Pas një hetimi disamujor, autoritetet policore në Kosovë kanë ndërmarrë një operacion të gjerë në Podujevë, duke kontrolluar banesat e disa personave të dyshuar për një sulm me mjet shpërthyes që ndodhi në fillim të vitit. Gjatë aksionit u gjetën dhe u konfiskuan armë zjarri, municione dhe pajisje të tjera të karakterit ushtarak.

Mësohet se ngjarja në fjalë ka ndodhur më 11 mars të vitit 2026, në fshatin Sfeqël, kur një granatë dore u hodh në drejtim të banesës së familjes Shaqiri. Fillimisht, rasti u regjistrua si “Përdorim i armës apo mjetit të rrezikshëm”, por me avancimin e hetimeve dhe mbledhjen e provave, në bashkëpunim me Prokurorinë, akuza u rikualifikua në “Vrasje në tentativë”, “Shtytje” dhe “Mbajtje pa autorizim të armëve”.

Sipas informacioneve ekskluzive të Sinjalit, personat e përfshirë në këtë hetim janë identifikuar si Lavdim Zejnullahu-Parascan, rreth 37 vjeç, Liridon Lushaku, rreth 36 vjeç, dhe A.Z., rreth 26 vjeç. Viktima e këtij sulmi është D.Sh., një i ri 24-vjeçar.

Më 21 korrik, hetuesit e Njësisë për Krimet e Rënda, të mbështetur nga Njësia Speciale Operative dhe ekipi K9, ekzekutuan urdhëresën e lëshuar nga Gjykata Themelore në Prishtinë për bastisjen e dy adresave në qytetin e Podujevës.

Gjatë kontrollit të banesës së Lavdim Zejnullahu-Parascan, forcat e rendit zbuluan dhe sekuestruan dy pistoleta – njëra prej të cilave dyshohet se është armë me gaz – së bashku me 67 fishekë të kalibrave të ndryshëm, tre karikatorë pistolete, tre karikatorë për armë të gjata, një gëzhojë si dhe komponentë të ndryshëm të pushkëve.

Në banesën tjetër, që i përket Liridon Lushakut, u gjet një pistoletë, për të cilën u hap një dosje e veçantë penale për armëmbajtje pa leje. Ndërkohë, A.Z. u pyet nga autoritetet në lidhje me të njëjtën vepër penale dhe, me urdhër të prokurorit, u lejua të largohet i lirë, duke vijuar procedurat në gjendje të lirë.

Burimet brenda hetimit bëjnë të ditur se gjatë operacionit, Lavdim Zejnullahu-Parascan dhe Liridon Lushaku nuk ndodheshin në shtëpitë e tyre. Atyre u janë dërguar thirrje zyrtare për t’u paraqitur në stacionin policor dhe tashmë janë shpallur në kërkim nga autoritetet.

Hetimet për të zbardhur plotësisht rrethanat e kësaj ngjarjeje janë ende në vijim.

Shënim: Të gjithë personat e përmendur në këtë shkrim gëzojnë prezumimin e pafajësisë deri në një vendim përfundimtar të formës së prerë nga gjykata.

The post Policia bastis banesa në Podujevë pas sulmit me granatë, dy të dyshuar shpallen në kërkim appeared first on Albeu.com.