Hita u ka kërkuar drejtuesve vendorë që të ndjekin nga afër zbatimin e masave për mbrojtjen e perimetrit të sigurisë së shkollave dhe garantimin e zhvillimit normal të procesit mësimor.

Ai ka kërkuar gjithashtu shtimin e kontrolleve në ambientet brenda dhe jashtë zonave të sigurisë së institucioneve arsimore, për të identifikuar dhe goditur personat që mund të përfshijnë nxënësit në veprimtari kriminale.

Gjatë diskutimeve, drejtori i Policisë së Shtetit ka vendosur si prioritet edhe rritjen e angazhimit për goditjen e grupeve kriminale, identifikimin e personave që qarkullojnë të armatosur ose me lëndë narkotike, si dhe arrestimin e individëve të shpallur në kërkim.

Strukturave vendore dhe kufitare u është kërkuar forcimi i veprimeve kundër krimeve të rënda, armëmbajtjes pa leje, narkotikëve dhe organizatave kriminale. Në të njëjtën kohë, Hita ka kërkuar zhvillimin e hetimeve proaktive ndaj krimeve në kufi dhe rasteve të trafikut.

Një vëmendje e veçantë i është kushtuar edhe përmirësimit të performancës së Policisë, komunikimit me qytetarët dhe rritjes së sigurisë në rrugë. Për këtë qëllim, është kërkuar shfrytëzimi më i efektshëm i teknologjisë për parandalimin e aksidenteve.

Skënder Hita ka nënvizuar se forcimi i besimit të publikut te Policia mbetet i rëndësishëm. Sipas tij, ky objektiv kërkon më shumë punë dhe angazhim, si dhe përdorimin e burimeve njerëzore për trajtimin dhe zgjidhjen e shqetësimeve që qytetarët përcjellin përmes platformës së bashkëqeverisjes dhe adresave zyrtare.

The post Skënder Hita udhëzon policinë në Tiranë, Korçë dhe Dibër: Fokus te grupet kriminale dhe siguria në shkolla appeared first on Albeu.com.