërsa me nivele më të ulëta janë tkurrur makineritë e pajisjet. I vetmi grup që ka shënuar rritje, duke amortizuar disi rënien e më të mëdhenjve është ai i ushqimeve, pijeve e duhanit. Madje, në qershor, ky i fundit ka kaluar për herë të parë në historinë e eksporteve në të dytin më të madh në vend, pas tekstileve e këpucëve.

Sipas INSTAT, në qershor 2023, eksportet e mallrave arritën vlerën 38 miliardë lekë, duke u ulur me -17,3%, në krahasim me të njëjtën periudhë të një viti më parë dhe me -4,0%, në krahasim me Maj 2023. Kjo është rënia më e dytë e thellë me bazë vjetore, pas prillit (-19.3%).

Sipas INSTAT, Gjatë muajit Qershor 2023, në uljen e eksporteve prej -17,3%, kanë ndikuar grupet: “Materiale ndërtimi dhe metale” me -9,7 pikë përqindje, “Minerale, lëndë djegëse, energji elektrike” me -4,5 pikë përqindje, “Produkte kimike dhe plastike” me -4,4 pikë përqindje, etj. Ndërsa, pozitivisht ka ndikuar grupi: “Ushqime, pije, duhan” me +4,6 pikë përqindje.

Eksportet, gjatë këtij gjashtëmujori janë ulur me -7,4%, krahasuar me një vit më parë. Grupet që kanë ndikuar negativisht në uljen vjetore të eksporteve, janë: “Materiale ndërtimi dhe metale” me -6,8 pikë përqindje, “Minerale, lëndë djegëse, energji elektrike” me -2,2 pikë përqindje, “Produkte kimike dhe plastike” me -1,0 pikë përqindje, etj. Ndërsa, pozitivisht kanë ndikuar grupet: “Ushqime, pije, duhan” me +2,1 pikë përqindje dhe “Makineri, pajisje dhe pjesë këmbimi” me +0,8 pikë përqindje.

Në janar shitjet jashtë vendit u zgjeruan me 20.2% me bazë vjetore, ndërsa në shkurt u zgjeruan me vetëm 2.8%. rënia nisi në mars, me 11.7%, u thellua në prill me 19.3% dhe vijoi tendencën negative në maj me -11.7%. Në qershor tkurrja u thellua sërish në 17.3%.

Fasoni bie ndjeshëm në qershor

Pas një përmirësimi në maj, eksportet e “Tekstile dhe këpucë”, iu rikthyen rënies në qershor. Sipas INSTAT, eksportet e këtij grupi u tkurrën me 8.5% në qershor, duke zbritur në gati 11 miliardë lekë. Sipas eksportuesve, arsyeja kryesore lidhet me rënien e ndjeshme të euros që ul të ardhurat e eksportuesve kur konvertohen në lekë.

Faktorë të tjerë që kanë ndikuar janë rritja e pagës minimale që ka shtuar kostot e punës, tkurrja e kërkesës nga jashtë sidomos për këpucë (nga ndryshimi i motit, shitësit e pakicës kanë krijuar stoqe të mëdha), kriza ekonomike në Europë që ka ulur kërkesën si dhe zhvendosja e prodhuesve në Indi e vende të tjera të Azisë për shkak të kostove më të ulëta.

Për 6 mujorin, eksportet e këtij grupi ranë lehtë me 0.45%. “Tekstilet e këpucët” mbeten grupi më i madh në vend, me 29% të totalit.

Bien dhe mineralet e lëndët djegëse

“Mineralet dhe lëndët djegëse” ranë me 24% në qershor. Burime nga Bankers Petroleum thanë se ndonëse ata të gjithë prodhimin po e çojnë për eksport, rënia ka ardhur si rrjedhojë e çmimeve më të ulëta të naftës.

Për 6 mujorin, tkurrja është 10%.

Ky grup vijon të mbetet i dyti më i madh në vend me 21.7% të totalit për 6 mujorin.

Materialet e ndërtimit dhe metalet në tkurrje të ndjeshme

Materialet e ndërtimit dhe metalet vijuan me tkurrjen e ndjeshme dhe në qershor, me -41.4%, duke pasur ecurinë më negative nga të gjitha grupet. Sipas burimeve nga Kurum, një ndër eksportuesit më të mëdhenj në vend, tendenca lidhet me disa faktorë, si rënia e çmimeve, por dhe frenimi i kërkesës.

