Hetimet për rastin e dyshuar të keqpërdorimeve në Byronë Kosovare të Sigurimeve (BKS) janë zgjeruar, kanë njoftuar Prokuroria Themelore në Prizren dhe Policia e Kosovës.

Më 1 shtator 2026, procedura hetimore është shtrirë ndaj 21 punonjësve të tjerë të BKS-së, të dyshuar për veprën penale “Keqpërdorimi i besimit në ndihmë”.

Pas përfshirjes së këtyre personave, numri i përgjithshëm i të pandehurve në këtë çështje ka shkuar në 69.

Sipas dyshimeve të Prokurorisë, personat e përfshirë, duke vepruar në kundërshtim me rregullat dhe procedurat e brendshme të BKS-së, kanë lejuar ose kanë marrë pjesë në transferimin dhe përfitimin e shumave të parave pa mbulesë. Vlerat për secilin person dyshohet se kanë qenë nga 2 mijë deri në 53 mijë euro.

Si pasojë e këtyre veprimeve, BKS-së dyshohet se i është shkaktuar edhe një dëm prej rreth 200 mijë eurosh.

Të pandehurit janë marrë në pyetje në Stacionin Policor në Prishtinë nga zyrtarët e Njësisë për Hetimin e Krimeve Ekonomike dhe Korrupsionit, ndërsa në procedurë kanë marrë pjesë edhe përfaqësues të Prokurorisë Themelore në Prizren.

Në kuadër të hetimit financiar, sot janë sekuestruar dhe ngrirë 35 prona, mes tyre parcela kadastrale, njësi banesore dhe njësi garazhuese. Këto pasuri lidhen me tre prej të pandehurve kryesorë.

Ndërkohë, Prokuroria, në bashkëpunim me Njësitin e Inteligjencës Financiare, ka vendosur ngrirjen e 21 llogarive bankare që u përkasin personave të dyshuar.

Në fillim të hetimeve, dëmi i pretenduar ndaj BKS-së ishte përllogaritur në rreth 1 milion e 43 mijë euro. Pas shtimit të dëmit prej rreth 200 mijë eurosh, vlera totale e dëmit të dyshuar është rritur në rreth 1.24 milion euro.

Prokuroria dhe Policia kanë bërë të ditur se veprimet hetimore do të vijojnë, me synim sqarimin e plotë të rastit dhe përcaktimin e përgjegjësisë së mundshme penale të personave të përfshirë.

The post Hetimi për dyshimet në BKS zgjerohet në 69 të pandehur, dëmi arrin rreth 1.24 milion euro appeared first on Albeu.com.

Inspektorati Policor i Kosovës ka kërkuar suspendimin e dy pjesëtarëve të Drejtorisë Rajonale në Mitrovicën e Veriut, të cilët dyshohen se kanë tejkaluar kompetencat gjatë një operacioni policor në Dren të Zubin Potokut.

Sipas IPK-së, hetimi paraprak ka nisur disa ditë më parë me detyrë zyrtare, pas raportimeve në media dhe deklaratave publike të 11 gushtit. Këto raportime lidhen me pretendimet e qytetarit N. R. se zyrtarë të Policisë së Kosovës kanë tejkaluar autorizimet gjatë ndërhyrjes.

Departamenti i Hetimeve i Inspektoratit do të vijojë punën në bashkëpunim me Prokurorinë Themelore në Mitrovicë, për të sqaruar të gjitha rrethanat dhe veprimet e zyrtarëve të përfshirë.

Profesorë dhe njohës të sigurisë vlerësojnë se ky rast, sikurse edhe raste të tjera, tregon se mekanizmat mbikëqyrës reagojnë ndaj çdo pretendimi për shkelje, pa marrë parasysh përkatësinë etnike të qytetarit.

Megjithatë, ata theksojnë se Serbia e përdor çdo rast që lidhet me Policinë e Kosovës apo me institucionet e tjera të vendit për qëllime propagandistike.

“Rasti është në hetim dhe ende nuk ka marrë epilog. Kjo nuk ka të bëjë me përkatësinë etnike, sepse institucionet e Republikës veprojnë konform përgjegjësive dhe kompetencave të tyre, pa e gjykuar rastin nga perspektiva etnike”, ka deklaruar Dorajet Imeri, profesor dhe njohës i çështjeve politike dhe të sigurisë.

