Kështu, ish-prokurorja do të marrë nga shteti shqiptar shumën prej 24600 euro.

Në vendimin e qeverise thuhet se 19 600 do ti marrë në lidhje me dëmin pasuror dhe jopasuror, si dhe në shumën 5 000 euro, në lidhje me kostot dhe shpenzimet, plus çdo taksë që mund të jetë e aplikueshme.

“Pagimi i shumës të depozituar, sipas përcaktimeve në pikën 3, të këtij vendimi, në favor të kërkueses Antoneta Sevdari, bëhet nga Ministria e Financave dhe Ekonomisë, pas paraqitjes së dokumentacionit të nevojshëm ligjor për kryerjen e pagesave nga buxheti i shtetit, brenda afatit 3-mujor nga dita kur vendimi i gjykatës është bërë përfundimtar”, thotë qeveria.

Po ashtu në vendimin e qeverisë thuhet se “Mbi shumën e përcaktuar në pikën 1, të këtij vendimi, duke filluar nga data 13.6.2023 deri në datën e ekzekutimit të këtij vendimi, paguhen interesa të thjeshta, të barabarta me kursin margjinal të huas së Bankës Qendrore Evropiane, gjatë periudhës së mospagimit, plus 3 (tre) %”.

VENDIMI

EKZEKUTIMIN E VENDIMIT TË GJYKATËS EVROPIANE PËR TË DREJTAT E NJERIUT, DATË 13.12.2022, PËR ÇËSHTJEN “SEVDARI KUNDËR SHQIPËRISË” (PËR KËRKESËN NR.40662/19)

Në mbështetje të nenit 100 të Kushtetutës, të nenit 46, të Konventës Evropiane për Mbrojtjen e të Drejtave të Njeriut dhe Lirive Themelore, ratifikuar me ligjin nr.8137, datë 31.7.1996, “Për ratifikimin e Konventës Evropiane për Mbrojtjen e të Drejtave të Njeriut dhe Lirive Themelore”, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 14, të ligjit nr.84/2022, “Për buxhetin e vitit 2023”, me propozimin e Kryeministrit, Këshilli i Ministrave

V E N D O S I:

Ekzekutimin e vendimit të Gjykatës Evropiane për të Drejtat e Njeriut, datë 13.12.2022, për çështjen “Sevdari kundër Shqipërisë”, kërkesa nr.40662/19, përfundimtar në datën 13.3.2023, në shumën 19 600 (nëntëmbëdhjetë mijë e gjashtëqind) euro, në lidhje me dëmin pasuror dhe jopasuror, si dhe në shumën 5 000 (pesë mijë) euro, në lidhje me kostot dhe shpenzimet, plus çdo taksë që mund të jetë e aplikueshme.

Vlera e përcaktuar si detyrim në pikën 1, të këtij vendimi, konvertohet në lekë, në bazë të kursit të këmbimit të bankës ku depozitohet shuma në datën e kryerjes së pagesës.

Vlera e përcaktuar si detyrim në pikën 1, të këtij vendimi, depozitohet në një nga bankat e nivelit të dytë, në emër të kërkueses Antoneta Sevdari, në vlerën që shteti shqiptar detyrohet, sipas vendimit përfundimtar të Gjykatës Evropiane për të Drejtat e Njeriut, datë 13.12.2022, “Sevdari kundër Shqipërisë”, kërkesa nr.40662/19.

Pagimi i shumës të depozituar, sipas përcaktimeve në pikën 3, të këtij vendimi, në favor të kërkueses Antoneta Sevdari, bëhet nga Ministria e Financave dhe Ekonomisë, pas paraqitjes së dokumentacionit të nevojshëm ligjor për kryerjen e pagesave nga buxheti i shtetit, brenda afatit 3-mujor nga dita kur vendimi i gjykatës është bërë përfundimtar.

Mbi shumën e përcaktuar në pikën 1, të këtij vendimi, duke filluar nga data 13.6.2023 deri në datën e ekzekutimit të këtij vendimi, paguhen interesa të thjeshta, të barabarta me kursin margjinal të huas së Bankës Qendrore Evropiane, gjatë periudhës së mospagimit, plus 3 (tre) %.

Efektet financiare, të parashikuara për ekzekutimin e këtij vendimi, përballohen nga fondi rezervë i buxhetit të shtetit, për vitin 2023.

Ngarkohet Ministria e Financave dhe Ekonomisë për zbatimin e këtij vendimi.

The post U dogj nga Vettingu por fitoi gjyqin në Strasburg, qeveria i jep 24 mijë euro ish-prokurores Antoneta Sevdari appeared first on Albeu.com.

Kurti tha se beson në pafajësinë e tyre, duke treguar se çfarë ka bërë shteti i Kosovës për të akuzuarit.

Kreu i ekzekutivit tha se si shtet kanë paguar mbi 16 milionë euro për mbrojtjen e tyre.

Pos kësaj, Kurti shton se drejtësia ndërkombëtare nuk ka përfunduar akoma puna për sa i përket drejtësisë në ish-Jugosllavinë.

”Lufta e UÇK-së ishte luftë e drejtë, e pastër, çlirimtare dhe antikoloniale. Unë besoj në pafajësinë e atyre që janë atje. Ne e mbështesim mbrojtjen e tyre dhe deri më tani kemi paguar si shtet mbi 16 milionë euro për mbrojtjen e tyre. Bashkësia ndërkombëtare duhet ta kuptojë se nuk e kanë mbaruar punën e tyre sa i përket drejtësisë në territoret e ish-Jugosllavisë, sepse në vitet e nëntëdhjeta nga forcat serbe janë vrarë 150 mijë joserbë. Do të thotë që, nëse një njeri ka vrarë deri në 10 prej tyre, janë 15 mijë vrasës serikë në Serbi të cilët shëtisin lirshëm. Nga ky numër, as 1% e tyre nuk kanë përfunduar pas grilave. Edhe këtu kemi një asimetri të theksuar që bie ndesh me pajtimin e popujve tanë në Ballkanin Perëndimor”, ka thënë Kurti.

