Limonët, kafeja e bluar, gazi i lëngshëm dhe vera shënuan rritjet më të forta në krahasim, ndërsa konservat e peshkut, sheqeri dhe birra u shitën më lirë se një vit më parë, sipas të dhënave të Institutit të Statistikave për çmimet mesatare të konsumit për artikujt kryesore të shportës.

Nga 45 artikujt e analizuar, 28 shënuan rritje të çmimit, ndërsa 16 ulje të çmimit.

Limonët u shtrenjtuan me 23.5%, kafeja me 14.6%

Rritjen më të lartë vjetore e shënoi çmimi i limonëve. Një kilogram limonë kushtoi mesatarisht 253.6 lekë në qershor 2026, nga 205.4 lekë në të njëjtin muaj të vitit të kaluar. Çmimi u rrit me 48.2 lekë për kilogram, ose 23.5%. Kafeja e bluar ishte një tjetër produkt me rritje të ndjeshme. Çmimi për 100 gramë arriti në 169.2 lekë, nga 147.6 lekë një vit më parë, me 14.6% rritje. Gazi i lëngshëm, që u shtrenjtua me 12.4%, si rrjedhojë e ndryshimeve në tregjet ndërkombëtare nga lufta në Iran. Çmimi mesatar për litër ishte 64.4 lekë muajin e kaluar.

Vera u shtrenjtua me 11.2%. Një shishe 0.75 litra kushtoi mesatarisht 756.9 lekë, nga 680.8 lekë në qershorin e vitit të kaluar, ose 76.1 lekë më shumë.

Rritje mbi mesataren e peshkut, kastravecëve dhe specave dhe kosit

Të dhënat e INSTAT tregojnë se çmimet e prodhimeve të stinës u rriten mbi mesataren e inflacioni 3.2 % në qershor 2026. Çmimi i kastravecëve u rrit me 9.9%, duke arritur në 97.6 lekë për kilogram. Specat u shtrenjtuan me 8%, duke arritur në 137 lekë për kilogram, nga 126.8 lekë një vit më parë.

Peshku i freskët kushtoi mesatarisht 923.1 lekë për kilogram, nga 851.8 lekë në qershor 2025 me rritje 8.4%.

Çmimi i kosit natyral u rrit me 6.9%, duke arritur në 192.5 lekë për kilogram në qershor 2026, ndërsa vezët u shtrenjtuan me 5.2%. Vaji i ullirit u shit mesatarisht me 839.2 lekë për litër, nga 798.9 lekë një vit më parë, duke shënuar rritje me 40.3 lekë ose 5%. Ullinjtë u shtrenjtuan me 4.5%, mollët me 4%, gjiza me 3.8% dhe mishi i derrit me 3.6%.

Mishi nuk ndalon rritjen

Në grupin e mishit, rritja më e lartë u regjistrua te mishi i derrit, çmimi i të cilit arriti në 687.1 lekë për kilogram, nga 663.4 lekë në qershor 2025, ose 3.6%. Mishi i pulës u shtrenjtua me 2.1%, ndërsa mishi i qengjit, dashit dhe kecit kushtoi mesatarisht 2% më shumë se një vit më parë në qershor. Me të njëjtën normë, prej 2%, u shtrenjtua edhe proshuta, ndërsa kremviçet u rritën me 1.9% dhe sallami me 0.8%. Çmimi i mishit të viçit mbeti i pandryshuar, në 1,235.8 lekë për kilogram.

Konservat e peshkut dhe sheqeri me uljen më të fortë

Rënien më të madhe të çmimit e shënuan konservat e peshkut. Çmimi mesatar për 100 gramë zbriti në 164.7 lekë, me një ulje 19.6% nga qershori 2025. Sheqeri u lirua me 12.9%. Një kilogram kushtoi mesatarisht 90.6 lekë, nga 104 lekë në qershor 2025. Birra shënoi një ulje prej 8.9%, me çmimin mesatar për gjysmë litri dhe zbriti në 158.6 lekë. Gjalpi u lirua me 3.8%. Çmimi i orizit ra me 3.5%, ndërsa ai i vajit të lulediellit me 2.5%. Rënie pati edhe për makaronat dhe pijet joalkoolike me gaz, me nga 1.8%, qumështin e freskët me 1.3%, patatet me 1.2% dhe portokallet me 1.1%. Djathi i bardhë u lirua me 0.7%, djathi kaçkavall me 0.6% dhe fasulet me 0.5%.

Eurodiezeli shtrenjtohet, benzina mbetet e qëndrueshme

Në grupin e karburanteve, eurodiezeli shënoi rritje të çmimit, ndërsa benzina mbeti pothuajse në të njëjtin nivel me një vit më parë. Çmimi mesatar i eurodizelit u rrit nga 173.1 lekë në 180.1 lekë për litër, ose me 7 lekë dhe 4%. Benzina kushtoi mesatarisht 172.7 lekë për litër, nga 172.9 lekë në qershor 2025, me një rënie të papërfillshme prej 0.1%. Çmimet në këtë grup u ndikuan nga lufta në Iran, ku për shkak të bllokimit të ngushticës së Hormuzit furnizimi me naftë i tregjeve globale nga lindja e mesme u vështirësua duke ndikuar në rritjen e çmimeve./Monitor

The post Rritja e çmimeve/ Limonët, kafeja dhe gazi produktet bazë shtrenjtohen mbi mesataren appeared first on Albeu.com.

