Komisioni Qeveritar për Persona të Zhdukur ka bërë publik raportin mbi gërmimet e kryera në tri pika të komunës së Zubin Potokut, prej nga janë nxjerrë mbetje mortore që i përkasin së paku 23 personave.

Kryesuesi i Komisionit, Agron Limani, deklaroi se kërkimet për personat e zhdukur në këtë hapësirë kishin nisur më herët, ndërsa rezultatet konkrete janë arritur gjatë muajit gusht.

Sipas Limanit, në lokacionin e parë në Kalludër janë identifikuar mbetjet mortore të 13 personave, në pikën e dytë në Jabukë janë gjetur katër mbetje mortore, ndërsa në lokacionin e tretë në Kalludër janë evidentuar gjashtë të tjera. Ai tha se deri tani janë identifikuar 23 persona dhe se procesi i zhvarrimit është përmbyllur me sukses.

Përfaqësuesi i Komisionit Qeveritar për Persona të Zhdukur, Kushtrim Gara, paraqiti me rend kronologjik ecurinë e punës në terren.

Ai sqaroi se bëhet fjalë për tri lokacione me varreza masive në pjesën veriore, përkatësisht në vijën veri-perëndimore të Republikës së Kosovës, në territorin e komunës së Zubin Potokut. Zona përfshin fshatrat Dren, Kalludër, Jabukë dhe Çrepulë, të vendosura në pjesën jug-lindore të kësaj komune.

Sipas Garës, aktivitetet në terren kanë zgjatur afro katër javë, ndërsa pika e parë është konfirmuar më 27 korrik.

Për lokacionin e parë në Kalludër, ai tha se janë konstatuar të paktën 13 individë, respektivisht 13 viktima të zhdukura me forcë.

Gara njoftoi se më 27 korrik, në vendin e njohur si “Mëlleja” në fshatin Kalludër, u evidentuan fragmente kockore dhe pjesë veshmbathjeje. Sipas tij, këto mbetje kishin dalë pjesërisht në sipërfaqe për shkak të erozionit dhe lëvizjes së dheut.

Pas autorizimeve nga prokurorja e rastit në Departamentin për Krime të Luftës të Prokurorisë, më 28 korrik nisën veprimet mjekoligjore në terren. Ekspertët mjekoligjorë konfirmuan po atë ditë se lokacioni ishte një varr masiv, tha Gara.

Ai bëri të ditur se më 30 korrik filluan gërmimet sistematike. Varri masiv u nda në segmente, me qëllim që mbetjet mortore të evidentoheshin, gjendeshin dhe dokumentoheshin me saktësi.

Me zgjerimin e zonës së trajtuar dhe zbulimin e mbetjeve të tjera, numri minimal i individëve është përditësuar gradualisht në përputhje me gjetjet në terren, deklaroi Gara.

Gjatë procesit, sipas tij, është vërtetuar se lokacioni i parë nuk përbënte varr primar dhe se aty nuk mund të ndodheshin mbetjet e të gjithë 23 personave.

Lokacioni i dytë në Jabukë është konfirmuar më 2 gusht, ndërsa gërmimet në atë pikë kanë nisur një ditë më vonë.

Gara tha se deri në përfundimin e punës më 3 gusht janë gjetur dhe zhvarrosur mbetjet mortore të katër personave. Ato më pas janë dërguar në Institutin e Mjekësisë Ligjore për ekzaminime të mëtejshme mjekoligjore dhe procedurat përkatëse.

Gërmimet dhe zhvarrimet janë realizuar nga ekspertët e Institutit të Mjekësisë Ligjore, së bashku me ekspertët e EULEX-it të angazhuar në kuadër të IML-së. Në këtë proces kanë ofruar mbështetje Komisioni Qeveritar për Persona të Zhdukur, Policia e Kosovës dhe institucione të tjera.

Ai theksoi se hetimet janë përqendruar edhe në rastin e quajtur “Grupi i Intelektualëve”.

Sipas Garës, angazhimi ka pasur në fokus personat e zhdukur me forcë nga kjo zonë ose ata që janë parë për herë të fundit aty. Në këtë kuadër përfshihet rasti i “Grupit të Intelektualëve”, me 23 bashkatdhetarë nga komunat e Mitrovicës dhe Skenderajt, të cilët gjatë udhëtimit nga fshati Koshtovë i komunës së Skenderajt drejt Malit të Zi janë rrëmbyer dhe zhdukur mes fshatrave Dren, Kalludër dhe Jabukë, diku më 19 prill, nga forcat ushtarake të ish-Republikës Federale të Jugosllavisë.

