Dhjetë ditë kanë kaluar që nga njoftimi i KFOR-it, misionit paqeruajtës të NATO-s në Kosovë, për nisjen e një “tranzicioni gradual të pranisë së tij të përhershme” në urën kryesore mbi lumin Ibër në Mitrovicë.

Ndryshimi vjen pasi përgjegjësia për sigurinë dhe administrimin e urës i është transferuar Policisë së Kosovës, ndërsa njësitë e KFOR-it po e pakësojnë hap pas hapi praninë e tyre të përhershme në këtë pikë.

Ky zhvillim po shihet si një mundësi për afrimin e dy pjesëve të Mitrovicës nga përfaqësues të shoqërisë civile dhe banorë të qytetit.

Betim Osmani, nga Iniciativa Qytetare në Mitrovicën e Veriut, e konsideron kalimin e përgjegjësive nga KFOR-i te institucionet vendore një hap të rëndësishëm drejt bashkimit më të madh mes veriut dhe jugut.

Osmani thotë se ky vendim është dashur të merrej edhe më herët, ndërsa vlerëson se veriu ka nevojë për investime pas mungesës së tyre për 27 vite. Sipas tij, nevojiten ndërhyrje për rikthimin e qytetarëve, veçanërisht të komunitetit shqiptar, si dhe për rindërtimin dhe integrimin e arsimit e shëndetësisë, shërbime cilësore nga të cilat, sipas tij, banorët e veriut kanë vuajtur për 27 vjet.

Për Osmanin, largimi gradual i KFOR-it është shenjë se përgjegjësia për sigurinë në urë po i afrohet gjithnjë e më shumë institucioneve të Kosovës.

Ai beson se procesi mund të çojë deri në fund të vitit edhe në rikthimin e qarkullimit të automjeteve. Sipas tij, kjo është një lëvizje graduale dhe fakti që tenda e përdorur më herët nga karabinierët është hequr tregon për ndryshimin e situatës. Osmani shton se, pas përfundimit të sezonit të verës, deri në fund të vitit mund të nisë lëvizja e veturave mbi urë.

Ai thekson se gjatë viteve të fundit nuk ka pasur tensione të rëndësishme në këtë zonë. Për këtë arsye, sipas tij, prania e vazhdueshme e forcave në urë nuk është e nevojshme, ndërsa do të mjaftonte rritja e numrit të policëve ose patrullave në veri, së bashku me praninë e KFOR-it.

Osmani kujton se në afërsi të lumit Ibër ndodhen edhe katër ura të tjera që lidhin veriun me jugun dhe thotë se nuk ka pasur probleme në përdorimin e tyre.

Ndryshe nga më parë, Skender Sadiku, po ashtu nga Iniciativa Qytetare në Mitrovicë të Veriut, shpreson që procesi të mos ndalet për shkak të presioneve apo interesave politike.

Sipas Sadikut, lëvizja e lirë është një e drejtë themelore dhe institucionet duhet t’ua garantojnë atë të gjithë qytetarëve. Ai shprehet se urat janë ndërtuar për të lidhur njerëz dhe kultura, ndaj të gjitha rrethanat duhet të çojnë në hapjen e tyre.

Sadiku nënvizon se në veri të Mitrovicës ekzistojnë probleme më urgjente se çështja e urës, veçanërisht në shërbimet shëndetësore dhe në infrastrukturë.

Ndërkohë, qytetarët që e përdorin urën kanë vërejtur ndryshime në siguri dhe në mënyrën e qarkullimit gjatë periudhës së fundit.

Sadri Imeri e cilëson urën si lidhjen kryesore mes dy pjesëve të qytetit dhe shpreson që së shpejti të lejohet edhe qarkullimi i veturave. Ai thotë se kalimi është bërë më i lehtë dhe më i lirshëm, por thekson se urat e tjera nuk e kryejnë të njëjtin funksion si ura në qendër të qytetit.

Imeri kujton se më herët kalimi në këtë pjesë ishte shumë i vështirë për shkak të bandave serbe, pengesave dhe mungesës së sigurisë. Sipas tij, sot situata është normalizuar dhe ai pret që brenda dy-tri javësh qarkullimi të lirohet.

