Në vitin 2024, vendi kishte vetëm 9.66 gjyqtarë profesionistë për çdo 100 mijë banorë, sipas të dhënave të Eurostat, të përpunuara nga Monitor (për Shqipërinë Eurostat, raporton vetëm të dhënat për numrin e gjyqtarëve, raporti për 100 mijë banorë është përllogaritur nga redaksia).

Ky nivel ishte rreth 39% më i ulët se mesatarja e Bashkimit Europian, prej 15.7 gjyqtarësh për 100 mijë banorë.

Mes 32 vendeve europiane dhe të rajonit për të cilat ka të dhëna, Shqipëria renditej e nënta nga fundi. Raport më të ulët kishin vetëm Suedia, Malta, Polonia, Italia, Çekia, Spanja, Austria dhe Irlanda.

Në raport me vendet e tjera të Ballkanit perëndimor, Shqipëria ka një diferencë të madh. Mali i Zi kishte 42.49 gjyqtarë për 100 mijë banorë, Serbia 40.18 dhe Maqedonia e Veriut 20.15.

Në raport me popullsinë, Mali i Zi kishte mbi katër herë më shumë gjyqtarë se Shqipëria, ndërsa Serbia rreth katër herë më shumë. Për Bosnjë-Hercegovinën dhe Kosovën nuk figurojnë të dhëna në tabelën përkatëse.

Niveli i ulët pasqyron tkurrjen e trupës gjyqësore gjatë procesit të rivlerësimit, kur largimet, dorëheqjet dhe shkarkimet nuk u zëvendësuan me të njëjtin ritëm nga emërimet e reja.

Për pasojë, një pjesë e gjykatave kanë funksionuar me vende vakante, ndërsa çështjet e mbartura dhe kohëzgjatja e proceseve janë kthyer në një nga problematikat kryesore të sistemit.

Të dhënat e tjera të Eurostat, treguan se Shqipëria ka 55% të gjyqtareve femra, një nga më të ulëtat në Europë.

Kroacia dhe Mali i Zi kryesojnë Europën

Kroacia kishte raportin më të lartë në Europë, me 43.32 gjyqtarë profesionistë për 100 mijë banorë. Pas saj renditej Mali i Zi me 42.49, Serbia me 40.18 dhe Sllovenia me 40.16.

Nivele të larta shënonin gjithashtu Luksemburgu, me 36.01 gjyqtarë për 100 mijë banorë, Bullgaria me 35.37 dhe Rumania me 35.31.

Në Gjermani raporti arrinte në 26.3, në Greqi në 26.06, ndërsa në Finlandë dhe Estoni përkatësisht në 19.38 dhe 18.11 gjyqtarë për 100 mijë banorë.

Eurostat raportoi se në të gjithë Bashkimin Europian numri i gjyqtarëve në raport me popullsinë është ulur edhe në nivel europian gjatë dekadës së fundit. BE kishte mesatarisht 15.7 gjyqtarë profesionistë për 100 mijë banorë në vitin 2024, nga 17.7 në vitin 2014.

Irlanda kishte numrin më të ulët të gjyqtarëve në raport me popullsinë, me vetëm 3.64 për 100 mijë banorë. Ajo ndiqej nga Austria me 4.32, Spanja me 6.18, Çekia me 6.72 dhe Italia me 7.86.

Polonia regjistronte 8.01 gjyqtarë për 100 mijë banorë, Malta 8.52 dhe Suedia 9.04, të gjitha poshtë nivelit të Shqipërisë.

Megjithatë, krahasimi i drejtpërdrejtë mes vendeve duhet interpretuar edhe në raport me organizimin e ndryshëm të sistemeve gjyqësore, kompetencat e gjykatave dhe rolin e personelit tjetër juridik.

Eurostat sqaron gjithashtu se të dhënat për Austrinë dhe Çekinë përfshijnë vetëm gjyqtarët e autorizuar për të shqyrtuar çështje penale.

Si përkufizohet gjyqtari profesionist

Në tregues përfshihen gjyqtarët profesionistë me kohë të plotë dhe të pjesshme, të autorizuar për të shqyrtuar çështje civile, penale dhe çështje të tjera, përfshirë ato në gjykatat e apelit.