Gjetjet dhe informacionet e siguruara deri në këtë fazë e lidhin me kusht këtë proces me rastin e “Grupit të Intelektualëve”, por identiteti i secilit person duhet të përcaktohet më tej përmes analizave të ADN-së, tha Gara.

Ai shtoi se krahas këtyre veprimeve, puna hetimore, operative dhe mjekoligjore ka vijuar për gjetjen e lokacioneve të tjera të mundshme.

Në tri pikat e gërmimit në Kalludër dhe Jabukë janë gjetur mbetje mortore të së paku 23 personave. Identifikimi individual pritet të vazhdojë përmes ekzaminimeve mjekoligjore dhe analizave të ADN-së.

The post Komisioni raporton për zhvarrimet në Zubin Potok, gjenden mbetje të të paktën 23 personave appeared first on Albeu.com.

Pas katër javësh punë në terren, kanë përfunduar gërmimet vlerësuese dhe zhvarrosja e mbetjeve mortore në tri zona të konfirmuara si varreza masive në Kalludër dhe Jabukë të Zubin Potokut.

Komisioni Qeveritar për Persona të Zhdukur ka bërë të ditur se në lokacionin e tretë u gjetën mbetje mortore që u përkasin gjashtë individëve. Si rezultat, numri i personave të zbuluar në të tri lokacionet ka shkuar në 23. Ata dyshohen se janë viktima të zhdukjes me forcë.

Gjatë operacionit u kryen gërmime të karakterit vlerësues, zhvarrosje, dokumentim mjekoligjor dhe shqyrtim i hapësirave të tjera me interes.

Në këtë aktivitet morën pjesë ekipet e Institutit për Mjekësi Ligjore, Sektorit të Policisë për Persona të Zhdukur, i cili funksionon në kuadër të Drejtorisë për Hetimin e Krimeve të Luftës, si dhe njësi të tjera të Policisë dhe institucioneve të sigurisë.

Operacioni u mbështet nga Komisioni Qeveritar për Persona të Zhdukur dhe Qeveria e Kosovës. Ai u zhvillua në zbatim të urdhrit të gjykatës kompetente, pas kërkesës së prokurores së çështjes në Departamentin për Krime Lufte të Prokurorisë Speciale të Republikës së Kosovës. Pjesë e punës në terren ishin edhe ekipet mjekoligjore të EULEX-it, në kuadër të Institutit për Mjekësi Ligjore.

Pas përfundimit të gërmimeve, materialet e gjetura do t’i nënshtrohen ekzaminimeve mjekoligjore dhe analizave të ADN-së. Këto procedura synojnë të përcaktojnë identitetin e viktimave dhe të mundësojnë ndërmarrjen e hapave të mëtejshëm, përfshirë informimin zyrtar të familjeve.

Kushtrim Gara nga Komisioni Qeveritar për Persona të Zhdukur ka konfirmuar se puna në lokacionet e dyshuara për varreza masive ka mbaruar, ndërsa ka paralajmëruar se identifikimi përmes analizave të ADN-së do të kërkojë më shumë kohë.

“Bëhet fjalë për rreth katër javë pune, nga fundi i muajit deri më tani. Hapësira tashmë është shënuar dhe bën pjesë në lokacionet e konfirmuara si varreza masive. Mund të thuhet se ka përfunduar vlerësimi i lokacioneve dhe zhvarrosja e të gjitha mbetjeve mortore, të cilat më pas janë dërguar në IML për ekzaminime të mëtejshme ligjore, përfshirë edhe analizat e ADN-së”, ka deklaruar Gara.

Sipas tij, institucionet e Kosovës do t’i trajtojnë me përparësi dhe profesionalizëm të gjitha çështjet që janë në kompetencën e tyre. Gara ka sqaruar se procesi i identifikimit gjenetik mund të zgjasë dhe se, sapo të pranohet raporti i ADN-së, do të ndiqen procedurat përkatëse. Një nga veprimet e para do të jetë njoftimi i familjeve, por kjo fazë do të kërkojë kohë.

Komisioni Qeveritar për Persona të Zhdukur ka falënderuar ekipet dhe institucionet që morën pjesë në këtë proces. Mirënjohje u është shprehur edhe familjeve të personave të zhdukur dhe Shoqatës së Familjeve “Zëri i Prindërve” për bashkëpunimin.

