Kur Dragi Mitkovski mori drejtimin e ndërmarrjes së higjienës komunale, i gjithë kryeqyteti mbështetej në vetëm gjashtëmbëdhjetë automjete funksionale për grumbullimin e plehrave.

Sipas tij, realiteti vijon të jetë larg standardeve të nevojshme, meqë operatorit ende i mungojnë mjetet adekuate. Një numër i madh prej tyre janë jashtë përdorimit për arsye defektesh ose amortizimi të plotë. Paralelisht, terreni vuan nga mungesa e kontejnerëve, ndërsa pjesa më e madhe e atyre që ndodhen në dispozicion janë shumë të dëmtuar dhe kanë nevojë për ndërrime.

“Aktualisht arrijmë të mbajmë në lëvizje rreth 50 deri në 60 automjete. E kemi të vështirë, por synojmë një nivel të pranueshëm. Natyrisht që gjendja perfekte është ende larg, por ne japim gjithçka nga ana jonë për të ruajtur një vazhdimësi minimalisht në evadimin e mbeturinave shtëpiake,” deklaroi Dragi Mitkovski, Drejtor i NP “Higjiena Komunale” – Shkup.

Drejtori Mitkovski e pranon hapur se panorama në terren nuk është e kënaqshme, megjithatë shton se përmirësime janë në prag. Deri në muajin gusht, kompania pret të pajiset me rreth 3300 kontejnerë të rinj dhe mjete të reja pune për shërbimet e saj.

“Besojmë se së shpejti do të ketë përparime, pasi u mbyllën hapat për dy makina komunale si dhuratë nga Qyteti i Shkupit, të cilat duhet të na vijnë gjatë gushtit. Gjithashtu, deri në fund të po këtij muaji pritet të finalizohet porosia për 40 automjetet nëpërmjet Ministrisë së Transportit dhe Lidhjeve – tenderët janë kryer dhe tani jemi në pritje të dërgesës. Për më tepër, brenda muajit arrijnë 100 kontejnerë, ndërsa deri në përfundim të gushtit do të mbërrijnë edhe 3300 copë të tjera të reja,” sqaroi Dragi Mitkovski, Drejtor i NP “Higjiena Komunale” – Shkup.

Në anën tjetër, Raporti i Entit Shtetëror të Revizionit për vitin 2024 ka nxjerrë në pah një sërë mangësish të rënda financiare, teknike dhe organizative brenda Ndërmarrjes Publike të Higjienës Komunale të Shkupit. Sipas dokumentit, kompania ka akumuluar detyrime prej rreth 12 milionë eurosh dhe po has vështirësi për të mbledhur mbi 2 milionë euro nga faturat e përdoruesve.

Revizioni gjithashtu ka konstatuar shkelje në angazhimin e 354 punëtorëve përmes një agjencie private pa një plan vjetor punësimi, si dhe parregullsi në përllogaritjen e rrogave. Raporti këshillon marrjen urgjente të masave për konsolidimin financiar, përtëritjen e flotës së automjeteve dhe forcimin e mekanizmave drejtues.

The post Kriza e mjeteve dhe borxhet miliona rëndojnë Higjienën Komunale të Shkupit appeared first on Albeu.com.

Enti Shtetëror i Revizionit ka dhënë një vlerësim negativ për aktivitetin e NP “Higjiena Komunale – Shkup” gjatë vitit 2024, duke evidentuar një sërë shkeljesh në aspektin financiar dhe administrativ.

Raporti i revizorëve tregon se kompania përballet me një barrë borxhi prej gati 12 milionë eurosh, ndërsa mbi 2 milionë euro përfaqësojnë kërkesa me arkëtim të pasigurt. Gjithashtu, janë gjetur pasuri të paevidentuara, vlera e të cilave arrin rreth 472 mijë euro.

Një situatë kritike paraqitet edhe në gjendjen e flotës së automjeteve. Prej 189 mjeteve që zotëron ndërmarrja, vetëm 76 janë funksionale, çka do të thotë se afërsisht 60 për qind e tyre janë jashtë përdorimit. Po ashtu, gjatë vitit të kaluar, përmes agjencive private u angazhuan 354 punëtorë me një kosto mbi 3 milionë euro.

Ndër problematikat e tjera të theksuara janë edhe humbjet financiare, likuiditeti i ulët dhe çrregullimet në sistemin e llogaritjes së pagave. Sipas vlerësimit të revizorëve, kjo situatë vë në rrezik cilësinë e shërbimeve ndaj qytetarëve dhe kërkon masa urgjente për konsolidimin financiar si dhe modernizimin e ndërmarrjes.

The post Raporti i ESHR-së: Gjendje alarmante në “Higjienën Komunale” të Shkupit, borxhe 12 milionë euro dhe mbi gjysma e automjeteve jashtë funksionit appeared first on Albeu.com.