Familja e veprimtarit të vrarë Haki Imeri ka reaguar për zhvillimet që lidhen me Gjykatën Speciale në Hagë dhe ish-presidentin Hashim Thaçi.

Përmes një postimi, ajo ka pretenduar se Thaçi ishte bindur se Dhomat e Specializuara nuk do ta preknin. Familja ka kritikuar gjithashtu angazhimet politike dhe mediatike kundër kësaj gjykate.

Sipas familjes Imeri, Gjykata Speciale nuk mund të zhbëhet, ndaj tashmë duhet pritur vendimi i Apelit.

Familja e nisi reagimin me fjalën “Miq”, duke pretenduar se Edi Rama i kishte garantuar Hashim Thaçit se nuk do të prekej nga DHSK-ja, përkatësisht Gjykata Speciale.

Më tej, në postim thuhet se më vonë ishte sjellë edhe Richard Grenell, “me flamurin e Serbisë”, si përforcim në kundërshtimin ndaj Speciales. Sipas familjes, ai në fakt ishte faktori kryesor që nisi dhe përshpejtoi arrestimin e Hashim Thaçit.

Në fushatën e Grenellit, sipas reagimit, u përfshinë edhe shumë “politikanë” dhe “gazetarë”, të cilët sulmuan Dhomat e Specializuara të Kosovës në Hagë.

Familja Imeri i cilësoi këto si iluzione me të cilat u ushqyen Hashim Thaçi dhe personat që u besuan atyre.

Në reagim theksohet se Gjykata Speciale nuk mund të zhbëhet, njësoj siç nuk u zhbë as në vitin 2017. Familja kërkoi që të pritet Apeli, duke thënë se me “budallallëqet” që po bëhen, i gjithë kaosi po i faturohet Thaçit.

Në fund, familja deklaroi se Gjykata Speciale i përket Kosovës, ndërsa trupat e saj janë të SHBA-së, BE-së dhe NATO-s.

The post Familja e Haki Imerit reagon për Specialen: Tani pritet Apeli, përmendet edhe Grenelli appeared first on Albeu.com.

Në një prononcim për “Bota sot”, Salihaj tha se qëndrimi i Grenellit nuk mund të konsiderohet vetëm si përkrahje personale për disa ligjvënës të LDK-së. Sipas vlerësimit të tij, kjo ndërhyrje synon të nxisë përçarje rreth marrëveshjes LDK-LVV dhe të pengojë konstituimin e institucioneve të Kosovës.

Ai pretendon se mbështetja publike për gjashtë deputetët ka si objektiv moszbatimin e marrëveshjes ndërmjet dy partive, duke bërë që vendi të vazhdojë të mbetet në krizë institucionale.

“Ndërhyrja e Grenellit ka për qëllim t’i inkurajojë deputetët e LDK-së që të mos e përkrahin marrëveshjen LDK-LVV. Qëllimi i fundit është që të mos bëhet konstituimi i institucioneve të Kosovës dhe të vazhdojë kriza institucionale, e cila e dëmton Kosovën në planin e brendshëm dhe të jashtëm”, deklaroi Salihaj.

Salihaj kritikoi gjithashtu faktin se disa përfaqësues të LDK-së po mbështeten publikisht nga Grenell.

Përplasjet lidhur me zgjedhjen e Presidentit, sipas Salihajt, duhen parë edhe në kuadër të një beteje më të gjerë politike për drejtimin e ardhshëm të institucioneve të Kosovës.

Ai nënvizoi se kundërshtimi i kryeministrit Albin Kurti duhet të zhvillohet përmes mekanizmave demokratikë dhe votës së qytetarëve, e jo duke penguar funksionimin e institucioneve.

“Lufta për ta larguar Kurtin nga pushteti duhet të jetë me votë të elektoratit, jo me obstruksione ndaj institucioneve. Kjo mënyrë e luftës, para se ta dëmtojë Kurtin, i dëmton interesat e Kosovës”, përfundoi Salihaj për “Bota sot”.

The post Grenell përfshihet në debatin për Presidentin, Salihaj tregon synimin që sheh pas përkrahjes së gjashtë deputetëve të LDK-së appeared first on Albeu.com.