Sylejman Curri e lidh ndryshimin e situatës me praninë dhe kontrollin e Policisë së Kosovës. Ai thotë se kjo ka bërë që qytetarët të lëvizin shumë më lirshëm dhe pa frikë, duke e konsideruar lehtësimin e qarkullimit 100 për qind.

Curri tregon se në të kaluarën persona të armatosur dilnin në zonën përreth furrës dhe policisë, ndërsa banorët nuk guxonin të kalonin në atë anë. Sot, sipas tij, një situatë e tillë nuk mund të ndodhë, pasi ajo pjesë kontrollohet nga Policia e Kosovës.

Më 20 gusht, një ditë para raportimit, presidenti i Serbisë, Aleksandar Vuçiq, i kërkoi sekretarit të përgjithshëm të NATO-s, Mark Rutte, që KFOR-i të mos e vazhdojë zvogëlimin gradual të pranisë në urën kryesore mbi Ibër.

Vuçiq deklaroi se tërheqja e KFOR-it në këtë moment mund të krijojë, siç u shpreh ai, “kushte për një përballje përfundimtare me popullsinë serbe” në veri të Kosovës.

NATO ka bërë të ditur se çdo vendim për hapjen e mundshme të urës për qarkullimin e automjeteve duhet të marrë parasysh nevojat e të gjitha komuniteteve lokale.

Një zyrtar i NATO-s i tha Radios Evropa e Lirë se KFOR-i do të vazhdojë të ofrojë mbështetjen e nevojshme të sigurisë, në mënyrë që përpjekjet diplomatike të Bashkimit Evropian të ecin përpara.

Aktualisht, ura kryesore mbi lumin Ibër përdoret vetëm nga këmbësorët. Qeveria e Kosovës kishte paralajmëruar në korrik të vitit 2024 se ura do të hapej edhe për automjetet, por kjo nismë shkaktoi tensione dhe reagime nga komuniteti ndërkombëtar.

The post Prania e KFOR-it në Urën e Ibrit po zvogëlohet, kërkohet rikthimi i automjeteve appeared first on Albeu.com.

Viktor Buzhala ka reaguar pas zhvillimeve të fundit për hapjen e urës kryesore mbi lumin Ibër, e cila ka qëndruar e mbyllur dhe ka ndarë Kosovën nga Serbia për 27 vjet. Ai e ka interpretuar këtë zhvillim si një arritje në favor të kryeministrit Albin Kurti.

Përmes një postimi në Facebook, Buzhala ka komentuar me ironi marrëdhënien e Kurtit me Bashkimin Evropian, duke pretenduar se kryeministri ka arritur ta bindë edhe BE-në për hapjen e urës.

“Albini po get e ka kapë edhe Bashkimin Europian. Imagjinojeni arriti me i bindë që me e hapë pas 27 vjetësh një urë që ka qenë e dizajnuar deri me 2020 me qenë pikë kufitare ndërmjet Kosovës dhe Serbisë”, ka shkruar ai, përcjell “Bota sot”.

Reagimi i tij është bërë pasi Bashkimi Evropian konfirmoi se janë plotësuar kushtet e nevojshme për hapjen e urës kryesore mbi Ibër në Mitrovicë.

Ky konfirmim pasoi vendimin e KFOR-it për të nisur një tranzicion gradual të pranisë së tij të përhershme ushtarake në këtë lokacion.

The post Albini po e bind edhe BE-në” – Viktor Buzhala komenton hapjen e urës së Ibrit dhe raportin me Kurtin appeared first on Albeu.com.

Bashkimi Evropian ka bërë të ditur se janë plotësuar kushtet teknike dhe politike për hapjen e urës kryesore mbi lumin Ibër në Mitrovicë. Ky zhvillim vjen pasi KFOR-i ka vendosur të nisë një kalim gradual nga prania e përhershme ushtarake në këtë pikë.

Ura, e cila prej vitesh simbolizon ndarjen mes dy pjesëve të Mitrovicës, vazhdon të mbetet në qendër të diskutimeve për sigurinë, lëvizjen e lirë dhe normalizimin e situatës në veri të Kosovës.

