Wayne Rooney, ish-kapiteni i Anglisë dhe një nga figurat më të njohura të Manchester United, ka dalë hapur kundër vendimit të FIFA-s për të shtyrë pezullimin e sulmuesit të Shteteve të Bashkuara, Folarin Balogun, duke thënë se ky veprim dëmton ndershmërinë e garës.

Balogun ishte parashikuar të mos luante në ndeshjen e raundit të 16-të të Kupës së Botës kundër Belgjikës, pasi kishte marrë karton të kuq gjatë fazës së grupeve.

Por FIFA mori vendimin që dënimi i tij të shtyhej për një vit, çka bëri të mundur përfshirjen e tij në këtë takim.

Raportimet thonë se ky zhvillim erdhi pasi presidenti i SHBA-së, Donald Trump, iu drejtua presidentit të FIFA-s, Gianni Infantino, për të kërkuar një rishqyrtim të çështjes.

Rooney e kritikoi fort këtë vendim. “Mendoj se është një turp absolut. Para Euro 2012 mora një pezullim prej tre ndeshjesh. Më thanë se nëse shkoja në Zvicër dhe zhvilloja një seancë stërvitore me një grup fëmijësh, ndeshja ime e tretë e pezullimit do të hiqej. E pranova sepse nuk doja të mungoja tri ndeshje, por edhe atëherë mendova se ishte e gabuar”.

Sipas ish-yllit anglez, nëse FIFA e konsideronte kartonin e kuq të padrejtë, atëherë zgjidhja e vetme duhej të ishte anulimi i tij i plotë, jo shtyrja e pezullimit.

“Ose ia heq kartonin e kuq, që ndoshta është vendimi i duhur, ose ai nuk luan. Por ta shtysh pezullimin për një vit? Është një turp absolut. Infantino duhet të turpërohet”, tha legjenda angleze.

Rooney theksoi gjithashtu se ky vendim hedh dyshime mbi frymën sportive të turneut.

“Nëse do të isha kundërshtari i SHBA-së, do të isha absolutisht i tërbuar”, tha Rooney.

The post Rooney sulmon FIFA-n për çështjen Balogun: Turp absolut, Infantino duhet të ndihet i turpëruar appeared first on Albeu.com.

Pas debatit publik që shoqëroi vendimin e Komitetit të Pavarur Disiplinor për Folarin Balogun, presidenti i FIFA-s, Gianni Infantino, reagoi duke vënë theksin te rëndësia që ka pavarësia e organeve gjyqësore në futboll.

Sipas tij, strukturat disiplinore të FIFA-s funksionojnë plotësisht të pavarura dhe vendimet e tyre ndërtohen mbi rregulloret në fuqi dhe faktet e çdo rasti konkret.

Heqja e kartonit të kuq për Balogun u kundërshtua nga shumë emra të njohur të futbollit, si edhe nga Kombëtarja e Belgjikës.

“Organet gjyqësore të FIFA-s janë të pavarura. Ato zbatojnë Kodin Disiplinor dhe vendosin bazuar në rregulla dhe fakte. Pavarësia e tyre është thelbësore për integritetin e futbollit dhe duhet respektuar gjithmonë”, deklaroi ai.

Infantino u ndal edhe te kontaktet që ka pasur me liderë botërorë, duke pohuar se për çështje që lidhen me Kupën e Botës ka biseduar edhe me Presidentin e SHBA-së, Donald Trump, por sqaroi se vendimmarrja mbetet kompetencë e organeve përkatëse të FIFA-s.

“Është një proces ligjor që trajtohet nga organet e pavarura dhe vendimi merret prej tyre. Kështu funksionon sistemi i FIFA-s dhe unë do ta respektoj gjithmonë këtë parim”, shtoi Infantino.

Kreu i FIFA-s pranoi gjithashtu se jo në çdo rast bie dakord me vendimet e komisioneve disiplinore, por nënvizoi se respektimi i tyre nuk vihet në diskutim.

“Disa vendime më befasojnë, me disa pajtohem dhe me disa jo. Por gjithmonë i respektoj. Nëse na pëlqejnë apo jo, është e parëndësishme. Respekti për institucionet dhe sundimi i ligjit mbrojnë integritetin e garave tona”, përfundoi ai.

