Edhe ata që nuk kanë probleme me gjumin, ndonjëherë mund të ndjehen të shqetësuar ose të stresuar, dhe kjo ndodh kur mendimet tona na sulmojnë.

“Bright Side” sjell disa metoda që mund t’ju ndihmojnë për të fjetur edhe kur në kokë keni shumë gjëra.

Përqendrohuni tek e tashmja.

Mendimet që nuk na lënë të flemë shpesh lidhen me të kaluarën ose të ardhmen. Ne shqetësohemi për atë që mund të ndodhë, ose pendohemi për gjërat që kemi bërë ose nuk kemi bërë në të kaluarën.

Nëse kjo është ajo që ju ndodh, përpiquni të përqendroheni në atë që po ndodh këtu, tani. Ndërsa nuk mund ta ndryshojmë të kaluarën, as nuk mund ta parashikojmë të ardhmen, momenti i tanishëm është diçka që ne mund ta kontrollojmë dhe ky ndryshim i fokusit mund të na japë relaksimin që i duhet trurit.

Hiqni pajisjet tuaja elektronike.

Përdorimi i telefonave, laptopëve dhe tabletëve para se të flini mund të rrisë nivelin e ankthit dhe stresit, veçanërisht nëse lexoni ose shikoni lajme ose gjëra të tjera që ju bëjnë të shqetësoheni. Përveç kësaj, drita nga këto pajisje elektronike ndikon keq në prodhimin e melatoninës në trupin tuaj, duke e bërë edhe më të vështirë procesin e fjetjes.

Shpërqendroje veten.

Tani që keni hequr pajisjet elektronike, mund të mendoni për disa alternativa më të shëndetshme. Mund të provoni një hobi qetësues ose një aktivitet relaksues që ju përshtatet më shumë, si leximi, përdorimi i një libri për t’u ngjyrosur, dëgjimi i muzikës, shëtitja ose gatimi. Kur nuk mund të flini për shkak të mendimeve, një aktivitet relaksues do t’ju ndihmojë të zhvendosni vëmendjen nga këto mendime.

Programoni një kohë të veçantë për gjërat që ju shqetësojnë.

Ashtu si caktoni një kohë për të shkuar në pazar, për t’u takuar me miqtë tuaj, ose për të bërë punët e shtëpisë, ju mund të provoni të planifikoni 15 deri në 30 minuta në ditë për shqetësimet tuaja.

Gjatë kësaj “kohe shqetësuese”, shkruani mendimet tuaja stresuese në letër dhe mendoni për disa hapa praktikë që mund të ndërmerrni për të trajtuar çështjen që ju shqetësojnë. Jini këmbëngulës dhe përpiquni ta bëni këtë teknikë pjesë të rutinës tuaj për të arritur rezultate më të mira.

Merrni frymë me aromën e vajit esencial të livandos.

Vaji esencial i livandos shpesh përdoret në aroma-terapinë për lehtësimin e stresit, relaksimin dhe për gjumë më të mirë. Ju mund të spërkatni disa pika në një peshqir ose leckë, ose të shtoni pak vaj në banjën tuaj. Vajrat thelbësore mund të shkaktojnë reaksione alergjike, prandaj bëni kujdes kur i përdorni.

Provoni një teknikë relaksimi për muskujt.

Ju mund ta përdorni këtë teknikë relaksimi pikërisht në shtratin tuaj. Një nga një, relaksoni muskujt duke lëvizur nga gishtërinjtë te koka. Ky ushtrim do t’ju ndihmojë të relaksoni muskujt e tendosur dhe do t’ju detyrojë të përqendroheni në këto pjesë të trupit, gjë që do të largojë vëmendjen nga çdo mendim tjetër.

Mos e detyroni veten të flini.

Në vend që të përpiqeni dhe të mos flini dot, ngrihuni nga shtrati dhe bëni diçka. Pini pak çaj, lexoni një libër, ose shkruani në ditarin tuaj dhe kthehuni në shtrat kur të ndiheni të përgjumur. Qëndrimi në shtrat dhe detyrimi i vetes për të fjetur mund ta bëjë trurin të lidhë shtratin me pagjumësi dhe shqetësime, duke e kthyer dhomën tuaj të gjumit në një vend ku është e vështirë të flesh.