Konfirmimi i BE-së ka ngritur pyetjen nëse hapja e urës tashmë është vetëm çështje kohe, si dhe nëse zvogëlimi gradual i pranisë së përhershme të KFOR-it mund të ndikojë në stabilitetin dhe sigurinë e zonës.

Për “Bota sot”, publicisti Emin Azemi dhe ish-deputeti Adem Salihaj kanë dhënë vlerësimet e tyre për domethënien e këtij procesi, ndryshimet në terren dhe ndikimin e mundshëm të tij në jetën e qytetarëve të Mitrovicës.

Azemi e sheh hapjen e urës si një kthesë me rëndësi historike dhe politike për rajonin. Sipas tij, fakti që BE-ja ka konfirmuar përmbushjen e kushteve të nevojshme tregon se ekziston një vullnet i qartë ndërkombëtar për të avancuar procesin dhe se periudha e gjatë e bllokimit po shkon drejt përfundimit.

Ai vlerëson se legjitimiteti i dhënë nga Brukseli e zhvendos debatin nga pyetja nëse ura duhet të hapet, te mënyra praktike se si do të realizohet hapja. Sipas Azemit, ky hap mund të riformësojë dinamikën e dialogut mes Kosovës dhe Serbisë, si dhe të sjellë një qasje të re për masat e sigurisë në terren.

Në aspektin diplomatik, Azemi konsideron se zhvillimet e fundit dëshmojnë një ndryshim të peshës së negociatave. Ai thotë se po kalohet nga diskutimet e pafundme për çështje teknike drejt krijimit të fakteve të reja lidhur me sovranitetin territorial.

Publicisti shton se qëndrimi i BE-së dhe lëvizjet e NATO-s tregojnë se vendimmarrja ndërkombëtare po e anashkalon veton historike të Serbisë për veriun dhe po e zvogëlon rolin e Beogradit në këtë proces. Megjithatë, ai thekson se rruga e Prishtinës drejt strukturave evropiane mbetet e lidhur ngushtë me koordinimin e hapave strategjikë me aleatët perëndimorë.

Sipas tij, në kohën kur Brukseli pritet t’i shtojë kërkesat ndaj Kosovës për zbatimin e Asociacionit, ky proces mund të shërbejë si balancë politike ndaj lëshimeve të fundit që lidhen me sovranitetin.

Për Azemin, vendimi i KFOR-it për tranzicionin gradual të pranisë së tij ushtarake ka rëndësi të veçantë strategjike. Ai e interpreton këtë veprim si pasqyrim të një vlerësimi të ri për gjendjen e sigurisë dhe si shenjë besimi te kapacitetet e autoriteteve vendore për ruajtjen e rendit.

Ai nënvizon se procesi po zhvillohet me kujdes, me synim shmangien e krijimit të një vakumi sigurie. Stabiliteti në veri, sipas tij, do të varet nga bashkëpunimi i ngushtë mes forcave vendore dhe atyre ndërkombëtare. Në këtë kuadër, Policia e Kosovës ka filluar të marrë përsipër sigurimin e urës, duke zëvendësuar pikat statike të KFOR-it.

Azemi e konsideron këtë zhvillim një hap të rëndësishëm drejt normalizimit të jetës dhe garantimit të lëvizjes së lirë në Mitrovicë. Ai thotë se ura po largohet gradualisht nga roli i saj shumëvjeçar si simbol i ndarjes etnike dhe mund të shndërrohet në një pikë normale lidhëse urbane.

Sipas tij, qarkullimi i lirë i qytetarëve dhe mallrave do të ndikonte në integrimin ekonomik të dy pjesëve të qytetit, do ta lehtësonte jetën e përditshme dhe do të krijonte mundësi për më shumë bashkëpunim shoqëror mes komuniteteve. Ai vlerëson gjithashtu se dobësimi i këtij simboli të ndarjes mund të sjellë stabilitet politik e psikologjik për vendin, të rrisë sigurinë për investimet e huaja dhe të hapë rrugë për zhvillim më të qëndrueshëm ekonomik.

Ndërsa Adem Salihaj thotë se largimi i KFOR-it nga ura dhe vendosja e Policisë së Kosovës aty përbëjnë një hap të madh, madje të fundit, drejt normalizimit të plotë të situatës në veri.

