Gonzalo García është zyrtarisht futbollist i Fulhamit. Klubi londinez ka transferuar nga Real Madridi sulmuesin spanjoll, i cili vlerësohet si një prej talenteve më premtuese të futbollit në Spanjë.

22-vjeçari ka firmosur me Fulhamin një marrëveshje pesëvjeçare, që do të jetë në fuqi deri në verën e vitit 2031. Në kontratë është përfshirë edhe mundësia që klubi ta zgjasë bashkëpunimin për një sezon shtesë.

Edhe pse Fulhami nuk e ka publikuar shumën e transferimit, klubi do të paguajë nga 40 deri në 42 milionë euro për 70% të të drejtave të Gonzalos. Real Madridi do të zotërojë 30% të mbetur, ndërsa i gjithë operacioni vlerësohet në afro 60 milionë euro.

Pas prezantimit zyrtar, Gonzalo shprehu gëzimin për nisjen e eksperiencës së tij të re në Ligën Premier. Ai falënderoi drejtuesit e Fulhamit dhe trajnerin Álvaro Arbeloa për besimin, ndërsa deklaroi se pret me padurim hapjen e këtij kapitulli të ri të karrierës.

I lindur në Madrid, Gonzalo García hyri në akademinë e njohur të Real Madridit kur ishte 10 vjeç. Pas një sezoni të kaluar me ekipet e moshave të Mallorcës, ai u kthye në akademinë madrilene në vitin 2019 dhe prej aty nisi rrugëtimin drejt skuadrës së parë.

Sezoni 2023/24 shënoi shpërthimin e tij, pasi realizoi 35 gola për ekipin U-19 të Real Madridit dhe kontribuoi në fitimin e një triplete historike. Rendimenti i lartë vazhdoi edhe te Castilla, ku në 36 paraqitje shënoi 25 herë dhe dhuroi katër asistime.

Këto paraqitje i siguruan një vend në ekipin e parë të Real Madridit. Gjatë sezonit të kaluar, sulmuesi luajti 39 ndeshje për skuadrën madrilene, me një bilanc prej tetë golash dhe tre asistimesh.

Gonzalo spikati gjithashtu në Kupën e Botës për Klube. Ai e mbylli turneun si golashënuesi më i mirë, duke regjistruar katër gola dhe një asistim, ndonëse Real Madridi u eliminua në gjysmëfinale.

The post Fulhami zyrtarizon afrimin e Gonzalo Garcías nga Real Madridi appeared first on Albeu.com.

Akademia e Real Madridit, e njohur si ‘La Fabrica’, është shndërruar në një burim të jashtëzakonshëm financiar për klubin. Edhe pse në publik diskutohet për numrin e vogël të futbollistëve vendas apo spanjollë në formacionin titullar madrilen, situatë që bëri që Spanja fituese e Kupës së Botës të mos kishte asnjë lojtar të Real Madridit në skuadër, përfitimi ekonomik nga akademia mbetet tepër i madh.

Në këtë aspekt, e enjtja shënoi një ditë historike në Valdebebas, me disa marrëveshje që sollën të ardhura të konsiderueshme në arkat e klubit.

Real Madridi përfundoi transferimin te Fulham të 70% të të drejtave të Gonzalo Garcias për 40 milionë euro. Klubi anglez bleu gjithashtu 70% të të drejtave të Cesar Palacios për 10 milionë euro.

Po atë ditë u konfirmua edhe largimi i Victor Valdepenas, një tjetër talent i dalë nga akademia madrilene. Ai iu bashkua Fiorentinës, e cila pagoi 8 milionë euro për 50% të të drejtave të tij.

Vetëm brenda pak orësh, këto tri marrëveshje për lojtarët e akademisë i siguruan Real Madridit gjithsej 58 milionë euro.

Kjo shumë i shtohet bilancit të krijuar më herët nga shitja e futbollistëve të tjerë të formuar në ‘La Fabrica’. Tregu i transferimeve po rezulton veçanërisht fitimprurës për akademinë e Valdebebas, e cila përbën një aset të rëndësishëm në procesin e ndryshimeve të ekipit të parë.

Përpara tri operacioneve të fundit, madrilenët kishin arkëtuar tashmë 123.5 milionë euro gjatë kësaj vere nga transferimet e lojtarëve të akademisë.

