Hekurudha Tiranë–Durrës–Rinas është shndërruar nga një projekt strategjik transporti në një simbol të keqqeverisjes, propagandës politike dhe papërgjegjshmërisë institucionale të qeverisë dhe në vecanti e zv.kryeministres nën hetim, Belinda Balluku.

E nisur me bujë në vitin 2021 dhe e shitur publikisht si “rilindja e hekurudhës shqiptare”, kjo vepër publike sot përfaqëson gjithçka që shkon keq me mënyrën se si menaxhohen investimet madhore në Shqipëri: premtime të pambajtura, afate të rreme dhe kosto që fryhen pa fund.

2021: Propaganda para planifikimit
Në vitin 2021, qeveria nisi punimet për hekurudhën Tiranë–Durrës me një fushatë të fortë propagandistike, me në qendër kryeministrim Edi Rama dhe atëkohë ministren Belinda Balluku. U fol për shpejtësi europiane, për lidhje direkte me aeroportin e Rinasit dhe për një udhëtim prej vetëm 12 minutash nga Tirana në aeroport. Kryeministri dhe ministrat e tij garantuan publikisht se projekti ishte i financuar, i planifikuar dhe do të përfundonte brenda vitit 2023. Nuk munguan as videot 3D qe tregonin se sa i bukur do të ishte dukej udhëtimi me tren nga Tirana në Durrës.

Por sot është e qartë se në atë kohë, ajo që nuk ishte përfunduar ishte vetë baza e projektit: shpronësimet, planifikimi real dhe menaxhimi serioz i riskut.

2022–2023: Afatet bien, justifikimet shtohen
Gjatë viteve 2022 dhe 2023, qytetarëve iu servirën deklarata të përsëritura për “ritme të larta pune”, “segmente që po përfundojnë”, “përfunduan 30% të punimeve”, “përfunduan 70% të punimeve”, etj. Në realitet, kantierët mbetën të copëzuar, punimet të ndërprera dhe afatet të paqarta.

Viti 2023 – afati zyrtar i përfundimit – kaloi pa asnjë përgjegjësi politike, pa asnjë raport publik dhe pa asnjë sqarim serioz se pse një projekt i tillë dështoi të dorëzohej në kohë. Në çdo shtet normal, tejkalimi i afatit do të sillte hetim administrativ dhe llogaridhënie. Në Shqipëri, solli vetëm një heshtje institucionale dhe një mundësi e re për Belinda Ballukun për të nisur propagandën nga e para dhe për ta përdorur edhe për disa vite.

2024: “Puna vijon”, realiteti ngec
Në vitin 2024, qeveria vazhdoi të përdorë të njëjtën formulë të konsumuar: “puna vijon”. U promovuan stacione të veçanta, sidomos ai i Vorës, si prova e suksesit të projektit. Por hekurudha si linjë funksionale mbeti larg përfundimit.

Mediat online dhe organizata të shoqërisë civile evidentuan atë që qeveria shmangu ta pranojë: projekti ishte i paralizuar nga probleme strukturore, përfshirë shpronësimet e papërfunduara – një absurditet për një vepër publike që kishte nisur prej vitesh.

2025–2026: Miliona shtesë për një dështim në vazhdim
Sot, qeveria miraton një rritje prej 377 milionë lekësh për fondin e shpronësimeve të hekurudhës Durrës–Tiranë–Rinas. Ky vendim është një pranim i heshtur, por i qartë, i dështimit të menaxhimit të projektit.

Pesë vite pas nisjes së punimeve, shteti shqiptar ende nuk ka mbyllur shpronësimet. Ndërkohë, qytetarët paguajnë faturën për paaftësinë e institucioneve dhe të zv.kryeministres Balluku  që nisën punë pa përmbushur kushtet minimale ligjore.

Një model i përsëritur i qeverisjes së korruptuar
Hekurudha Tiranë–Durrës–Rinas nuk është rast i izoluar. Ajo ndjek të njëjtin model të projekteve të tjera publike: nisin për arsye politike, shiten si suksese elektorale dhe përfundojnë si barrë financiare për taksapaguesit.

