Në fjalën e tij, kreu i shtetit vlerësoi organizatorët për kthimin e panairit në një traditë të rëndësishme kulturore dhe theksoi rolin e Ulqinit si një qytet ku, sipas tij, shqipja mbetet “gjuha e familjes, e kujtesës dhe e krijimtarisë”.

Begaj u ndal te rëndësia e librit për formimin e shoqërisë, duke theksuar se ai nuk shërben vetëm për të dhënë informacion, por ndihmon në zhvillimin e mendimit kritik, dialogut dhe aftësisë për të kuptuar këndvështrime të ndryshme.

Gjithashtu, presidenti vuri theksin edhe te roli i librit në ruajtjen e gjuhës shqipe, traditës dhe identitetit kombëtar, duke nënvizuar se gjuha mbetet e gjallë vetëm kur lexohet, shkruhet dhe u transmetohet brezave të rinj.

Ai bëri thirrje që libri të trajtohet si një prioritet kombëtar, jo vetëm gjatë aktiviteteve promovuese, por edhe përmes investimeve në biblioteka, mbështetjes për autorët, botuesit e përkthyesit, si dhe afrimit të leximit me fëmijët.

Gjatë vizitës në Ulqin, Presidenti Begaj, u prit edhe nga kryetari i Komunës, Genci Nimanbegu, me të cilin diskutoi mbi projektet zhvillimore të komunës dhe forcimin e përfaqësimit të faktorit shqiptar në Mal të Zi.

Më pas, ai zhvilloi një takim edhe me përfaqësues të forcave politike shqiptare në Ulqin, ku shprehu mbështetjen e shtetit shqiptar për të drejtat e shqiptarëve në Mal të Zi dhe vlerësoi bashkëpunimin mes komunave të Ulqinit e Tuzit si një urë lidhëse mes dy vendeve.

The post Presidenti Begaj nga Ulqini: Gjuha shqipe ruhet kur lexohet, shkruhet dhe u përcillet fëmijëve appeared first on Albeu.com.

Në tekstin e miratuar, institucioneve të Maqedonisë së Veriut u kërkohet të veprojnë pa vonesë për garantimin e të drejtave gjuhësore, ndërsa njëkohësisht theksohet se reagimi i studentëve nuk duhet të interpretohet në mënyrë të gabuar.

Parlamenti Europian u bën thirrje autoriteteve të RMV-së që kjo çështje të marrë zgjidhje sa më të shpejtë, duke nënvizuar se protestat e studentëve nuk duhet të paraqiten si të motivuara politikisht apo si faktor destabilizues.

“I bën thirrje autoriteteve të Maqedonisë së Veriut që të zgjidhin sa më shpejt çështjen e përdorimit të gjuhës shqipe në provimet shtetërore, për të siguruar zbatimin praktik të Marrëveshjes Kornizë të Ohrit si në ligj ashtu edhe në frymë, dhe të mos i paraqesin në mënyrë të pasaktë protestat e studentëve si të motivuara politikisht apo si një faktor destabilizues”, thuhet në amendament.

Miratimi i këtij amendamenti nga Parlamenti Europian për përdorimin e gjuhës shqipe në provimet shtetërore të jurisprudencës në Maqedoninë e Veriut është vlerësuar si një zhvillim i rëndësishëm dhe si rezultat i presionit qytetar, veçanërisht i protestave të studentëve.

Bexheti kritikon qeverinë

Profesori Nexhat Bexheti, në një prononcim për “Bota sot”, e ka cilësuar pozitivisht vendimin e Parlamentit Europian për miratimin e amendamentit që lidhet me përdorimin e gjuhës shqipe në provimet shtetërore të jurispondencës në Maqedoninë e Veriut.

Ai ka thënë se bëhet fjalë për një zhvillim të rëndësishëm, i ardhur si pasojë e presionit qytetar, sidomos nga studentët që kanë protestuar për këtë çështje.

“Miratimi i amandamentit për përdorimin e gjuhës shqipe në provimet shtetërore të jurispondencës në Maqedoninë e Veriut, nga Parlamentu Europian është lajm për t’u përshëndetur, njëkohësisht edhe lajm inkurajues për kërkesën e studentëve të cilën e kërkuan edhe me protesta paqësore, që u tregua e arsyeshme kërkesa e studentëve.