Ndizni televizorin.

Ne e dimë që kemi rekomanduar tashmë të heqim qafe të gjitha pajisjet tuaja para gjumit, por nëse asgjë nuk ju ndihmon, shfaqja juaj e preferuar televizive mund të funksionojë për shpërqendrimin e trurit. Drita që lëshon televizori është më larg nga sytë tuaj sesa ajo që vjen nga telefoni, kështu që është më pak e dëmshme.

Provoni ushtrime të frymëmarrjes.

Mendimet shpesh janë të lidhura me stresin dhe stresi na bën që zemrat të rrahin më shpejt, duke rritur ritmin e frymëmarrjes. Frymëmarrja e ngadaltë dhe e thellë mund t’ju ​​ndihmojë të qetësoheni. Ju gjithashtu mund të provoni ushtrime dhe teknika të tjera të frymëmarrjes që mund t’i praktikoni në çdo kohë për të parandaluar stresin dhe ankthin.

Ka njerëz që flenë si qengji natën e ka të tjerë truri i të cilëve kthehet në një fushëbetejë mendimesh.

Mendimet gjatë natës arrijnë ta mbajnë njeriun zgjuar e plot ankth.

Ato marrin flakë natën sepse truri përpunon gjithçka që ka ndodhur gjatë ditës.

Në përditshmërinë tonë, e kemi mjaft të vështirë të marrim kohën e duhur për të përpunuar lajmet, informacionet dhe ndodhitë.

Këto të fundit më pas akumulohen dhe ulërasin në kokën tonë duke na lënë zgjuar për orë të tëra.

Fajin e Ka Teknologjia

Pajisjet elektronike luajnë një rol kyç në problemet e njeriut me gjumin. Përdorimi i teknologjisë e lë trurin alert, të zgjuar e në punë.

Ky aktivitet i lartë i trurit në orët e vona mund të provokojë ankthin, i cili të mban të mbërthyer nga frika në shtrat.

Si Të Fikësh Mendimet e Të Flesh Siç Duhet

Njerëzit që mendojnë shumë gjatë natës duhet të dinë se nuk ndodhen në një situatë të pashpresë.

Mendimet mund të fiken shumë lehtë, nëse njeriu mëson të qetësojë veten të paktën një orë përpara gjumit.

Një orë përpara gjumit, njeriu duhet të marrë kohë për veten, të bëjë gjëra që e qetësojnë dhe i pëlqejnë.

Këtu mund të përfshihet: një dush i ngrohtë, një libër i bukur, një çaj bimor, meditimi por edhe fikja e celularit.

Nëse këtë e ktheni në një ritual, do të vëreni se cilësia e gjumit do të përmirësohet ndjeshëm.

Një mënyrë tjetër e mirë për të fikur shqetësimet e ditës është që t’i diskutoni ato me dikë tjetër.

Mund të jetë partneri juaj, një mik, ose një anëtar i familjes.

Biseda të tilla ku njeriu mund të flasë me zë të lartë e nga zemra për shqetësimet e ditës kanë efekt terapeutik dhe shqetësues.

Mbajtja e një ditari është gjithashtu një mënyrë e mirë për të hequr këtë barrë të rëndë nga vetja.

Shkruajini mendimet tuaja përpara se të flini, mbylleni ditarin dhe thuajini ‘lamtumirë’ ndjenjave negative.

Ditarin mbajeni në sirtar sepse “larg syve, larg trurit.”

Këshilla e fundit por jo për nga rëndësia është që të mos përpiqeni t’i bllokoni mendimet.

Sa më shumë t’i nënshtroni ato, aq më shumë mendimet do të kërkojnë të dalin në sipërfaqe.

Sekreti i lumturisë por jo vetëm është që të pranoni se jeta ka aspekte të bukura e të këqija.

Të gjitha së bashku janë pjesë e jetës.