Avokati Gazmend Halilaj thekson se gjetja e mbetjeve nuk shënon përfundimin e punës institucionale, por hap një fazë të re me rëndësi humanitare, juridike dhe penale. Sipas tij, çdo mbetje mortore, send personal, veshje, gjurmë apo material tjetër i zbuluar në këto zona mund të ndihmojë në identifikimin e viktimave dhe në rindërtimin e rrethanave të vdekjes.

Në një prononcim për gazetën “Bota sot”, Halilaj ka deklaruar se pas gërmimeve duhet të dokumentohet në mënyrë të plotë lokacioni, të kryhet ekzaminimi profesional i mbetjeve, të merren mostrat biologjike dhe të garantohet ruajtja e çdo prove pa cenuar integritetin e saj. Ai e konsideron analizën e ADN-së një prej elementeve më të rëndësishme të kësaj faze.

Sipas avokatit, krahasimi i materialit gjenetik të mbetjeve mortore me mostrat e të afërmve mund të përcaktojë identitetin e viktimës me një shkallë shumë të lartë sigurie. Për familjet që kanë pritur për vite ose dekada, një rezultat i tillë nuk përbën vetëm një përfundim shkencor e juridik, por edhe një të drejtë njerëzore dhe një mundësi për t’i dhënë fund pasigurisë.

Megjithatë, Halilaj nënvizon se identifikimi i viktimës nuk është i barabartë me gjetjen e autorit. ADN-ja mund të përcaktojë se kujt i përkasin mbetjet, ndërsa përgjegjësia penale kërkon lidhjen mes viktimës, vendit të ngjarjes, mënyrës së vdekjes dhe personave të dyshuar për krimin.

Ai ka theksuar se secila provë duhet të shoqërohet nga një zinxhir i qartë ruajtjeje: duhet të dihet koha e gjetjes, personi që e ka marrë, vendi ku është ruajtur, eksperti që e ka ekzaminuar dhe metodat e përdorura. Mosrespektimi i standardeve ligjore e profesionale mund të krijojë kontestime serioze për përdorimin e provës në një procedurë penale, edhe nëse ajo ka peshë të madhe faktike. Përgjegjësia për garantimin e këtij procesi, sipas tij, është institucionale.

Halilaj ka shtuar se hetimi duhet të përcaktojë edhe vendin dhe kohën e vrasjes, rrethanat në të cilat ajo ka ndodhur, personat e pranishëm, strukturat që kanë vepruar në atë zonë dhe çdo të dhënë që mund të lidhë një individ konkret me krimin.

Prokuroria dhe Policia duhet të kujdesen që provat të mblidhen dhe të administrohen në përputhje me ligjin, ndërsa ekspertët e mjekësisë ligjore dhe institucionet e tjera duhet të sigurojnë ekzaminimin dhe ruajtjen profesionale të materialeve mortore e biologjike. Çdo hallkë është e rëndësishme, pasi këto prova mund të përdoren edhe shumë vite më vonë në një proces gjyqësor.

Nëse të dhënat tregojnë se vdekjet kanë ardhur si pasojë e një krimi lufte, identifikimi i viktimave do të jetë vetëm pika e nisjes së një hetimi më të gjerë. Në këtë rast duhet të zbardhen jo vetëm identitetet, por edhe vendi, koha dhe rrethanat e vrasjeve, personat e pranishëm, strukturat vepruese në zonë dhe lidhjet e mundshme të individëve konkretë me veprën penale.

Sipas Halilajt, çdo gërmim kërkon një qasje të dyfishtë: familjeve duhet t’u jepet përgjigje për fatin e të afërmve të tyre, ndërsa çdo provë duhet të përdoret për të sqaruar rrethanat e krimit dhe për të përcaktuar përgjegjësinë penale.

Ai ka vënë në dukje se një varrezë masive nuk duhet parë vetëm si vend ku gjenden mbetje njerëzore, por edhe si një skenë e mundshme krimi. Ajo mund të ofrojë të dhëna për mënyrën e kryerjes së veprës, rrethanat e vdekjes dhe, potencialisht, autorët. Edhe kalimi i shumë viteve nuk ia heq vlerën provave, veçanërisht në rastet e krimeve të luftës, ku çdo element i ri mund të ndihmojë në plotësimin e historisë së një ngjarjeje ende të pazbardhur për familjet.