Asnjë ministër nuk është hetuar. Asnjë ministër nuk ka dhënë dorëheqje. Asnjë institucion nuk ka mbajtur përgjegjësi. Asnjë raport i detajuar mbi rritjen e kostove nuk është bërë publik. Ndërsa propaganda vazhdon, besimi publik gërryhet.

Pyetje që sot zv.kryeminisrja nën hetim, Belinda Balluku duhet t’u përgjigjet:

• Pse u nis projekti pa u përfunduar shpronësimet?
• Sa herë janë shtyrë realisht afatet dhe me çfarë vendimesh zyrtare?
• Sa është sot kostoja totale e projektit dhe sa ishte ajo fillestare?
• Kush mban përgjegjësi politike dhe administrative për këtë zvarritje?

Derisa këto pyetje të marrin përgjigje, hekurudha Tiranë–Durrës–Rinas mbetet jo vetëm e papërfunduar në terren, por edhe një monument i gjallë i qeverisjes së korruptuar dhe të paaftë. /albeu.com/

The post EDITORIAL/ Hekurudha Tiranë–Durrës–Rinas: kronikë e një dështimi të paralajmëruar të Belinda Ballukut appeared first on Albeu.com.

Sipas vendimit të ri, fondi total i shpronësimeve rritet në 377.3 milionë lekë, nga rreth 280.4 milionë lekë që ishte parashikuar më parë. Pronarët e pasurive të paluajtshme, pronë private, që shpronësohen, kompensohen në vlerë të plotë.

Kompensimi do të bëhet në vlerë të plotë për pasuritë e llojit arë, truall dhe vreshtë, sipas tabelës shoqëruese të vendimit. Edhe lista e pronarëve përfitues zgjerohet me pasuri shtesë të identifikuara gjatë zbatimit të projektit

Vendimi i plotë:

V E N D I M PËR DISA NDRYSHIME DHE SHTESA NË VENDIMIN NR.19, DATË 17.1.2024, TË KËSHILLIT TË MINISTRAVE, “PËR SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “REHABILITIMI I LINJËS HEKURUDHORE DURRËS – TERMINALI I TRANSPORTIT PUBLIK TIRANË (PPT) DHE LIDHJA ME AEROPORTIN NDËRKOMBËTAR TË TIRANËS (TIA)”, TË NDRYSHUAR

Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave

V E N D O S I:

I. Në vendimin nr.19, datë 17.1.2024, të Këshillit të Ministrave, “Për shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Rehabilitimi i linjës hekurudhore Durrës – terminali i transportit publik Tiranë (PPT) dhe lidhja me Aeroportin Ndërkombëtar të Tiranës (TIA)”, të ndryshuar, bëhen këto ndryshime dhe shtesa:

1. Pika 3 ndryshohet, si më poshtë vijon:

“3. Pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse, që paraqitet në tabelën që i bashkëlidhet këtij vendimi, për pasuritë e llojit “arë”, “truall” dhe “vreshtë”, me vlerë të përgjithshme shpronësimi prej 377 326 511.55 (treqind e shtatëdhjetë e shtatë milionë e treqind e njëzet e gjashtë mijë e pesëqind e njëmbëdhjetë pikë pesëdhjetë e pesë) lekësh.”.

2. Në pikën 4, togfjalëshi “… prej 280 445 392.25 (dyqind e tetëdhjetë milionë e katërqind e dyzet e pesë mijë e treqind e nëntëdhjetë e dy pikë njëzet e pesë) lekësh …” zëvendësohet me “… prej 377 326 511.55 (treqind e shtatëdhjetë e shtatë milionë e treqind e njëzet e gjashtë mijë e pesëqind e njëmbëdhjetë pikë pesëdhjetë e pesë) lekësh …”.