Ata duhet të jenë të rekrutuar dhe të paguar për ushtrimin e profesionit të gjyqtarit. Në të dhëna nuk përfshihen gjyqtarët joprofesionistë, anëtarët laikë të trupave gjyqësore dhe magjistratët që nuk e ushtrojnë këtë funksion si profesion./Monitor

The post Reformë në drejtësi, por Shqipëria ndër vendet me më pak gjyqtarë në raport me popullsinë appeared first on Albeu.com.

Në vitin 2024, gratë përbënin 55% të gjyqtarëve profesionistë në Shqipëri, ndërsa burrat 45%, sipas të dhënave të Eurostat. Me këtë nivel, Shqipëria renditet pranë fundit të klasifikimit europian, duke lënë pas vetëm disa vende si Polonia, Gjermania, Turqia, Lihtenshtajni, Irlanda dhe Islanda.

Në Ballkanin Perëndimor, Shqipëria kishte përqindjen më të ulët të grave gjyqtare. Në Serbi, gratë përbënin 73% të gjyqtarëve profesionistë, në Bosnjë dhe Hercegovinë 64.8%, në Malin e Zi 63.8%, ndërsa në Maqedoninë e Veriut 61.4%.

Diferenca me Serbinë, që kryeson rajonin, arrin në 18 pikë përqindje. Shqipëria mbetet gjithashtu pas vendeve fqinje të Bashkimit Europian, si Greqia, ku gratë përbënin 75.5% të gjyqtarëve, dhe Kroacia, me 72.3%.

Të dhënat tregojnë se, ndonëse gratë janë shumicë në gjyqësorin shqiptar, ndarja mes gjinive është më e balancuar sesa në shumicën e vendeve të rajonit dhe të Europës, ku profesioni i gjyqtarit dominohet më dukshëm nga gratë.

Gratë shumicë në pothuajse të gjithë Europën

Sipas Eurostat, përqindja më e lartë e grave gjyqtare u regjistrua në Slloveni, ku ato përbënin 81.4% të totalit. Pas saj renditeshin Letonia me 79.7%, Greqia me 75.5%, Luksemburgu me 73.6%, Serbia me 73% dhe Kroacia me 72.3%.

Në Francë, gratë përbënin 70% të gjyqtarëve, ndërsa në Estoni dhe Hungari pesha ishte përkatësisht 68.7% dhe 68.6%. Nivele mbi 65% u regjistruan edhe në Lituani, Portugali, Finlandë dhe Rumani.

Në skajin tjetër të renditjes, gratë ishin pakicë në Islandë, me 43.1%, në Irlandë me 43.6%, në Lihtenshtajn me 45% dhe në Turqi me 49.6%. Gjermania kishte një ndarje pothuajse të barabartë, me gratë që përbënin 50.7% të gjyqtarëve profesionistë.

Eurostat thekson se Irlanda ishte i vetmi vend i Bashkimit Europian ku burrat përbënin shumicën e gjyqtarëve. Në Slloveni, Letoni dhe Greqi, përkundrazi, gratë përbënin mbi tre të katërtat ose afër këtij niveli të totalit.

BE-ja kishte më pak gjyqtarë se një dekadë më parë

Në vitin 2024, Bashkimi Europian kishte mesatarisht 15.7 gjyqtarë profesionistë për çdo 100 mijë banorë, nga 17.7 në vitin 2014.

Raporti më i lartë u regjistrua në Kroaci, me 43.3 gjyqtarë për 100 mijë banorë, e ndjekur nga Sllovenia me 40.2, Luksemburgu me 36, Bullgaria me 35.4 dhe Rumania me 35.3.

Në anën tjetër, Irlanda kishte vetëm 3.6 gjyqtarë për 100 mijë banorë, Austria 4.3, Spanja 6.2, Çekia 6.7 dhe Italia 7.9.

Në përkufizimin e Eurostat përfshihen gjyqtarët profesionistë me kohë të plotë dhe të pjesshme, të autorizuar për të shqyrtuar çështje civile, penale dhe çështje të tjera, përfshirë edhe gjykatat e apelit. Nuk përfshihen gjyqtarët joprofesionistë dhe anëtarët laikë të trupave gjyqësore./Monitor

The post Shqipëria, ndër vendet me më pak gra gjyqtare në Europë appeared first on Albeu.com.