Në këtë mënyrë, të ardhurat e deritanishme të gjeneruara nga ‘La Fabrica’ kanë arritur në 181.5 milionë euro. Shifra është më e lartë se 105 milionë eurot që Real Madridi ka investuar për përforcimin e ‘projektit Mou’.

Denzel Dumfries u transferua për 20 milionë euro, Marc Cucurella kushtoi 60 milionë euro, ndërsa për Carlos Espi u paguan 25 milionë euro. Shpenzimet pritet të rriten ndjeshëm me shtimin e 120 milionë eurove, ose edhe më shumë, për Yan Diomande, si dhe me çmimin e Rodrit, i cili do të jetë mbi 50 milionë euro.

Transferimet e Diomandes dhe Rodrit te Real Madridi po vonohen për arsye të ndryshme.

Nico Paz është shitja më e kushtueshme e kësaj vere, pasi kaloi te Como për 60 milionë euro. Ai është bërë futbollisti i dytë më i shtrenjtë i akademisë në historinë e Real Madridit, pas Alvaro Moratës. Klubi madrilen ka ruajtur edhe mundësinë për ta riblerë për 80 milionë euro.

Victor Munoz u transferua te Liverpooli për 40 milionë euro, aq sa parashikonte klauzola e tij e lirimit. Nga marrëveshja për fituesin e Kupës së Botës, Real Madridi do të përfitojë 20 milionë euro.

Të ardhura sollën edhe lëvizjet e Mario Gilas dhe Alvaro Rodriguezit. Gila u largua nga Lazio për t’iu bashkuar Milanit në një transferim prej 30 milionë eurosh, ndërsa Rodriguez kaloi nga Elche te Bournemouth për 25 milionë euro. Real Madridi zotëronte gjysmën e të drejtave në të dyja rastet dhe do të arkëtojë në total 27.5 milionë euro.

Klubi do të marrë gjithashtu 3.5 milionë euro nga Getafe për 50% të Mario Martin, ndërsa nga Alex Jimenez përfitoi 12.5 milionë euro në prillin e kaluar.

Të ardhurat prej 181.5 milionë eurosh nga lojtarët e akademisë paraqiten kështu:

Nico Paz (Como): 60 milionë euro

Gonzalo Garcia (Fulham): 50 milionë euro (70% e tarifës së transferimit)

Cesar Palacios (Fulham): 10 milionë euro (70% e tarifës së transferimit)

Victor Munoz (Liverpool): 20 milionë euro (50% e tarifës së transferimit)

Mario Gila (Milan): 15 milionë euro (50% e tarifës së transferimit)

Alvaro Rodriguez (Bournemouth): 12.5 milionë euro (50% e transferimit)

Alex Jimenez (Bournemouth): 12.5 milionë euro (50% e tarifës së transferimit)

Victor Valdepenas (Fiorentina): 8 milionë euro (50% e transferimit)

Mario Martin (Getafe): 3.5 milionë euro (50% e tarifës së transferimit)

The post ‘La Fabrica’ mbush arkat e Real Madridit, të ardhurat tejkalojnë investimet në transferime appeared first on Albeu.com.

Real Madridi po përgatitet të mbyllë një tjetër operacion të rëndësishëm në merkaton e verës, me sulmuesin Gonzalo Garcia që pritet ta vazhdojë karrierën në Ligën Premier.

Fulhami ka shfaqur interesim të madh për 22-vjeçarin, me kërkesë të trajnerit Alvaro Arbeloa. Ish-futbollisti dhe ish-trajneri i akademisë së klubit madrilen ka këmbëngulur që të punojë sërish me Garcian, ndërsa disa raunde bisedimesh i kanë afruar palët pranë përfundimit të marrëveshjes.

Gonzalo Garcia ishte përfshirë mes objektivave kryesorë të Fulhamit që në fillim të korrikut, menjëherë pasi Arbeloa mori drejtimin e skuadrës angleze.

Jose Mourinho, trajneri i ri i Real Madridit, kishte shprehur rezerva për largimin e sulmuesit të formuar në akademinë “La Fabrica”, pasi e vlerëson atë si një profil me rëndësi për ekipin. Megjithatë, edhe pse Mourinho dëshironte ta mbante në skuadër, klubet kanë arritur akordin.