Për 6 mujorin, ky grup u tkurr me 39%, duke dhënë ndikimin më negativ në ecurinë e eksporteve.

Ky grup është i treti më i madh për 6 mujorin, me 17.9% të totalit.

Ushqimet, pijet dhe duhani ishin grupi i dytë më i madh në qershor

“Ushqimet, pijet dhe duhani” u rritën me vetëm 1.6% në prill (nga 18.2% në mars). Përfaqësuesit e sektorit thonë se janë ndikuar nga rënia e çmimeve në tregjet ndërkombëtare për shkak të motit të favorshëm, që ka rritur prodhimin.

Megjithatë në maj sektori iu rikthye rritjes së shpejtë, duke u zgjeruar me 24.6%. kjo tendencë ka vijuar edhe në qershor, kur ky grup ishte i vetmi që vijoi zgjerimin e fortë me 42.6%, duke kaluar për herë të parë këtë muaj në të dytin më të madh në vend, pas tekstileve e këpucëve, me 18.8% të totalit, teksa mineralet e materialet e ndërtimit ranë ndjeshëm, duke zvogëluar peshën e tyre në totali e eksporteve.

Për 6 mujorin, ky grup është zgjeruar me 20.7%, duke pasur ecurinë më të mirë, ndërsa mbetet i katërti më i madh me 13% të totalit, nga 10% në të njëjtën periudhë të një viti më parë.

Industria automotive po ndien efektet e rënies së euros

Eksportet e Makineri, pajisje, pjesë këmbimi ishin deri në muajin mars grupi që po shënonte ecurinë më të mirë të eksporteve si rrjedhojë e zgjerimit të fabrikave që punojnë në industrinë mbështetëse automotive. Por, në prill, edhe ky grup shënoi rënie të eksporteve me 5.9% me bazë vjetore, duke u ndikuar nga zhvlerësimi i euros.

Megjithatë në maj, grupi iu rikthye rritjes, duke u zgjeruar me 10.5%. por, në qershor grupi shënoi sërish rënie, me 4.8%, si rrjedhojë e rënies së euros.

Për 6 mujorin grupi është rritur me 10%, teksa përbën 8.9% të totalit të eksporteve.

Rritet deficiti tregtar

Në Qershor 2023 eksportet e mallrave arritën vlerën 38 mld lekë, duke u ulur me -17,3%, në krahasim me të njëjtën periudhë të një viti më parë dhe me -4,0%, në krahasim me Maj 2023. Importet e mallrave arritën vlerën 75 miliard lekë, duke u ulur me -7,5%, në krahasim me një vit më parë dhe me -6,8%, në krahasim me Maj 2023.

Defiçiti tregtar i këtij muaji është 37 miliard lekë, duke u rritur me 5,4%, krahasuar me Qershor 2022 dhe ulur me -9,6%, në krahasim me Maj 2023.

Në këtë gjashtëmujor eksportet e mallrave arritën vlerën 234 miliard lekë, duke u ulur me -7,4%, ndërkohë importet e mallrave arritën vlerën 439 miliard lekë, duke u ulur me -1,6%, krahasuar me një vit më parë. Defiçiti tregtar arriti vlerën 204 mld lekë, duke u rritur me 5,9%, krahasuar me të njëjtën periudhë të 2022.

Bien eksportet drejt Italisë, Greqisë e Spanjës

Sipas INSTAT, Në muajin Qershor 2023, vendet me të cilat Shqipëria ka pasur ulje më të madhe të eksporteve, në krahasim me Qershor 2022 janë: Italia (9,4%), Greqia (40,7%) dhe Spanja (47,9%).

Ndërsa, vendet me të cilat eksportet kanë pasur rritje më të madhe, janë: Zvicra (34,8%), Kina (10,1%) dhe Ukraina (63,0%).

Gjatë këtij gjashtëmujori vendet me të cilat Shqipëria ka pasur ulje më të madhe të eksporteve, në krahasim me një vit më parë, janë: Italia (10,6%), Gjermania (30,3 %) dhe SHBA (57,8%). Ndërsa, vendi me të cilin eksportet kanë pasur rritjen më të madhe, është: Spanja (67,0%), Greqia (16,1%) dhe Maqedonia (12,4%).

