Projektligji tani duhet të shqyrtohet nen për nen në komisionin përgjegjës, ku mund të propozohen edhe amendamente. Pas kësaj, projektligji duhet të rikthehet në Kuvend për lexim të dytë dhe për votimin përfundimtar.

Rregullorja e Kuvendit të Kosovës lejon që, në rrethana të caktuara, të shmangen afatet e zakonshme procedurale, nëse këtë e propozojnë së paku gjashtë deputetë dhe e mbështesin dy të tretat e deputetëve të pranishëm.

Kryeministri Albin Kurti, në fjalën e tij përpara votimit, tha se për UÇK-në nuk mund të ketë gjyq, ndërsa shtoi se lëvizjet për ndryshimin e ligjit janë të nxituara por do t’i mbështesin.

Ai shtoi se rruga për të kundërshtuar aktgjykimin ndaj ish-krerëve të UÇK-së është procesi i Apelit.

“Adresa e fitores është apeli”, tha Kurti.

Sipas tij, për këtë nevojitet “organizim dhe strategji shtetërore e kombëtare”, e cila nuk duhet të jetë partiake.

“Nuk ndihmojnë veprimet pa strategji”, tha Kurti.

The post Dënimi i ish-krerëve të UÇK-së, Kuvendi i Kosovës miraton në parim ndryshimet për Gjykatën Speciale appeared first on Albeu.com.

Kuvendi i Kosovës ka miratuar me 99 vota një deklaratë në lidhje me aktgjykimin e Gjykatës Speciale me seli në Hagë, e cila dy javë më parë shpalli fajtorë për krime lufte katër ish-krerët e Ushtrisë Çlirimtare të Kosovës: Hashim Thaçi, Jakup Krasniqi, Kadri Veseli dhe Rexhep Selimi. Deputetët serbë nuk morën pjesë në votim.

Në deklaratë shprehet shqetësim i thellë ndaj vendimit të shkallës së parë kundër katër ish-udhëheqësve të UÇK-së dhe konsiderohet i papranueshëm përfundimi për ekzistencën e një qëllimi të përbashkët kriminal që u përmend gjatë gjykimit.

Gjithashtu theksohet se respektimi i shtetit të së drejtës nënkupton edhe të drejtën dhe përgjegjësinë për të kundërshtuar me mjete ligjore e institucionale një aktgjykim që Kuvendi i Kosovës e vlerëson të padrejtë.

Deklarata, e cila përmban shtatë pika, rikujton se lufta e popullit për liri dhe pavarësi përmes UÇK-së lindi në rrethana të represionit sistematik dhe krimeve gjenocidale të Serbisë, në një kohë kur popullit të Kosovës i mohoheshin të drejtat themelore dhe vetë mundësia për të jetuar i lirë në vendin e tij.

Në tekst përmendet po ashtu rëndësia vendimtare e ndërhyrjes së NATO-s për ndalimin e dhunës ndaj popullit të Kosovës dhe për çlirimin e vendit.

“Asnjë aktgjykim nuk mund ta zhbëjë të vërtetën historike të luftës në Kosovë. Serbia ushtroi gjenocid e krime kundër njerëzimit”, thuhet në deklaratë.

Pas vendimit të Hagës, Kuvendi u kërkon të gjitha institucioneve shtetërore të Kosovës të ndërmarrin të gjitha veprimet e nevojshme për mbrojtjen e së vërtetës dhe pastërtisë së luftës çlirimtare të popullit të Kosovës, si dhe hartimin e një strategjie të përbashkët shtetërore për bashkërendimin e veprimeve juridike, institucionale dhe diplomatike në mbrojtje dhe afirmim të së vërtetës së plotë historike mbi luftën e drejtë për liri dhe çlirim.

Kuvendi kërkon gjithashtu që Dhomat e Specializuara ta respektojnë mandatin në përputhje me vullnetin e Kuvendit të Kosovës, duke kundërshtuar çdo përpjekje për të përmbysur të vërtetën historike, për të vënë në dyshim luftën çlirimtare apo për të barazuar popullin që luftoi për liri dhe mbijetesë me regjimin që e shtypi atë.

Më 16 shtator, Gjykata Speciale u shqiptoi dënime për krime lufte katër ish-krerëve të UÇK-së. Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet.