Gjykata Speciale po gjykon për “krime lufte” ish-krerët e UÇK-së. Ndërkaq kjo gjykatë ishte themeluar me aprovimin e Kuvendit të Kosovës /Gazeta Express

The post Kurti beson në pafajësinë e Thaçit, Veselit dhe të tjerëve: Kemi paguar 16 milionë euro për mbrojtjen e tyre appeared first on Albeu.com.

Një çerek shekulli më parë, në mes të luftës në Kosovë dhe pas saj, figura të larta ndërkombëtare ia mësyen drejt derës së Hashim Thaçit, komandantit të Ushtrisë Çlirimtare të Kosovës, i cili më vonë do të bëhej politikani më i shquar i vendit.

Thaçi priti ish-kryeministrin e Britanisë së Madhe, Tony Blair, një nga mbështetësit më të shquar ndërkombëtarë të UÇK-së. Ai takoi liderin e ndjerë të Liberal Demokratëve Sir Paddy Ashdoën për një birrë. Madeleine Albright, asokohe sekretare e shtetit të SHBA-së, ishte një admiruese e zëshme dhe Hillary Clinton u takua me Thaçin më vonë kur ajo mori pozitën e njëjtë.

Megjithatë, javën e kaluar, Thaçi – i cili shërbeu si kryeministër dhe president i Kosovës – u paraqit në bankën e të akuzuarve të një gjykate të Hagës së bashku me tre kolegë të shquar, të gjithë të akuzuar për krime lufte të kryera gjatë konfliktit, duke përfshirë bashkëpunimin për vrasjen e 102 personave.

Ndërsa prokurorët paraqitën rastin e tyre kundër Thaçit dhe të pandehurve të tjerë Rexhep Selimi, Kadri Veseli dhe Jakup Krasniqi – të gjitha figura të larta në udhëheqjen e UÇK-së gjatë luftës kundër forcave serbe nga viti 1998 deri në vitin 1999 – ata përshkruan një fushatë të supozuar të vrasjeve, torturës dhe represionit kundër kundërshtarëve dhe anëtarët e pakicave etnike të drejtuar nga katër burrat.

Pretendohet se viktimat përfshinin përkrahës shqiptarë etnikë të partisë politike rivale LDK, civilë serbë dhe romë, të cilët u mbajtën pa proces të rregullt në kushte çnjerëzore në selinë e UÇK-së, iu nënshtruan torturës dhe, në disa raste, u ekzekutuan.

Gjyqi, i cili u hap dy vjet pasi burrat u dorëzuan në juridiksionin e gjykatës dhe pritet të zgjasë deri në gjashtë vjet, tashmë duket me siguri se do të rishkruajë historinë e konfliktit.

Procedurat, thellësisht të papëlqyeshme në Kosovë dhe Shqipërinë fqinje, kujtojnë periudhën e konfliktit brutal midis viteve 1998 dhe 1999, ku organizatat e armatosura serbe dhe kosovare kryen krime lufte në kontekstin e kryengritjes së armatosur të UÇK-së dhe reagimit ushtarak të Beogradit.

Në një luftë të zhvilluar fillimisht në dhe rreth fshatrave dhe qyteteve të vogla në bastionin malor të Drenicës të UÇK-së, Thaçi, i njohur me emrin “Gjarpri”, ishte përfaqësues politik në shtabin e përgjithshëm të UÇK-së.

Më pas, në fund rreth moshës 30 vjeçare, ai u dallua mes kolegëve të tij komandantë për inteligjencën dhe besimin e tij, duke përfaqësuar më vonë UÇK-në në negociatat e dështuara të paqes në Rambuje, Francë, në fillim të vitit 1999 që i paraprinë ndërhyrjes së NATO-s në konflikt.

Megjithatë, në të njëjtat fshatra, me shtëpitë dhe fermat e tyre të vogla të shpërndara nëpër kullota malore, aktakuza pretendon se UÇK-ja dhe komandantët e saj i mbanin të burgosurit e saj në kushte shpesh të vështira, duke i nënshtruar ata ndaj rrahjeve dhe poshtërimeve të tjera, dhe ndonjëherë duke i vrarë ata. .

Në mesin e katalogut të krimeve të supozuara të zbuluar javën e kaluar, veçohet një: ngjarjet që ndodhën rreth 26 korrikut 1998 në mes të një ofensive serbe.

Më pas, thuhet në dokumentin e akuzës, anëtarët e UÇK-së “morën afërsisht 30 të burgosur nga Llapushniku ​​në malet e afërta të Berishës/Beriša dhe i ndanë në dy grupe. Një grup u zgjidh dhe u lirua; të arrestuarit e grupit tjetër u qëlluan dhe u vranë”.

Nëse gjyqi në Hagë është goditës, kjo është për shkak se ndërhyrja e NATO-s në Kosovë u përkufizua si një përgjigje ndaj krimeve të rënda të luftës, veçmas masakra e Raçakut nga forcat serbe në janar 1999, e cila ripërcaktoi shtrirjen e ndërhyrjes ushtarake mbi baza humanitare.

Megjithatë, edhe atëherë, ishte e qartë se të dyja palët kishin në shënjestër civilët, edhe nëse kishte një ndryshim në shkallë, sidomos aksioni ushtarak në shkallë të gjerë i nisur nga Beogradi pas fillimit të bombardimeve të NATO-s që bëri që qindra mijëra civilë të largoheshin nga Kosova në vendet fqinje.

Për disa, duke përfshirë diplomatët perëndimorë, të cilët u përballën me Thaçin dhe komandantët e tjerë të UÇK-së gjatë konfliktit, siç e kujtojnë ata, mbështetja perëndimore ishte një zgjedhje – rreshtimi i interesave në Londër dhe Uashington me UÇK-në kundër Sllobodan Millosheviqit në Beograd, i cili tashmë e kishte zhytur Bosnjën në tmerr.

“E gjitha kishte të bënte me heqjen qafe të Millosheviçit dhe një riorganizim pas dështimit për t’a mbështetur Bosnjën”, kujton një zyrtar që u takua me Thaçin gjatë konfliktit.