Në muajin Qershor 2023, vendet me të cilat Shqipëria ka pasur uljen më të madhe te importeve, janë: Italia (6,4%), Kosova (46,5%) dhe Rusia (77,3%). Ndërsa, vendet me të cilat importet kanë pasur rritjen më të madhe të importeve, në krahasim me Qershor 2022 janë: Kina (50,6 %), Gjermania (15,2%) dhe SHBA (48,8%).

Gjatë këtij gjashtëmujori, vendet me të cilët Shqipëria ka pasur uljen më të madhe të importeve, në krahasim me një vit më parë, janë: Turqia (18,4%), Greqia (11,9%) dhe Italia (3,8%). Ndërsa, vendet me të cilat importet kanë pasur rritjen më të madhe janë: Kina (39,7%), Zvicra (103,1%) dhe SHBA (49,0%).

Shkëmbimet tregtare me vendet e BE-së zënë 59,2%, të gjithë tregtisë. Në Qershor 2023, eksportet drejt vendeve të BE-së zënë 75,6% të eksporteve gjithsej dhe importet nga vendet e BE-së zënë 50,9 % të importeve gjithsej. Partnerët kryesorë tregtarë janë: Italia (29,6%), Kina (9,0%), Turqia (7,2%) dhe Greqia (6,8%).

Shkëmbimet tregtare, për gjashtëmujorin e parë 2023, me vendet e BE-së zënë 59,3% të gjithë tregtisë. Në periudhën Janar – Qershor 2023, eksportet drejt vendeve të BE-së zënë 74,1% të eksporteve gjithsej dhe importet nga vendet e BE-së zënë 51,4% të importeve gjithsej. Partnerët kryesorë tregtarë janë: Italia (30,2 %), Kina (7,6%), Turqia (7,0%) dhe Greqia (6,8%).

The post Thellohet drama e eksporteve, bien 17.3% në qershor; Bizneset shtojnë humbjet nga rënia e euros appeared first on Albeu.com.

Sipas të dhënave zyrtare të INSTAT në janar-mars të këtij viti, nga 18 grupet kryesore të produkteve ushqimore, 13 prej tyre ishin me rënie në krahasim me 3-mujorin e parë të vitit 2022.

Në shumicën e grupeve rënia ishte dyshifrore duke treguar një tendence të qëndrueshme që nisi që vitin e kaluar.

Aktorët e tregut pohuan se importet po bien për dy arsye kryesore: E para rënia e konsumit si rrjedhojë e çmimeve të larta pas luftës në Ukrainë; E dyta tkurrja e popullsisë nga niveli i lartë i emigracionit.

Rënien më të madhe të importeve e kanë shënuar sheqernat dhe ëmbëlsirat, pasi në këtë grup sasitë e importuara ishin 43.5% më të ulëta në krahasim me të njëjtën periudhe të një viti më parë. Grupi i dytë më rënien me të madhe ishin drithërat me 42 %, vaji me 41%, produktet e industrisë së blojës me 40.6 %.

Rënia e importeve të sheqernave dhe drithërave i faturohet kryesisht emigracionit të lartë të rinjve gjatë vitit të fundit. Me 2022 kanë kërkuar azil në BE dhe në Britaninë e Madhe rreth 30 mijë persona, shumica mbi 80 për qind të rinj në moshë.

Adi Haxhiymeri, drejtues i Shoqatës Përpunuese të Miellit thotë se tkurrja e popullsisë se re në moshë jep efekte te menjëhershme tek importet e drithërave, pasi sipas tij kjo grup-moshë janë konsumatorët më të mëdhenj të brumërave. Tregtarët në tregjet e pakicës pohojnë gjithashtu se importi i ëmbëlsirave ka rënë nga tkurrja e popullatës së re në moshë.

Rënie të madhe shënoi edhe importi i vajit me 40%, bimët industriale me 21%, frutat dhe arrat e ngrënshme me 20%, peshku me 17.6%, zarzavatet me 17 për qind etj.

Në anën tjetër nga gupet e ushqimeve rritje kanë pësuar vetëm importet që lidhen me produktet nga kafshët, të tilla si bulmeti dhe mishi. Rritja e importeve në këto produkte po vjen si rrjedhojë e krizës që po kalon blegtoria e vendase ku numri i kafshëve po tkurret me shpejtësi në fermat e vogla si rrjedhojë e pakësimit dhe plakjes së popullsisë në zonat rurale. Mungesa e prodhimit vendas ka bërë që çmimet e bulmetit të rriten me ritmet shumë të larta vitin e fundit.