Qeveria e RMV-së nuk e kuptoi seriozishtë kërkesën e studentëve duke u mbështetur në përvojat e kaluara kur qeveria i merte si shkel e shko kërkesat tjera që u parashtruan paraprakishtë, dhe asnjëra nuk u realizua, studentët me sa duket u frymëzuan ashtu që kjo kërkesë të mos bie në ujë si tjerat kërkesa të shqiptarëve. Studentët me siguri u pregaditën me seriozitetin e lartë pasi që edhe kërkesa është serioze dhe përmbajtsore. Premieri Mickoski aludoi duke menduar se partneri shqiptar i koalicionit do të ketë aftësi që t’a minimizojë kërkesën me premtime se gjoʻja për disa muaj do të zgjidhet problemi i sedimentuar për disa vite me radhë”, ka thënë ai.

Sipas Bexhetit, qeveria ka gabuar edhe në mënyrën se si i ka trajtuar protestat dhe sinjalet ndërkombëtare, pasi ato janë interpretuar si faktor destabilizues.

“Protestat u mbajtën dy herë, por nuk u ndëgjua nga qeveria, dhe ajo u mundua që t’a kualifikojë si shkaktare për destabilizimin e vendit, dhe se do të ndikojë negativisht për antarsimin e RMV-së në Bashkësinë Europiane. Qeveria paraprakisht ndodheshte në konflkt diplomatik me Bulgarinë,edhe vala e disa protestave e cenon stabilitetin e shtetit nga natyra ekonomike tashe edhe nga natyra etnike. Qeveria e RMV-së akoma nuk e kupton rëndësinë e raportit negativ nga Parlamenti Europian,ajo shtiret sikur është ndonjë superfuqi në rajon,nuk bindet me raporte dhe këshillime qëllim mira,politika antieuropiane e qeverisë së RMV-së, mundet të vijë në pikën kritike që Bashkimi Europian mundet të miratojë sanksione të lehta fillestare, që do të ndihet në uljen e standardit jetësor tek qytetarët aktualisht standard jetësor i tangon shtresat e qytetarëve”, ka vlerësuar ai.

Më tej, ai ka nënvizuar se protestat studentore nuk janë destabilizuese dhe se qeveria duhet të heqë dorë nga ky etiketim.

“Protestat e studentëve nuk janë destabilizuese, dhe qeveria duhet ta braktisë sintagmën “destabilizuese” për protestat. Parlamenti Evropian (PE) përafërsisht e vendos në një paralele qeverinë e RMV-së me atë të Vuçiqit, duke vlerësuar se ato janë në linja të ngjashme me politika antieuropiane, pasi nuk po i zbatojnë rregullat e anëtarësimit në BE”, ka shtuar ai.

Në përfundim, Bexheti ka deklaruar se kërkesat e studentëve janë legjitime dhe se ato tashmë gëzojnë edhe mbështetje nga institucionet evropiane.

“Kërkesat e studentëve janë në avantazh sepse edhe Parlamenti Europian i kualifikoi të arsyeshme, tani qeveria sa më shpejtë duhet t’a zgjidhë me ligj dhënjen e provimit shtetëror të jurispondencës në gjuhën shqipe. Na gëzon fakti se studentët ishin këmbëngulës dhe vigjilentë, u ankuan deri te autoritetet europiane, dhe e drejtuan një padrejtësi të kahmotçme”, ka përfunduar Bexheti për “Bota sot”.

“Do të ndjekim çdo hap deri në zbatimin e të drejtës për provimin e jurisprudencës në shqip”

Njëri nga organizatorët e protestave të studentëve shqiptarë, Suhejb Memedi nga Lëvizja Studentore dhe avokat i studentëve në Universitetin “Nëna Terezë”, ka deklaruar për “Bota sot” se monitorimi i çështjes së provimit të jurisprudencës do të vijojë deri në realizimin e plotë të kërkesave të tyre.

Ai ka theksuar se bëhet fjalë për një të drejtë të garantuar, e cila ende nuk po gjen zbatim në praktikë.