The post “Vendimet e FIFA-s duhet të respektohen”, Infantino komenton heqjen e pezullimit për Balogun appeared first on Albeu.com.

Gjatë pak më shumë se dy javëve të para të Kupës së Botës 2026 në Amerikën e Veriut, presidenti i FIFA-s, Gianni Infantino, ka qenë i pranishëm në 24 ndeshje, teksa ka lëvizur mes qyteteve të ndryshme në SHBA, Kanada dhe Meksikë.

Ky edicion i turneut zhvillohet në tre vende dhe në 16 qytete organizatore, ndërsa kalendari ka më shumë ndeshje për shkak të zgjerimit të formatit në fazën e grupeve.

Ndonëse në strategjinë e FIFA-s për qëndrueshmërinë dhe të drejtat e njeriut për Botërorin 2026 ishte theksuar se organizata synon të japë kontribut në fusha si klima, shëndeti, të drejtat e njeriut dhe përfshirja sociale, të dhënat e analizuara tregojnë një panoramë tjetër për lëvizjet e kreut të saj.

Një hetim i BBC Verify dhe BBC Sport ka gjurmuar një avion privat të lidhur me FIFA-n dhe Infantinon, i cili gjatë turneut ka kryer 27 fluturime drejt qyteteve ku presidenti është parë në stadiume.

BBC iu drejtua FIFA-s për të marrë një konfirmim lidhur me këto udhëtime, por nuk mori përgjigje. Sidoqoftë, sipas raportimit, të dhënat e fluturimeve dhe fotografitë publike të Infantinos në arena sportive përputhen me itinerarin e avionit të monitoruar.

Sipas raportimeve, për këto lëvizje është përdorur një avion privat i tipit Gulfstream G650ER, ndërsa edhe në raste të mëparshme Infantino është lidhur me avionë të Qatar Airways Executive.

Shpeshherë ai ka ndjekur deri në dy ndeshje në një ditë, në qytete të ndara nga qindra milje, ndërsa në disa raste ka kryer deri në tre fluturime brenda së njëjtës ditë.

Udhëtimi më i gjatë i regjistruar për të gjatë dy javëve të para ka qenë ai prej rreth 2,800 milje (4,507 km) nga Vancouver në Miami, i realizuar pas ndeshjes Australi – Turqi.

Më 15 qershor, ai përshkoi mbi 2,700 milje (rreth 4,000 km) nga Miami në Seattle për të ndjekur ndeshjen Belgjikë – Egjipt, përpara se të vazhdonte më tej drejt Los Anxhelosit për sfidën Iran – Zelandë e Re.

Një tjetër ditë me itinerar të ngjeshur ishte 26 qershori, kur avioni u nis nga Miami, ndaloi shkurt në Dallas, vijoi drejt Seattle dhe më pas u kthye sërish në Miami pas ndeshjes Egjipt – Iran.

Analiza e BBC-së vlerëson se ky avion ka përshkuar të paktën 31,144 milje (50,122 km) dhe ka qëndruar mbi 66 orë në ajër gjatë periudhës së marrë në shqyrtim.

Sipas përllogaritjeve, ndikimi mjedisor i këtij avioni gjatë dy javëve të para të turneut është afërsisht i barabartë me emetimet vjetore të 78 personave mesatarë.

Në Botërorin e Katarit 2022, Infantino kishte qenë i pranishëm në të gjitha 64 ndeshjet, në një turne ku distancat mes stadiumeve ishin dukshëm më të shkurtra krahasuar me kompeticionin aktual, i cili është i shpërndarë në të gjithë një kontinent.

The post Infantino në qendër të kritikave për udhëtimet ajrore: 27 fluturime private për 24 ndeshje në Botërorin 2026 appeared first on Albeu.com.

Edhe pse Kampionati Botëror 2026 u shoqërua me shumë kritika lidhur me organizimin, biletat dhe problemet me vizat për lojtarët e tifozët, pas fillimit të tij është vërejtur interesim i madh dhe një numër ndeshjesh kanë ofruar spektakël.