Në tremujorin e parë importet e kafshëve të gjalla u rriten me 22.8%, importet e mishit me 12I dhe importet e bulmetit me 12 për qind.

Disa produkte bulmeti nga importi kanë nisur të bëhen konkurruese me prodhimet vendase jo vetëm në cilësi, por edhe në çmime./monitor

The post Ngërçi i konsumit, të gjitha importet e ushqimeve me rënie në 3-mujor përveç mishit dhe bulmetit appeared first on Albeu.com.

“Ajo që BE-ja ofron dhe me vonesë, është shumë pak, është vetëm një pikë në oqeanin e nevojave“, tha Kryeministri polak Mateusz Morawiecki në një konferencë shtypi.

Komisioni Evropian ka ofruar 110 milionë dollarë ndihmë për fermerët e Europës Qendrore, si shtesë në një paketë të mëparshme ndihme prej 61.5 milionë dollarësh. KE-ja thotë gjithashtu se do të marrë masa parandaluese urgjente për produkte të tjera, si gruri, misri dhe farat e lulediellit, por shtetet e Evropës Qendrore duan që kjo listë të zgjerohet, duke përfshirë mjaltin dhe disa lloje mishrash.

Ekonomia e Ukrainës është tejet e varur nga bujqësia dhe vendimi për ndalim nga vendet evropiane do të sillte një goditje të konsiderueshme për këtë vend, njoftoi agjencia ‘Bloomberg’, duke cituar organizatën ‘UkrAgroConsult’.

Tani për tani, Rumania ka vendosur të mos i ndalojë produktet ukrainase duke lejuar tranzitin e tyre përmes portit të saj të Konstancës në Detin e Zi.

Disa vende të Evropës Qendrore u bënë porta për një tepricë produktesh ushqimore nga Ukraina, pas një bllokimi nga Rusia të porteve të Detit të Zi. Iniciativa e Detit të Zi e ndërmjetësuar nga Kombet e Bashkuara dhe Turqia ka mundësuar kalimin e sigurt të dërgesave në drith përmes këtij korridori, por Rusia po kërcënon që të mos e rinovojë më atë, pas skadimit të marrëveshjes më 18 maj.

Ministri i Jashtëm rus Sergej Lavrov tha të enjten se rinovimi i marrëveshjes varej nga ajo nëse Perëndimi do të hiqte kufizimet që prekin eksportet bujqësore ruse. Kremlini tha të premten se po monitoronte njoftimet për një ndalim të mundshëm të eksporteve ruse dhe se sanksionet e reja perëndimore do të dëmtonin ekonominë globale.

“Ne e dimë se SHBA-të dhe BE-ja po shqyrtojnë në mënyrë aktive sanksione të reja“, u tha gazetarëve zëdhënësi i Kremlinit Dmitry Peskov. “Ne besojmë se sanksionet aktuale kundër Federatës Ruse dhe hapat e rinj shtesë që po mendojnë të ndërmarin SHBA-të dhe BE-ja, sigurisht që do të godasin edhe ekonominë globale”.

Ndërkohë luftimet në Bakhmut janë ndezur dhe Kievi tha të premten se ndërsa forcat ruse kishin bërë disa përparime në qytetin lindor, situata vazhdonte të ishte nën kontroll. “Situata është e tensionuar, por nën kontroll”, shkruante zëvendësministrja ukrainase e Mbrojtjes Hanna Malyar, në aplikacionin e mesazheve ‘Telegram’.

Zonja Malyar i bëri komentet pasi Ministria ruse e Mbrojtjes bëri të ditur në një konferencë shtypi të premten se trupat e saj po luftonin në pjesën perëndimore të Bakhmutit, e vetmja pjesë e qytetit ukrainas ende nën kontrollin e forcave të Kievit.

The post Katër vende të BE-së ndalojnë importin e produkteve ushqimore nga Ukraina appeared first on Albeu.com.

Kosova duket se blen goxha shumë mallra në Shqipëri. Por, kjo nuk po ndodh ngjashëm me Shqipërinë.

Nga të dhënat e fundit të Doganës së Kosovës, ka dalë se qytetarët dhe bizneset e Kosovës kanë importuar mallra nga Shqipëria në vlerë të 254 milionë eurove.