COPE raporton se Fulhami do t’i paguajë Real Madridit 70 milionë euro për kartonin e sulmuesit spanjoll. Me këtë shifër, Gonzalo Garcia bëhet futbollisti më i shtrenjtë i shitur nga klubi madrilen gjatë kësaj vere.

Të ardhurat nga ky transferim janë më të larta se 60 milionë eurot që Real Madridi përfitoi nga kalimi i Nico Paz te Como, pasi klubi italian vuri në zbatim klauzolën për blerjen përfundimtare të tij.

Vetëm pak minuta pas publikimit të lajmit për Gonzalon, Marca bëri të ditur se Real Madridi dhe Fulhami kishin gjetur gjuhën e përbashkët edhe për transferimin e mesfushorit Cesar Palacios.

Palacios, 21 vjeç, regjistroi 10 paraqitje me ekipin e parë të Los Blancos gjatë sezonit të kaluar. Ai do të transferohet për 10 milionë euro, ndërkohë që Real Madridi do të mbajë 30% të të drejtave ekonomike të lojtarit.

The post Fulhami arrin marrëveshje për dy futbollistë të Real Madridit, operacioni kap vlerën e 80 milionë eurove appeared first on Albeu.com.

Fulhami ka paraqitur një ofertë prej 60 milionë eurosh për të siguruar përfundimisht shërbimet e sulmuesit të ri të Real Madridit, Gonzalo Garcia, sipas raportimit të AS.

Shuma e propozuar nga klubi londinez e tejkalon ndjeshëm variantin e parapëlqyer nga madrilenët. Reali kishte shfaqur gatishmëri të merrte rreth 30 milionë euro, por duke ruajtur 50 për qind të kartonit të futbollistit.

Drejtuesit e klubit spanjoll nuk janë ende të bindur për shitjen e plotë të 22-vjeçarit, të cilin e vlerësojnë si një prej talenteve me perspektivën më të madhe në skuadër.

Gonzalo e ka nisur periudhën përgatitore me objektivin për të siguruar një vend në ekipin e parë të Jose Mourinhos. Paraqitjet e tij gjatë javës së parë të stërvitjeve në Valdebebas kanë lënë përshtypje shumë pozitive, ndërsa sulmuesi shënoi edhe në miqësoren kundër Leganés.

Pavarësisht vlerësimit për të, konkurrenca e fortë në fazën sulmuese ka shtyrë Real Madridin të marrë në konsideratë largimin e lojtarit. Në aspektin financiar, një transferim për 60 milionë euro do të përbënte një përfitim të konsiderueshëm për klubin.

Pengesa kryesore në bisedime lidhet me formulën e marrëveshjes. Real Madridi synon të vazhdojë të ketë ndikim mbi të ardhmen e Gonzalos, duke mbajtur një pjesë të të drejtave të tij edhe pas transferimit.

Klubi madrilen e ka zbatuar më parë këtë model në marrëveshjet për Nico Paz dhe Jacobo Ramón, si dhe më herët në rastin e Brahim Diaz.

Fulhami, ndërkohë, nuk është i interesuar për një operacion të pjesshëm. Klubi anglez dëshiron ta vendosë sulmuesin spanjoll në qendër të projektit të tij dhe këmbëngul që të fitojë pronësinë e plotë të kartonit.

Raportimet bëjnë të ditur se trajneri i Fulhamit, Alvaro Arbeloa, e konsideron Garcian një element të rëndësishëm për të ardhmen e ekipit. Arbeloa e njeh mirë futbollistin, pasi e ka stërvitur më parë te Castilla.

Palët nuk kanë arritur ende një dakordim për strukturën e transferimit, por negociatat mbeten në zhvillim dhe realizimi i marrëveshjes shihet si i mundshëm. Në rast se bisedimet mbyllen me sukses, Gonzalo Garcia pritet ta vijojë karrierën në Ligën Premier.

The post Real Madridi në dilemë për ofertën 60 milionë euroshe të Fulhamit për Gonzalo Garcian appeared first on Albeu.com.