3. Në tabelën bashkëlidhur vendimit bëhen këto ndryshime dhe shtesa:

a) Vlerat e shpronësimit të pasurive të paraqitura në nënndarjet me numrat rendorë 9, 11, 12, 15, 17, 18, 40, 41, 42, 43, 55, 57, 65, 73 dhe 74 zëvendësohen me vlerat e shpronësimit në nënndarjet përkatëse, sipas tabelës që i bashkëlidhet këtij vendimi;

b) Pas nënndarjes me numër rendor 84 shtohen pasuritë që shpronësohen, të paraqitura në nënndarjet me numra rendorë nga 85 në 115, sipas tabelës që i bashkëlidhet këtij vendimi.

II. Shpenzimet procedurale shtesë, në vlerën 50 000 (pesëdhjetë mijë) lekë, përballohen nga shoqëria “Hekurudha Shqiptare”, sh.a.

III. Ngarkohen Ministria e Infrastrukturës dhe Energjisë, shoqëria “Hekurudha Shqiptare”, sh.a., drejtoritë vendore të Agjencisë Shtetërore të Kadastrës Kamzë Vorë, Tiranë Rurale 2 dhe Krujë, Agjencia Shtetërore për Shpronësimin, Drejtoria e Administrimit dhe Mbrojtjes së Tokës pranë Këshillit të Qarkut Tiranë dhe Drejtoria e Administrimit dhe Mbrojtjes së Tokës pranë Këshillit të Qarkut Durrës për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

The post 377 milionë lekë shtesë për pronarët/ Qeveria rrit fondin e shpronësimeve për projektin hekurudhor Durrës–Tiranë–Rinas appeared first on Albeu.com.

“Pas vonesave të mëdha prej gati një dekade, të projektit hekurudhor si ai Tiranë-Rinas-Durrës, vjen edhe cilësia katastrofale e realizimit të tij”, shkruan Meta krahas videos.

Madje me ironi, Meta shkruan se në këtë segment mund të kalojë gjarpri por jo treni.

“Ndërkohë që hekurudhat janë braktisur dhe trafiku rritet duke u kthyer në një problem madhor për qytetarët dhe turistët, pas rrugëve të lëna rrugëve, përfshi dhe ato të florinjta që shemben si rruga Korçë-Ersekë, abuzimeve të tmerrshme si bakshishi 50 milion euro i tunelit të Llogarasë, sinjalistikës dhe sigurisë rrugore në shkatërrim, projektet rilindase përfundojnë sipas modelit të incerenatorëve: vidh paratë se cilësia dhe funksionimi nuk kanë rëndesi!”, shkruan Meta.

The post Hekurudha Tiranë-Durrës/ Meta publikon VIDEO-n: Këtu kalon gjarpri, por jo treni appeared first on Albeu.com.

Esmeralda Topi

Nga kantieri i punimeve për hekurudhën Tiranë-Durrës pranverën e shkuar, kryetari i bashkisë së Tiranës Erion Veliaj, premtoi se linja e trenit elektrik mes dy qyteteve do të përfundonte në mars të këtij viti.

‘Mezi pres, që në më pak se një vit nga sot, ne të kemi dorëzuar këtë dhe të fillojë ambicia për punë të tjera…’, deklaroi Veliaj, në krah të ministres së infrastrukturës Belinda Balluku. Edhe Balluku përforcoi të njëjtin afat përfundimi për linjën hekurudhore Tiranë -Durrës.

“Në mars 2024 kantieri duhet të dorëzohet”- theksoi Balluku.

Koha tregoi se angazhimi për të përfunduar linjën hekurudhore mes Tiranës dhe Durrësit këtë vit nuk u përmbush. Hekurudha vijon të jetë kantier, pasi ende nuk është arritur të përfundohet 30% e volumit të punimeve.