Sipas ekspertëve të fushës, zhvillimet dëshmojnë se Policia e Kosovës disponon mekanizma të brendshëm mbikëqyrjeje dhe se përgjegjësia është individuale, pavarësisht nëse bëhet fjalë për zyrtarë apo qytetarë të një përkatësie të caktuar.

“IPK-ja punon për të gjithë qytetarët e RKS-së, ndërsa monitoron dhe mbikëqyr punën policore. Nga viti 2006 e deri më sot ka trajtuar dhjetëra mijëra raste dhe është vlerësuar si nga qytetarët, ashtu edhe nga bashkësia ndërkombëtare”, ka thënë Arben Dashevci, njohës i sigurisë.

Ndërkohë, disa ditë më parë, në pronën e serbit Nenad Rashkoviq në Zubin Potok është gjetur një armë e tipit AK-47. Dyshimet e hetuesve janë se ajo mund të jetë përdorur në vrasjen e shqiptarëve gjatë luftës së vitit 1999.

Gjetja e armës është përfshirë në hetimet për zbardhjen e krimeve të dyshuara në Kalludër dhe Jabukë. Ajo po i nënshtrohet ekzaminimit forenzik, për të parë nëse përputhet me gëzhojat e zbuluara në lokacionet ku dyshohet për ekzistencën e varrezave masive.

Pamjet e siguruara nga RTK-ja tregojnë se arma ishte fshehur brenda një peme, pranë shtëpisë së Rashkoviqit dhe tri lokacioneve të varrezave masive në Zubin Potok.

Presidenti i Serbisë, Aleksandar Vuçiq, e ka përdorur rastin e Nenad Rashkoviqit për të kritikuar Policinë e Kosovës dhe institucionet e vendit. Më 12 gusht, ai e vizitoi Rashkoviqin në një spital në Beograd dhe pretendoi se ky i fundit ishte “rrahur pothuajse për vdekje” nga Policia e Kosovës dhe se kjo kishte ndodhur “pa asnjë arsye”.

Por burimet e RTK-së bëjnë të ditur se Rashkoviqi dyshohet se është larguar në drejtim të Serbisë për t’iu shmangur arrestimit nga autoritetet e Kosovës, në kuadër të hetimeve për krime të dyshuara lufte.

The post Ekspertët: Hetimi ndaj zyrtarëve në Zubin Potok tregon funksionimin e mekanizmave mbikëqyrës appeared first on Albeu.com.

Hetuesit e Drejtorisë për Hetimin e Krimeve të Luftës po vazhdojnë veprimet hetimore lidhur me rastin e dyshuar të krimeve të luftës në Zubin Potok.

Puna në terren është zhvilluar edhe gjatë së shtunës. Në lokacionin e tretë ku po kryhen hetimet, zyrtarët kanë mbledhur të dhëna dhe informacione që mund të kontribuojnë në zbardhjen e rastit.

Informacionet për gjetjet dhe rezultatet e deritanishme i janë përcjellë prokurores Florije Salihu-Shamolli, e cila është duke e trajtuar rastin në përputhje me procedurat përkatëse.

Hetimet po kryhen në koordinim me institucionet kompetente, ndërsa autoritetet kanë bërë të ditur se angazhimi në terren do të vazhdojë edhe gjatë ditëve në vijim.

Detaje të tjera mbi rezultatet e punës hetimore nuk janë publikuar, me qëllim ruajtjen e integritetit të procesit.

The post Hetimi për krime lufte në Zubin Potok vijon në terren, Specialja publikon pamje appeared first on Albeu.com.

Dhimbja dhe pasiguria vijojnë të mbizotërojnë në familjen e Zylfi Tejecit, veteranit të Ushtrisë Çlirimtare të Kosovës nga rajoni i Hasit, zhdukja e të cilit ka kaluar tashmë një vit e gjysmë pa asnjë përgjigje konkrete.

I zhdukur që nga 23 janari i vitit paraprak, fati i tij mbetet plotësisht i errët, ndërsa familjarët vazhdojnë të jetojnë në ankth të përhershëm, duke pritur çdo ditë një lajm që do t’u jepte fund dilemave mbi vendndodhjen e tij.