“Ne jemi duke e vëzhguar çdo hap sa i përket çështjes së provimit të jurisprudencës. Kjo është një e drejtë që na garantohet, por që ende nuk po zbatohet. Parlamenti Evropian e shpjegoi qartë dje se të gjitha provimet shtetërore duhet të mbahen edhe në gjuhën shqipe, në mënyrë që të mos shkelet Marrëveshja e Ohrit. Kjo nënkupton edhe një herë se Ligji për Përdorimin e Gjuhëve është i qartë”, ka thënë ai.

Memedi ka shtuar gjithashtu se mbështetja e ardhur nga institucionet evropiane përbën një moment të rëndësishëm në këtë proces, teksa ka kritikuar edhe qasjen e pushtetit.

“Parlamenti Evropian na mbështeti dhe hodhi poshtë deklaratat e partive në pushtet. Nuk duhet të bëhet asnjë harmonizim i ligjit, nuk duhet të dërgohet në Komisionin e Venecias dhe as të ketë zgjidhje gjysmake. Kërkojmë vetëm zbatimin e ligjit dhe mundësinë që provimi të jepet në gjuhën shqipe”, ka cekur ai.

Në fund, ai ka nënvizuar se forca e kësaj lëvizjeje qëndron te uniteti dhe këmbëngulja e studentëve.

“Fitoren do ta shohim vetëm atëherë kur të drejtat që na takojnë të zbatohen si në teori, ashtu edhe në praktikë. Fitorja jonë më e madhe është se u bëmë bashkë, qëndruam stoikë dhe do të shkojmë deri në fund. Një shpresë për të mos u dorëzuar u hap dje nga Parlamenti Evropian”, ka përfunduar Memedi për “Bota sot”.

The post PE kërkon zgjidhje të shpejtë për provimet e jurisprudencës në shqip në RMV, studentët paralajmërojnë se do ta ndjekin çështjen deri në fund appeared first on Albeu.com.

Nisma vjen vetëm dy ditë pas protestës së mbajtur në Shkup, ku një grup studentësh të nisur nga Tirana nuk u lejuan të kalonin kufirin dhe u devijuan drejt Kumanovës, duke rritur tensionin dhe reagimet në radhët e të rinjve.

Sipas njoftimit, tubimi do të nisë në qendër të kryeqytetit dhe më pas do të vijojë me një marshim drejt Ambasadës së Maqedonisë së Veriut në Tiranë.

Organizatorët kanë zgjedhur si slogan “Shqiptaria është me Shkupin”, duke theksuar mesazhin e unitetit dhe mbështetjes për shqiptarët përtej kufijve.

Ata u bëjnë thirrje të rinjve që t’i bashkohen protestës për të dhënë një sinjal të qartë solidariteti dhe për të treguar se, sipas tyre, “jemi një”.

The post “Shqiptaria është me Shkupin”/ Studentët protestë në sheshin Skënderbej për gjuhën shqipe appeared first on Albeu.com.

Siç bëhet me dije, projekti është financuar nga Fondi Kombëtar i Zvicrës për Shkencën (SNSF) dhe bart titullin “Gjuha Shqipe në Antikitet”.

Projekti ka nisur në tetor të vitit 2022 dhe pritet të përmbyllet në shtator të këtij viti.

Qëllimi i projektit është të përcaktojë se si kanë folur paraardhësit e shqiptarëve në antikitet. Ose, siç nënvizohet në përshkrim, projekti synon të përcaktojë se si dukej pararendësja e gjuhës shqipe në antikitet dhe ku mund të jetë folur kjo pararendëse.

“Ky projekt është frymëzuar nga puna e vazhdueshme e kolegëve të ndryshëm mbi përshkrimin gramatikor të teksteve të shqipes së vjetër dhe puna aktuale mbi etimologjinë e shqipes”, shkruan gazetari Enver Robelli.

Për këtë qëllim Fondi Kombëtar i Zvicrës për Shkencën ka ndarë për një periudhë 4-vjeçare një shumë prej 916’708 franga (1 milion euro).