Pasi përfundoi raundi i dytë i ndeshjeve, kreu i FIFA-s doli me një deklaratë, ku e cilësoi Kupën e Botës 2026 si ngjarjen më të suksesshme të të gjitha kohërave.

“Është e pabesueshme. Më shumë se çdo gjë që bota ka parë ndonjëherë – jo vetëm midis ngjarjeve të futbollit, por midis të gjitha ngjarjeve në përgjithësi. Ky është ngjarja më e suksesshme në histori”, ka deklaruar fillimisht Infantino.

Ai theksoi se stadiumet janë të mbushura plot, po ashtu edhe qytetet, ndërsa atmosfera sipas tij është e jashtëzakonshme.

“Stadiumet janë të mbushura plot, qytetet janë të mbushura plot dhe atmosfera është e mrekullueshme. Ka shumë familje, fëmijë dhe gra në tribuna dhe është vërtet e mrekullueshme”.

Në fund, kreu i futbollit botëror shprehu falënderim për tifozët që po marrin pjesë në këtë kompeticion.

“Jam shumë mirënjohës për të gjithë tifozët që vijnë në stadiume dhe marrin pjesë në festivalet e FIFA-s”, përfundoi i pari i futbollit botëror.

The post Infantino e quan Kupën e Botës 2026 ngjarjen më të suksesshme në histori appeared first on Albeu.com.

Për herë të parë në historinë e këtij kompeticioni, FIFA vendosi që çdo ndeshje të ketë ndërprerje për hidratim në minutën e 22-të dhe të 67-të. Megjithatë, ky ndryshim ka sjellë ankesa nga tifozë, analistë dhe futbollistë.

Mes atyre që e kanë kundërshtuar këtë praktikë është edhe mbrojtësi i Holandës dhe Liverpoolit, Virgil van Dijk, i cili e ka shprehur qartë qëndrimin e tij, duke theksuar se këto pushime në thelb e ndajnë takimin në katër pjesë.

Edhe tifozët e Anglisë në stadiume janë parë duke vërshëllyer gjatë këtyre ndërprerjeve, pasi një pjesë e tyre besojnë me cinizëm se ato po shfrytëzohen nga transmetuesit për reklamime.

Në fakt, pushimet e hidratimit nuk janë një risi e krijuar posaçërisht për Kupën e Botës 2026. Ato janë përdorur edhe më parë për t’u dhënë lojtarëve mundësinë të rifitojnë energji gjatë ndeshjeve të luajtura në temperatura ekstreme. Sidoqoftë, tifozët skeptikë kanë vënë në dukje se në këtë turne disa sfida janë zhvilluar në kushte ideale moti për futboll, por pavarësisht kësaj, ndërprerjet janë zbatuar sërish.

“Arsyeja kryesore është nxehtësia, por gjithashtu duhet të kuptojmë se në një garë si Kupa e Botës (FIFA), që luhet gjatë 39 ditëve, me ekipe që potencialisht luajnë tetë ndeshje në ato 39 ditë, të kesh një moment për të pushuar është jashtëzakonisht e rëndësishme”, ka thënë fillimisht Infantino.

“Ajo që ka edhe më shumë rëndësi për ne është të sigurohemi që të gjitha ekipet, në çdo ndeshje, të luajnë në të njëjtat kushte. Dhe është shumë e vështirë të pranohet që një trajner mund të ketë mundësinë të ndikojë në një ndeshje duke bërë rregullime thjesht sepse është më nxehtë, ndërsa në një ndeshje tjetër, ku temperatura është pak më e ulët, i njëjti trajner nuk ka të njëjtën mundësi”.

“Ne duam të sigurojmë kushte të barabarta për të gjithë, dhe kjo është arsyeja pse këto pushime zbatohen në çdo ndeshje”.

Infantino ka mohuar gjithashtu çdo motiv financiar pas këtij vendimi.

“Nuk ka të ardhura shtesë për FIFA-n, pasi të gjitha marrëveshjet tregtare u nënshkruan shumë kohë më parë. Pra, kjo nuk është një çështje financiare për ne. Për ne, është thjesht një çështje sportive”, përfundoi presidenti i FIFA-s.

