Gjykata Themelore në Prishtinë u ka caktuar nga një muaj paraburgim të dyshuarve M.J. dhe M.B., të cilët dyshohen për krime lufte kundër popullsisë civile.

Vendimi është marrë nga gjyqtarja e procedurës paraprake pas zhvillimit të seancës dëgjimore, duke miratuar kërkesën për paraburgim të paraqitur nga Prokuroria Speciale e Republikës së Kosovës.

Sipas vlerësimit të gjykatës, paraburgimi është masa e përshtatshme në këtë çështje penale, pasi ekziston rrezik real që të pandehurit, nëse lirohen, të arratisen për t’iu shmangur përgjegjësisë penale. Duke qenë se ata janë edhe shtetas të Serbisë, gjykata ka vlerësuar se mund të largohen lehtësisht dhe të bëhen të paarritshëm për organet e drejtësisë, çka do ta pamundësonte sigurimin e pranisë së tyre dhe do ta pengonte zhvillimin normal të procedurës penale.

Gjykata ka konstatuar gjithashtu se lënia e tyre në liri mund të krijojë mundësi për ndikim mbi provat dhe dëshmitarët. Për këtë arsye, ajo ka çmuar se, tani për tani, paraburgimi është masa e vetme që garanton zhvillimin e papenguar të procedurës në këtë rast penal.

Në njoftim bëhet e ditur se palët e pakënaqura mund të paraqesin ankesë kundër aktvendimit në Gjykatën e Apelit, nëpërmjet Gjykatës Themelore në Prishtinë.

The post Nga një muaj paraburgim për dy të dyshuarit për krime lufte ndaj popullsisë civile appeared first on Albeu.com.

Halit Gashi, i mbijetuar dhe dëshmitar, ka ngritur dyshime lidhur me fjalën përfundimtare të mbrojtësit të Milorad Gjokoviqit, pasi Gjykata Themelore në Prishtinë vendosi ta rihapë procesin e rigjykimit ndaj të akuzuarit për krime lufte.

Gashi pretendon se shpallja e aktgjykimit po vonohet për shkak të një dëshmitareje, e cila, sipas tij, ka dhënë dëshmi të sakta dhe ka qenë dëshmitare okulare e vrasjes dhe masakrës së familjes Krasniqi.

Ai tha se procesi gjyqësor ka zgjatur 1489 ditë dhe se gjykata po e shtyn sërish çështjen për ta marrë në pyetje një dëshmitare tjetër, ndonëse ajo, sipas tij, ka qenë shumë e saktë dhe ka parë drejtpërdrejt vrasjen dhe masakrën e familjes Krasniqi.

Gashi e cilësoi këtë veprim si të panevojshëm, duke theksuar se Nurije Krasniqi është pyetur tri herë për masakrën ndaj familjeve Krasniqi, Morina dhe Shala. Sipas tij, gjatë dëshmisë së parë, avokatët e të pandehurit nuk kishin qenë të përgatitur për pyetje dhe kundërpyetje, ndërsa në paraqitjen e dytë dhe të tretë ishin përpjekur të gjenin hollësi të vogla.

Ai shprehu kundërshtime të veçanta edhe për fjalën përfundimtare të mbajtur më 21, të martën e kaluar. Sipas Gashit, çdo pikë, presje, fjalë dhe fjali, qoftë e ngushtë apo e zgjeruar, e paraqitur nga mbrojtësi i të pandehurit, ishte e pavërtetë.

Gashi deklaroi gjithashtu se nuk kishte marrë asnjëherë procesverbale nga seancat gjyqësore të zhvilluara nën drejtimin e gjyqtarit Valon Kurti. Ai tha se këto dokumente nisi t’i pranonte vetëm pasi Donika Shala-Avdyli mori detyrën e kryetares së trupit gjykues.

Sipas tij, nuk i është dorëzuar asnjë procesverbal për seancat e mbajtura prej 8 të 2022-ës deri më sot. Për këtë arsye, Gashi tha se dyshon fuqishëm se në dokumente mund të jetë shkruar diçka krejt tjetër nga pyetjet që janë bërë gjatë seancave.

Ai sqaroi se, pasi Valon Kurti u largua nga pozita e kryetarit të trupit gjykues dhe në këtë detyrë erdhi Donika Shala-Avdyli, procesverbalet nisën t’u jepeshin për çdo seancë të zhvilluar.