Rama thotë se gjykatësit sot “janë vetë zot dhe vetë shkop”.

Gjithashtu, kryeministri theksoi se pagat e gjykatësve sot janë njësoj me pagat e gjykatësve në Greqi, një vend anëtar i Bashkimit të Evropës dhe me të larta se pagat e gjykatësve në Mal të Zi dhe Maqedoninë e Veriut.

“GJK publikoi para pak ditësh regjistrimin e seancës ku gjykatësit, dy shoqata gjykatësish edhe ato me probleme ligjore, kërkuan nga GJK që tju rrisë pagat. Tani, po ta dëgjosh atë regjistrimin të publikuar nga seanca, ndihesh në vështirësi të madhe duke menduar që këta janë njerëzit që gjykojnë dhe japin drejtësi, ndërkohë që filli i logjikës së atyre që u ballafaquan me GJK lë tejet për të dëshiruar. Këtu nuk është cështje personash. Në Shqipëri pagat e gjykatësve sot sic janë, janë të njëjta me pagat e gjykatësve në Greqi dhe janë dyfish më të larta sesa pagat e gjykatësve në Maqedoninë e Veriut dhe Mal të Zi”, tha Rama.

Rama u kujtoi gjykatësve se me reformën në drejtësi i respektuan jo vetëm me pagat, por i bënë edhe të pavarur në vendimmarrjen e tyre.

Sipas tij, është absurde që të kërkohet rritje rroge nga 1800 deri në 3000 euro. Ndërsa në këtë iniciativë tha se bëjnë përjashtim gjykatësit e SPAK.

“I ngritën mbi presidentin dhe mbi gjithë të tjerët për ti dhënë një sinjal të vullnetit për të pasur jo vetëm një drejtësi të pavarur, por edhe gjykatës që të ndihen të respektuar, duke marrë paga super, ky thotë ta bëjmë tani përgjithmonë. Pra Shqipëria të mbetet i vetmi vend përjetësisht ku gjykatësit të marrin paga më të larta se të tjerët, mbi presidentin. Çfarë kërkojnë gjykatësit? 1800 euro rritje për gjyqtarin e shkallës së parë, 2000 euro rritje për gjyqtarin e Apelit dhe rreth 3000 mijë euro rritje për gjykatësit e SPAK-ut, plus BKH. Duhet thënë në fakt që SPAK nuk i është bashkuar kësaj iniciative absurde dhe kjo i bën respekt. Këtu jemi. Jemi në një situatë kur gjykatësit duan të imponohen mbi parlamentin, mbi qeverinë dhe dy pushtetet e tjera dhe duan të marrin rroga sipas mendimit të tyre”, tha kryeministri.

Kreu i qeverisë tha se shpreson që, “Gjykata Kushtetuese mos t’ia lërë këtë njollë të madhe turpi Shqipërisë dhe të mos na bëjë të kërkojmë ilaçe të tjera”.

The post Rama për gjyqtarët: Duan rritje rroge deri në 3000 euro, absurditet, shpresoj që “Kushtetuesja” mos t’i lerë këtë njollë turpi Shqipërisë appeared first on Albeu.com.

Gjyqtarët shfaqen njëzëri kur thonë se me ndryshimin në sistemin e pagave të nëpunësve, në fakt është prekur siguria financiare e tyre, duke cenuar kështu pavarësinë që ua garanton reforma dhe Kushtetuta.
Edhe Shoqata Kombëtare e Gjyqtarëve i kërkon Gjykatës Kushtetuese të bëhet palë në procesin për pagat që është në Kushtetuese.