Thaçi, kujton ish-zyrtari, kishte “një aurë autoriteti”, por nuk arriti ta rikrijonte plotësisht veten si një politikan i pavarur, siç u kërkua nga disa prej admiruesve të tij politikë perëndimorë. Në vend të kësaj, ai mbeti peng i kolegëve të tij të vjetër në komandën e përgjithshme të UÇK-së, zgjedhje që përfundimisht do ta linin atë të pambrojtur ndaj ndjekjes penale pasi pyetjet e paqarta u shfaqën në dekadën pas luftës në lidhje me të dhënat e vetë UÇK-së.

Në vitin 2010, atëherë do të publikohej një raport nga Dick Marty për Këshillin e Evropës, duke detajuar pretendimet për abuzime të rënda të të drejtave të njeriut, përfshirë trafikimin e organeve nga UÇK-ja – pretendime që do të çonin, pesë vjet më vonë, në krijimin e një Gjykate Speciale për të gjykuar anëtarët e përmendër të UÇK-së, duke përfshirë edhe Thaçin.

Por ndërsa çështja ka vazhduar në gjyq me një ritëm thuajse të akullt, me Kosovën nën presion nga ish-mbështetësit e saj perëndimorë për të dorëzuar Thaçin dhe kolegët e tij të pandehur, pretendimet më të forta nga raporti i Marty-t – se viktimat u vranë dhe u morën organet – janë zhdukur nga procedurat.

Në vend të kësaj, fokusi i rastit kundër Thaçit dhe tre kolegëve të tij është tani që, përmes “përgjegjësisë komanduese” në zinxhirin komandues të UÇK-së, ata ranë dakord për “plane dhe politika” që çuan drejtpërdrejt në krime, “duke marrë pjesë, duke lehtësuar, miratuar

inkurajimin e tyre, dhe dështimin për të parandaluar krimet që të ndodhin.

Nëse forma e prokurorisë tani është e qartë, e tillë është edhe mbrojtja e përshkruar nga avokati i Thaçit, Gregory Kehoe, javën e kaluar, në të cilin tha se ndërsa Thaçi “nuk mohon se disa krime janë kryer nga shqiptarët etnikë [për hakmarrje [ai] refuzon se ato ishin kryer si çështje e politikës së [UÇK-së] … ose se ato ishin të përhapura.”

Kehoe nënvizoi gjithashtu atë që ka të ngjarë që çështja kryesore kontestuese midis prokurorisë dhe mbrojtjes të jetë : sa e centralizuar dhe hierarkike ishte struktura komanduese e UÇK-së.

Përderisa prokuroria këmbëngul se dokumentet dhe deklaratat në atë kohë tregonin një përqendrim të lartë të pushtetit dhe drejtimit nga shtabi i përgjithshëm i grupit, avokati i Thaçit do të argumentojë se UÇK-ja ishte më e mjegullt, me Thaçin që gëzonte më pak ndikim sesa pretendohej në aktakuzë, në një grup luftëtarësh besnikëria e të cilit, tha ai, ishte ndaj komandantëve lokalë.

Nëse kjo ka të ngjarë të jetë një çështje e vështirë për t’u zgjidhur ndërsa vazhdon gjyqi, kjo është për shkak se edhe ata që patën mundësinë të vëzhgojnë Thaçin dhe UÇK-në nga afër, mbeten, 25 vjet më vonë, të pasigurt se sa autoritet kishte Thaçi në periudha të ndryshme gjatë konflikti dhe sa në qendër ishte organizuar UÇK-ja.

“Ai ishte një oportunist,” kujtojnë ata. “Ai ka qenë pjesë e strukturës komanduese, por ka pasur shumë rivalitete në nivel lokal. Pyetja është, çfarë kontrolli kishte ai dhe në çfarë mase e përdorte atë?”./express

The post The Guardian: Çfarë kontrolli kishte Thaçi në UÇK dhe në çfarë mase e përdorte atë? appeared first on Albeu.com.

Pas dy vjet e gjysmë prej kur ishin arrestuar, ka nisur gjykimi ndaj Hashim Thaçit, Kadri Veselit, Rexhep Selimit dhe Jakup Krasniqit, nga Dhomat e Specializuara në Hagë. Të katërt akuzohen për krime lufte, me kualifikimin nga prokuroria si “ndërmarrje e përbashkët kriminale”.

Në ditën e parë të gjykimit, të hënën, fjala ishte te Zyra e Prokurorit të Specializuar, e cila i ka shpalosur akuzat ndaj të katërtëve. ZPS është fokusuar të dëshmojë se UÇK-ja ka funksionuar në mënyrë hierarkike dhe Shtabi i Përgjithshëm ka pasur fuqi dhe kompetenca ekzekutive.

Sot ka folur mbrojtja, nisur nga ajo e ish-udhëheqësit politik të UÇK-së, Hashim Thaçit.

Avokati kryesor i tij, Gregory Kehoe, është fokusuar në demantimin e Prokurorisë për “mirëorganizimin” dhe funksionimin strikt të UÇK-së, sipas hierarkisë. Ai ka prezantuar video e deklarata që dëshmojnë se klienti i tij nuk ka pasur kompetenca ekzekutive, nuk ka marrë vendime mbi UÇK-në dhe nuk ka pasur kontroll mbi të.

Ndër figurat kryesore që avokati i Thaçit i ka përmendur vazhdimisht është veprimtari Adem Demaçi, që ka qenë përfaqësuesi politik i UÇK-së. Sipas mbrojtjes së Thaçit, ndikimin për vendime politike në UÇK e kishte Adem Demaçi dhe komandantët e shtatë zonave operative të ushtrisë.

Për ta ilustruar këtë, avokati Kehoe është ndalur te procesi i Rambujesë, ku ka ekspozuar dhjetëra deklarata, përfshirë të top diplomatëve evropianë dhe amerikanë, që kishin treguar se Thaçi nuk po mund ta nënshkruante marrëveshjen e Rambujesë, pasi nuk e kishte bekimin e bashkëluftëtarëve dhe të Demaçit.