Sipas Salihajt, për gati tri dekada Ura e Ibrit ka funksionuar si simbol i kufirit dhe ndarjes. Për vite me radhë, ajo përcillte idenë se në njërën anë ndodheshin shqiptarët, ndërsa në anën tjetër serbët dhe Serbia.

Ai kujton se deri para pesë vjetësh kalimi i shqiptarëve në veri konsiderohej tejet i rrezikshëm dhe se askush prej tyre nuk guxonte të shkelte në atë pjesë. Salihaj vlerëson se ndërtimi i dy urave alternative dhe vendosja e kontrollit të Qeverisë së Kosovës në veri ia kanë zbehur Urës së Ibrit rolin si vijë ndarëse.

Salihaj thotë se strukturat serbe, të cilat i lidh me Rojet e Urës dhe Brigadat e Veriut, e kanë humbur gjithnjë e më shumë ndikimin. Sipas tij, veprimtaria kryesore e tyre tashmë konsiston në shkrimin e grafiteve antishqiptare gjatë natës.

Ai e përshkruan urën si një simbol famëkeq që kujton se ende ekzistojnë njerëz që shpresojnë ta përdorin atë për të penguar vendosjen e kontrollit të plotë në atë pjesë të Kosovës. Salihaj e cilëson atë si simbol të ndarjes së Kosovës, projekt për të cilin, sipas tij, ka punuar shumë Vuçiqi, bashkë me disa bashkëpunëtorë në Kosovë dhe Shqipëri.

Salihaj shprehet se normalizimi i plotë i jetës në veri tashmë është i sigurt dhe se ai pritet të ndodhë brenda muajsh. Megjithatë, ai thekson se për realizimin e këtij procesi ende mbetet punë për t’u bërë.

The post BE-ja konfirmon përmbushjen e kushteve, hapja e Urës së Ibrit mund të jetë pranë appeared first on Albeu.com.

Partia Demokratike e Kosovës ka dalë me një apel të fortë për rivendosjen e normalitetit kushtetues, duke iu drejtuar drejtpërdrejt kryesuesit të seancës, Avni Dehari, që të mos e mbajë më të bllokuar procesin e formimit të Kuvendit të ri. Sipas PDK-së, seanca konstituive duhet të rinisë pa vonesa të mëtejshme.

Në një komunikatë për mediat, kjo forcë politike ka tërhequr vëmendjen se roli i Deharit, si deputeti më i vjetër që udhëheq mbledhjen e parë, është rreptësisht i kornizuar nga dispozitat kushtetuese, vendimet e Gjykatës Kushtetuese dhe Rregullorja e legjislativit.

“Zoti Dehari, ju përkujtojmë se mandati juaj në krye të kësaj seance është i qartë dhe i kufizuar, siç e përcaktojnë Kushtetuta, praktika e Gjykatës Kushtetuese dhe rregullat e Kuvendit”, shprehet PDK-ja në reagimin e saj.

Partia nënvizon se obligimi i tij kryesor konsiston në garantimin e mbarëvajtjes së seancës deri në përfundimin e plotë të procedurave konstituive. Po ashtu, PDK-ja ka insistuar se nuk i takon kryesuesit të përkohshëm të marrë vendime të bazuara në perceptime ose llogari politike.

“Ju nuk dispononi autoritetin që, të udhëhequr nga gjykime apo motive të natyrës politike, të përcaktoni fatin apo kalendarin e konstituimit të Kuvendit”, vijon deklarata e Partisë Demokratike.

Në fund të reagimit, PDK-ja ka lëshuar një mesazh të prerë dhe simbolik, duke e mbyllur me thirrjen: “Mendohuni – HAPENI KUVENDIN!”.

The post PDK i bën thirrje Avni Deharit: Të vijojë pa vonesë seanca konstituive e Kuvendit appeared first on Albeu.com.