Më tutje në njoftim nënvizohet: “Gjuha shqipe përbën një degë të veçantë të familjes së gjuhëve indo-evropiane. Përveç greqishtes dhe gjuhëve romane, shqipja është pasardhësja e vetme e mbijetuar e gjuhëve të folura në Ballkan në antikitet. Meqenëse teksti më i hershëm koherent në shqip daton nga viti 1555, qasja jonë kryesore në historinë e gjuhës bëhet nëpërmjet rindërtimit gjuhësor dhe studimit të huazimeve të hershme. Këto huazime kanë hyrë në gjuhë si rezultat i kontaktit midis folësve të shqipes dhe greqishtes, latinishtes dhe rumanishtes (tri gjuhët në të cilat ne përqendrohemi në këtë projekt), si dhe me gjuhët sllave të jugut, turqishten dhe italishten”.

Sa i përket metodave, shkencëtarët e përfshirë në këtë projekt tregojnë se “metodat shkencore të përdorura do të jenë rindërtimi gjuhësor krahasues dhe gjuhësia e kontaktit”. Rindërtimi gjuhësor krahasues përbëhet nga dy hapa. I pari është rindërtimi i brendshëm gjuhësor, i cili rezulton nga krahasimi i dialekteve të gegnishtes dhe toskërishtes së vjetër, duke dhënë një përafrim të parë të proto-shqipes. Hapi i dytë: krahasimi i pastajmë i shqipes së vjetër dhe proto-shqipes me gjuhët e tjera indo-evropiane (dhe protogjuhët e tyre përkatëse), gjë që, sipas shkencëtarëve, mundëson të korrigjohet dhe përmirësohet rezultati i hapit të parë.

Lidhur me kontaktin gjuhësor, projekti fokusohet në korrespondencat leksikore dhe gramatikore midis shqipes dhe latinishtes, shqipes dhe rumanishtes, si dhe shqipes dhe fazave të ndryshme të greqishtes.

Ky kërkim është i ndarë në tre nën-projekte plotësuese që realizohen nga kërkuesi post-doktorant dr. Sergio Neri dhe nga dy doktorantët Gerard Spaans dhe Alexander Herren.

“Rezultati i projektit do të jetë një monografi akademike (ose një seri artikujsh të gjatë) mbi rindërtimin e proto-shqipes, dy teza doktorature, disa artikuj bashkëpunues ndërkombëtarë të rishikuar nga kolegët dhe akte të konferencave. Përveç kësaj, ne do të krijojmë një bazë të dhënash etimologjike të korrespondencave leksikore latine/shqipe, shqipe/rumune dhe shqipe/greke, e cila do të plotësojë bazën e të dhënave etimologjike të shqipes së vjetër në München”, njoftojnë shkëncëtarët e përfshirë në këtë projekt.

The post Si flisnin shqiptarët në antikitet? Zvicra ndan 1 milion euro për të zbuluar rrënjët e gjuhës shqipe appeared first on Albeu.com.

Sipas rezultateve të fundit të Mikrocensusit 2024, rreth 77% e popullsisë në Gjermani flasin vetëm gjermanisht në shtëpi, ndërsa 17% përdorin gjermanishten së bashku me një gjuhë tjetër. Ndërkohë, 6% e banorëve komunikojnë në familje vetëm në gjuhë jo-gjermane.

Këto shifra konfirmojnë një trend të qartë: Gjermania po bëhet gjithnjë e më shumë një shoqëri shumëgjuhëshe.

Kryesojnë turqishtja, rusishtja dhe arabishtja

Nga rreth 15 milionë persona që përdorin në familje një gjuhë tjetër përveç gjermanishtes (ose krahas saj), gjuhët më të përhapura rezultojnë:

Turqishtja – rreth 2.6% e popullsisë totale
Rusishtja – rreth 2.3%
Arabishtja – rreth 1.7%
Anglishtja – rreth 1.3%
Polonishtja – rreth 1.2%
Italishtja – rreth 0.6%

Këto përqindje pasqyrojnë valët historike dhe të fundit të migracionit drejt Gjermanisë, nga Turqia, vendet e ish-BRSS, Lindja e Mesme dhe Europa Lindore.

Shqipja mes gjuhëve më të përdorura

Siç mëson Albeu.com, pas të dhënave të përpunuara nga mikrocensusi 2024, rreth 0.7% e popullsisë në Gjermani përdor shqipen në familje. Kjo përkthehet në afro 600 mijë persona që komunikojnë në shqip në jetën e përditshme.