“Sa i takon aftësisë së Thaçit për të nënshkruar marrëveshjen e Rambuje, kjo vihet në dyshim nga një sërë faktorësh. Faktori i parë është se duhej të ekzistonte njëfarë aprovimi nga Adem Demaçi. Adem Demaçi ishte përfaqësuesi i përgjithshëm politik dhe autoriteti suprem politik i UÇK-së. Gjatë konferencës në Rambuje u largua për të shkuar në Slloveni, që t’i merrte miratimin dhe mbështetjen e Demaçit”, tha tha Kehoe.

Pasi e kreu mbrojtja, fjalën e mori ish-Presidenti Thaçi.

Ai nisi adresimin e tij duke shprehur keqardhje për secilën viktimë të luftës në Kosovë, pa marrë parasysh etninë.

“Sot po nisim një rrugëtim së bashkë, rrugëtim drejt së vërtetës dhe drejtësisë. Këto janë parime të çmuara për mua, janë gurthemeli i demokracive dhe paqes. Më lejoni të shfrytëzoj këtë moment që ndjej keqardhje dhe dhimbje për të gjitha viktimat e kësaj luftë të tmerrshme pavarësisht përkatësisë etnike fetare apo politike. Viktimat nuk marrin drejtësi kur të pafajshmit ndiqen. Padrejtësia nuk ndreqet nga një padrejtësi tjetër. Unë jam i pafajshëm për të gjitha këto akuza”, ka thënë Thaçi.

Në aktakuzën e ngritur ndaj ish-krerëve të UÇK-së, por edhe në prezantimin e djeshëm, Prokuroria në Hagë përmendi vazhdimisht aktivistë të LDK-së, që pretendon se janë ndaluar, kërcënuar e keqtrajtuar nga krerët e UÇK-së për shkak të aktivitetit politik të tyre.

Thaçi tha se mes shqiptarëve, kundërshtarët e vetëm ishin forcat serbe, si për krahun e LDK-së, ashtu edhe të UÇK-së.

“Kundërshtarët tonë ishin ushtria policia dhe paramilitarët serbë të kalitur në fushatat e tyre të vrasjeve në Bosnje. Të nderuar, si rezistenca paqësore dhe e armatosur kishte synim lirinë, pavarësinë dhe rendin demokratik të Kosovës. Pa atë rezistencë gjithëpopullore, Kosova s’do të ekzistonte fare. Qytetarët e Kosovës s’donin luftë, ishin të përkushtuar për paqe. Lufta u imponua. Kosova ishte në anën e drejt të historisë”, ka theksuar tutje.

Thaçi tha se po të ishin gjallë top diplomatët botërorë të kohës së luftës, do të dëshmonin në mbrojtje të tij. Përmendi edhe Demaçin dhe ish-Presidentin Rugova.

“Me vjen keq që s’mund të dëgjojmë dëshmitë e znj. Albright, [Ish-sekretare amerikane], sekretarit [britanik] Robin Cook, senatorit Rober Dole, Richard Holbrook-ut, shefit të parë të UNMIK-ut, presidentit Ibrahim Rugova, Fehmi Aganit e Adem Demaçit. Ata do të kishin dëshmuar për mua, për atë që kam thënë dhe bërë gjatë asaj kohe shumë të rëndësishme në historinë e lirisë”, tha Thaçi.

Ndërkaq, shtoi se shume burrështetas të nivelit të ngjashëm janë të gatshëm të dëshmojnë pro tij.

Ish-udhëheqësi i Inteligjencës në UÇK, që viteve të fundit në liri ishte kryeparlamentar i Kosovës, Kadri Veseli ishte prezent në sallë edhe sot, por nuk u deklarua.

Në emër të mbrojtjes, akuzave të Prokurorisë iu kundërpërgjigj avokati Ben Emmerson.

Ai u fokusua t’i tregojë Prokurorisë akuzat, sipas tij, të pabazë që s’ndërlidëshin fare me klientin e tij.

Emmerson tregoi disa prej rasteve ku Veseli akuzohet, por, siç thotë avokati, ai as nuk ka qenë prezent as nuk ka ndërlidhje me të. Përmendi komunikatat e lëshuara nga UÇK-ja, që Emmerson thotë se as nuk i ka shkruar as nuk i ka shtyrë Veseli dhe po ashtu disa qendra të ndalimit në zona të ndryshme operative, si ajo e Jabllanicës në Dukagjin, që avokati thotë se nuk kishte qenë, as s’kishte të bënte me to Veseli.

Veseli me bashkëluftëtarë akuzohet nga Prokuroria edhe për ndalim dhe keqtrajtim të aktvistëve të LDK-së, dhe, për këtë u përgjigj sot avokati britanik.

“Ky është një mendim krejt i ndryshëm nga ajo që ka ndodhur në terren, ku shumica e mbështetësve të UÇK-së ishin në fakt anëtarë të LDK-së. Tani, konflikte, dallime në mendime ka pasur, si në çdo rast kur bashkohen dy forca politike. Por asnjëherë nuk ka pasur një politikë përndjekjeje ndaj LDK-së”, tha Emmerson.

Ndryshe Avokati Emmerson, gjatë elaborimeve që bëri tha se disa individë e kishin rritur rolin e tyre në Ushtrinë Çlirimtare të Kosovës për qëllime politke ose siç tha ai për tema të ditës.

Më pas foli ish-Inspektori i UÇK-së, Rexhep Selimi. Fjalën e nisi me rrëfimin e tij si student i Universitetit të Prishtinës, për të dalë të ngjarjet që rodhën gjatën gjithë viteve të ‘90-ta.

Prokuroria në nisjen e gjykimit, për t’i mbështetur akuzat e saj, ka publikuar disa sekuenca të ndryshme të deklarimeve të Selimit, edhe sa ishte pjesë e Lëvizjes Vetëvendosje, kundër kundështarit të tij politik, Thaçit.

Sot, Selimi tha se nuk duhet t’i përdorën si prova juridike dallimet politike që kishin të akuzuarit.

“Gjithmonë kam thënë dhe e përsëris. Nuk kam frikë nga drejtësia, por nga padrejtësia duhet të kemi frikë të gjithë. Dallimet dhe opinionet mes nesh nuk duhet të përdorën si fakte juridike, e po ashtu kundër neve të bashkakuzuarve. Kam shumë besim se të gjithë së bashku do ta nxjerrim të vërtetën e UÇK-së se jemi të pafajshëm. Unë bashkë me bashkëluftëtarët e mi do të kthehemi”, tha Selimi.