Shqetësimi i thellë i të birit ka dalë së fundmi në pah përmes një mesazhi të ndarë në platformat sociale, ku Ardian Tejeci ka shprehur publikisht vuajtjen dhe frustrimin për heshtjen që rrethon rastin e të atit.

Në reagimin e tij, ai ka rikujtuar kontributin e babait si luftëtar i UÇK-së dhe ka bërë thirrje të hapur për zbardhjen pa vonesë të së vërtetës mbi rrethanat e zhdukjes së tij.

Rreth gjashtë muaj më parë, zëdhënësi i Policisë për Rajonin e Prizrenit, Shaqir Bytyqi, kishte konfirmuar se hetimet për këtë çështje janë ende aktive dhe se institucionet e rendit kanë kryer në vijimësi veprime të ndryshme hetimore për të hedhur dritë mbi këtë ngjarje.

The post Pa asnjë gjurmë prej më shumë se 18 muajsh, misteri i zhdukjes së ish-ushtarit të UÇK-së nga Hasi mbetet i pazbardhur appeared first on Albeu.com.

Kryeprokurori i Prokurorisë Speciale, Blerim Isufaj, bëri të ditur se hetimet për sulmin ndaj familjes Jasharaj nga Prekazi në vitin 1998 pritet të përfundojnë në një afat të afërt.

Gjatë një konference për media të hënën, Isufaj theksoi se bëhet fjalë për një çështje të ndjeshme, e cila sipas tij kërkon kujdes dhe maturi.

“Hetimet në rastet që lidhen me lagjjen dhe familjen Jashari, së shpejti do të finalizohen”, tha Isufaj.

Ai shtoi se përfundimi i hetimit pritet të ndodhë shumë shpejt, por nuk dha më shumë hollësi përtej faktit se procesi është drejt fundit. “Hetimi do të përfundojë shumë shpejt, pastaj të shohim. Ky hetim është shumë sensitiv, shumë i ndjeshëm dhe kërkon maturi. Thjesht, ne po e bëjmë atë punë. Nuk mund të them asgjë më tepër, përveçse hetimi është në përfundim”, u shpreh Isufaj.

Në prezantimin e një përmbledhjeje të punës së Prokurorisë Speciale gjatë vitit të fundit, ai veçoi edhe dy operacione të rëndësishme që lidhen me krimet e luftës.

“Vlen të përmendet se këtë vit janë realizuar dy operacione të rëndësishme lidhur me krimet e luftës. Në këtë drejtim, në rastet që lidhen me Masakrën e Reçakut janë arrestuar pesë persona si të dyshuar për krime të luftës. Po ashtu, pesë persona janë arrestuar si të dyshuar për rastin e Syriganës në Skenderaj”, tha Isufaj.

The post Isufaj njofton se hetimet për rastin e Jasharajve pritet të mbyllen së shpejti appeared first on Albeu.com.

Sipas reagimit të saj, çështjet që aktualisht po hetohen konsiderohen raste të veçanta dhe, siç thuhet, nuk pasqyrojnë punën dhe profesionalizmin e pjesës më të madhe të operatorëve të këtij sektori, të cilët ushtrojnë aktivitetin e tyre në përputhje me ligjin dhe standardet në fuqi.

Në reagim thuhet: “Shoqata e Naftëtarëve të Kosovës mbetet e përkushtuar për bashkëpunim të ngushtë me institucionet kompetente dhe mbështet çdo proces që forcon sundimin e ligjit, nxit konkurrencën e ndershme dhe rrit besimin e qytetarëve në tregun e naftës”.

Më tej, Shoqata thekson se çdo shkelje e mundshme duhet të trajtohet duke u mbështetur në fakte dhe se përgjegjësia duhet të jetë individuale, pa u shtrirë si përgjithësim mbi të gjithë sektorin.

Në të njëjtën kohë, një aksion i gjerë policor kundër krimit të organizuar, i drejtuar nga Prokuroria Speciale dhe Drejtoria për Hetimin e Krimeve të Rënda dhe Krimit të Organizuar në Policinë e Kosovës, me asistimin e Doganës dhe Administratës Tatimore të Kosovës, ka çuar sot në arrestimin e 9 personave.