Komuniteti shqiptar në Gjermani përfshin qytetarë me origjinë nga Kosova, Maqedonia e Veriut, Shqipëria dhe trojet e tjera shqiptare në rajon, duke e bërë shqipen një nga gjuhët më të pranishme të Ballkanit në territorin gjerman.

Migracioni dhe shumëgjuhësia

Destatis thekson se shumëgjuhësia është më e theksuar tek personat me sfond migracioni – pra ata që vetë ose prindërit e tyre kanë emigruar në Gjermani pas vitit 1950.

Brenda këtij grupi vetëm 22% flasin ekskluzivisht gjermanisht në shtëpi, rreth 55% përdorin gjermanishten së bashku me një gjuhë tjetër dhe afërsisht 23% komunikojnë vetëm në një gjuhë jo-gjermane.

Këto shifra tregojnë se gjuha mbetet një element kyç i identitetit kulturor për komunitetet migrante, por edhe se integrimi gjuhësor vazhdon të jetë një proces dinamik.

Në fund të vitit 2024, Gjermania numëronte rreth 83.6 milionë banorë, me një përqindje të konsiderueshme të popullsisë me origjinë të huaj.

Edhe pse gjermanishtja mbetet gjuha dominuese dhe lidhëse e shoqërisë, të dhënat zyrtare tregojnë qartë se realiteti social i vendit është shumëgjuhësh. Nga turqishtja te arabishtja, nga rusishtja te shqipja – Gjermania e sotme flet më shumë gjuhë se kurrë më parë. /albeu.com/

The post Gjermania gjithnjë e më shumë shumëgjuhëshe, edhe shqipja mes gjuhëve më të përdorura në familje appeared first on Albeu.com.

Ai tha se për çështjen e gjuhës shqipe ata janë në të njëjtën anë me të gjithë shqiptarët. Mexhiti theksoi se askush nuk duhet ta ketë as dilemën më të vogël lidhur me këtë. Ai tha si qeveri po punojnë në gjetjen e zgjidhjeve afatgjata për problemet e krijuara e të trashëguara dhe për këtë po harmonizojnë veprimet, qëndrimet dhe orientimet me të gjithë aktorët dhe faktorët relevantë shoqërorë.

“Ju bëj thirrje të gjithëve për qetësi dhe gjakftohtësi. Qeveria ka punuar dhe po punon për të tejkaluar sfidat dhe për ulje të tensioneve. Për çështjen e gjuhës shqipe ne jemi në të njëjtën anë me të gjithë shqiptarët. Askush të mos ketë as dilemën më të vogël lidhur me këtë! Të drejtat e fituara nuk mund të suprimohen dhe as të abrogohen. Për këtë jemi garantues ne, përfaqësuesit e popullit në institucione.

Si qeveri po punojmë në gjetjen e zgjidhjeve afatgjata për problemet e krijuara e të trashëguara dhe për këtë po harmonizojmë veprimet, qëndrimet dhe orientimet me të gjithë aktorët dhe faktorët relevantë shoqërorë. Qeveria është në veprim dhe koordinim të përhershëm. Bashkë me Parlamentin dhe aktorët tjerë shoqërorë jemi duke ndjekur me vëmendje çdo veprim, çdo qëndrim publik, çdo aksion e reaksion. Si institucione të përgjegjshme nuk do të lejojmë abrogimin e Ligjit për përdorimin e gjuhëve dhe as rrënimin e frymës së bashkëjetesës që e garanton Marrëveshja e Ohrit.

I përkrahim të gjitha iniciativat publike, individuale ose kolektive të cilat për qëllim kryesor kanë ruajtjen por edhe avancimin e përdorimit zyrtar të gjuhës shqipe. Betejat e përditshme politike dhe interesat e partive politike janë më pak të rëndësishme se gjuha shqipe. Ju bëj thirrje edhe njëherë të gjithëve që të ruajmë qetësinë dhe gjakftohtësinë”, ka shkruar ai.

The post Debati i gjuhës shqipe në Maqedoninë e Veriut, Mexhiti: Po punojmë në gjetjen e zgjidhjeve afatgjata për problemet e trashëguara appeared first on Albeu.com.

Kjo deklaratë e bërë të hënën nga kryetarja e Kuvendit të Shqipërisë, Elisa Spiropali gjatë vizitës së saj në shkup, ka trazuar jo pak politikën maqedonase.