Seanca u mbyll me fjalën e mbrojtjes së Selimit, ndërkaq nesër flet mbrojtja e ish-Zëdhënësit të UÇK-së, Jakup Krasniqit, që ishte sot në sallë. Ndonëse nuk foli, ne mediat kosovare patën vëmendjen reagimet e tij, i cili, në një moment qau kur po shihte pamjet e krimeve ndaj shqiptarëve në Kosovë, që i kishte lëshuar një prej ekipeve të mbrojtjes. /Express/

The post Si u mbrojtën sot ish-krerët e UÇK-së? appeared first on Albeu.com.

Rama shkruan se ajo që po ndodh është një çobë e shpifur dhe e pagëltitshme.

Postimi i Ramës:

????SIGURISHT QË PO!

Por prapëseprapë është aq e pagëlltitshme një çorbë kaq e shpifur, kur i sheh ata që e udhëhoqën luftën çlirimtare të një populli të shtypur egërsisht, të akuzohen si kriminelë lufte nga një organ i krijuar mbi bazën e fantazive të shthurrura me trafik organesh!

MEGJITHATË UÇK NUK DO TË MUNDET NGA PADREJTËSIA?/albeu.com

The post Procesi gjyqësor ndaj ish-krerëve të UÇK, Rama: Një çorbë kaq e shpifur, e pagëlltitshme appeared first on Albeu.com.

Ish-presidenti Hashim Thaçi, ish-kryetarët e parlamentit të Kosovës Jakup Krasniqi dhe Kadri Veseli, si dhe ish-anëtari i Shtabit të Përgjithshëm Rexhep Selimi, u deklaruan “krejtësisht të pafajshëm” në nisjen e seancës së parë gjyqësore, e cila duket se do t’i paraprijë një procesi maratonë që mund të zgjasë rreth gjashtë vjet. Thaçi dhe Veseli ishin të prerë në përgjigjet e tyre, ndërkohë që Veseli shprehu mospajtimin e tij për “vonesën mbi dy-vjeçare të gjykimit paraprak”. Krasniqi nga ana e tij tha dhe ripërsëriti se nuk ka lidhje me asnjë akuzë të parashtruar ndaj tij.

Whiting: Të pandehurit pjesë e zinxhirit komandues

Katër ish-drejtuesit e UÇK-së akuzohen se nga marsi i vitit 1998 e deri në shtator 1999 kanë kryer krime lufte dhe krime kundër njerëzimit ndaj pakicave etnike – atyre serbe dhe rome – si dhe ndaj rivalëve të tyre politikë që nuk i kanë mbështetur gjatë luftës dhe në qeverinë e formuar pas çlirimit. Ata akuzohen për përndjekje, trajtim çnjerëzor, vrasje, zhdukje personash etj.

Prokurori special në detyrë, Alex Whiting, tha në hyrje të parashtrimeve të tij se katër të akuzuarit janë anëtarë themelues të UÇK-së dhe kanë qenë pjesë e zinxhirit komandues. “Por ka pasur edhe një anë të errët të lidershipit të tyre, që janë objekt i kësaj akuze” – deklaroi përfaqësuesi kryesor i organit të akuzës, i cili zëvendësoi prokurorin tashmë të dorëhequr Jack Smith, të cilit iu ngarkua një tjetër detyrë në Shtetet e Bashkuara të Amerikës. Në akuzë evidentohet se janë mbi 100 krime, shumica shqiptarë të Kosovës të cilët ishin rivalë politikë nga Lidhja Demokratike e Kosovës.

Në dosjen e akuzës gjenden dokumente dhe dëshmitarë të shtrirë gjeografikisht në shumë zona të Kosovës, por edhe në Shqipëri. Prokurori në detyrë Whiting theksoi se intimidimi i dëshmitarëve ka qenë dhe mbetet një tjetër sfidë e këtij procesi. “Dëshmitarët e akuzës vijojnë të intimidohen dhe të frikësohen edhe sot”. Rreth 312 persona pritet të dëshmojnë në këtë proces gjyqësor.

Protesta në Hagë

Në rrugët e Hagës flitej shqip një ditë para nisjes së gjyqit. Qytetarë të shumtë udhëtuan nga Zvicra, Gjermania dhe shtete të tjera për t’u tubuar në mbështetje për të akuzuarit dhe kundër këtij procesi gjyqësor. Teksa paraditen e datës 3 prill, në Gjykatën Speciale lexohej aktakuza, metra më tutje, protestuesit u mblodhën nën thirrjet “UÇK” dhe “Liri për çlirimtarët”. Për Deutsche Welle-n qytetarët e pyetur thanë, se nuk i besojnë prokurorisë, por i besojnë drejtësisë, dhe janë të mendimit se ish-krerët e UÇK-së do të shpallen të pafajshëm. Autoritetet kishin lejuar mbledhjen e 300 personave, por sipas organizatorëve u mblodhën rreth 3 mijë vetë./dw

The post DW: Jo gjyq kundër UÇK-së, por gjyq kundër individësh appeared first on Albeu.com.

Rama është shprehur se ka diçka që nuk shkon me këtë proces, duke shtuar se mbetet i mahnitur nga sensi më negativ, nga fakti që udhëheqësit dhe komandanti i një lëvizje çlirimtare popullore, jo i një ushtrie të organizuar, por i një rebeli ndaj një regjimi brutal që synoi të spastronte etnikisht shqiptarët në Kosovë akuzohen së bashku si kriminelë.

Më tej ai tha se ajo që po u ndodh 5 ish-drejtuesve të UÇK është diçka e tmerrshme, duke e cilësuar gjyq me mikun jo me armikun.

Sa i takon protestës së sotme në Kosovë ndërsa vetë ishte me presidentin Vuçiç në Itali, Rama tha se ishte një rastësi.

Intervista:

– Zoti kryeministër, nesër është një ditë e rëndësishme për kombin shqiptar, sa i takon pikënisjes së një procesi gjyqësor ndërkombëtar në Hagë për pesë nga drejtuesit kryesorë të Ushtrisë Çlirimtare të Kosovës. Çfarë komenti keni ju për këtë?