Komisioni Evropian pritet t’u dorëzojë vendeve anëtare të Bashkimit Evropian një rekomandim me shkrim, ku vlerësohet se Serbia i ka plotësuar kushtet për hapjen e Klasterit 3 në kuadër të negociatave për anëtarësim në BE. Burime të besueshme në Bruksel i kanë konfirmuar Radios Evropa e Lirë se propozimi do të jetë që ky grup kapitujsh negociues të çelet gjatë muajit korrik.

Klasteri 3 konsiderohet një segment me peshë në rrugën integruese të Serbisë drejt BE-së. I njohur si “Konkurrueshmëria dhe Rritja Gjithëpërfshirëse”, ai përfshin fusha të rëndësishme si transformimi digjital, politika ekonomike dhe monetare, tatimet, arsimi dhe kultura, shkenca dhe kërkimi, si edhe çështje që lidhen me punësimin dhe politikat sociale.

Sidoqoftë, fjala e fundit nuk i përket Komisionit Evropian. Hapja e këtij klasteri kërkon miratimin unanim të të gjitha shteteve anëtare të Bashkimit Evropian, të cilat do ta shqyrtojnë rekomandimin në ditët në vazhdim.

Edhe pse Komisioni Evropian ka dhënë një sinjal pozitiv, më herët disa vende anëtare kanë shfaqur rezerva për avancimin e Serbisë në negociata, duke kërkuar hapa më të prekshëm në reformat demokratike, si dhe përparim në normalizimin e marrëdhënieve me Kosovën.

Për pasojë, mbetet ende e paqartë nëse propozimi do ta sigurojë mbështetjen unanime të vendeve anëtare dhe nëse Klasteri 3 do të hapet gjatë këtij muaji.

Lama: Përsa i përket raporteve me Kosovën, Serbia mbetet destabilizuese, por është e qartë se BE përdor si ‘shkopin’, edhe ‘karrotën’ me Serbinë

Ish-ambasadorja Alma Lama tha për “Bota sot” se rekomandimi për hapjen e Kapitullit 3 të negociatave me Serbinë ka të bëjë me reformat e brendshme dhe jo me Kosovën.

Sipas saj, ndonëse Serbia duket se ka përmbushur disa kritere formale, ajo mbetet ende larg harmonizimit me politikën e jashtme të BE-së, veçanërisht për shkak të qëndrimit të saj prorus.

“Së pari Serbia është pjesë e procesit të anëtarësimit në Bashkimin Europian. Kapitulli i tretë që ka rekomanduar Komisioni që të hapet nuk lidhet me Kosovën, por me reforma të brendshme në Serbi, siç është gjyqësori, mediat dhe korniza ligjore për zgjedhjet, dhe formalisht duket se i ka plotësuar kriteret. Përsa i përket përputhjes me politikën e jashtme të BE-së në raport me Ukrainën dhe Rusinë, Serbia mbetet larg dhe i vetmi vend në rajon që mban qëndrim prorus”, deklaroi ajo.

Më tej, Lama vlerësoi se Serbia vazhdon të luajë rol destabilizues ndaj Kosovës, por nënvizoi se Bashkimi Evropian po përdor njëkohësisht edhe presionin, edhe nxitjen në qasjen ndaj Beogradit.

“Përsa i përket raporteve me Kosovën, Serbia mbetet destabilizuese, por është e qartë se BE përdor si shkopin, edhe karrotën me Serbinë. Hapja e kapitujve të negocimit është një proces që duhet ta miratojnë të gjitha shtetet e BE-së, prandaj kjo nuk është një punë e kryer, ndërkohë prova e sundimit të ligjit vjen pas hapjes së kapitujve, ku kriteret duhet të plotësohen në mënyrë rigoroze”, theskoi ajo.

Arifi: Megjithatë i takon MPJD të Kosovës që të bëj punën e vet e të mos befasohemi

Në të njëjtën linjë, edhe ish-ambasadori Avni Arifi u shpreh se, megjithëse Komisioni Evropian ka propozuar hapjen e Cluster 3, mbetet e vështirë që ky propozim të marrë mbështetjen e të gjitha vendeve anëtare të BE-së. Ai kërkoi po ashtu angazhim më të madh nga MPJD-ja e Kosovës.