Gashi u shpreh i gatshëm që në çdo kohë dhe në çdo moment të përballet me drejtësinë dhe me të vërtetën. Për Gjokoviqin, ai pret që gjykata të shqiptojë dënimin e merituar, përkatësisht dënimin maksimal, duke shprehur zhgënjim që vendimi i pritur atë ditë nuk u dha.

Rihapja e shqyrtimit gjyqësor ndaj Milorad Gjokoviqit, i akuzuar për krime lufte, është vendosur nga Gjykata Themelore në Prishtinë. Shkak për këtë vendim është bërë mosgjetja e një deklarate që dëshmitarja Nurije Krasniqi kishte dhënë në Institutin për krime lufte në Kosovë.

Prokuroria pretendon në aktakuzë se Gjokoviqi, gjatë viteve 1998-1999, në fshatin Ozdrim të Pejës dhe në fshatra të tjera të këtij rajoni, kishte vepruar si pjesëtar i forcave policore dhe ushtarake serbe. Ai dyshohet se kishte zbatuar masa që përfshinin vrasje, bastisje, rrahje, maltretime, arrestime, tortura, trajtim mizor dhe çnjerëzor, mbajtje në kushte skllavërie, dëbim dhe deportim të dhjetëra civilëve shqiptarë.

Në aktakuzën e hartuar më 23 qershor 2023 përshkruhet se forcat e rregullta ushtarake kishin hyrë nga pjesa veriore e Ozdrimit, nëpërmjet rrugës rajonale Pejë–Mitrovicë. Ndërkohë, nga ana perëndimore e fshatit, në drejtim të Vitomiricës, kishin depërtuar grupe paramilitare, të përziera me pjesëtarë të njësive speciale ushtarake.

Sipas të njëjtit dokument, këto forca kishin hapur zjarr ndaj popullsisë civile, duke vrarë gjashtë civilë shqiptarë: I.K., Sh.K., E.M., R.Sh., Z.Sh. dhe M.H.

Aktakuza thotë se tre civilë të tjerë, A.G., H.G. dhe M.G., ishin plagosur nga të shtënat dhe fillimisht ishin dërguar në Spitalin e Pejës. Më pas, ata dyshohet se ishin ekzekutuar dhe varrosur në fshatin Lutogllavë.

Gjatë ofensivës dyshohet se ishin vrarë edhe pesë civilë shqiptarë, R.K., Z.K., A.K., A.K. dhe A.Sh. Trupat e tyre nuk janë gjetur, ndërsa të pestë vazhdojnë të figurojnë në listën e personave të zhdukur.

The post Gashi akuzon Gjykatën Themelore për vonesa në shpalljen e aktgjykimit ndaj Gjokoviqit appeared first on Albeu.com.

Me 13 vjet heqje lirie u dënua i pandehuri D.B., pasi Gjykata Themelore në Mitrovicë, përkatësisht Departamenti për Krime të Rënda, e shpalli fajtor për veprat penale të vrasjes së rëndë në tentativë dhe armëmbajtjes pa leje.

Vendimi u bë publik më 23 korrik 2026 nga gjyqtari kryesues i trupit gjykues, Xhemajl Jusufi.

Prokuroria Themelore në Mitrovicë e kishte akuzuar D.B. se kishte ndërmarrë një përpjekje për të eliminuar të birin, në fshatin Stanoc të Komunës së Vushtrrisë.

Të dhënat e Policisë tregojnë se ngjarja ka ndodhur më 28 korrik 2025. I dyshuari qëndroi i pakapshëm për disa muaj, derisa u arrestua më 14 nëntor të po atij viti, pas një operacioni të shërbimeve ligjzbatuese.

Përmes një komunikate për publikun, Prokuroria kishte bërë të ditur se “pas një pune operative është arrestuar një person me iniciale D.B., i cili prej muajsh ka qenë në kërkim, me dyshimin për kryerjen e veprave penale ‘Vrasja e rëndë në tentativë’ dhe ‘Mbajtja në pronësi, kontroll ose posedim të paautorizuar të armëve’”.

The post Dënohet me 13 vite burg babai që tentoi t’i merrte jetën të birit në Stanoc të Vushtrrisë appeared first on Albeu.com.

Gjykata Themelore në Mitrovicë ka vendosur t’ua ndërpresë arrestin shtëpiak dy mjekëve, V.R. dhe E.S., të cilët po hetohen nën dyshimin për veprën penale të marrjes së ryshfetit.