Avokati përfundon se drejtësia nuk mund të mbështetet te emocionet apo supozimet, por te prova të mbledhura, të administruara dhe të ruajtura në mënyrë profesionale e të ligjshme. Nëse materialet e gjetura lidhen me persona dhe veprime konkrete kriminale, ato mund të kenë peshë vendimtare në procedurat penale dhe në përcaktimin e përgjegjësisë. Për familjet, identifikimi përbën një hap drejt së vërtetës, ndërsa për drejtësinë duhet të shërbejë si fillim i zbardhjes së plotë të krimit.

The post Pas zbulimit të 23 viktimave në varreza masive, Halilaj shpjegon hapat drejt identifikimit dhe drejtësisë appeared first on Albeu.com.

Procesi katërjavor i gërmimeve vlerësuese dhe zhvarrosjes së mbetjeve mortore në tri lokacione të konfirmuara si varre masive në Kalludër dhe Jabukë të Zubin Potokut ka përfunduar.

Komisioni Qeveritar për Persona të Zhdukur bëri të ditur se në lokacionin e tretë janë konstatuar mbetje mortore të gjashtë individëve. Në total, nga të tri hapësirat e shqyrtuara janë konfirmuar mbetje të 23 personave, të dyshuar si viktima të zhdukjes me forcë.

Gjatë punës në terren u kryen gërmime vlerësuese, zhvarrosje, dokumentim mjekoligjor dhe vlerësim i plotë i zonave që paraqisnin interes për hetimin.

Në operacion u angazhuan ekipet e Institutit për Mjekësi Ligjore, Sektori i Policisë për Persona të Zhdukur në kuadër të Drejtorisë për Hetimin e Krimeve të Luftës, si dhe njësi të tjera të Policisë dhe sigurisë. Pjesë e procesit ishin edhe ekipet mjekoligjore të EULEX-it pranë Institutit për Mjekësi Ligjore.

Gërmimet u zhvilluan me mbështetjen e Komisionit Qeveritar për Persona të Zhdukur dhe Qeverisë së Kosovës, në bazë të urdhrit të gjykatës kompetente. Urdhri ishte nxjerrë pas kërkesës së prokurores së rastit në Departamentin për Krime Lufte të Prokurorisë Speciale të Republikës së Kosovës.

Kushtrim Gara nga Komisioni Qeveritar për Persona të Zhdukur deklaroi se angazhimi në terren zgjati rreth katër javë, nga fundi i muajit deri më 21.08.2026, dhe se hapësirat tashmë janë evidentuar brenda lokacioneve të konfirmuara si varre masive.

Sipas Garës, procesi i vlerësimit të lokacioneve dhe zhvarrosjes së të gjitha mbetjeve mortore ka përfunduar, ndërsa materialet janë dërguar në Institutin për Mjekësi Ligjore për ekzaminime të mëtejshme ligjore dhe analiza të ADN-së.

Ai sqaroi se identifikimi përmes ADN-së mund të zgjasë më shumë, ndërsa familjarët do të njoftohen sapo institucionet të pranojnë rezultatet e analizave. Gara theksoi se çdo veprim që është në kompetencën e institucioneve të Kosovës do të trajtohet me prioritet dhe profesionalizëm dhe se informimi i familjeve do të jetë një nga hapat e menjëhershëm pas marrjes së raportit të ADN-së.

Pas mbylljes së punës në terren, procedurat do të vijojnë me ekzaminimet mjekoligjore dhe identifikimin gjenetik, me synim përcaktimin e identitetit të viktimave dhe ndërmarrjen e hapave të mëtejshëm, përfshirë njoftimin zyrtar të familjeve.

Komisioni Qeveritar për Persona të Zhdukur falënderoi ekipet dhe institucionet e përfshira, si dhe familjet e personave të zhdukur e Shoqatën e Familjeve “Zëri i Prindërve” për bashkëpunimin gjatë gjithë procesit.

The post Përfundojnë gërmimet në Zubin Potok, gjenden mbetje mortore të 23 personave appeared first on Albeu.com.

Kushtrim Gara, nga Komisioni Qeveritar për Persona të Zhdukur, bëri të ditur se ka përfunduar puna në lokacionet e dyshuara për varreza masive.

Sipas tij, pas rreth katër javësh angazhim është mbyllur edhe procesi i zhvarrosjes së pjesëve kockore.

