Kosova do të përfshihet sot nga mot i ngrohtë dhe kryesisht i kthjellët. Vranësira të pakta deri mesatare mund të shfaqen më së shumti pranë zonave malore.

Instituti Hidrometeorologjik i Kosovës bën të ditur se temperaturat minimale do të lëvizin nga 12–16 gradë celsius, ndërsa maksimalet pritet të arrijnë nga 29–33 gradë celsius, raporton KosovaPress.

Fryma e erës do të jetë kryesisht nga veriu dhe veriperëndimi, me shpejtësi 1–4 metra në sekond.

Sipas institutit, kushtet biometeorologjike do të jenë përgjithësisht të përshtatshme. Megjithatë, në mesditë dhe gjatë pasdites, nxehtësia mund të sjellë ngarkesë të lehtë termike, veçanërisht në zonat e ulëta.

Temperaturat e larta dhe moti kryesisht i thatë do të ndihmojnë pjekjen dhe zhvillimin e kulturave bujqësore, por do të shtojnë edhe nevojën për ujitje. Për këtë arsye, rekomandohet kontrolli i lagështisë së tokës, sidomos te kulturat që janë në fazat aktive të zhvillimit.

Gjatë orëve të mesditës, indeksi UV do të mbetet shumë i lartë, në nivelin 6–8. Këshillohet shmangia e ekspozimit të drejtpërdrejtë dhe të zgjatur ndaj rrezeve të diellit.

Vlera të larta të temperaturave parashikohen edhe përgjatë dhjetëditëshit të parë të shtatorit. /Telegrafi/

The post Temperaturat ngjiten deri në 33°C, dita parashikohet kryesisht me diell appeared first on Albeu.com.

Për të mërkurën, më 22 korrik, Instituti Hidrometeorologjik i Kosovës (IHMK) ka aktivizuar paralajmërimin meteorologjik të nivelit portokalli. Sipas institutit, stuhi lokale të shoqëruara me bubullima pritet të përfshijnë të gjithë territorin e Kosovës.

IHMK-ja njofton se gjatë tërë ditës parashikohen zhvillime të theksuara konvektive. Në rajone të caktuara, ato mund të sjellin reshje të dendura shiu, breshër dhe erëra të fuqishme me karakter stuhie.

Këto kushte atmosferike mund të rrisin ndjeshëm rrezikun nga goditjet e rrufeve, duke kërcënuar njerëzit dhe kafshët. Gjithashtu, mund të ketë dëmtime të rrjetit elektroenergjetik, ndërprerje në furnizimin me energji elektrike dhe vështirësi në funksionimin e sistemeve të telekomunikacionit.

Në vendet ku reshjet do të jenë më intensive mund të ndodhin përmbytje të shpejta lokale. Ndërkohë, erërat e forta dhe breshëri mund të dëmtojnë objekte, automjete, infrastrukturë dhe kultura bujqësore. Instituti tërheq vëmendjen edhe për shtimin e rrezikut nga zjarret për shkak të shkarkimeve atmosferike.

Qytetarët këshillohen të mos qëndrojnë në hapësira të hapura gjatë stuhive dhe të shmangin strehimin poshtë pemëve të vetmuara, pranë shtyllave elektrike ose afër objekteve metalike. Ata duhet të marrin masa edhe për mbrojtjen e pronës dhe automjeteve nga breshëri dhe erërat e fuqishme.

Për shkak të rrugëve të rrëshqitshme dhe dukshmërisë së kufizuar, IHMK-ja u kërkon drejtuesve të automjeteve të kenë kujdes të shtuar në trafik. Qytetarëve u rekomandohet të përcjellin njoftimet dhe udhëzimet e institucioneve kompetente deri në përfundimin e intervalit të paralajmërimit.

Alarmi do të mbetet i vlefshëm më 22 korrik, nga ora 00:00 deri në orën 23:59. IHMK-ja ka bërë të ditur se do ta monitorojë në vazhdimësi gjendjen meteorologjike dhe, nëse paraqitet nevoja, do të publikojë përditësime të tjera.

The post IHMK shpall alarm portokalli për 22 korrik, stuhi me breshër dhe erëra të fuqishme në mbarë Kosovën appeared first on Albeu.com.