Unioni dhe Shoqata e Gjyqtarëve kërkojnë shpalljen antikushtetuese të nenit që cakton pagën referuese të magjistratëve në ligjin “Për statusin e gjyqtarëve dhe prokurorëve në Republikën e Shqipërisë”. Shoqata shton detaje të reja në padinë që TCH disponon.
Aty argumentohet se edhe pse me miratimin e strukturës dhe nivelit të ri të pagave të magjistratëve si pjesë e paketës së reformës në drejtësi u prish hierarkia e pagave në vend, si një normë duke tejkaluar pagat e magjistratëve ato të funksionarëve më të lartë në vend, si Presidenti i Republikës dhe Kryeministri, kjo mund të ndreqej duke rritur pagat e këtyre të fundit dhe jo duke ulur de facto pagat e magjistratëve, raporti i të cilave, pavarësisht formulës së përdorur, duhet të ruajë të njëjtën diferencë me pagat e shërbimit civil.
Rritja e madhe e pagave në sektorin publik, me përjashtim të magjistratëve, u bë për dy arsye, përmendet më tej: “Së pari, rritja e lartë e shkallës së inflacionit për shkak të ngjarjeve ndërkombëtare që përbëjnë fakte të njohura botërisht, si pandemia e Covid-19 dhe lufta në Ukrainë, si dhe rritja e ndjeshme e ekonomisë me reflektim në rritjen e buxhetit të shtetit.” Megjithatë, këto dy arsye nuk u reflektuan në rritjen e pagave të magjistratëve, denoncojnë gjyqtarët.
Jo pa qëllim, kushtetutëbërësi dhe ligjvënësi kanë parashikuar që paga e magjistratit duhet të reflektojë dinamikën e pagave në shërbimin civil, duke përfshirë jo vetëm rastin e uljes në situatë krize por edhe rritjen në situatë lulëzimi ekonomik, si dhe indeksin e çmimeve të konsumatorit, u deklarohet gjyqtarëve kushtetues. Pra, thonë gjyqtarët, pavarësisht formulës që zgjedh ligjvënësi në përcaktimin e pagave të magjistratëve, e cila është në diskrecionin e tij, sikurse edhe Gjykata Kushtetuese e ka cituar në vendimin e saj nr. 35, datë 22.11.2022, ai duhet në çdo rast të reflektojë këto dy kritere, çka nuk e ka bërë në situatën konkrete.
Duke bërë llogaritë, gjyqtarët deklarojnë se paga referuese e gjyqtarëve është e përafërt me kategorinë II, çka është shumë më e ulët se referenca e mëparshme tek kategoria I, tek sistemi i pagave të nëpunësve civilë.

The post Beteja e gjyqtarëve për pagat/ Shoqata thotë se cenohet pavarësia financiare, Gjykata Kushtetuese pranon kërkesën appeared first on Albeu.com.

Kreu i qeverisë e bëri këtë deklaratë teksa po fliste për marrëveshjet pronar-ndërtues dhe hapësirat publike, ndërsa theksoi se mjaft probleme ndodhin për shkak të gjyqtarëve të këtij lloji.

Nuk është hera e parë që kryeministri Edi Rama “sulmon” gjyqtarët. Pak kohë më parë kreu i qeverisë linçoi publikisht magjistratin Marko Boshku.

“Kemi arritur që kur bëhet një ndërtim në një pronë, flasim për ndërtim banesash, dhe pronarët bëjnë një marrëveshje me një ndërtues, gjithçka që është rreth ndërtimit, nuk është më e pronarit dhe as e ndërtuesit, është e komunitetit.

Këto probleme të trashëguara nuk janë zgjidhur më parë dhe sot hasin vështirësi për shkak të injorancës dhe korruptimit të gjykatësve. Njëra nga të dyja ose të dyja së bashku sepse duhet të jesh o injorant ose i korruptuar që t’ia mohosh komuniteteve të drejtën për të pasur hapësirat e tyre, që iu njohin ndërtueseve një të drejtë që nuk iu takon.

E di që nuk është normale që kryeministri të tregojë me gisht një gjykatës duke i treguar fotografinë dhe duke i thënë që ka bërë një akt armiqësor.

Ama për mua është e rëndësishme që të gjithë ata që ankohen, që një lokal i zë rrugën për të dalë nga shtëpia, të mendoje që ai lokali atje nuk prishet sepse nuk do x apo y apo se është korruptuar inspektorati. Kur në fakt e vërteta është se ai lokali nuk prishet se gjykatësi i ka dhënë të drejtën të rrijë aty dhe të bëjë biznes në kurriz të komunitetit.