Pushimet për hidratim do të mbeten në fuqi deri në fund të kësaj Kupe Bote. Megjithatë, gjithçka lë të kuptohet se tifozët do të shpresojnë që më 19 korrik të jetë hera e fundit që do t’i shohin këto ndërprerje, përveç rasteve kur ato bëhen të domosdoshme për shkak të kushteve të lojës dhe mirëqenies së futbollistëve.

The post Infantino reagon ndaj debatit për pushimet e hidratimit në Kupën e Botës me një sqarim zyrtar appeared first on Albeu.com.

Vera, që po e komentonte ndeshjen për radion e njohur paraguaiane ABC, përdori në transmetim fyerje të rënda ndaj arbitrit nga El Salvadori, Ivan Barton, si edhe ndaj presidentit të FIFA-s, Gianni Infantino.

Shkaku i gjithë episodit ishte kartoni i kuq i ndëshkuar ndaj futbollistit të Paraguait, Miguel Almiron.

Mesfushori i Atlanta United vendosi dorën para gojës gjatë një përplasjeje verbale me një kundërshtar. Ndonëse ky veprim është parë prej vitesh si i zakonshëm te futbollistët anembanë botës, në këtë Kupë Bote ka hyrë në fuqi një rregull i ri që e ndalon rreptësisht.

FIFA ka vendosur të godasë praktikën e mbulimit të gojës, me synimin për të parandaluar që lojtarët të dërgojnë mesazhe raciste, homofobike apo fyese pa u kapur nga kamerat. Nxitja e drejtpërdrejtë për këtë ndryshim ishte skandali i mëparshëm në Ligën e Kampionëve mes Vinicius Junior dhe Gianluca Prestianni, ku u ngritën akuza të rënda për racizëm pa prova zanore.

Në momentin kur Almiron u përjashtua për shkak të këtij rregulli të ri, Jorge Vera reagoi në mënyrë të pakontrolluar.

Fillimisht ai e quajti arbitrin Barton hajdut, ndërsa më pas sulmet verbale i drejtoi ndaj drejtuesve më të lartë të futbollit. Në mikrofon ai bërtiti se FIFA e kishte vrarë futbollin dhe se Infantino mbante përgjegjësi të drejtpërdrejtë për këtë.

Më tej, pasi deklaroi se të gjithë duhet të turpëroheshin, ai iu drejtua edhe presidentit të Konfederatës së Futbollit të Amerikës së Jugut, Alejandro Dominguez. Vera i kërkoi të ndalonte së pozuari në foto me Infantinon, të tregonte guxim dhe, në fund, i quajti ata hajdutë të mallkuar.

Megjithëse Paraguai fitoi 1-0 ndaj Turqisë dhe mbeti me shanse reale për t’u kualifikuar në fazën e 1/16-tës, për Verën turneu ka përfunduar këtu.

Radiostacioni ABC, kompania e tij mëmë, reagoi menjëherë me një deklaratë ku i kërkoi FIFA-s ta rishikojë vendimin. Sipas tyre, bëhej fjalë për një incident të izoluar, gabimi ishte pranuar menjëherë dhe përjashtimi i përhershëm nga turneu përbën një masë ekstreme dhe qartësisht joproporcionale për një shkelje të parë që u shoqërua menjëherë me kërkimfalje.

Pak më vonë, edhe vetë komentatori publikoi një videomesazh në rrjetet sociale, ku u shfaq dukshëm i prekur nga pasojat e veprimit të tij. Ai tha se kishte vepruar nën ndikimin e emocioneve dhe presionit të madh të transmetimit live, ndërsa u kërkoi falje zyrtarisht FIFA-s, organizatës së gjyqtarëve, kolegëve dhe dëgjuesve.

Vera nënvizoi se deklaratat e tij ishin krejtësisht të gabuara, se ato pak sekonda nuk përfaqësonin një shembull të mirë dhe se ai merr përgjegjësi të plotë për gabimin. Ai shtoi gjithashtu se nuk kishte pasur kurrë synim të fyente personalisht askënd.

The post FIFA i heq përgjithmonë akreditimin komentatorit pas shpërthimit në transmetim live gjatë Kupës së Botës appeared first on Albeu.com.