“Bëhet fjalë për rreth katër javë punë, nga fundi i muajit deri më sot. Tashmë mund të konfirmohet se hapësira është shënuar në kuadër të lokacioneve të konfirmuara të varreve masive. Procesi ka përfunduar sa i përket vlerësimit të lokacioneve dhe zhvarrosjes së të gjitha mbetjeve mortore, të cilat më pas janë dërguar në IML për ekzaminime të mëtejshme ligjore, përfshirë edhe analizat e ADN-së”, deklaroi Gara.

I pyetur se kur do të informohen familjarët e viktimave, Gara shpjegoi se identifikimi përmes analizave të ADN-së kërkon më shumë kohë. Ai theksoi se familjet do të njoftohen menjëherë pasi institucionet të marrin rezultatet e analizave.

“Çdo çështje që është në kompetencë të institucioneve të Kosovës do të trajtohet me prioritet dhe profesionalizëm. Identifikimi përmes analizave të ADN-së mund të zgjasë pak më shumë. Sapo të pranojmë raportin e ADN-së, do të ndërmarrim hapat e nevojshëm, ndërsa njoftimi i familjeve do të jetë një nga veprimet e menjëhershme. Kjo pjesë do të kërkojë pak më shumë kohë”, tha ai.

The post Gara: Përfunduan zyrtarisht gërmimet në Kalludër dhe Jabukë, u gjetën 23 persona appeared first on Albeu.com.

Gërmimet, vlerësimi dhe zhvarrosja e mbetjeve mortore në Kalludër të Zubin Potokut mund të përfundojnë brenda kësaj jave, ka deklaruar për RTK-në Kushtrim Gara nga Komisioni Qeveritar për Persona të Zhdukur.

Sipas tij, kjo është java e katërt e punës në terren, ndërsa ekipet aktualisht janë të angazhuara në lokacionin e tretë të dyshuar si varrezë masive.

“Në kuptimin e gërmimit, vlerësimit dhe zhvarrosjes së mbetjeve mortore është çështje ditësh, në qoftë se jo sot, nesër, pra gjatë kësaj jave. Mirëpo, në kuptimin e përfundimit në tërësi si proces, pasi është faza e shqyrtimit të mbetjeve, pastaj është çështja e analizave të ADN-së, e cila është çështje e testimit në laborator që kryhet bashkë me partnerët ndërkombëtarë do të marrë pak kohë”, ka thënë Gara.

Ai ka sqaruar se, pasi të mbyllen operacionet në terren, mbetjet mortore do t’i nënshtrohen shqyrtimit dhe testimit gjenetik në bashkëpunim me partnerët ndërkombëtarë.

Gara ka theksuar se institucionet e Kosovës do t’u japin përparësi të gjitha veprimeve që janë në kompetencën e tyre dhe që mund të kryhen nga ekspertët vendorë.

“Por, ajo që është e rëndësishme, çdo gjë që është brenda mundësive, kompetencave dhe në duart e ekspertëve të institucioneve të Kosovës do të adresohet me prioritet dhe brenda afateve optimale”, është shprehur ai.

Dyshimet për praninë e mbetjeve mortore të personave të zhdukur gjatë luftës në Kosovë kanë bërë që gërmimet të zhvillohen në këtë pjesë të Zubin Potokut.

Në këtë zonë, disa javë më parë, u përcaktuan disa hapësira që dyshohej se mund të ishin varreza masive.

Pas përfundimit të analizave dhe identifikimit eventual të mbetjeve, Komisioni Qeveritar për Persona të Zhdukur do t’i informojë familjet e viktimave, ka bërë të ditur Gara.

Familjet do të vendosin më pas për datën dhe vendin e rivarrimit, si dhe nëse dëshirojnë që të dhënat për këtë proces të bëhen publike.

The post Gara: Gërmimet në Kalludër pritet të mbyllen këtë javë, më pas nisin analizat e ADN-së appeared first on Albeu.com.

Njësitë kompetente të Policisë së Kosovës kanë zbuluar mbetje eshtërore të tre individëve në fshatin Kalludër të Zubin Potokut, gjatë hetimeve që lidhen me një rast të trajtuar si krim lufte kundër popullatës civile.

Në njoftimin e policisë bëhet e ditur se gjetja ka ndodhur të premten, ndërsa pas vlerësimit fillestar nga eksperti mjeko-ligjor është konfirmuar se bëhet fjalë për mbetje me prejardhje njerëzore dhe me vlerë për forensikën.

Autoritetet kanë shprehur dyshimin se eshtrat mund t’i përkasin viktimave të luftës së fundit në Kosovë.