Më vjen mirë që tani gjykatësit janë më të përmbajtur. Nëse ne duam të ndërtojmë një shkollë apo kopësht, aty ku hapësira është e lirë dhe prona është private, atëherë duhet ta shpronësojmë.”-tha Rama.

The post Kryeministri Edi Rama shpërthen në akuza ndaj gjyqtarëve: Injorantë dhe të korruptuar appeared first on Albeu.com.

Gjyqtarët janë gjithmonë ‘nën mikroskop’ duke u abuzuar nga lojtarët, trajnerët dhe tifozët. Por, paga që ata marrin në krahasim me lojtarët është e zbehtë, megjithatë shifrat nuk janë aspak të ulëta.

Një raport i ri i publikuar nga mediumi prestigjioz L’Equipe, pretendon se gjyqtarët në Ligue 1 marrin mesatarisht një pagë fikse prej 7,239 mijë euro në muaj.

Gjatë një viti kjo pagë barazohet me 72 mijë euro në vitë, që është dy herë më e lartë se ajo që marrin gjyqtarët në Angli para taksave sipas të dhënave të fundit.

Por, gjyqtarët gjithashtu marrin 3,375 mijë euro për çdo ndeshje që ndajnë drejtësinë në Ligue 1, dhe 5 mijë euro të tjera sa herë që ata ndajnë drejtësinë në garat e UEFA-s.

Krahas kësaj, ndarja e drejtësisë në një ndeshje mes dy shteteve do të thotë se gjyqtarët francez marrin hiq më pak se 8,580 mijë euro për ndeshje.

Dhe në krye të kësaj, ka gjithashtu një pagesë ditore të rregullt prej 600 eurosh për shpenzimet e tyre në ushqime, udhëtime dhe akomodime gjatë tri ditëve.

Informatat sa i përket pagesës së gjyqtarëve në Ligën Premier nuk janë të qasshme por në vitin 2021, portali GOAL kishte pretenduar se gjyqtarët anglezë kanë një pagë fikse mes 38 mijë dhe 42 mijë eurosh, si dhe paguhen 1,150 mijë euro për ndeshje. /Telegrafi/

The post Edhe ndarja e drejtësisë kushton, zbulohen pagat e jashtëzakonshme që marrin gjyqtarët appeared first on Albeu.com.

Gjykimi i ndeshjeve dhe vendimet e VAR-it kanë qenë temë diskutimi në Spanjë ditëve të fundit, sidomos pas fitores të kontestueshme të Real Madridit ndaj Almerias në fundjavë.

Për situatën e gjyqtarëve ka folur edhe trajneri i Atleticos, Simeone, i cili ka zbuluar një gjë të bezdisshme.

“Është shumë e vështirë… sepse në varësi të cilës anë je, ka gjithmonë situata. Gjyqtarët po kalojnë shumë momente të presionit. Jam Absolutisht i sigurt. VAR-i i përmirëson ato, por në të njëjtën kohë i ekspozon. Ky është realiteti”, ka thënë fillimisht Simeone për beIN SPORTS.

“Pastaj, ne fillojmë të debatojmë nëse audioja është e mirë apo nëse po rrjedh… Nuk ka rëndësi se çfarë zbulohet, por çfarë ndodh, por ata mendojnë se ne të gjithë jemi budallenj. Kjo është ajo që është e bezdisshme”.

Në fund, Simeone mbrojti natyralitetin në VAR dhe vendimet e gjyqtarëve.

“Ajo që ne të gjithë kemi nevojë është qetësia që gjërat janë të natyrshme dhe kur gjërat janë të natyrshme, gjithçka mund të ndodhë; të gjithë mund të bëjmë gabime sepse askush nuk është i përsosur, edhe me mundësinë e VAR-it, por me natyrshmëri”, përfundoi argjentinasi. /Telegrafi/

The post “Mendojnë se ne jemi të gjithë budallenj”, Diego Simeone zbulon një gjë të bezdisshme për gjyqtarët appeared first on Albeu.com.

Në këtë përfundim ka dalë grupi që po shqyrton masat e sigurisë, pasi u zbulua plani për të vrarë prokuroren e posaçme Doloreza Musabelliu dhe prokuroren Merita Selimi.