Javën e kaluar, Partia Demokratike e Kosovës, e cila në politikën e saj mishëron vlerat e luftës së UÇK-së, i propozoi qeverisë të nisë verifikimin e ndryshimeve të paraqitura në projektligjin për Dhomat e Specializuara, që në opinion njihet si Gjykata Speciale.

Sipas projektligjit, juridiksioni i Gjykatës Speciale kërkohet të kufizohet vetëm në veprat penale që përmenden në raportin e vitit 2011 të Asamblesë Parlamentare të Këshillit të Evropës, i cili trajtonte, ndër të tjera, pretendimet për trafikim organesh pas luftës në Kosovë. Po ashtu, periudha kohore që mbulon kjo gjykatë, nga janari i vitit 1998 deri në dhjetor të vitit 2000, propozohet të ndryshohet në periudhën nga 1 korriku i vitit 1999 deri në dhjetorin e vitit 2000. Në projektligj parashihet edhe që dënimet e Gjykatës Speciale të ekzekutohen në Kosovë dhe personat e dënuar të mos përjashtohen nga e drejta e Presidentit të Kosovës për falje. Ligji nuk është miratuar ende, por i është paraqitur qeverisë.

Njohësit e çështjeve juridike vlerësojnë se nismat për plotësim dhe ndryshim të ligjit për Dhomat e Specializuara janë tejet komplekse. Ehat Miftaraj nga Instituti i Kosovës për Drejtësi deklaroi për DW-në se deputetët e Kuvendit kanë të drejtë dhe kompetencë kushtetuese për të iniciuar plotësim dhe ndryshim të ligjit, me kusht që këto ndryshime të mos cenojnë detyrimet që ka marrë Kosova në bazë të amendamentit kushtetues të përcaktuar me nenin 162 të Kushtetutës. Sipas tij, çdo plotësim ose ndryshim i ligjit nuk mund të jetë në kundërshtim me detyrimet ndërkombëtare të marra përsipër nga Republika e Kosovës.

Miftaraj shtoi se çdo plotësim apo ndryshim duhet të bëhet në konsultim dhe bashkëpunim me shtetet kryesore të Këshillit të Bashkimit Evropian apo me SHBA-në, në mënyrë që këto ndryshime të kenë efekt dhe të jenë të zbatueshme në praktikë.

Që nga shpallja e dënimit për ish-krerët e UÇK-së, në Prishtinë dhe në qytete të tjera të Kosovës çdo ditë vazhdojnë të mbahen protesta kundër vendimit të Gjykatës Speciale.

Dhomat e Specializuara, ose siç njihet në opinion Gjykata Speciale, u themeluan nga Kuvendi i Kosovës në vitin 2015 dhe e ka selinë në Hagë. Stafi i saj është tërësisht ndërkombëtar.

Gjykata Speciale trajton vetëm rastet që lidhen me pretendimet për krime të kryera nga pjesëtarë të UÇK-së gjatë luftës së viteve 1998-1999. Ajo u bë pjesë e Kushtetutës së Kosovës përmes një neni të posaçëm, i cili u miratua nga dy të tretat e deputetëve të atëhershëm dhe po ashtu nga dy të tretat e deputetëve të pakicave, përfshirë përfaqësuesit në Kuvend të serbëve të Kosovës.

Sipas dy neneve të tjera të Kushtetutës, mandati i Gjykatës Speciale përfundon vetëm kur Këshilli i Bashkimit Evropian e njofton Kosovën për përfundimin e mandatit, duke e bërë atë një mekanizëm mbi të cilin autoritetet kosovare, me ligjin ekzistues, nuk kanë asnjë kompetencë. / DW

The post A do të pësojë ndryshime ligji për Gjykatën Speciale? appeared first on Albeu.com.

Analisti politik Gani Qarri ka komentuar për “Bota sot” vendimin e Dhomave të Specializuara në Hagë ndaj ish-drejtuesve të UÇK-së, reagimet publike pas aktgjykimit, protestat kundër Speciales dhe zhvillimet e fundit në Kuvendin e Kosovës.

Sipas Qарrit, vendimi i gjykatës nuk e ka prekur UÇK-në si organizatë dhe as nuk e ka njollosur luftën e saj, por ka përcaktuar përgjegjësi individuale për personat e dënuar.