Kryeministri Hristijan Mickovski thotë se nuk ka asgjë kundër Shqipes dhe se i respekton identitetet e gjuhëve të tjera që fliten në Maqedoninë e Veriut.

Hristijan Mickovski: Ne nuk jemi si vendet anëtare individuale që duan të kërcënojnë identitetin e kombeve të tjera, ne nuk kemi një qëllim të tillë, përkundrazi, ne e respektojmë atë identitet dhe veçantinë e Gjuhës Shqipe dhe Gjuhën Maqedonase dhe të gjitha gjuhët e tjera që përdorin qytetarët në Maqedoni.”

Por nga Partia e Majta, deklaratën e Spiropalit e kanë cilësuar si ndërhyrje në punët e brendshme të Maqedonisë së Veriut.

Amar Mecinoviç – “Levica”: Zyrtarët e huaj, në fakt, nuk duhet të kenë kërkesë për politikën tonë të brendshme, kështu që sinqerisht nuk do të komentojmë sepse është jashtë të gjitha praktikave diplomatike.

Ndërkohë që partitë shqiptare në Maqedoninë e Veriut mbështesin deklaratën e Spiropalit si të duhurën.

Ilire Dauti – Fronti Evropian: Padyshim që Gjuha Shqipe nuk është gjuhë jetime dhe ka pas vetes një popull të tërë unë e kam shprehur edhe më heret është nder edhe për vetë Maqedoninë e Veriut që ta ketë gjuhë zyrtare një nga tre gjuhët indo-evropiane më të vjetra në botë.

Në javën e parë të Tetorit, Gjykata Kushtetuese në Maqedoninë e Veriut do të debatojë rreth mundësisë për abrogimin e ligjit të Gjuhës Shqipe në tërësi, ose vetëm disa pjesë të tij.

The post Deklaratat e Spiropalit për Gjuhën Shqipe shkakton debate në Maqedoninë e Veriut appeared first on Albeu.com.

Kryetarja e Kuvendit, Elisa Spiropali, tha gjatë një konference të përbashkët për shtyp me homologun e saj maqedonas, Afrim Gashi, se cenimi i gjuhës shqipe cenon identitetin e shqiptarëve, teksa shtoi se kjo çështje duhet të zgjidhet sipas marrëveshjes së Ohrit.

“Ne presim me besim dhe shpresojmë që të zbatohet plotësisht ligji për gjuhët. Gjuha shqipe është e shenjtë dhe ka të bëjë me thelbin e identitetit tonë.

Cenimi i saj në çdo formë dhemb shumë dhe cenon identitetin tonë që ne afrojmë në këtë botë të madhe, si vlerën tonë njohim dhe mirëkuptojmë shqetësimet për ndryshimet e mundshme varësisht vendimit të pritshëm të Gjykatës Kushtetuese, por presim që kjo të ketë zgjidhje sipas klimës që dikton marrëveshja kuadër e Ohrit”, shprehet Spiropali.

The post Shqipja do shfuqizohet si gjuhë zyrtare në RMV? Elisa Spiropali: Cenohet identiteti ynë, të zbatohet marrëveshja e Ohrit appeared first on Albeu.com.

Gjatë shtatë ditëve të analizuara (12-18 shtator) të komunikatave të këtyre tre institucioneve, vërehet që Presidenca nuk e përfill fare gjuhën shqipe, Qeveria dërgon komunikata edhe në shqip edhe pse me vonesë dhe jo të gjitha, ndërsa Kuvendi gjithmonë e zbaton gjuhën shqipe, përveç përjashtimeve tepër të rralla.

Gjatë shtatë ditëve të analizuara, presidenca nuk e ka dërguar as edhe një komunikatë në gjuhën shqipe, ndërsa praktikë të ngjashme ka pasur edhe gjatë kryesimit të këtij institucioni nga ish-presidenti Stevo Pendarovski.

Megjithatë sërish nuk ka qenë në këtë nivel. Edhe pse me raste shumë të rralla, dërgohej tek-tuk ndonjë komunikatë në gjuhën shqipe.