Në propozimet që pritet të ndryshojnë vendimin e Këshillit të Ministrave të 2019 për ruajtjen e njerëzve që hetojnë krimin e organizuar dhe të korruptuarit, përfshihet edhe ruajtja e tyre dy vjet mbasi mbyllin këtë mandat. Megjithatë veç pjesës me forca të dukshme, barra kryesore do t’i bjerë atyre agjentëve që merren me informacionin, që në rastin e prokurores së SPAK Doloreza Musabelliu u sinjalizua nga një anëtar grupi kriminal,  kthyer në të penduar.

Por, nëse agjencitë e sigurisë në vend janë vendosur në alarm dhe po ndryshojnë qasje për mbrojtjen e prokurorëve dhe gjyqtarëve nisur vetëm nga rrëfimi i një bashkëpunëtori drejtësie, apo ka edhe të dhëna të tjera, kjo do të mësohet kur dosjet e tjera të SPAK të bëhen publike. Në rekomandimet e reja mbetet i pandryshuar eskortimi i prokurorëve të rrezikuar si dhe përdorimi i sallës VIP në aeroport për prokurorët dhe gjyqtarët jo vetëm për vizitat zyrtare por edhe shërbimet.

Që takimin e dytë me dyer të mbyllura ku kanë marrë pjesë drejtori i përgjithshëm i Policisë së Shtetit, ministri i Brendshëm, kreu i Gardës, kryeprokurori Altin Dumani është sugjeruar po ashtu që veç gardës, godina e SPAK të ruhet dhe nga Policia e Shtetit.

Diskutimet për rikthimin e policisë së bashku me gardën që ruan personalitetet shtetërore, ndodh  në të njëjtën kohë kur edhe drejtoria e përgjithshme e policisë së burgjeve ka vendosur të shtojë grupin special që eskorton të paraburgosurit, nën gjykim nga kjo gjykatë. Njëherazi burgjet kanë kërkuar futjen në 41 biss të 6 të burgosurve të konsideruar jo vetëm të rrezikshëm por ende aktivë në krimin e organizuar.

The post Drejtësia në “duart” e Gardës, përveç prokurorëve të SPAK, do të merren në mbrojtje edhe gjyqtarët appeared first on Albeu.com.

Duke e cilësuar tragjedi për demokracinë, situatën në të cilën ndodhet opozita prej kohësh, Noka theksoi se nuk do ta falin “përdhunimin e logos së PD-së”.

Noka: Po merremi me faktin sepse është tragjedi për demokracinë. Ajo logo, ajo parti ka përmbysur regjimin komunist. Përdhunimin e asaj nuk e falim kurrë. Mund të falim përdhunimin e bravës dhe të Alibashës, por përdhuinimin e asaj logos nuk ia falim kurrë.

I ftuar në “Euronews” ai u shpreh se gjyqtarët që i dhanë vulën Alibeajt janë kërcënuar me jetë.

Noka: Ata gjyqtarë janë kërrcënuar me jetë. Treshja e gjyqtarëve është kërcënuar me jetë, me familje, me karrierë. Ata që u detyruan të merrnin vendim t’ia japin logon pengun. Janë kërcënuar dhe kanë shkuar kërcënimie shumëfishe. Shko pyeti, jo nga ne. Unë nuk jam për të kërcënuar, problemin e kam me Edi Ramën./Albeu.com/

The post “Alibeajt nuk ia falim kurrë”, Noka: Gjyqtarët që i dhanë vulën janë kërcënuar me jetë appeared first on Albeu.com.

Ndërkohë që klubet nxjerrin listën e lojtarëve të tyre të cilët do të përfaqësojnë secilën kombëtare në këtë turne, FIFA ka publikuar listën me 36 gjyqtarë kryesorë, 69 gjyqtarë ndihmës dhe 24 të tjerë të cilët do të jenë te VAR.

Këtë Botëror do të jetë diçka e bukur dhe e veçantë për t’u parë pasi gjashtë gjyqtare femra do të jenë pjesë e këtij kompeticioni, hera e parë në historinë e saj. Stephanie Frappart, Salima Mukansanga dhe Yoshimi Yamashita do të jenë gjyqtaret kryesore. Neuza Back, Karen Diaz Medina dhe Kathryn Nesbitt do të jetë ndihmëset gjyqtare.