Ai ka deklaruar se Dhomat e Specializuara, duke u përqendruar vetëm te krimet personale të individëve, nuk e kanë akuzuar në asnjë pjesë të aktgjykimit UÇK-në si tërësi. Qarri ka vlerësuar se ky qëndrim është në përputhje me opinionin pozitiv të Gjykatës Ndërkombëtare për Drejtësi për pavarësinë e Kosovës, si organi më i lartë juridik i OKB-së. Sipas tij, gjykata ka konfirmuar gjithashtu se lufta e popullit të Kosovës kundër okupimit gjenocidal serb ishte legjitime dhe me rëndësi historike, njësoj si luftërat çlirimtare të popujve të pushtuar në vende të tjera të botës.

Analisti ka kërkuar që të mos barazohet përgjegjësia e personave të dënuar me luftën e UÇK-së. Në të njëjtën kohë, ai ka kritikuar sistemin vendor të drejtësisë, duke thënë se për më shumë se dy dekada ai ka dështuar të japë vendime ndaj gangsterëve dhe kriminelëve pa mbështetjen e ndërkombëtarëve.

Qarri ka përmendur veçanërisht mungesën e hetimit dhe zbardhjes së shumë vrasjeve të pasluftës, si dhe rastet e fajdeve e gjobvënieve mafioze me lidhje politike, të cilat, sipas tij, kanë çuar edhe në vetëvrasje të shqiptarëve të pambrojtur. Për këtë arsye, ai ka thënë se Kosova duhet ta delegojë këtë pjesë të sistemit gjyqësor në vendet perëndimore. Në të kundërtën, sipas tij, nuk do të ketë shpresë që drejtësia vendore të veprojë ndaj personave që e konsiderojnë veten të paprekshëm nga ligji.

Qarri ka bërë gjithashtu pretendime të drejtpërdrejta ndaj disa eksponentëve të PDK-së dhe AAK-së. Ai ka thënë se te qytetarët po forcohet bindja se një pjesë e këtyre figurave përbëjnë rrezik jo vetëm për krijimin e institucioneve, por edhe për stabilitetin dhe funksionimin e shtetit.

Sipas tij, nëse AKI-ja, ligji dhe drejtësia nuk ndërhyjnë urgjentisht ndaj tyre, besimi në sistemin kosovar të drejtësisë do të dëmtohet edhe më tej. Qarri ka shtuar se po bëhet gjithnjë e më i pranishëm edhe mendimi se gjykimet për vepra të rënda penale ndaj personave me aktakuza duhet të zhvillohen në ndonjë shtet evropian.

Duke folur për situatën në Kuvend, analisti ka theksuar se fillimisht duhet të përfundojë konstituimi i tij, përfshirë zgjedhjen e nënkryetarit që mungon nga radhët e PDK-së. Ai është shprehur se vendimi i Gjykatës Kushtetuese është i qartë dhe kërkon që Kuvendi të kompletohet para se të trajtohen çështje të tjera.

Qarri ka vlerësuar se kërkesa e PDK-së që Projektligji për Dhomat e Specializuara të vendoset si pika e parë e rendit të ditës bie ndesh me këtë vendim, pasi legjislativi ende nuk është kompletuar me të gjithë nënkryetarët pas zgjedhjeve të fundit.

Ai ka argumentuar se një Kuvend i pakonstituuar plotësisht nuk mund të ndërmarrë hapa për ndryshimin e vendimit të Dhomave të Specializuara. Sipas Qарrit, rruga e vetme juridike për të kundërshtuar padrejtësi apo paqartësi të mundshme mbetet Gjykata e Apelit.

Për analistin, zgjedhja e të gjithë nënkryetarëve është kusht për ta bërë Kuvendin ligjërisht funksional dhe për t’i dhënë atij kompetencën që të marrë vendime, përfshirë ato që lidhen me kërkesat e PDK-së për Specialen.

Qarri ka fajësuar disa figura të PDK-së për zgjatjen e krizës institucionale. Ai ka thënë se përveç mospajtimeve politike rreth zgjedhjes së presidentit, refuzimi për bashkëpunim me institucionet legjitime dhe kryeministrin Kurti po pengon funksionimin e shtetit.