Kryeministri Rama: Komenti im është i njohur. Nuk besoj se ka diçka të re për të thënë, por sigurisht që sa herë krijohet mundësia për ta përsëritur duhet përsëritur që ka diçka shumë të madhe që nuk shkon me këtë proces dhe pa dashur fare të paragjykoj aspektin që ka të bëjë me drejtësinë dhe me pavarësinë e një gjykate, e cila është formuar me votën e Parlamentit të Kosovës, thjeshtë mbetem i mahnitur nga sensi më negativ, nga fakti që udhëheqësit dhe komandanti i një lëvizje çlirimtare popullore, jo i një ushtrie të organizuar, por i një rebeli ndaj një regjimi brutal që synoi të spastronte etnikisht shqiptarët në Kosovë akuzohet, akuzohen së bashku si kriminelë. Njeriu që vetë Presidenti aktual i Shteteve të Bashkuara dhe deri dje një nga figurat kryesore të senatit amerikan Joe Biden e pagëzoi si Xhorxh Uashingtoni i Kosovës, është sot prej tanimë një kohe të gjatë prapa hekurave, i marrë si president në detyrë dhe i mbyllur brenda pa akuzë për një periudhe 1 vjeçare, gjë që është jashtë çdo lloj imagjinate, në raport me të drejtën ndërkombëtare dhe kombëtare dhe do duhet të përballet me një proces, që mua më bën të mendoj mos vallë ky do jetë fati i presidentit Zelenski pas 10 vjetësh. Edhe pse përsëri ka një ndryshim, gjithsesi. Presidenti Zelenski është komandanti i një ushtrie të rregullt, Hashim Thaçi ishte komandanti i një lëvizjeje çlirimtare, e cila mori emrin Ushtri Çlirimtare, por e cila ishte larg së pasuri një zinxhir komandimi të atillë që mund të ngrihen akuza të kësaj natyre. Dhe kur kam parë sesi rusët filluan të flasin për trafik organesh në Donbass dhe sesi filluan të hidhen tezat e para të krimeve të luftës edhe nga ana ushtrisë ukrainase, kam thënë Zoti na ruajttë se mund ta shikojmë edhe këtë hero që sot të gjithë e admirojnë, para një gjykate.

– Zoti kryeministër, “Liria ka emër” ishte një nga tubimet më të mëdha që ka ndodhur në Kosovë ditët e fundit, një tubim që ka bërë bashkë, jo vetëm politikën, por shoqërinë civile, komunitete fetare në Kosovë. E ndërkaq, ju jeni sot këtu pranë presidentit Aleksandër Vucic. Ka një domethënie kjo?

Kryeministri Rama: Kjo është një rastësi e plotë, se ne jemi këtu në ditën e hapjes së panairit të madh VinItaly, një nga panairët më të mëdhenj të botës dhe më i madhi i Europës së bashku me atë në Dusseldorf nëse s’gabohem për të prezantuar prodhimet tona, diçka e re që s’ka ndodhur kurrë më parë edhe natyrisht që është rezultat dhe i bashkëpunimit në kuadrin e Ballkanit të Hapur dhe është një koincidencë e plotë, por nga ana tjetër, me presidentin Vucic janë ulur, kanë diskutuar dhe kanë ndër vepruar të gjithë liderët e Kosovës, përfshirë edhe kryeministrin aktual se kështu duhet të jetë, s’ka sesi të jetë tjetër dhe kjo në raport me atë që ndodh nesër është larg së qeni e lidhur, pasi ajo që ndodh nesër nuk është një proces ose një fazë e re e një procesi që zhvillohet në Serbi. Zhvillohet në Hagë nga një trupë, e cila supozohet që të përfaqësojë botën demokratike të lirive e të të drejtave, supozohet të mishërojë të drejtën ndërkombëtare, të drejtat dhe liritë e njeriut, kartat e të tjera e të tjera, dhe që më mirë të mos flas më shumë sepse realisht shumë gjëra mund të them.

– Në prag të mbajtjes së seancës nesër për 5 drejtuesit kryesorë të UÇK, orët e fundit ka patur incidente në Mitrovicën e veriut. Keni patur mundësi të komunikoni me presidentin Vucic në lidhje me këtë situatë atje?

Kryeministri Edi Rama: Kemi qenë aty gjatë gjithë kohës dhe faktikisht pa ndikime të jashtme, por jemi përfshirë në diskutime me guvernatorin e Venetos, me ministrin e Jashtëm italian. Nesër presim këtu kryeministren e Italisë. Këto tre vende dhe ne jemi të ftuarit e nderit të këtij panairi. Natyrisht, që ky është një proces i komplikuar. Incidentet dhe përplasjet nuk kanë munguar, por ama nga ana tjetër, gjatë gjithë këtij procesi gjërat kanë ecur përpara.

Sot, kemi kryeministrin e Kosovës dhe Presidentin e Serbisë që janë në një fazë të avancuar të procesit të normalizimit dhe siç e thashë më parë e siç e kam edhe shkruar, takimi i fundit me Albinin ka qenë një takim që më ka bërë shumë të besoj se jemi në një fazë pozitive dhe prandaj dhe unë e mbështes plotësisht kryeministrin e Kosovës në këtë përpjekje. Nuk i kuptoj fare ata të cilët e konsiderojnë tradhtar. Natyrisht për gjëra të cilët dhe për të cilat ai i ka konsideruar tradhtar të tjerët më përpara por kjo nuk ka asnjë lidhje se këto janë gjëra krejt të ndara. Si kryeministër i Kosovës ai po bën gjënë e duhur. Unë jam tërësisht në mbështetje të tij dhe të këtij procesi dhe kam shumë besim që ky proces do të konkludojë e besoj shumë që edhe kjo marrëdhënie mes Serbisë dhe Shqipërisë, Shqipërisë dhe Serbisë  ka ndikimin e vetë pozitiv në atmosferën e procesit.

– Mendoni që situata në gjyq nesër do të ndikojë e do t’i ndikojë kryeministrit të Kosovës një tjetër qasje sa i takon dialogut me Serbinë?