Me urdhër të Gjykatës Themelore në Prishtinë, gjatë këtij operacioni janë zhvilluar kontrolle në 21 lokacione.

Ky operacion është realizuar në kuadër të veprimeve procedurale hetimore, ndërsa pas mbledhjes së informacioneve dhe sigurimit të provave, ekziston dyshimi se të arrestuarit kanë funksionuar si grup i strukturuar kriminal, duke paraqitur dokumente të rreme për tatimet, si edhe duke kryer shitje dhe transaksione fiktive të derivateve të naftës.

The post Shoqata e Naftëtarëve të Kosovës përkrah hetimet dhe kërkon që sektori të mos trajtohet në mënyrë të përgjithësuar appeared first on Albeu.com.

Policia e Kosovës ka konfirmuar se personi i zhdukur në Liqenin e Batllavës është lokalizuar në ditën e dytë të operacionit të kërkim-shpëtimit.

Sipas njoftimit të Policisë, rasti ishte denoncuar dje rreth orës 13:00, pasi ishte marrë informacioni se një person kishte hyrë në ujërat e Liqenit të Batllavës dhe më pas nuk ishte parë duke dalë.

“Menjëherë pas pranimit të informatës janë angazhuar të gjitha njësitë relevante policore, si dhe njësitë e tjera të kërkim-shpëtimit, me qëllim të lokalizimit të personit”, thuhet në njoftimin e Policisë.

Sot, pas angazhimit të ekipeve të kërkim-shpëtimit, personi u nxor nga uji, ndërsa ekipi mjekësor në vendngjarje konstatoi se ai nuk kishte shenja jete.

“Në koordinim me prokurorin e shtetit, po ndërmerren veprimet e nevojshme procedurale dhe hetimore lidhur me rastin”, ka deklaruar për KosovaPress zëdhënësi i Policisë së Kosovës për kryeqytetin, Enis Pllana.

Blerim Ruhani humbi jetën pasi u zhduk teksa po notonte. Ngjarja ishte raportuar të martën rreth orës 13:00, kur Policia e Kosovës ishte njoftuar se një person kishte hyrë në ujë dhe nuk ishte parë më duke dalë.

The post Instituti i Mjekësisë Ligjore mbërrin në vendngjarje pas gjetjes së trupit të 25-vjeçarit në Liqenin e Batllavës appeared first on Albeu.com.

Në një përgjigje për Radion Evropa e Lirë (REL), IPK-ja tha se, edhe pse nuk ka marrë asnjë ankesë, procedurat hetimore do të nisin sipas detyrës zyrtare.

Gjatë aktivitetit të Vidovdanit në Gazimestan, Policia e Kosovës ndaloi 37 persona. Për 36 prej tyre, Gjykata Themelore në Prishtinë ka ngritur akuza për “shkaktim të trazirave dhe cenim të rendit dhe qetësisë publike”, ndërsa vendimi pritet të bëhet i ditur më 1 korrik. Ndërkohë, një person tjetër është dënuar me gjobë.

Avokati Nikolla Todoroviq tha se të akuzuarit janë kryesisht serbë nga Serbia dhe nga vende të rajonit, duke shtuar se dokumentet e tyre personale janë konfiskuar deri në shpalljen e vendimit.

Çdo 28 qershor, serbë nga Kosova, Serbia dhe vende të rajonit mblidhen tradicionalisht në Gazimestan, afër Prishtinës, për të përkujtuar betejën kundër Perandorisë Osmane më 1389.

Pas këtij rasti, në opinion qarkulluan pretendime se disa nga të ndaluarit janë përballur me keqtrajtim fizik dhe psikologjik nga disa zyrtarë policorë, të cilët, sipas këtyre pretendimeve, i kanë qëlluar me shuplaka, i kanë rrahur, ofenduar e poshtëruar, si dhe i kanë detyruar të brohorasin “Kosova Republikë”.

Radio Evropa e Lirë nuk ka mundur t’i vërtetojë këto pretendime në mënyrë të pavarur.