Kur bëhet fjalë për ueb-faqen, situata nuk është më e mirë, por përsëri është funksionale edhe në shqip. Megjithatë, nuk është përditësimi i njëjtë si në maqedonisht.

Për shembull, gjatë kontrollit të ueb-faqes nga redaksia jonë më 19 shtator, në versionin maqedonisht të ueb-faqes komunikata e fundit e Presidencës është e datës 18 shtator, ndërsa në versionin shqip është e datës 10 shtator, ndërkohë që mes datave 10-18 shtator ka pasur çdo ditë informacione në gjuhën maqedonase. Pra, për 8 ditë të plota, ueb-faqja nuk është përditësuar me asnjë informacion shqip.

Ndërkohë, në versionin shqip, pjesa e “Kategorive” është në gjuhën maqedonase, siç mund të vërehet në fotografitë e mëposhtme (djathtas):

Kuvendi i Maqedonisë së Veriut, në shtatë ditët e analizuara, pothuajse të gjitha komunikatat i ka dërguar në të dyja gjuhët, përveç një komunikate që është dërguar vetëm në maqedonisht.

Edhe sa i përket ueb-faqes së Kuvendit, njoftimet ditore dhe agjenda janë vazhdimisht të përditësuara me informacione të reja edhe në gjuhën shqipe. Ndërsa kur bëhet fjalë për të dhëna më të veçanta, nuk gjenden në versionin në shqip. Për shembull rubrika “Të dhëna të hapura” dhe “Regjistër për organizata”, nuk ndodhet në versionin shqip të ueb-faqes.

The post Ç’po ndodh në Maqedoninë e Veriut? Presidenca “nuk e njeh” gjuhën shqipe, Qeveria pjesërisht, ndërsa Kuvendi po appeared first on Albeu.com.

Dhe nuk janë pak, por të paktën 80 nxënës do të frekuentojnë ambientet e shkollës shqipe “Gjuha Jonë”, në Filadelfia të SHBA-ve, teksa regjistrimet përfunduan të dielën e 15 shtatorit, në ambientet e reja të shoqatës “Bijtë e Shqipes”, e cila ushtron aktivitetin e saj patriotik prej më shumë se 20 vitesh, për të promovuar vlerat e  kombit shqiptar.

Emocionet e vogëlushëve përcillnin edhe shpresën se gjuha e rrënjëve të tyre, do të jetojë me ta, pavarësisht se disa prej tyre kanë lindur në SHBA.

“Librat janë përgatitur nga Diaspora, të përshtatur për fëmijët që jetojnë këtu dhe 6 mësuese vullnetare tashmë janë gati të mirëpresin nxënësit, të cilët do të ndahen në 5 klasa. Mësimi në këto ambiente do të zhvillohet çdo të dielë, nga ora 10 deri në 13.00 dhe online nga ora 16.00 deri në 18.00, për fëmijët që nuk kanë mundësi të frekuentojnë ambientet tona. Shpresojmë ta përmbushim me dinjitet misionin fisnik të mësuesit, në mënyrë që fëmijët tanë të njihen gjerësisht me traditat, kulturën, zakonet dhe gjuhën tonë të bukur” – thotë Rudina Bani, mësuese dhe nënkryetare e shoqatës “Bijtë e Shqipes”.

Ndërkaq, kryetari I saj, Dritan Marku, falenderoi prindërit, të cilët kanë vendosur të mos i shkëpusin lidhjet me gjuhën amtare, duke ua përcjellë fëmijëve, si një vlerë të shtuar për komunitetin shqiptar që banon atje.

“U uroj nxënësve një vit të mbarë shkollor dhe shumë suksese në rrugën e tyre drejt dijes për vlerat e pamata të kombit tonë”- shtoi ai.

Ceremonia e nisjes së këtij viti të ri shkollor u zhvillua në ambientet e reja të shoqatës “Bijtë e Shqipes”, të ndërtuara me kontributin e biznesmenëve shqiptarë të Filadelfias, ndërsa së shpejti do të inaugurohet ndërtesa e plotë, përmes një aktiviteti me shumë të ftuar, muzikë, këngë e valle shqiptare.

The post Shqip në Filadelfia/ “Gjuha Jonë” mirëpret 80 nxënës në bankat e shkollës (FOTO) appeared first on Albeu.com.