Kryeministri Edi Rama: Nuk më duket se nga ana e kryeministrit të Kosovës ka ndonjë lidhje shkak pasojë me atë që ndodh në Hagë dhe kryeministri i Kosovës është i fokusuar në punët e tij, në axhendën e tij, në procesin e normalizimit, kështu që nuk shoh lidhje shkak – pasojë, aq më tepër që në rolin e kryeministrit të Kosovës, ai duhet respektojë plotësisht pa asnjë diskutim procesin e drejtësisë atje pavarësisht se ç’mund të mendojmë e ç’mund të na vijë nga shpirti  e gati të na plasi shpirtin për atë drejtësi atje, por nuk kemi pse bëjmë komente.

– Çfarë urimi keni ju për 5 drejtuesit më të lartë të UCK në këtë rrugëtim me drejtësinë ndërkombëtare?

Kryeministri Edi Rama: Ajo që po kalojnë ata është diçka që mund ta përkufizojmë me fjalën “e tmerrshme”, por nga ana tjetër ata janë njerëz që e kanë sfiduar atë si të thuash sensin e përgjithshëm edhe më parë, e kanë sfiduar në mënyrë shumë ekstreme kur kanë guxuar, jo vetëm ta mendojnë, por dhe të veprojnë për të pavarësuar Kosovën, atëherë kur askush as nuk e qaste fare si ide e kanë guxuar t’i japin idesë së pavarësimit të Ibrahim Rugovës dimensionin e luftës së armatosur. Pra, diçka aq heroike të cilën sot shumëkush e harron sepse nganjëherë kështu është jeta, nganjëherë kështu janë njerëzit dhe nganjëherë politika dhe cinizmi i errin sytë shumëkujt e nuk janë të gjithë fatkeqësisht që e mendojnë sot se pa Hashim Thacin e pa ata që janë atje dhe pa heronjtë, dëshmorët dhe protagonistët që dhanë jetë ose jo për Ushtrinë Çlirimtare të Kosovës, sot askush nga ata që i japin gojës pa fre nuk do kishin gojë fare sepse nuk do t’i linte njeri të hapin gojën, kështu që kjo është ecuria e proceseve jetësore, por nga ana tjetër unë kam shumë admirim për forcën, për durimin, për kokëfortësinë pse jo të Hashimit dhe të atyre për t’ia dalë edhe në këtë betejë që është po aq e barabartë sa ishte beteja me armikun atëherë edhe pse nuk është një betejë me armikun, është një betejë me mikun, është tjetër gjë kjo.

Faleminderit!/albeu.com

The post Nesër në Hagë gjyqi ndaj ish-krerëve të UÇK, Rama: Po kalojnë diçka të tmerrshme, betejë me mikun appeared first on Albeu.com.

Gjyqtari i procedurës paraprake ka konstatuar se ka prova ‘prima facie’ se viktimat 21/06, 44/06, 45/06, 46/06, 47/06, 53/06, 54/06, 55/ 06, 56/06, 57/06, 58/06 dhe 59/06, kanë pësuar dëme si rezultat i drejtpërdrejtë i krimeve të pretenduara në aktakuzën e ndryshuar dhe i pranon ato si viktima pjesëmarrëse në procedurë.

Në këtë vendim thuhet se të gjithë aplikantët janë viktima të krimeve që pretendohet se janë kryer në lokacionet e identifikuara në aktakuzën e ndryshuar dhe krimet e supozuara bien brenda fushëveprimit kohor të akuzave siç specifikohet në aktakuzën e ndryshuar në lidhje me secilën prej vendndodhjeve, raporton “Betimi për Drejtësi“.

“Më konkretisht: (a) Viktima 21/06 është viktimë e drejtpërdrejtë e persekutimit, burgimit/arrestimit dhe ndalimit të paligjshëm arbitrar, akteve të tjera çnjerëzore, trajtimit mizor dhe torturës, që pretendohet se janë kryer në [REDAKTUAR]. Duke vënë në dukje se viktima 21/06 pretendon gjithashtu se është viktimë e krimeve të kryera të dyshuara në vitin 2004, gjyqtari i procedurës paraprake kujton se krime të tilla nuk bien në sferën kohore të akuzave ose në juridiksionin e përkohshëm të Dhomave të Specializuara”, thuhet në vendim.

Tutje, thuhet se viktimat 44/06, 45/06, 46/06 dhe 47/06 janë viktima indirekte të persekutimit dhe burgimit/arrestimit dhe ndalimit të paligjshëm ose arbitrar, të dyshuara të kryera në [REDAKTUAR] kundër një anëtari të ngushtë të familjes.

“Gjyqtari i procedurës paraprake vëren se edhe viktimat 44/06, 45/06, 46/06 dhe 47/06 pohojnë se nuk dihet fati i familjarit të tyre. Në lidhje me këtë, gjyqtari i procedurës paraprake vëren se anëtari i familjes nuk është në mesin e viktimave të vrasjes ose zhdukjes me forcë të përmendur në aktakuzën e ndryshuar dhe për rrjedhojë, vrasja dhe/ose zhdukja e pretenduar e anëtarit të familjes bie jashtë fushëveprimit të akuzës”, thuhet në vendim.

Sipas vendimit, viktima 53/06 është viktimë indirekte e burgimit/arrestimit dhe ndalimit të paligjshëm apo arbitrar, akteve të tjera çnjerëzore, trajtimit mizor dhe vrasjes, që pretendohet të jenë kryer në [REDAKTUAR] ndaj një anëtari të familjes së ngushtë, i cili përmendet si viktimë në aktakuzën e ndryshuar.

“Megjithatë, gjyqtari i procedurës paraprake vëren se anëtari i familjes nuk është në mesin e viktimave të zhdukjes me forcë të përmendur në aktakuzën e ndryshuar dhe për rrjedhojë, ky krim i supozuar bie jashtë fushëveprimit të akuzave”, thuhet në vendim.