Për këtë çështje ka nisur hetim sipas detyrës zyrtare edhe Institucioni i Avokatit të Popullit në Kosovë, i cili ka kërkuar informacione nga institucionet përgjegjëse për të sqaruar të gjitha rrethanat e rastit që lidhen me ndalimin e disa dhjetëra personave në Gazimestan.

Po ashtu, Avokati i Popullit i Serbisë, Zoran Pashaliq, i është drejtuar Avokatit të Popullit të Kosovës, Naim Qelaj, me kërkesë që, brenda kompetencave të tij, të zhvillojë urgjentisht hetime për të gjitha rrethanat e ndalimit të një numri më të madh qytetarësh të përkatësisë etnike serbe pas shënimit të Vidovdanit në Gazimestan.

“Avokati i Popullit ka kërkuar nga zoti Qelaj që të përcaktojë nëse gjatë privimit nga liria, ndalimit dhe fillimit të procedurave për kundërvajtje janë respektuar standardet ndërkombëtare për mbrojtjen e të drejtave të njeriut, përfshirë të drejtën për liri dhe siguri, të drejtën për t’u informuar për arsyet e privimit nga liria, të drejtën për qasje te mbrojtësi, të drejtën për një gjykim të drejtë, si dhe ndalimin e diskriminimit mbi çfarëdo baze”, thuhet në njoftim.

Në të njëjtin njoftim bëhet e ditur se Avokati i Popullit i Serbisë, lidhur me këtë rast, u është drejtuar edhe institucioneve të Bashkimit Evropian në Bruksel, ambasadave të vendeve të Quint-it, si dhe Misionit të Organizatës për Siguri dhe Bashkëpunim në Evropë (OSBE) në Prishtinë.

Reagim për rastin ka pasur edhe nga Dioqeza e Rashkës dhe Prizrenit e Kishës Ortodokse Serbe, e cila theksoi se pretendimet për keqtrajtim fizik dhe psikologjik ndaj personave të ndaluar duhet të hetohen.

“I bëjmë thirrje Avokatit të Popullit, Inspektoratit Policor, organeve kompetente gjyqësore dhe prokuroriale, si dhe misioneve ndërkombëtare, veçanërisht OSBE-së dhe EULEX-it [Misionit të Bashkimit Evropian për Sundimin e Ligjit në Kosovë], që, në përputhje me mandatet e tyre, të sigurojnë një verifikim të plotë, të pavarur dhe profesional të të gjitha rrethanave”, thuhet në njoftimin e Dioqezës.

Zyra e Qeverisë së Serbisë për Kosovën i ka dënuar ndalimet e kryera gjatë shënimit të Vidovdanit në Gazimestan, duke i cilësuar ato si “akt të turpshëm dhe të papranueshëm të represionit”.

Gazimestani në Kosovë njihet edhe për fjalimin që mbajti aty në vitin 1989 udhëheqësi i atëhershëm i Serbisë, Sllobodan Milosheviq. Ky fjalim përmendet shpesh si një hyrje në konfliktet e armatosura që pasuan shpërbërjen e ish-Jugosllavisë. / REL

The post IPK njofton hetim zyrtar për pretendimet ndaj policëve gjatë shënimit të Vidovdanit në Gazimestan appeared first on Albeu.com.

Një zëdhënës i policisë konfirmoi se oficerët hynë në selinë e Partisë Socialiste, por nuk dha informacione të mëtejshme pasi hetimet janë sekrete.

Partia e kryeministrit Pedro Sanchez, po përballet me një sërë skandalesh korrupsioni dhe hetimet po përfshijnë figura politike dhe anëtarë të familjeve të tyre.

Hetimi po kryhet pasi u zbulua se në shtëpinë e ish-kryeministrit José Luis Rodríguez Zapatero u gjetën ora luksoze, me një vlerë totale midis dy dhe tre milionë eurove, bizhuteri me rubinë, smerald dhe safirë, gjerdanë, vathë dhe varëse me punim të shkëlqyer.

Ish-kryeministri socialist akuzohet se ka qenë në krye të një rrjeti të paligjshëm që shtrihej nga Spanja në Amerikën Latine, me shtrirje deri në Kinë, dhe se dyshohet se ka marrë të paktën 2.6 milionë euro gjatë pesë viteve nga kompani të ndryshme nën hetim ose kompani me kapital kinez.