Kurse, eksporti për në shtetin “vëlla” nuk ka qenë shumë i lartë, është sjell tek 100 milionë euro.

“Kosova gjatë vitit 2022 ka importuar mallra nga Shqipëria në vlerë prej 254 milionë euro, derisa ka eksportuar mbi 100 milionë euro mallra”, thuhet në të dhënat e doganës.

Sipas të dhënëve Kosova, Shqipërinë e ka partnerin e tetë sa u përket importeve, derisa kjo e fundit renditet si partneri i tretë i Kosovës për nga eksportet.

Në bazë të këtyre shifrave, Shqipëria mbulon rreth 4.5 për qind të importeve të përgjithshme të Kosovës, derisa 11 për qind e eksporteve të Kosovës shkojnë në Shqipëri.

Si për import ashtu edhe për eksport, Kosova me Shqipërinë më së shumti shkëmbime tregtare kanë pasur me hekur dhe energji elektrike.

top 15 produktet që Kosova importoi dhe eksportoi në Shqipëri gjatë vitit 2022, duke u bazuar në të dhënat e Doganës së Kosovës.

Importet nga Shqipëria në Kosovë

1-Shufra çeliku në vlerë prej 107.6 milionë euro

2-Energji elektrike – 16.4 milionë euro

3-Çimento Portland, jo e bardhë – 22.3 milionë euro

4-Preparate sipërfaqësore për fasada, mure të brendshme, dysheme, tavane – 6.9 milionë euro

5-Profile alumini – 6.6 milionë euro

6-Bitum nafte – 5.1 milionë euro

7-Ujë mineral 3.3 milionë euro

8-Qumësht me yndyrë mbi 1% – 3 milionë euro

9-Domate te freskëta – 3 milionë euro

10-Shalqinj – 2.3 milionë euro

11-Xeherore dhe koncentrate nikeli – 2.2 milionë euro

12-Pije freskuese – 2.1 milionë euro

13-Speca të freskëta – 2 milionë euro

14-Tranguj – 1.9 milionë

15-Patate – 1.2 milionë euro

Eksportet e Kosovës në Shqipëri

1-Mbetje të hekurit – 16.7 milionë euro

2-Energji elektrike – 6.6 milionë euro

3-Skrap dhe mbetje tjera alumini – 6 milionë euro

4-Pije freskuese – 4.9 milionë euro

5-Kafshë për therje dhe mish gjedhi – 2.6 milionë euro

6-Pllaka, fleta, filma, prej plastike – 1.9 milionë euro

7-Vaj ushqimor luledielli – 1.7 milionë euro

8-Dyshekë të ndryshëm – 1.5 milionë euro

9-Krunde gruri – 1.1 milionë euro

10-Sapun për tualet 1.1 milionë euro

11-Birrë me dhe pa alkool – 907 mijë euro

12-Miell gruri – 872 mijë euro

13-Jorganë dhe jastëkë të ndryshëm – 820 mijë euro

14-Zhavorr i lyer me katran për të shtruar rrugët – 640 mijë euro

15-Serra – 550 mijë euro

Qeveritë shqiptare të Kosovës dhe Shqipërisë janë mbledhur disa herë vitet e fundit me qëllim për të lehtësuar tregtinë mes dy vendeve dhe shtuar shkëmbimet tregtare.

Kosova vazhdon të jetë e varur nga importi i mallrave nga shtetet e huaja.

Vlera e mallrave të importuar është 5 miliardë e 603 milionë euro apo 20 për qind më shumë se vitin paraprak, ndërsa vlera e mallrave në eksport ishte 869.5 milionë euro.

Vetëm gjatë vitit 2022 në vendin kanë hyrë mbi 5 miliardë euro mallra, derisa 371 milionë vetëm nga Serbia.

Dogana e Kosovës ka treguar se të hyrat e mbledhura për në vitin 2022 ishin 1 miliard e 531 milionë euro apo 11.23 për qind më shumë.

The post Nga uji te pijet energjike, dyshekët dhe specat, çfarë eksportohet dhe importohet më shumë mes Shqipërisë dhe Kosovës appeared first on Albeu.com.

