Në mbledhjen e zhvilluar sot nga Këshilli Gjyqësor, gjyqtarja Daniela Dimovska u emërua kryetare e Gjykatës Themelore Penale të Shkupit.

Zgjedhja erdhi pas përfundimit të një procedure me shpallje publike, ku kandiduan dy persona: Daniela Dimovska, gjyqtare dhe ushtruese e detyrës së kryetares së Gjykatës Themelore Penale të Shkupit, si dhe Ivica Stefanovski, gjyqtar në të njëjtin institucion.

Kreu i Komisionit të Përzgjedhjes, Ivica Nikolovski, bëri të ditur se të dyja kandidaturat ishin të rregullta dhe se kandidatët kishin kaluar testimet dhe intervistat e parashikuara. Pas pranimit të raportit dhe procesit të votimit, kryetare u zgjodh Dimovska.

Një vit më parë, Dimovska ishte zgjedhur ushtruese e detyrës së kryetares së Gjykatës Themelore Penale të Shkupit. Para kësaj, ajo ka ushtruar detyrën e gjyqtares në Departamentin për Krim të Organizuar dhe Korrupsion në po këtë gjykatë.

The post Daniela Dimovska merr drejtimin e Gjykatës Penale të Shkupit appeared first on Albeu.com.