Një aksident i rëndë në ambientet e punës i ka marrë jetën një punonjësi të Korporatës Energjetike të Kosovës (KEK).

KEK-u ka bërë të ditur se viktima është Haxhi (Selatin) Gojnovci, i lindur më 23 prill 1967 në Lismir të Fushë Kosovës.

Ngjarja ndodhi të dielën në Divizionin e Prodhimit të Qymyrit të KEK-ut. Në informacionet e para ishte njoftuar se një punëtor kishte marrë lëndime të rënda.

Policia e Kosovës dhe ekipet e ndihmës së shpejtë mbërritën në vendin ku ndodhi aksidenti.

Në njoftimin e fundit, KEK-u sqaroi se Gojnovci pësoi aksidentin me pasojë fatale teksa ishte duke kryer detyrat e punës dhe po lëvizte në zonën e ekskavatorit.

Korporata njoftoi se më 16.08.2026, gjatë angazhimit në detyrë dhe lëvizjes pranë ekskavatorit, i ndjeri u përfshi në një aksident të rëndë, i cili fatkeqësisht përfundoi me humbjen e jetës së tij.

Gojnovci kishte nisur punën në KEK në vitin 1985, duke kontribuar në Korporatë për më shumë se katër dekada.

Sipas KEK-ut, ai do të mbahet mend me respekt për përgjegjshmërinë, përkushtimin, korrektësinë dhe sjelljen shembullore në vendin e punës, si dhe për marrëdhëniet e mira kolegiale të krijuara ndër vite.

KEK-u u ka përcjellë ngushëllime familjes, miqve dhe kolegëve të Haxhi Gojnovcit.

The post Punëtori Haxhi Gojnovci humb jetën në aksident në KEK, ishte pjesë e Korporatës prej vitit 1985 appeared first on Albeu.com.