“Fsh. Kalludër, Zubin Potok / 19.04.1999 – NN. Me datën 14.08.2026 njësitë përkatëse policore kanë gjetur mbetjet eshtërore të tre (3) individëve, të cilat sipas ekspertit mjeko-ligjor janë me prejardhje njerëzore dhe janë me interes forenzik. Mbetjet eshtërore dyshohet që janë të viktimave të luftës së fundit në Kosovë”, thuhet në raportin 24-orësh të policisë.

The post Zbulohen në Kalludër eshtrat e tre personave, dyshohet se janë viktima të luftës appeared first on Albeu.com.

Në Kalludër të Zubin Potokut po kryhen gërmime në kuadër të përpjekjeve për të sqaruar fatin e personave që vazhdojnë të figurojnë të zhdukur nga lufta e fundit në Kosovë.

Punimet janë vizituar sot nga kryetari i Komunës së Mitrovicës, Faton Peci, dhe nënkryetari Enis Osmani. Në këtë zonë po kërkohen trupat e personave të pagjetur gjatë luftës.

Në reagimin e tij pas vizitës, Peci e ka cilësuar çështjen e të pagjeturve dhe të krimeve të luftës si një prej plagëve më të rënda që vazhdon të rëndojë mbi shoqërinë kosovare.

Ai ka shkruar se, edhe pas më shumë se dy dekadash, Kosova vazhdon të ketë varre të hapura, ndërsa plagët e shkaktuara nga lufta ende kullojnë.

Peci ka drejtuar kritika ndaj Serbisë, duke thënë se ajo nuk ka kërkuar falje për krimet e kryera gjatë luftës në Kosovë. Sipas tij, Mitrovica ka paguar çmimin më të lartë për lirinë.

Duke folur për veriun e Kosovës, kryetari i Mitrovicës ka deklaruar se varrezat janë gjithashtu dëshmi të gjurmëve të historisë dhe të pranisë shqiptare në këto troje.

Sipas Pecit, asgjë nuk mund ta fshehë të vërtetën, pasi gjaku nuk humbet dhe dheu nuk e lejon krimin të mbetet i mbuluar.

Ai ka sjellë në vëmendje edhe vuajtjen e familjarëve të personave të pagjetur, të cilët prej afër tri dekadash jetojnë mes pritjes, dhimbjes dhe kërkimit për më të dashurit e tyre.

Peci ka theksuar se këto familje ende mbajnë gjallë shpresën se një ditë do të kenë mundësi të vendosin lule mbi varret e familjarëve të tyre.

The post Kërkime për të zhdukurit në Kalludër, Peci: E vërteta nuk mund të mbulohet appeared first on Albeu.com.

Gjatë vazhdimit të hetimeve në terren për rastin në Zubin Potok, Prokuroria Speciale e Republikës së Kosovës dhe Policia e Kosovës kanë identifikuar dhe konfirmuar praninë e mbetjeve mortore edhe në lokacionin e tretë të dyshuar.

Në këtë zonë po kryhen ekzaminimet dhe procedurat e domosdoshme hetimore, përmes bashkërendimit të plotë mes Prokurorisë Speciale, Policisë së Kosovës dhe institucioneve të tjera kompetente, me synimin për të sqaruar të gjitha rrethanat.

Prokuroria Speciale e Republikës së Kosovës dhe Policia e Kosovës kanë ritheksuar angazhimin për zbardhjen e plotë të rastit, duke ndërmarrë çdo veprim të nevojshëm hetimor në pajtim me ligjin dhe në koordinim të ngushtë ndërinstitucional.

The post Konfirmohet gjetja e mbetjeve mortore në lokacionin e tretë në Zubin Potok appeared first on Albeu.com.

Hetimet për rastin e dyshuar të krimeve të luftës në komunën e Zubin Potokut po zhvillohen me intensitet nga Prokuroria Speciale e Republikës së Kosovës, në bashkërendim me Policinë e Kosovës.

Në kuadër të këtij rasti janë arrestuar deri tani tre persona. Ata dyshohen se kanë kryer veprën penale “Krime lufte kundër popullsisë civile”, ndërsa gjatë procesit hetimor janë kontrolluar disa lokacione.

Në fshatin Jabukë, veprimet hetimore kanë çuar në zbulimin e mbetjeve mortore. Për të mundësuar identifikimin e tyre, mbetjet do t’u nënshtrohen ekzaminimeve mjeko-ligjore dhe analizave të ADN-së.