Të dhënat e FIFA-s tregojnë se, përpara sfidave të së dielës, numri total i tifozëve të pranishëm në stadiumet e Botërorit kishte arritur në 2,307,947. Mesatarisht, çdo ndeshje është ndjekur nga 64,110 spektatorë, ndërsa niveli i mbushjes së stadiumeve ka shkuar në 99.54 për qind.

Këtë e ka vlerësuar si një arritje të madhe presidenti i FIFA-s, Gianni Infantino, i cili e konsideroi formatin e ri të Kupës së Botës si një sukses të rëndësishëm.

“Stadiume të mbushura, qytete të mbushura dhe miliona tifozë që festojnë pasionin për futbollin. Kupa e Botës me 48 skuadra tashmë është një sukses i madh”, deklaroi Infantino.

Botërori po sjell edhe shifra rekord në tribuna. Brenda vetëm një dite, katër ndeshje të fazës së grupeve grumbulluan 281,223 tifozë, duke lënë pas rekordin e Botërorit 1994 në SHBA, kur në katër përballje ishin regjistruar 277,070 spektatorë.

Synimi i radhës është kapërcimi i kufirit prej 3.5 milionë tifozësh në stadiume, një rekord që po ashtu i përket Kupës së Botës 1994.

Në krahasim me këtë edicion, Botërori i Katarit 2022 përfundoi me rreth 3.4 milionë spektatorë dhe me një mesatare mbushjeje prej 96.3 për qind.

Ajo që ka tërhequr më shumë vëmendjen e organizatorëve është fakti se interesimi ka qenë i lartë edhe për ndeshje mes përfaqësueseve që zakonisht nuk konsiderohen favorite.

Ndeshja mes Zelandës së Re dhe Egjiptit në Vancouver u ndoq nga 52,497 tifozë, Belgjikë-Iran mblodhi 70,317 spektatorë në Inglewood, ndërsa Tunizi-Japoni në Monterrey tërhoqi mbi 51 mijë shikues.

Në këtë frekuentim të madh po ndikon edhe karakteri multikulturor i Amerikës së Veriut, ku shumë komunitete nga vende të ndryshme të botës mbështesin kombëtaret e tyre nga tribunat.

Atmosferë të veçantë pati edhe sfida Portugali – RD Kongo në Houston, ku mijëra tifozë të veshur me fanellën me numrin 7 të Cristiano Ronaldos krijuan një skenë spektakolare, ndonëse shumë prej tyre nuk ishin portugezë.

Pjesëmarrja e madhe e tifozëve ka ardhur pavarësisht çmimeve të larta të biletave. Për shumicën e takimeve të fazës së grupeve, biletat standarde u shitën me shpejtësi, ndërsa në treg mbetën kryesisht paketat VIP, me çmime që nisnin nga rreth 500 dollarë.

Gjithsesi, kjo kërkesë e jashtëzakonshme ka dëshmuar se pasioni për futbollin mbetet një forcë globale, duke e kthyer Kupën e Botës 2026 në një sukses të madh jo vetëm në fushë, por edhe në shkallët e stadiumeve.

The post Botërori 2026 po befason me tribuna plot, stadiumet afro kapacitetit maksimal appeared first on Albeu.com.

Të enjten, më 18 qershor 2026, ai tërhoqi vëmendje të madhe pasi ishte i pranishëm në dy ndeshje brenda ditës. Fillimisht ndoqi suksesin bindës 5-1 të Zvicrës, skuadrës së tij vendase, ndaj Bosnjës dhe Hercegovinës, e më pas u shfaq edhe në përballjen Kanada-Katar.

Prania e tij në të dyja sfidat u konsiderua befasuese, pasi mes tyre kishte vetëm një orë diferencë dhe atij iu desh të lëvizte nga një vend në tjetrin në një interval shumë të shkurtër.

Shpjegimi lidhet me faktin se kreu i FIFA-s përdor avionin e tij privat, i cili udhëton në vende të ndryshme për t’i dhënë mundësi të ndjekë disa ndeshje gjatë së njëjtës ditë.

Infantino e kishte marrë si dhuratë një avion privat për Kupën e Botës nga Qatar Airëays, ndërsa gëzon edhe leje të posaçme sigurie që ia lehtësojnë udhëtimin e shpejtë.