“Iraku do të ishte një partner i preferuar bashkëpunimi në importimin e gazit dhe naftës në Gjermani”, tha kancelari Olaf Scholz pas një takimi me kryeministrin e ri të Irakut, Mohammed Schia al-Sudani, në Berlin. Importet e gazit mund të shpërndahen nga Gjermania edhe më tej në vende të tjera europiane.

Scholz theksoi, se Gjermania nuk do të jetë sërish e varur vetëm nga një furnizues gazi si dikur me Rusinë. Nga Rusia përpara sulmit ndaj Ukrainës furnizohej më shumë se gjysma e importeve gjermane të gazit. Tani Gjermania nuk mer më gaz nga Rusia.

Iraku do të kthehet në eksportues të gazit

Al-Sudani theksoi qëllimin e vendit të tij, që të avancojë edhe më tej eksportin e gazit nga Iraku. “Ne kemi plane ambicioze për përdorimin e gazit, që shoqëron prodhimin e naftës dhe digjet gjatë këtij procesi”, tha kryeministri irakian. “Ne e kemi paraqitur këtë mundësi dhe kemi ftuar sipërmarrjet gjermane të investojnë në këtë sektor.”

Asnjë vend tjetër në botë nuk është kaq shumë i varur nga të ardhurat prej naftës sa Iraku. Sipas të dhënave të Agjencisë Ndërkombëtare të Energjisë, Iraku është vendi i pestë në botë për prodhimin e naftës. Edhe gazi eksportohet përmes terminalit LNG të të Basra Gas Company të hapur në vitin 2022.

Në kuadër të kësaj vizite Siemens Energy dhe ministri irakian e Energjetikës Siad Ali Dahil nënshkruan një deklaratë rakordimi për zgjerimin e infrastrukturës së furnizimit me energji në Irak. Konkretisht Siemens Energy do të zgjerojë centralet që punojnë me energji fosile dhe të rigjenerueshme. Projektet synojnë të reduktojnë ndërprerjet e vazhdueshme të elektricitetit në Irak dhe të ulin emisionet e dioksidit të karbonit.

Iraku vuan vazhdimisht nga furnizimi i keq me elektricitet duke pasur ndërprerje të vazhdueshme. Kjo krahas gjendjes së vështirë ekonomike dhe korrupsionit janë arësyet për protetstat e vazhdueshme, që e kanë tronditur këtë vend vitet e fundit./DW/

 

 

The post Gjermania do të importojë gaz nga Iraku appeared first on Albeu.com.

Këto të dhëna që po nxirren nga raportet e vazhdueshme, konfirmohen edhe nga komuniteti i biznesit, nga i cili po thonë se marrëveshjet e nënshkruara Kosovë-Shqipëri nuk implementohen dhe ende ka shumë barriera.

Megjithatë, rritja e importit me Serbinë, po arsyetohet edhe me ngritjen e çmimeve për mallrat.

Në nanën tjetër, deputeti i Kuvendit të Kosovës nga radhët e LDK-së, Avdullah Hoti deklaron se së importet nga Serbia janë rritur së fundi.

Kritika në këtë drejtim ka edhe Ferat Shala në PDK. Ditë më parë edhe Dhoma e Tregtisë dhe Industrisë në Kosovë, ka kërkuar të blihen produkte vendore e asgjë të prodhuar në Serbi pasi që ky shtet në vazhdimësi është duke e penguar qarkullimin e mallrave tona përmes Serbisë./express

The post Kosova rrit importin nga Serbia, bashkëpunimi ekonomik me Shqipërinë në nivel të ulët appeared first on Albeu.com.

Kjo shifër parashikohet të rritet edhe më tej po të kemi parasysh faktin që mbeten ende të pambuluar muaji nëntor dhe ai dhjetor. Gjasat janë që nëse nuk do të kemi përmirësim të situatës hidrike në vend, importet të kalojnë vlerën 500 milionë euro për vitin 2022, diçka që ishte paralajmëruar edhe më herët në deklarata gjatë këtij viti nga kreu i qeverisë Rama.

Shqipëria është aktualisht në gjendjen e emergjencës së furnizimit me energji e cila u shpall nga tetori i një viti më parë dhe do të shtrihet deri në mes të vitit të ardhshëm. Sigurimi i energjisë është bërë gjithnjë e më i vështirë për vendin për shkak se kushtet hidrike vijojnë të mbeten problematikë. Pas një përmirësimi të lehtë disa javë më parë tashmë kaskada e Drinit ka “avulluar” pasi prej saj është prodhuar thuajse çdo ditë energji në bazë të nevojave dhe mundësive që ka pasur KESH për të alternuar sigurimin e energjisë në tregun e lirë.