Kjo Kupë Bote do të ketë gjithashtu të veçantë edhe teknologjinë e gjysmë-automatike të pozicionit jashtëloje. Kjo teknologji do të ndihmojë shumë gjyqtarët.

Arbitrat në Kupën e Botës Katar 2022

AFC – Konfederata Aziatike e Futbollit

Gjashtë gjyqtarë

10 ndihmës gjyqtarë

Katër zyrtarë të video-ndeshjes

Abdulrahman al-Jassim (Katar)

Chris Beath (Australi)

Alireza Faghani (Iran)

Ma Ning (Kinë) – Ma Ning është vetëm arbitri i dytë kinez që merr pjesë në Kupën e Botës.

Mohammed Abdulla Mohamed (Emiratet e Bashkuara Arabe)

Yoshimi Yamashita (Japoni) – Në prill 2022, Yamashita u bë gjyqtarja e parë grua që mbikëqyri një ndeshje të Ligës së Kampionëve të AFC.

CAF – Konfederata e Futbollit Afrikan

Gjashtë gjyqtarë

10 ndihmës gjyqtarë

Dy zyrtarë të video-ndeshjes

Bakary Papa Gassama (Gambia)

Mustapha Ghorbal (Algjeri)

Victor Gomes (Afrika e Jugut)

Salima Mukansanga (Rwanda) – Mukansanga po bën vazhdimisht histori. Ajo është gruaja e parë nga Ruanda e saj e lindjes që arbitron Kupën e Botës FIFA për femra, gruaja e parë që ka gjykuar ndonjëherë në Kupën e Kombeve Afrikane dhe tani një nga femrat e para që arbitron Kupën e Botës për meshkuj.

Janny Sikazwe (Zambia)

Maguette Ndiaye (Senegal)

CONCACAF – Konfederata e Futbollit të Amerikës së Veriut, Amerikës Qendrore dhe Karaibeve.

Pesë gjyqtarë

12 ndihmës gjyqtarë

Tre zyrtarë të video ndeshjes

Ivan Barton (Salvador)

Ismail Elfath (Shtetet e Bashkuara të Amerikës)

Mario Escobar (Guatemala)

Said Martinez (Honduras)

César Ramos (Meksikë)

CONMEBOL – Konfederata e Futbollit të Amerikës së Jugut

Shtatë gjyqtarë

15 ndihmës gjyqtarë

Katër zyrtarë të video-ndeshjes

Raphael Claus (Brazil)

Andres Matias Matonte Cabrera (Uruguaj)

Kevin Ortega (Peru)

Fernando Rapallini (Argjentinë)

Wilton Sampaio (Brazil)

Facundo Tello (Argjentinë)

Jesus Valenzuela (Venezuela)

OFC – Konfederata e Futbollit të Oqeanisë

Një gjyqtar

Dy ndihmës gjyqtarë

Matthew Conger (Zelanda e Re)

UEFA – Unioni i Shoqatave Evropiane të Futbollit

11 gjyqtarë

20 ndihmës gjyqtarë

11 zyrtarë të video ndeshjeve

Istvan Kovacs (Rumani)

Stephanie Frappart (Francë) – Frappart e bën punën e saj në Ligue 1 të Francës, por ka referuar disa ndeshje ndërkombëtare të profilit të lartë kohët e fundit, duke përfshirë Superkupën UEFA 2019 mes Liverpool dhe Chelsea. Në vitin 2020, ajo u bë gruaja e parë që drejtoi një ndeshje të Ligës së Kampionëve. Në vitin 2022, ajo drejtoi finalen e Coupe de France 2022 mes Nice dhe Nantes.

Danny Makkelie (Holandë)

Szymon Marciniak (Poloni)

Antonio Mateu Lahoz (Spanjë)

Michael Oliver (Angli)

Daniele Orsato (Itali)

Daniel Siebert (Gjermani)

Anthony Taylor (Angli)

Clement Turpin (Francë)

Slavko Vinçiç (Slloveni)

The post Kupa e Botës Katar 2022: Të gjithë gjyqtarët që do të gjykojnë sfidat, mes tyre edhe 6 arbitre femra appeared first on Albeu.com.