Po ashtu, presidenti i FIFA-s nuk qëndron për gjithë kohëzgjatjen e ndeshjeve, por merr pjesë vetëm në një pjesë të tyre, gjë që i krijon mundësinë të shfaqet në disa takime brenda ditës.

The post Si arrin Gianni Infantino të jetë në dy ndeshje të Kupës së Botës FIFA brenda së njëjtës ditë? appeared first on Albeu.com.

Sulmuesi iranian tregoi se lojtarët e pyetën kreun e FIFA-s për arsyen pse disa zyrtarë të përfaqësueses së tyre nuk po lejoheshin të hynin në Shtetet e Bashkuara të Amerikës.

Interesi i gazetarëve u përqendrua te fjalët e Infantinos, ndërsa më pas u bë publik edhe një incizim i fjalimit të tij.

“E di çfarë po kalon. E kuptoj. Por ti je më i fortë se çdo gjë. E ke bashkuar të gjithë botën, faleminderit. Dhe në këto dy ndeshje që të kanë mbetur, do ta bësh të gjithë botën krenare për atë që po bën. Dhe nëse trajneri ka nevojë për një sulmues, unë do të vij në ndeshjen tjetër për të luajtur me ty”.

“Ai thjesht do të na ndihmojë”, deklaroi Taremi, duke përcjellë mesazhin që ekipi mori nga njeriu i parë i futbollit botëror. “Tani është fillimi i Kupës së Botës dhe ai do të na ndihmojë. Ne i besojmë gjithçkaje që ai thotë”, shtoi sulmuesi iranian.

Sipas të dhënave në dispozicion, Infantino i bëri me dije kombëtares iraniane në dhomën e zhveshjes se do të angazhohej maksimalisht që më shumë zyrtarë iranianë, të cilëve më herët u ishte refuzuar viza, të udhëtonin drejt SHBA-së dhe të ishin të pranishëm në ndeshjet e mbetura të fazës së grupeve të turneut.

E gjithë kjo po ndodh në një periudhë tensionesh të rritura politike mes Shteteve të Bashkuara të Amerikës dhe Iranit.

Situata mori edhe më shumë vëmendje pas deklaratës së Presidentit të SHBA-së Donald Trump, i cili fundjavën e kaluar tha se marrëveshja për t’i dhënë fund luftës me Iranin “është rënë dakord dhe nënshkruar plotësisht”.

Sipas njoftimeve, ceremonia zyrtare për nënshkrimin e marrëveshjes pritet të zhvillohet të premten në Zvicër.

The post Infantino futet në zhveshtoren e Iranit dhe u drejtohet lojtarëve pas telasheve me vizat appeared first on Albeu.com.

Numri një i futbollit botëror u foli lojtarëve dhe stafit teknik të Iranit me tone inkurajuese, duke përgëzuar paraqitjen e skuadrës dhe mesazhin që, sipas tij, ajo po përcjell në skenën ndërkombëtare.

“Ndeshja e sotme ishte e vështirë dhe me pak më shumë fat mund ta kishit fituar. Por ju po luani futboll të mirë. Keni edhe dy ndeshje të mbetura dhe do ta bëni botën krenare edhe një herë me atë që do të tregoni në fushë”.

“E di se çfarë po kaloni, e kuptoj, por ju jeni më të fortë se gjithçka. Po dërgoni një sinjal për të gjithë botën. Sonte e bashkuat të gjithë stadiumin rreth jush”.

“Ia treguat këtë botës dhe dërguat një mesazh të fuqishëm. Ju falënderoj shumë”, deklaroi Infantino.

Pas këtij barazimi 2-2 ndaj Zelandës së Re, Irani mori një pikë me peshë në garën e tij në turne.

Ky rezultat i mban iranianët plotësisht në lojë për kualifikimin në fazën eliminatore, ndërsa u kanë mbetur edhe dy ndeshje për të siguruar praninë në raundin e ardhshëm të kompeticionit./

The post Gianni Infantino takon Iranin pas 2-2 me Zelandën e Re: “Po i jepni një mesazh gjithë botës” appeared first on Albeu.com.