Sipas një përgjigjeje me shkrim që kjo gjykatë i ka dërguar kp-së, vendimi është nxjerrë më 10 korrik 2026. Prokuroria Themelore në Mitrovicë nuk kishte paraqitur kërkesë për zgjatjen e kësaj mase apo për zëvendësimin e saj me ndonjë masë tjetër.

“Gjykata Themelore në Mitrovicë duke vendosur sipas detyrës zyrtare dhe në mbështetje të nenit 181, paragrafët 1 dhe 7, lidhur me nenin 188, paragrafi 1 të Kodit Nr. 08/L-032 të Procedurës Penale, më 10 korrik 2026 ka nxjerrë aktvendim me të cilin të pandehurve V.R. dhe E.S. u ndërpritet masa e arrestit shtëpiak”, thuhet në përgjigjen e Gjykatës.

Gjykata ka theksuar se ndaj dy të dyshuarve mbetet dyshimi i bazuar se kanë kryer veprën penale “Marrja e ryshfetit”, sipas Kodit Penal të Republikës së Kosovës.

Nga ana tjetër, Prokuroria Themelore në Mitrovicë ka njoftuar se nuk e ka kërkuar vazhdimin e arrestit shtëpiak, për shkak se nuk kanë ekzistuar më kushtet ligjore për paraqitjen e një kërkese të tillë.

Sipas Prokurorisë, deri në këtë fazë të procedurës janë intervistuar të gjithë dëshmitarët e nevojshëm dhe të pandehurit, përfshirë edhe personat për të cilët është zhvilluar procedurë lidhur me veprën penale të dhënies së ryshfetit.

Aktakuza, megjithatë, ende nuk është ngritur, pasi pritet të kryhen edhe disa veprime të tjera procedurale të nevojshme.

Prokuroria ka bërë të ditur se V.R. po hetohet për gjashtë raste të dyshuara të marrjes së ryshfetit, ndërsa E.S. për tri raste të tilla.

Në sqarimin e saj, Prokuroria ka njoftuar po ashtu se E.S. kishte qenë më herët në arrest shtëpiak, në periudhën nga 10 janari deri më 9 shkurt 2023, për një rast tjetër penal. Për atë rast, më 30 korrik 2024, Prokuroria kishte ngritur aktakuzë ndaj tij për veprën penale “Marrja e ryshfetit”, e cila ndodhet në procedurë në Gjykatën Themelore në Mitrovicë.

Dy mjekët e Spitalit të Përgjithshëm në Vushtrri u arrestuan nga Policia e Kosovës më 13 maj 2026, nën dyshimin për veprën penale “Marrja e ryshfetit”. Rasti vazhdon të hetohet nga Prokuroria Themelore në Mitrovicë.

The post Dy mjekëve të dyshuar për ryshfet u hiqet masa e arrestit shtëpiak appeared first on Albeu.com.

Gjykata Themelore në Prishtinë ka vendosur t’u caktojë masën e paraburgimit prej 30 ditësh nëntë personave të dyshuar: F.M., F.M., S.K., N.B., D.M., A.M., M.M., N.M. dhe G.Q.

Sipas dyshimeve, ata ngarkohen për veprat penale shpëlarja e parave, kontrabandimi i mallrave në bashkëkryerje, pjesëmarrja ose organizimi i grupit kriminal të organizuar, mbajtja në pronësi, kontroll ose posedim të paautorizuar të armëve, si dhe falsifikim i parasë.

Në njoftimin e gjykatës bëhet e ditur se Departamenti Special i Gjykatës Themelore në Prishtinë ka shqyrtuar kërkesën e Prokurorisë Speciale të Republikës së Kosovës për caktimin e paraburgimit ndaj të pandehurve në këtë çështje penale.

Prishtinë, 03 Korrik 2026 – pas mbajtjes së seancës dëgjimore, gjyqtari i procedurës paraprake, përmes aktvendimit, e ka miratuar kërkesën e Prokurorisë Speciale të Republikës të Kosovës, duke vendosur që secilit prej të pandehurve t’i caktohet paraburgim në kohëzgjatje prej 1 (një) muaj.

Gjykata ka vlerësuar se kjo masë është e përshtatshme në rrethanat e kësaj çështjeje, pasi ekziston rrezik real që, nëse të akuzuarit mbesin në liri, ata mund të arratisen me qëllim shmangien nga përgjegjësia penale dhe të pengojnë zhvillimin normal të procedurës penale.