Jose Mourinho ka filluar të marrë vendimet e para të rëndësishme për të ardhmen e skuadrës së Real Madridit, teksa po përgatit formacionin për sezonin e ardhshëm. Franco Mastantuono dhe Raul Asencio pritet të vazhdojnë karrierën e tyre larg “Santiago Bernabeut” në formë huazimi, ndërsa Gonzalo Garcia duket se ka siguruar një vend në ekipin e parë.

Menjëherë pas rikthimit të tij të dytë në krye të klubit më 13 korrik, trajneri portugez ka zhvilluar bisedime të veçanta me secilin prej futbollistëve, sipas gazetares së COPE, Arancha Rodriguez.

Në këtë fazë përgatitore, Mourinho po mirëpret me radhë lojtarët që po kthehen nga detyrimet e tyre në Kupën e Botës, teksa njëkohësisht po analizon me kujdes potencialin e grupit që ka në dispozicion.

Burime pranë klubit sugjerojnë se Mastantuono dhe Asencio janë dy emrat më të përfolur për një kalim të përkohshëm te një klub tjetër, me qëllimin kryesor për të fituar minuta loje dhe përvojën e nevojshme në nivel të lartë.

Largimi i mundshëm i Asencios është një temë e hapur prej disa javësh, veçanërisht pasi mbrojtja madrilene u përforcua me ardhjen e Ibrahima Konates. Edhe pse lojtari i dalë nga akademia kishte shpresuar të luftonte për një fanellë titullari nën drejtimin e Mourinhos, tashmë perspektiva është një huazim për të ndihmuar në rritjen e tij profesionale.

Sa i përket Mastantuonos, talenti i tij vijon të vlerësohet lart si nga drejtuesit ashtu edhe nga trajneri. Megjithatë, pasi e ka vëzhguar me vëmendje gjatë seancave stërvitore, Mourinho është i mendimit se një eksperiencë huazimi do t’i ofronte më shumë hapësirë dhe do të përshpejtonte zhvillimin e tij.

Në kontrast të plotë me dy shokët e tij, Gonzalo Garcia ka arritur të fitojë besimin e stafit teknik dhe tani pritet të jetë pjesë integrale e ekipit të parë gjatë sezonit të ri.

Sulmuesi 22-vjeçar ishte listuar mes lojtarëve që mund të shiteshin në fillim të merkatos verore, por Mourinho insistoi ta mbante gjatë përgatitjeve për ta vlerësuar personalisht. Garcia ka shkëlqyer me formën e tij fizike, seriozitetin në punë dhe performancat në fushë, duke i dhënë të gjitha argumentet teknikut portugez se mund të luajë një rol kyç në projektin e ri.

Ndërkohë që puna për formësimin e skuadrës vazhdon, Real Madridi mban sytë hapur në merkato dhe emra si Michael Olise dhe Rodri qarkullojnë si objektiva potencialë të klubit.

The post Mourinho vendos fatin e tre talenteve te Reali, revolucioni nis nga akademia appeared first on Albeu.com.

Alvaro Arbeloa e ka nisur me vrull aventurën e tij të re në pankinën e Fulhamit, duke vënë në shënjestër dy ish-nxënës të tij nga akademia e Real Madridit. Sipas gazetës “The Sun”, trajneri spanjoll, i cili firmosi një marrëveshje trevjeçare pas lamtumirës së Marco Silvas, synon të përforcojë vijën e parë të sulmit me Franco Mastantuono dhe Gonzalo Garcia.

Gonzalo Garcia ka lënë gjurmë te Castilla nën urdhrat e Arbeloas, duke gjetur rrugën e rrjetës 10 herë në 32 ndeshje. Sulmuesi 22-vjeçar kishte shënuar po aq gola edhe me Xabi Alonson në krye të ekipit, përpara ndërrimit të trajnerit, çka dëshmon se bëhet fjalë për një ndër diamantet më të spikatur të akademisë madrilene.

Nga ana tjetër, Franco Mastantuono, mesfushori ofensiv 18-vjeçar që iu bashkua Los Blancos verën e kaluar nga River Plate për rreth 38 milionë funte, gjithashtu ka qenë nën drejtimin e Arbeloas. Ai numëron 18 paraqitje dhe dy gola, dhe burime pranë klubit sugjerojnë se një largim i tij do të ishte i mundur vetëm në formë huazimi, nëse palët gjejnë gjuhën e përbashkët.