Vonesat në këtë projekt sipas Hekurudhës Shqiptare lidhen me pesë elementë:

1. Elektrifikimi i linjës hekurdhore
2. Ndërtimi i godinave të stacioneve hekurudhore dhe urave hekurudhore
3. Ndërtimi i segmentit hekurudhor në drejtim të Aeroportit Ndërkombëtar të Rinasit (TIA).
4. Zgjatimi i linjës prej 4 km nga PTT në drejtim të Bulevardit “Zogu i Parë”
5. Shpronësimet

Parashikimet e reja tregojnë se linja hekurudhore Tiranë-Durrës do të përfundojë marsin e vitit të ardhshëm.

‘Linja hekurudhore “Durrës -Tiranë” së bashku me segmentet hekurudhore përkatëse (Domje – Rinas), përfundon brënda tremujorit të parë të vitit 2025.^’, pohon zyrtarisht për Faktoje, Hekurudha Shqiptare.

Kjo nënkupton se inagurimi i veprës që shënjon rijetëzimin e hekurudhës shqiptare do të ndodhë pak para zgjedhjeve të përgjithshme parlamentare.

Verifikim

Mëngjesin e 22 majit, në dalje të Tiranës pranë mbikalimit të Rinasit, po punohej për shtrimin e shinave të reja në gjumën ekzistuese.

Paralelisht puna vijonte edhe për ndërtimin e urave të reja.

Pranë zonës së njohur si ura e Limuthit, punimet për mbikalimin e linjës hekurudhore ishin thuajse në përfundim.

“Ka nisur faza e dytë e projektit në  tenderimin e stacioneve hekurudhore, ndërkohë kanë përfunduar tetë urat e nevojshme të këtij projekti hekurudhor.”, sqaron Hekurudha Shqiptare.

Edhe pika e fundit e linjës hekurudhore, stacioni i Durrësit vijonte të ishte kantier. Punonjësit po hiqnin shinat e vjetra për t’i hapur rrugën shtrimit të shinave të reja.

Punimet për ndërtimin e hekurudhës Tiranë-Durrës kanë filluar në nëntor të vitit 2021, kohë kur nisi zhvendosja e shinave të vjetra. Kompania që po zbaton këtë projekt është INC spa, e cila u shpall fituese në vitin 2020, me një ofertë 69.7 milionë euro. Projekti është bashkëfinancuar me një grant të Bashkimit Europian dhe kredi të butë nga BERZH.

Linja hekurudhore Tiranë-Durrës do të kalojë mbi linjën e vjetër ndërkohë që projekti parashikon edhe shtesën nga kryeqyteti në drejtim të Aeroportit Ndërkombëtar, një linjë e re.

Po ashtu, veç pesë stacioneve ekzistuese, do të shtohen edhe tre stacione të reja përgjatë aksit të ri nga Domje në Rinas.

Transporti hekurudhor në shifra

Në Shqipëri, gjatësia e rrjetit hekurudhor llogaritet 253 km. Në shfrytëzim janë vetëm katër linja hekurudhore:

• Kufi – Gjorm 93 km,
• Durrës – Elbasan 76 km,
• Rrogozhinë – Fier 49 km
• Fier – Vlorë 35 km.

Vetëm 873 pasagjerë kanë zgjedhur si mjeti udhëtimi transportin hekurudhor nga janari në mars. Në krahasim me të njëjtën periudhë të një viti më parë, ka një rënie pasagjerësh me 47.4%.

Rënia e numrit të pasagjerëve përmes rrjetit hekurudhor është drastike në dekadën e fundit.

Nga 329 mijë pasagjerë në 2013, vitin e shkuar gjithsej kanë zgjedhur të udhëtojnë me tren, vetëm 7300 persona.

Përfundim

Nisur nga verifikimi i kryer dhe informacionet e mbledhura, deklaratat mbi afatin e përfundimit të linjës hekurudhorë Tiranë-Durrës do t’i kategorizojmë të pavërteta.

• Lexoni më poshtë artikullin verifikues që ka bërë gazetarja Ilda Hoxha vitin e shkuar, lidhur me ecurinë e punimeve për hekurudhën Tiranë-Durrës.

/Faktoje.al/

The post Treni vjen me zgjedhjet appeared first on Albeu.com.