“E vertetë se Komisioni ka propozuar hapjen e Cluster 3 si rezultat i disa reformave që shteti serb ka bërë në fushën e lirisë së mediave, ligje të caktuara si dhe bashkëpunimin në politikën e jashtme. Megjithatë ky propozim vështirë se do të marrë përkrahjen e vendeve anëtare pikërisht duke marrë parasysh arsyet që ju keni përmend.

Përderisa vazhdojnë terroristët me duar të përgjakura të ecin rrugëve të Beogradit vështirë të besohet se vendet e BE do të pajtohen. Megjithatë i takon MPJD të Kosovës që të bëj punën e vet e të mos befasohemi”, deklaroi ai për “Bota sot”.

The post Diplomatët komentojnë rekomandimin e BE-së për Serbinë: çfarë sinjali jep për Kosovën? appeared first on Albeu.com.

Aksidenti ndodhi dy ditë më parë në aksin Strugë- Qafë Thanë, dhe pavarësisht përpjekjeve, autoboti është arritur të hiqet këtë pasdite ndërsa do të fillojë qarkullimi i mjeteve normalisht në këtë pikë kufitare.

Gjatë ditëve që dogana ishte e bllokuar, qarkullimi u drejtua në doganën e Tushemishtit dhe atë të Goricës.

Njoftimi i plote:

Drejtoria Vendore e Kufirit dhe Migracionit Korçë

Pika e Kalimit Kufitar Qafë Thanë

Nga kontakti i vazhdueshëm me autoritetet e policisë kufitare të Maqedonisë së Veriut, jemi njoftuar se, aksi rrugor “Strugë-Qafë Thanë”, i cili ishte i bllokuar që në datën 30.12.2025, për shkak të një aksidenti rrugor, aktualisht është zhbllokuar.

Lëvizja e mjeteve dhe e shtetasve, po kryhet lirisht si në hyrje dhe në dalje të Republikës së Shqipërisë, duke respektuar procedurat e verifikimit kufitar.

The post Përmbysja e autobotit me gaz bllokoi rrugën, hapet pas dy ditësh pika kufitare e Qafë-Thanës appeared first on Albeu.com.

Ndryshe nga më parë, projektligji i miratuar për Lojërat e Fatit detyron subjketet të ruajnë të dhënat e klientëve të tyre për çfarëdolloj shume të luajtur brenda një periudhe tre vjeçare, ndërsa më herët ligji synonte regjistrimin e individëve që merrnin pjesë në baste me vlera 100 mijë lekë ose më tepër.

Ndryshimet fiskale dhe mospagimi i 15% të tatimit mbi fitimin do të sjellë krijimin e një fondi të posaçëm dhe detyrime monetare fikse për kompanitë që licensohen për aktivitetin e lojërave të fatit, sipas draftit të ri të hedhur për konsultim publik.

Organizatorët e kategorive “Kazino”, “Kazino në hotele me 5 yje” dhe “Resort kazino”, brenda 31 marsit të vitit pasardhës derdhin në llogari të Fondit të Posaçëm shumën 0.4 për qind të xhiros vjetore.

Mekanizma të ngjashëm ligjorë në tregun e lojërave të fatit ndiqen edhe nga vende të Bashkimit Evropian.

The post Bastet online drejt hapjes, qeveria jep “dritën jeshile” appeared first on Albeu.com.

Rakacolli tha se momentalisht fokusi është te vaksinimi, ndërsa sa i përket procesit të hapjes ai do të jetë gradual.

“Siç e kemi theksuam gjithmonë ne ndjekim me vëmendje situatën epidemiologjike, kemi një numër të qendrueshëm të personave të shtruar në spitale. Ka vende që zbatohen masat dhe ka vende të tjera që nuk zbatohen. Asgjë nuk shihet me shifra ditore, se do të shkonim drejt gabimeve, mos harroni që nuk shkon njeri që të vaksinohet ditën e Shën Valentinit. Unë nuk mendoj që ajo që presim është lehtësimi i masave, ajo që presim ne është ajo që pandemia të menaxhohet si duhet. Masat shkojnë në përputhje me rastet dhe kushtet epidemiologjike”, tha Rakacolli. /albeu.com

The post A do të kemi lirim të masave anti-covid? Rakacolli: Do të jetë graduale appeared first on Albeu.com.