Fulhami ndodhet në kërkim të alternativave në repartin e avancuar, pasi Harry Wilson iu bashkua Leeds Unitedit dhe Raul Jimenez u rikthye te Wolverhamptoni pas përfundimit të kontratës. Për të mbuluar këto boshllëqe, klubi londinez po mban në vëzhgim edhe mesfushorin e Southamptonit, Shea Charles, megjithëse “Shenjtorët” kanë hedhur poshtë dy oferta nga Leeds dhe e konsiderojnë kartonin e tij me vlerë rreth 25 milionë funtesh.

Ndërkohë, ish-mesfushori i Tottenhamit, Yves Bissouma, po zhvillon stërvitje në qendrën e Fulhamit në Motspur Park, pas largimit nga Spurs. Megjithatë, drejtuesit e klubit nuk po konsiderojnë për momentin një lëvizje konkrete për reprezentuesin e Malit.

The post Synimet e para të Arbeloas te Fulham, dy talente të Real Madridit në radar appeared first on Albeu.com.

Real Madridi po punon për të ndërtuar një skuadër elitare për sezonet e ardhshme, por për të vënë në zbatim planet ambicioze të verës, klubi duhet të krijojë hapësira në ekip dhe njëkohësisht të sigurojë të ardhura të konsiderueshme.

Në javët e ardhshme, nga “Los Blancos” pritet të largohen gjithsej gjashtë lojtarë.

Sipas El Debate, skuadra madrilene ka përfituar tashmë rreth 51 milionë euro nga shitja e Nico Paz dhe 17 milionë euro nga Víctor Munoz. Po ashtu, me largimet e Carvajal, Ceballos dhe Alaba, janë çliruar paga të rëndësishme, me kursimin total që llogaritet rreth 52 milionë euro.

Pavarësisht kësaj, drejtuesit e Real Madridit e konsiderojnë se kjo shumë nuk është e mjaftueshme. Projekti i tyre përfshin edhe largimin e të paktën gjashtë futbollistëve të tjerë: dy mbrojtës, dy mesfushorë dhe dy sulmues.

Raportohet se trajneri i ri, Jose Mourinho, ka përcaktuar disa emra që mund të sakrifikohen. Fran Garcia, Raul Asencio dhe Eduardo Camavinga janë mes lojtarëve për të cilët dera e largimit mbetet e hapur.

Në mesin e futbollistëve që përmenden si kandidatë për t’u larguar janë edhe Alvaro Carreras, Franco Mastantuono dhe Gonzalo García.

Nëse këto lëvizje përmbyllen me sukses, Real Madridi do të siguronte burime të rëndësishme financiare për objektivat madhorë të merkatos, ku në fokus mbeten emra si Michael Olise, Erling Haaland dhe Julian Alvarez.

Gjithsesi, nuk përjashtohet as mundësia e një transferimi të madh. Fede Valverde dhe Aurelien Tchouameni përmenden si dy prej lojtarëve më të kërkuar dhe si opsione të mundshme për t’u sakrifikuar në funksion të projektit të ri galaktik.

The post Real Madridi përgatit largimin e 6 futbollistëve për të mbështetur projektin e ri appeared first on Albeu.com.

Drejtuesit madrilenë po analizojnë situatën e deri në shtatë lojtarëve: Raul Asencio, Fran Garcia, Eduardo Camavinga, Aurelien Tchouameni, Franco Mastantuono, Brahim Diaz dhe Gonzalo Garcia.

Edhe pse ende nuk ka një vendim përfundimtar, sektori sportiv i klubit është tashmë i angazhuar në ndërtimin e një skenari të ndërlikuar për këtë afat kalimtar.

Kohët e fundit, Real Madridi ka zhvendosur prioritetet në strategjinë e merkatos. Pas hapave përpara në afrimin e përforcimeve, tani klubi duhet të lirojë hapësira në skuadër përpara se të ndërmarrë lëvizje të tjera.

Situatat e Asencios dhe Fran Garcias duken më të drejtpërdrejta, pasi të dy kanë vlerësim të lartë në treg dhe mund t’i sjellin klubit të ardhura të rëndësishme, pa cenuar strukturën kryesore të ekipit.