Po ashtu, sipas vlerësimit të gjykatës, lënia e tyre në liri mund të krijojë mundësi që ata të vazhdojnë komunikimet dhe bashkëpunimin mes vete për të vijuar me kryerjen e veprave penale ose të veprave të reja penale.

Kundër këtij aktvendimi, palët e pakënaqura kanë të drejtë

The post Një muaj paraburgim për nëntë të dyshuar në rastin e mashtrimit me derivate të naftës appeared first on Albeu.com.

I dënuari Bujar Behrami më datë 08.11.2023 përmes telefonit – rrjetit social Viber – me fjalë ka kanosur gazetarin duke i thënë se do t’i shkaktojë lëndime të rënda trupore apo do ta privojë nga jeta, raporton Klan Kosova.

“Me datën 08.11.2023 rreth orës 13:00h, në Prishtinë, përmes telefonit – rrjetit social viber – me dashje dhe me qellim të frikësimit dhe kërcënimit, me fjalë seriozisht kanos personin tjetër se do t’i shkaktojë lëndime të rënda trupore apo do ta privojë nga jeta për shkak të veprimtarisë së tij dhe atë të dëmtuarin Herolind Ademi gazetar hulumtues në Klan Kosova, në atë mënyrë që për shkak se i dëmtuari gjatë kryerjes së detyrave të tij si gazetar hulumtues derisa ishte duke hulumtuar veprimtarinë ilegale të shërbimeve IPTV ka kontaktuar me të pandehurin të cilit i është prezantuar si gazetar dhe ky i fundit përmes mesazheve nga numri i tij 049-XXXXXX i drejtohet të dëmtuarit me fjalët ‘ 0 haver veq mbyllun se sakte ta kam adresen por tregoj veq mbyllun edhe mos dil, kjo eshte hera e fundit vey po t’ kallxoj terhequ prej meje e mos u perzij se nuk han ma buk, kjo eshte e fundit se te kam lokalizu e di sakle lokacionin tuaj, fol me kon dush po t’kallxoj mos mu perziej ne pune te mija qe don me jetu edhe naj dite qekaq di met than’. Pastaj i njëjti telefonon edhe tek punëdhënësi i të dëmtuarit Klan Kosova ku bisedon me dëshmitaren Erblina Berisha të cilës i thotë se ‘deshta me paralajmerua Herolindin qe kur te shihemi ka me pa ai qekaq deshta faleminderit’ me çka tek i dëmtuari shkakton ndjenjën e frikës dhe ankthit për sigurinë e tij”, ka thënë Gjykata në aktvendim, transmeton Klan Kosova.

Me këtë rast, Gjykata thotë se ka kryer veprën penale “Kanosja”.

The post Vodhi kanale televizive dhe kërcënoi gazetarët – katër muaj burgim për Bujar Behramin appeared first on Albeu.com.

Gjykata Themelore në Prishtinë – Departamenti Special ka vendosur lidhur me kërkesën e Prokurorisë Speciale të Republikës së Kosovës, në çështjen penale kundër të pandehurve I.Z., R.K., A.K., A.D., dhe M.D., për shkak të dyshimit te bazuar se kanë kryer veprën penale Pjesëmarrja ose Organizimi i grupit Kriminal të Organizuar nga neni 277 i KPRK-së lidhur me veprat penale Kontrabandim me mallra nga neni 311, Shmangie nga tatimi nga neni 307 si dhe veprës penale Tregtia e ndaluar nga neni 299 të të Kodit Penal të Republikës së Kosovës.

Gjyqtarja e procedurës paraprake kërkesën e prokurorit të shtetit për caktimin e masës së paraburgimit kundër të pandehurve I.Z., R.K., A.K., A.D., dhe M.D e ka aprovuar si të bazuar dhe të njëjtve iu ka caktuar masën e paraburgimit në kohëzgjatje prej një (1) muaji, për secilin veç e veç, konform nenit 187 par. 1 nënpar. l.l dhe 1.2, pikat 1.1.1, 1.2.2 dhe 1.2.3 të KPPRK-së.

Kundër këtij aktvendimi palët kanë të drejtë ankese në Gjykatën e Apelit të Kosovës./albeu.com

The post Aksioni kundër kontrabandës në veri të Kosovës, gjykata merr vendim për 5 të dyshuarit appeared first on Albeu.com.