Sipas njoftimit zyrtar të Qeverisë, Xhaferi i ka dorëzuar shkresë kryetarit të Kuvendit, Jovan Mitrevski dhe nga ai kërkon që në seancën e radhës edhe ai të shkarkojë ministrat Fatmir Mexhitin dhe Azir Aliun.

“Kryetari i Qeverisë së Republikës së Maqedonisë së Veriut, Talat Xhaferi, dorëzoi shkresë deri te Kryetari i Kuvendit të Republikës së Maqedonisë së Veriut, Jovan Mitreski, në të cilën, në pajtim me nenin 94, paragrafi 2 i Kushtetutës së Republika të Maqedonisë së Veriut, i propozon Kuvendit në seancën e parë vijuese t’i shkarkojë: Fatmir Mexhitin nga pozita e ministrit të Shëndetësisë dhe Azir Aliun nga pozita e ministrit të Shoqërisë Informatike dhe Administratës”, thuhet në njoftimin e qeverisë.

Po ashtu kryetarit të Kuvendit, Xhaferi i ka kërkuar që për ministër të Shëndetësisë të zgjedh Ilir Demirin dhe për Ministër të Adiministratës Naim Bajramin.

Shërbimet e Kuvendit konfirmojnë se shkarkimet dhe propozimet e reja të ministrave, kanë arritur në Kuvend dhe do të jenë në rend dite, në seancën e caktuar për ditën e premte.

Fatmir Mexhiti dhe Azir Aliu, pas përplasjes së Aleancës për Shqiptarët u pozicionuan në anën e Arben Taravarit, të cilët kanë deklaruar se në zgjedhje do të garojnë bashkë me opozitën shqiptare. Kurse krahu tjetër i ASH-së i kryesuar nga Ziadin Sela, janë të qëndrimit që në zgjedhje të garojnë vetëm. /shenja/

The post Mbështetja për Taravarin pritet t’u kushtojë me shkarkim dy ministrave në Maqedoninë e Veriut appeared first on Albeu.com.