Në repartin e mesfushës, tabloja paraqitet më e ndërlikuar. Camavinga dhe Tchouameni mbeten lojtarë të nivelit të lartë, me kontrata afatgjata dhe me peshë të madhe në tregun ndërkombëtar. Pavarësisht kësaj, te Real Madridi ekziston bindja se një largim nga kjo zonë e fushës do të sillte burime shtesë financiare për operacionet e ardhshme gjatë merkatos.

Në listën e futbollistëve që mund të largohen bën pjesë edhe Brahim, megjithëse rasti i tij shihet ndryshe. Ai ka treguar se mund të përshtatet në disa role në sulm, por shtimi i konkurrencës në repartin ofensiv mund t’ia reduktojë hapësirat dhe minutazhin.

Nga ana tjetër, e ardhmja e Gonzalo Garcias do të kushtëzohet nga mënyra se si klubi do ta ndërtojë sulmin. Për të mund të merret një vendim pas përgatitjeve verore, në varësi të asaj nëse do të ketë hapësirë për një sulmues rotacioni.

Për Mastantuonon, alternativa që shihet si më e mundshme është huazimi dhe jo transferimi përfundimtar. Talenti argjentinas ka nevojë për vazhdimësi në lojë dhe Real Madridi nuk synon t’ia ngadalësojë zhvillimin.

Prandaj, si zgjedhja më e arsyeshme konsiderohet kalimi i tij në formë huazimi te një klub ku do të ketë mundësi të luajë rregullisht dhe të marrë më shumë përgjegjësi.

The post Real Madridi shqyrton largimin e shtatë futbollistëve në verën e transferimeve appeared first on Albeu.com.

Me tre gola, një asist dhe paraqitje të jashtëzakonshme, sulmuesi 21-vjeçar ka qenë vendimtar në kalimin e “Los Blancos” në çerekfinale të turneut.

“Është e pashpjegueshme çfarë Kupe Bote po përjetoj”, rrëfeu Gonzalo, i mbushur me emocion dhe vetëdije për momentin historik që po jeton.

I rritur në akademinë e famshme “La Fábrica” dhe me hapa të qetë në Valdebebas, Gonzalo erdhi në SHBA pa shumë vëmendje, por tani ka marrë gjithë skenën.

Në vetëm katër ndeshje, ai ka ndezur entuziazmin e tifozëve dhe ka sjellë në kujtesë fjalët e Courtois pas eliminimit të Real Madridit nga Liga e Kampionëve kundër Arsenalit.

“Na mungonte një sulmues klasik” – kishte thënë Courtois. Dhe Gonzalo e dëshmoi.

Në sfidën vendimtare ndaj Juventusit, ai realizoi golin me kokë që e çoi Real Madridin në çerekfinale, pas një krosimi perfekt nga Trent. Ishte mënyra më klasike për të zhbllokuar ndeshjen – krosim, gjuajtje dhe gol.

Paraqitja e tij nuk ka ndikuar vetëm në rezultatet sportive, por edhe në aspektin ekonomik. Deri tani, Gonzalo ka kontribuar drejtpërdrejt në fitimin e 22.8 milionë eurove, ndërsa në total, Real Madrid ka përfituar 54.2 milionë euro nga ky turne, me potencialin për të fituar edhe mbi 100 milionë euro, nëse e ngritin trofeun.

Rritje galopante në tregun e transferimeve

Paraqitjet e Gonzalo Garcías kanë shpërthyer edhe në tregun e transferimeve. Ai mbërriti në Kupën e Botës për Klube me një vlerë prej 5 milionë euro, por pas katër ndeshjesh – ku ka shënuar ose asistuar në secilën – vlera e tij është rritur në 8 milionë euro dhe vazhdon të ngjitet.

“E njihja mirë, por nuk do të thosha se prisja tre gola në katër ndeshje, por ai i ndihmon shumë ekipit. Janë gola vendimtarë dhe unë kisha besim tek ai”, deklaroi Xabi Alonso pas ndeshjes.

Gonzalo García nuk është më vetëm një premtim. Ai po bëhet një realitet i fuqishëm dhe një emër që po e shkruan historinë e vet në fanellën e bardhë të Real Madridit.

The post Heroi i ri i Real Madridit – Gonzalo Garcia garanton çerekfinalen dhe miliona euro të ardhura appeared first on Albeu.com.