Ndërkohë, puna në terren po vazhdon edhe në fshatin Kalludër e Vogël, ku gërmimet ende nuk kanë përfunduar.

Prokuroria Speciale ka konfirmuar se hetuesit po veprojnë aktualisht edhe në një lokacion të tretë. Prokurorja përgjegjëse ka qëndruar në vendngjarje së bashku me hetuesit e Drejtorisë për Hetimin e Krimeve të Luftës dhe ekspertët forenzikë, me qëllim mbikëqyrjen e veprimeve hetimore.

Për shkak se procedura ndodhet në një fazë të ndjeshme, Prokuroria Speciale ka bërë të ditur se për momentin nuk mund të publikojë hollësi të tjera. Informacione shtesë do të bëhen publike atëherë kur kjo të jetë e mundur pa e dëmtuar hetimin.

The post Hetimet për varreza masive zgjerohen në një lokacion të tretë pas Kalludrës së Vogël dhe Jabukës appeared first on Albeu.com.

Një hetim i zhvilluar për rreth dy vjet nga autoritetet e Kosovës nisi me ndalimin e dy personave të dyshuar për krime lufte dhe vijoi me gërmime në Zubin Potok, ku besohej se mund të ndodhej një varrezë masive. Brenda pak ditësh, në terren u gjetën mbetje mortore me origjinë njerëzore, u arrestua edhe një person tjetër i dyshuar për krime lufte dhe u evidentua një lokacion i dytë ku mund të ketë mbetje njerëzore. Ndërkohë, në Serbi u arrestua një shtetas i Kosovës, i dyshuar për spiunazh.

Gërmimet në Kalludër të Vogël, një fshat malor në komunën veriore të Zubin Potokut, nisën më 28 korrik, pas dyshimeve për ekzistencën e një varreze masive.

Sipas autoriteteve, operacioni në këtë zonë ishte rezultat i një hetimi rreth dyvjeçar të Prokurorisë Speciale të Kosovës.

Pak ditë përpara fillimit të punimeve, u arrestuan dy persona, të dyshuar për krime lufte kundër popullsisë civile. Prokuroria ka bërë të ditur se rasti i tyre lidhet me gërmimet e zhvilluara në Kalludër të Vogël.

Detajet mbi veprimet për të cilat dyshohen të arrestuarit nuk janë bërë publike. Megjithatë, Policia deklaroi se për njërin prej tyre kishte siguruar prova se ai ishte “i mobilizuar dhe pjesë aktive gjatë periudhës së luftës në ish-armatën jugosllave”.

M.J. dhe M.B. ndodhen aktualisht në paraburgim.

Më 2 gusht, Policia e Kosovës arrestoi edhe J.R., në kuadër të të njëjtit hetim.

Prokuroria Speciale sqaroi se ndalimi i tij erdhi pas veprimeve të mëtejshme hetimore, por nuk dha informacion mbi rolin që dyshohet se ka pasur.

Dejan Vasiq, avokati i M.B., i tha Radios Evropa e Lirë se në kërkesën për caktimin e paraburgimit klienti i tij akuzohet se ka qenë ndër personat që kanë varrosur viktimat e lidhura me ngjarjet në fjalë.

“Ai është i bindur se nuk ka asnjë lidhje me këtë ngjarje, pasi nuk ka qenë fare në vendin që përmend prokurori”, deklaroi Vasiq.

Millosh Deleviq, mbrojtësi i M.J., nuk pranoi të jepte hollësi mbi dyshimet konkrete ndaj klientit të tij. Ai tha vetëm se vepra penale është cilësuar si krim lufte kundër popullsisë civile.

Gjatë vijimit të kërkimeve, autoritetet konfirmuan se mbetjet e zbuluara në Kalludër të Vogël janë të origjinës njerëzore.

Që në ditët e para të gërmimeve u ngritën dyshime se ato mund t’u përkisnin një grupi shqiptarësh të zhdukur me forcë gjatë luftës së fundit. Lokacioni vazhdon të jetë nën gërmime.

Grupi civil, i njohur si “grupi i intelektualëve”, rezulton i zhdukur që nga 19 prilli i vitit 1999. Në përbërje të tij kishte mjekë, profesorë, avokatë dhe persona me profesione të tjera.