Skandalet e korrupsionit në nivelet më të larta të politikës spanjolle zbulojnë, atë që juristët pretendojnë, një mosfunksionim të institucioneve të vendit, me një gjendje të keqe të zgjatur që politikanët tregojnë pak gatishmëri për ta adresuar.

The post Hetime për skema të dyshuara korrupsioni, policia spanjolle “zbarkon” në selinë e partisë së kryeministrit, Pedro Sánchez appeared first on Albeu.com.

Burime për skyweb.al bëjnë me dije se verifikimet po fokusohen te disa kompani të regjistruara në DURANA, për të cilat ka dyshime se lidhen me personazhe të përfshirë në skandalin e AKSHI-t, mes tyre emra të njohur të sektorit të teknologjisë së informacionit dhe të tenderëve publikë.

Sipas burimeve, nuk bëhet fjalë për një hetim të përgjithshëm ndaj të gjitha subjekteve të regjistruara në park, por për kompani specifike që dyshohet se kanë lidhje direkte ose indirekte me aktorët e dosjes AKSHI.

Lidhja me dosjen AKSHI

Zgjerimi i verifikimeve nga SPAK lidhet drejtpërdrejt me hetimet për AKSHI-n, ku prokurori special Bledar Maksuti ka dokumentuar një skemë e përqendrimit të tenderëve publikë te një numër i kufizuar kompanish, përmes kostove të fryra dhe ndikimit mbi proceset e prokurimit.

Hetimet kanë treguar se këto kompani përfitonin njëkohësisht fonde publike dhe, sipas dyshimeve, shmangnin detyrimet fiskale, tashmë nëpërmjet projektit DURANA.

Në këtë kontekst, DURANA po shihet si një element shtesë i së njëjtës skemë, ku përfitimi nuk kufizohej vetëm te tenderët, por shtrihej edhe te përjashtimet nga taksat, duke i shkaktuar dëm të dyfishtë buxhetit të shtetit.

SPAK po verifikon nëse projekti DURANA është përdorur për favorizim dhe shmangie taksash në funksion të të njëjtëve aktorë të përfshirë në dosjen AKSHI, duke e shtrirë hetimin përtej një institucioni të vetëm dhe drejt një skeme më të gjerë financiare.

Çfarë është DURANA

DURANA është një park teknologjik dhe shkencor, i krijuar në bazë të ligjit për parqet teknologjike, i administruar nga Korporata Shqiptare e Investimeve dhe i shpallur zonë e lirë për zhvillimin e teknologjisë së informacionit. Statusi i parkut u garanton subjekteve të regjistruara përjashtime dhe lehtësira të gjera fiskale, përfshirë ulje ose përjashtim nga tatim-fitimi, tatimi mbi të ardhurat personale dhe TVSH-ja, sipas parashikimeve ligjore.

Ky mekanizëm u aplikua në një kohë kur privilegjet fiskale për kompanitë e IT-së po hiqeshin për shkak të presionit të fortë ndërkombëtar, duke ngritur dyshime se DURANA u përdor si një skemë alternative për shmangien e taksave.

Denoncimet e Arben Ahmetajt

Ish-zëvendëskryeministri Arben Ahmetaj ka denoncuar publikisht DURANA-n, duke e cilësuar si një rrugë të re për favorizimin fiskal të një grupi të caktuar kompanish të IT-së, pas rrëzimit të skemës së mëparshme të taksimit preferencial. Sipas Ahmetajt, përmes regjistrimit në DURANA, kompani që vijonin të fitonin tenderë publikë përfitonin njëkohësisht edhe nga përjashtimi nga detyrimet tatimore.

Denoncimet e tij kanë ngritur pikëpyetje mbi qëllimin real të parkut dhe mbi përputhjen e aktivitetit të subjekteve të regjistruara me kriteret ligjore të kërkim-zhvillimit dhe inovacionit.

Më herët Skyweb.al raportoi se faqja e Korporatës së Investimeve kishte fshirë nga WEB-i gjithçka që lidhej me këtë projekt duke shtuar dyshimet se diçka po fshihet. /skyweb.al

The post Skandali AKSHI, SPAK shtrin hetimet edhe te DURANA Tech Park appeared first on Albeu.com.