Nga raportimi i të dhënave të kësaj kaskadë në 31 tetor rezulton se rezerva energjetike e mbetur në të është 448 GWh, një nivel ky tejet modest dhe që tregon se nëse situate hidrike nuk përmirësohet në vijim sigurimi i energjisë do të varet kryesisht në import. Në 31 tetor KESH prodhoi 14 mijë MWh nga kaskada apo mbi 2/3 e sasisë së nevojshme për konsum në vend nga prodhimi në kaskadë. Niveli i Fierzës në 31 tetor ishte 268 metra duke mbetur kështu poshtë mesatares historike për këtë muaj që sipas të dhënave zyrtare është 273.5 metra. Nëse nuk do të kemi nisje të shirave atëherë blerjet do të jenë në bursë ku luhatja e çmimeve është e lartë.

Çmimet në Bursën e Hungarisë gjatë dy javëve të fundit kanë qenë relativisht të ulëta në raport me mesataren e përgjithshme që ka përkufizuar këtë vit që ka qenë kryesisht mes 250-300 euro MWh. Rënia e kërkesës për energji por dhe kushtet e mira të motit kanë bërë që presioni mbi çmimet të jetë më i ulët dhe për rrjedhojë nga mesi i tetorit e deri në fund të tetorit çmimet mesatare të luhateshin në maksimalisht 200 euro/MWh në 103 euro MWh minimalisht në bandë. Kuptohet kjo sasi ishte më e shtrenjtë për oraret pik.

Gjithsesi çmimet e energjisë për datën 2 nëntor u rritën me 57 për qind për profilin bazë në raport me datën 1 nëntor dhe 77 për qind për oraret e pikut. Kjo rritje e befte lidhet me kërkesën e cila nga data 1 në datën 2 nëntor shënoi rritje me rreth 20 për qind.

Ndërkohë për datën 3 nëntor 1 MWh energji në bazë u shit me 165 euro MWh dhe në pik me 183 euro. Volumi ditor ra me 5 për qind në raport me një ditë më parë. Ndërkohë për datën 3 nëntor 1 MWh energji në bazë u shit me 165 euro MWh dhe në pik me 183 euro. Volumi ditor ra me 5 për qind në raport me një ditë më parë.

Mbetet e paqartë sesi do të vijojë ecuria e çmimeve në bursë dhe pikërisht bashkuar me situatën problematike hidrike qeveria ka bërë të qartë se nga data 1 nëntor fasha 800 KWh për familjarët është në fuqi. Në një tentativë për të nxitur kursimin është vendosur se çdo kilovat mbi këtë fashë konsumi do faturohet me 42 lekë për kilovat duke e rritur kështu ndjeshëm koston. Në një reagim Ministria e Infrastrukturës dhe Energjisë deklaroi se nëse do të lihet në fuqi fasha edhe për nëntorin apo jo mbetet të shihet në vijim sesi do të paraqiten treguesit. /Monitor

The post Importet e energjisë, 406 milionë euro për janar-tetor, ulet ndjeshëm rezerva energjetike në kaskadë appeared first on Albeu.com.

“Do ta përgjysmojmë naftën deri në verë dhe do të jemi në zero në fund të vitit, dhe më pas do të vijë gazi”, ka thënë ministrja gjermane e Jashtme, Annalena Baerbock, raportoi BBC-ja të mërkurën.

Gjermania aktualisht blen 1/4 e vajit të saj dhe 40% të gazit nga Rusia dhe ka paralajmëruar se do të përballet me recesion nëse furnizimet ndalojnë papritur.

SHBA-ja tashmë ka ndaluar importet ruse të naftës, kurse Britania planifikon t’i largojë deri në fund të vitit.

Bashkimi Evropian ka thënë se do të kalojë në furnizime alternative dhe se do ta bëjë Evropën të pavarur nga energjia ruse “përpara vitit 2030”.

Gjermania ka ndaluar fillimin e një gazsjellësi të madh rus, Nord Stream 2, për shkak të fillimit të luftës nga Rusia në Ukrainë.

The post Gjermania do të ndalojë importin e naftës nga Rusia deri në fund të vitit appeared first on Albeu.com.