Më 29 korrik, kryeministri në detyrë i Kosovës, Albin Kurti, u tha gazetarëve se dyshimi fillestar ishte që mbetjet mund t’i përkisnin këtij grupi.

“Ne nuk mund të konfirmojmë se bëhet fjalë për ta, por ky ka qenë dyshimi ynë i menjëhershëm. Sidoqoftë, duhet t’i presim organet tona të na tregojnë se për çfarë bëhet fjalë atje”, tha Kurti.

Instituti i Mjekësisë Ligjore po merret me procesin e identifikimit. Autoritetet kanë theksuar se vetëm ekzaminimet forenzike dhe analizat e ADN-së mund të përcaktojnë identitetin e viktimave.

Prokuroria Speciale u ka kërkuar mediave, qytetarëve dhe zyrtarëve që të shmangin çdo spekulim lidhur me identitetin e mbetjeve.

“…Ende gjithçka është herët, dhe deklarimet në publik mund ta dëmtojnë procesin e hetimit, e natyrisht mund edhe ta devijojnë rezultatin final”, thuhet në reagimin e Prokurorisë.

Më 2 gusht, Prokuroria dhe Policia njoftuan për gjetjen e një lokacioni tjetër në fshatin Jabukë të Zubin Potokut, ku dyshohet se mund të ketë mbetje mortore.

Institucionet deklaruan se do t’i drejtohen Gjykatës Themelore në Prishtinë për të marrë autorizimin e nevojshëm për gërmime edhe në këtë zonë.

Një ditë përpara njoftimit për lokacionin e dytë, Kurti vizitoi vendin ku po kryheshin kërkimet në Kalludër të Vogël.

Sipas tij, puna në terren mund të vazhdojë për “shumë javë, ndoshta edhe shumë muaj”, pasi mbetjet mortore janë gjetur të shpërndara përgjatë një përroi.

Kurti përsëriti edhe kërkesën që Serbia të hapë arkivat shtetërore dhe ushtarake, duke argumentuar se ato mund të ndihmojnë në zbardhjen e fatit të personave të pagjetur.

Pas njoftimit për lokacionin e dytë reagoi edhe ushtruesja e detyrës së presidentit, Albulena Haxhiu, e cila e cilësoi atë “një rikujtim të rëndë të krimeve të kryera gjatë luftës”.

Ndërsa në Zubin Potok vijonin hetimet për varrezën e dyshuar masive, autoritetet serbe arrestuan një shtetas të Kosovës me dyshimin për “spiunazh”.

Ministria e Punëve të Brendshme e Serbisë bëri të ditur se R.T., nga Istogu, u arrestua më 30 korrik në Kralevë. Gjykata e Lartë në këtë qytet i caktoi atij 30 ditë paraburgim.

Autoritetet serbe nuk publikuan të dhëna mbi veprimet që i atribuohen R.T.-së, përveç faktit se ai dyshohet për veprën penale të spiunazhit.

Megjithatë, disa burime në Kosovë i thanë Radios Evropa e Lirë se arrestimi mund të lidhet me dyshimet se R.T. kishte dhënë informacione që çuan te lokacioni ku po zhvillohen gërmimet për mbetje mortore në Zubin Potok.

Andin Hoti, ministri në detyrë i Punës, Familjes, Mbrojtjes Sociale dhe Vlerave të Luftës Çlirimtare i Kosovës, e cilësoi arrestimin e personit që, sipas tij, kishte ndihmuar në zbulimin e një varreze të dyshuar masive në Kosovë si “tentim-vrasje ndaj së vërtetës”.

“Ky nuk është shtet që kërkon drejtësi. Ky është një aparat shtetëror që vazhdon të mbrojë kriminelët, të frikësojë dëshmitarët dhe të pengojë zbardhjen e fatit të personave të zhdukur. Çdo arrestim i tillë dërgon një mesazh të qartë: kush flet për varrezat masive, ndëshkohet”, shkroi Hoti në Facebook.

Hoti nuk ka sqaruar se mbi cilat informacione mbështetet pretendimi i tij se arrestimi lidhet me ndihmën e supozuar për zbulimin e varrezës masive. Ai nuk ka qenë i qasshëm për një koment të mëtejshëm.

Sipas të dhënave zyrtare, 1.579 persona vazhdojnë të jenë të regjistruar si të zhdukur nga lufta e viteve 1998-99.

The post Nga të arrestuarit te kërkimet për një varrezë të dyshuar masive në Zubin Potok: Të dhënat e deritanishme appeared first on Albeu.com.