Gjithashtu, thuhet se viktima 54/06 është viktimë e drejtpërdrejtë dhe e tërthortë e burgimit/arrestimit dhe ndalimit të paligjshëm ose arbitrar, akteve të tjera çnjerëzore, trajtimit mizor, torturës dhe vrasjes, që dyshohet se është kryer në [REDAKTUAR] kundër tij dhe një anëtari të ngushtë të familjes, i cili përmendet si viktimë, në aktakuzën e ndryshuar.

“Viktimat 55/06, 56/06 dhe 57/06 janë viktima indirekte të burgimit/arrestimit dhe ndalimit të paligjshëm ose arbitrar, akteve të tjera çnjerëzore, trajtimit mizor, torturës, vrasjes, dhe në rastin e viktimës 56/06, gjithashtu zhdukjes me forcë, dyshohet se është kryer në [REDAKTUAR] dhe në [REDAKTUAR], kundër anëtarëve të ngushtë të familjes që përmenden në aktakuzën e ndryshuar”, thuhet në këtë vendim.

Vendimi thotë se viktimat 58/06 dhe 59/06 janë viktima indirekte të përndjekjes, burgimit/arrestimit dhe ndalimit të paligjshëm ose arbitrar, akteve të tjera çnjerëzore, trajtimit mizor dhe torturës, të dyshuara të kryera në [REDAKTUAR] ndaj një anëtari të ngushtë/të afërt të familjes.

“Në masën që viktima 58/06 pretendon gjithashtu se është viktimë e drejtpërdrejtë e keqtrajtimit dhe viktima 59/06 viktimë indirekte e keqtrajtimit të pretenduar të viktimës 58/06, gjyqtari i procedurës paraprake kujton se akuzat për akte të tjera çnjerëzore dhe trajtim mizor duhet të lexohen së bashku me akuzat për burgim/arrest arbitrar dhe paraburgim që pretendohet se janë kryer në një nga vendet e paraburgimit të identifikuara ose në një vendndodhje të identifikuar në mënyrë të ngjashme në aktakuzën e ndryshuar dhe në listën A. Gjyqtari i procedurës paraprake vëren se, ndryshe nga anëtari i ngushtë i familjes së tij, viktima 58/06 asnjëherë nuk është arrestuar apo dërguar në vendin e identifikuar në aktakuzën e ndryshuar. Ai u keqtrajtua gjoja [REDAKTUAR] dhe, si i tillë, keqtrajtimi i tij bie jashtë fushëveprimit gjeografik të akuzave siç specifikohet në aktakuzën e ndryshuar”, thuhet tutje në vendim.

Sipas vendimit, viktima 21/06 ka pësuar dëmtime fizike (plagë), dëmtim mendor (humbje të kujtesës, sulme paniku dhe ankth gjumi) dhe dëm material, si rezultat i drejtpërdrejtë i ndalimit dhe keqtrajtimit të pretenduar të tij.

Ndërkaq, thuhet se viktimat 44/06, 45/06, 46/06, 47/06, 53/06, 55/06, 56/06, 57/06 dhe 58/06 kanë pësuar dëmtim mendor (trauma psikologjike, humbje, dhimbje emocionale, depresion, frikë, ankth, stres dhe pagjumësi) si anëtarë të familjes së drejtpërdrejtë të viktimave të drejtpërdrejta.

“Viktima 54/06 ka pësuar dëmtime fizike (plagë të rënda, brinjë të thyera, dhimbje fizike dhe dhimbje koke), si dhe dëmtime mendore (trauma, stres, rikthim, frikë dhe probleme me gjumin), si rezultat i drejtpërdrejtë i ndalimit dhe keqtrajtimit të tij të pretenduar dhe si anëtar i familjes së një viktime të drejtpërdrejtë. Viktima 59/06 ka pësuar dëmtim mendor (traumë psikologjike) për shkak të marrëdhënies së ngushtë familjare me viktimën e drejtpërdrejtë. Në këtë drejtim, gjyqtari i procedurës paraprake sqaron se ndërkohë që një marrëdhënie e ngushtë me viktimën e drejtpërdrejtë mund të mos jetë supozohet (pasi viktima 59/06 nuk është anëtar i afërt i familjes), një marrëdhënie e tillë mund të konkludohet nga fakti se [REDAKTUAR] [REDAKTUAR]”, thuhet në këtë vendim.

Në fund thuhet se gjykata ka miratuar aplikimet e viktimave 21/06, 44/06, 45/06, 46/06, 47/06, 53/06, 54/06, 55/06, 56/06, 57/06, 58/06 dhe 59 /06 dhe ka urdhëruar që masa mbrojtëse e anonimitetit sipas rregullit 80 (4) (e) (i) të Rregullores t’iu jepet viktimave 21/06, 44/06, 45/06, 46/06, 47/06, 53/06, 54/06, 55/06, 56/06, 57/06, 58/06 dhe 59/06.

Ndryshe, më 29 prill, Zyra e Prokurorit të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.

Prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.

Në aneksin e publikuar sa i përket krimeve që pretendohen se ndodhën në Semetishtë dhe Budakovë, prokuroria ka listuar krimet e luftës si arrestimi dhe ndalimi i paligjshëm ose arbitrar, trajtim mizor ose çnjerëzor, torturë, vrasje. Ndërkaq, si krime kundër njerëzimit i ka listuar burgimin, vepra të tjera çnjerëzore, torturën, vrasjen, zhdukjen me forcë e personave dhe persekutimin.

Kurse, për krimet që pretendon që ndodhën në Gjilan, si krime lufte i ka listuar arrestimi dhe ndalimin e paligjshëm ose arbitrar, trajtimin mizor ose çnjerëzor, torturën dhe vrasjen. Ndërsa, si krime kundër njerëzimit ka listuar burgimin, vepra të tjera çnjerëzore, torturën, vrasjen, dhe persekutimin.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.

Njëjtë është deklaruar edhe Veseli në paraqitjen e tij më 10 nëntor, sikurse edhe Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Sipas akuzës, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.

Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.

Sipas aktakuzës, të akuzuarit bashkë me udhëheqësit tjerë të UÇK-së kontribuuan në arritjen e qëllimit t përbashkët.

“Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues./express

The post Pranohen 12 viktima pas zgjerimit të aktakuzës ndaj Thaçit dhe të tjerëve appeared first on Albeu.com.