Sipas tij, PDK-ja po i vendos kushte edhe Kuvendit dhe po pamundëson zgjedhjen e nënkryetarëve, ndonëse një legjislativ që nuk është konstituuar plotësisht nuk ka fuqi të marrë vendime. Qarri e ka cilësuar kërkesën për trajtimin e menjëhershëm të Projektligjit për Dhomat e Specializuara si një kushtëzim të qëllimshëm, që mund të zgjasë më tej ngërçin politik dhe ta lërë Kosovën pa institucione funksionale e qeverisje të qëndrueshme.

Ai është ndalur edhe te protestat kundër aktgjykimit të Speciales. Qarri ka thënë se ato nuk duhet të përdoren për presion ndaj Kuvendit, Qeverisë apo institucioneve të tjera të Kosovës dhe as të kthehen në kërcënim për stabilitetin e vendit.

Analisti ka theksuar se as Kuvendi ende i pakonstituuar dhe as Qeveria aktuale nuk janë përgjegjës për themelimin e Dhomave të Specializuara apo për dënimet e shqiptuara më 16 shtator ndaj 4 të akuzuarve në Hagë.

Qarri ka shtuar se aktgjykimi duhet të trajtohet si çështje juridike. Ai ka bërë të ditur se Gjykata Speciale, pavarësisht presionit të vazhdueshëm të Prokurorisë në Hagë, ka rrëzuar gjashtë akuza për “krime kundër njerëzimit” ndaj të dënuarve. Për këtë arsye, sipas tij, përgjegjësia individuale nuk duhet të paraqitet si dënim i luftës së UÇK-së apo si përpjekje për ta njollosur atë.

Ai ka rikujtuar se vetë Dhomat e Specializuara kanë sqaruar publikisht se vendimet nuk përbëjnë dënim për luftën e Kosovës për liri dhe as për UÇK-në, por lidhen me persona të caktuar që janë gjetur fajtorë për krime personale.

Për çdo pretendim lidhur me padrejtësi ose paqartësi në aktgjykim, Qarri ka kërkuar përdorimin e mjeteve juridike. Sipas tij, vendimet duhet t’i nënshtrohen një shqyrtimi të kujdesshëm në Gjykatën e Apelit, në mënyrë që të mos mbeten dyshime për gjykim të njëanshëm ose të padrejtë.

Ai ka deklaruar se Qeveria Kurti mund ta ndërmarrë këtë nismë dhe Kuvendi ta votojë vetëm pasi të kompletohet me të gjithë nënkryetarët, përfshirë atë që mungon nga PDK-ja. Qarri ka paralajmëruar se çdo bllokim i mëtejshëm i Kuvendit nga PDK-ja dhe subjektet e lidhura me të do ta rëndojë situatën.

Në përfundim, analisti ka paralajmëruar se kundërshtimi i Projektligjit të PDK-së nga partitë e tjera mund të sjellë një tjetër ngërç parlamentar. Ai ka thënë se, nëse gjatë këtyre 13 ditëve nuk arrihet marrëveshje për konstituimin e Kuvendit, zgjedhjen e presidentit dhe sigurimin e qeverisjes stabile, vendi do të përballet me një krizë të re, gjë që e ka cilësuar të papranueshme për partitë dhe qytetarët e Kosovës.

The post Qarri: Aktgjykimi i Speciales lidhet me individë, ndërsa PDK-ja po pengon funksionimin e Kuvendit appeared first on Albeu.com.

Deputetja e PDK-së, Sala Jashari, iu bashkua protestuesve të mbledhur përpara Qeverisë së Kosovës.

Ajo u bëri thirrje pjesëmarrësve të tregojnë qetësi dhe maturi, ndërsa theksoi se duhet kërkuar një mënyrë për zhbërjen e Gjykatës Speciale.

“Kjo është një ditë e rëndë për Kosovën. Kam ardhur për t’u kërkuar protestuesve që të ruajmë qetësinë dhe maturinë. Kosova ndodhet në një situatë të vështirë dhe ne duhet të tregohemi të qetë e të matur. Një vendim të tillë të Gjykatës nuk e kemi pritur”, deklaroi Jashari.

Ajo shtoi se deputetët kanë detyrimin të ndërmarrin hapa përmes institucioneve, në mënyrë që sa më shpejt të gjendet forma për zhbërjen e kësaj gjykate.

The post Jashari: Kosova po përjeton një ditë të rëndë, të gjendet mënyra për zhbërjen e Gjykatës Speciale appeared first on Albeu.com.