Thomas Waitz, eurodeputet austriak i grupit të të Gjelbërve në Parlamentin Evropian, i është drejtuar me shkrim Komisionit Evropian për planet dhe debatet që lidhen me ngritjen e infrastrukturës së re të gazit fosil në shtetet kandidate për anëtarësim në Bashkimin Evropian, mes tyre edhe Kosova.

Në dokumentin e paraqitur ditë më parë, Waitz nënvizon se Kosova tashmë e ka miratuar Strategjinë e Energjisë, ndërsa po finalizon Planin Kombëtar për Energjinë dhe Klimën (NECP). Ai përmend gjithashtu zbatimin e detyrimeve që burojnë nga Ligji për Klimën dhe përgatitjen e kontributit vullnetar të Kosovës për klimën.

Sipas eurodeputetit, pavarësisht këtyre proceseve, kohët e fundit është shtuar debati politik rreth zhvillimit të infrastrukturës së gazit fosil. Kjo po ndodh edhe pse Kosova nuk disponon aktualisht treg të gazit, rrjet për shpërndarjen e tij, kapacitete magazinuese apo një bazë të përcaktuar të kërkesës.

Në njërën prej tri pyetjeve të parashtruara, Waitz kërkon vlerësimin e Komisionit Evropian për propozimet që synojnë ndërtimin e infrastrukturës së re të gazit fosil në vendet kandidate ku një sistem i tillë nuk ekziston. Ai pyet se si përputhen këto propozime me synimet e Agjendës së Gjelbër, përgjegjësitë që rrjedhin nga Komuniteti i Energjisë dhe procesin e përgatitjes së NECP-së.

Waitz kërkon gjithashtu të sqarohet nëse investimet e mundshme energjetike nga shtetet e treta dhe partnerët ndërkombëtarë duhet të harmonizohen me strategjitë kombëtare të energjisë, të miratuara prej vendeve kandidate, si dhe me situatën konkrete në terren. Sipas pyetjes së tij, kjo do të garantonte përputhjen me tranzicionin energjetik që mbështetet nga Bashkimi Evropian.

Çështja e tretë lidhet me mënyrën se si Komisioni Evropian synon të ndihmojë vendet e zgjerimit në zhvillimin e një debati publik të mbështetur në fakte dhe në planifikimin strategjik. Kërkesa vjen në kushtet kur diskutimet mbi gazin fosil po zënë gjithnjë e më shumë vend në debatin politik, megjithëse objektivat afatgjata përfshijnë dekarbonizimin, zgjerimin e burimeve të ripërtëritshme të energjisë, përmirësimin e efikasitetit energjetik dhe reduktimin e emetimeve të gazrave serrë.

The post Waitz kërkon sqarime nga Komisioni Evropian për planet e gazit në Kosovë appeared first on Albeu.com.

Gjatë ceremonisë së vendosjes së gurthemelit për parkun solar 105 megavat në Kramovik të Rahovecit, kryeministri në detyrë Albin Kurti bëri të ditur se Kosova është duke shqyrtuar mundësinë e furnizimit me gaz të lëngëzuar nga Shtetet e Bashkuara. Ky bashkëpunim, sipas tij, do të realizohej përmes termocentralit të Vlorës në Shqipëri.

Kurti vlerësoi edhe dimensionin e veçantë të këtij projekti për raportet me mërgatën. Ai theksoi se kompania drejtuese e konsorciumit, Orllati Group, e rritur në Zvicër, po sjell në Kosovë përvojë, kapital dhe standarde të larta pune përmes një investimi afatgjatë.

Kreu i qeverisë kujtoi se për dekada mërgata i ka qëndruar pranë Kosovës në periudhat më sfiduese. Ai vuri në dukje se gjithnjë e më shumë sipërmarrës nga diaspora po kthehen me investime, prodhim, teknologji dhe vende të reja pune, çka përbën një fazë të re dhe tejet të rëndësishme të kontributit të tyre.

Kurti shprehu gjithashtu mirënjohje për qeverinë amerikane, e cila ka ofruar mbështetje në përgatitjen dhe hartimin e ankandit të parë solar. Ekspertiza e SHBA-ve, sipas tij, ka ndihmuar që procesi të ndjekë praktikat më të mira ndërkombëtare dhe të frymëzojë besim te investitorët.

Duke kaluar te projektet e tjera energjetike, kryeministri njoftoi se ankandi i radhës për kapacitete të reja të energjisë së erës, deri në 100 megavat, ka hyrë në fazën përfundimtare të dorëzimit të ofertave. Ai saktësoi se janë tre kompani të parakualifikuara: një nga Franca, një nga Gjermania dhe Kosova, dhe një nga Turqia, të cilat zotërojnë përvojën dhe ekspertizën e nevojshme.

Ndërkohë, Kurti vuri në dukje se parku i erës në Selac, me kapacitet 70 megavat, është pranë përfundimit. Nga vendi ku po mbahej ceremonia, ai tregoi se turbinat e këtij parku në Zatriq dalloheshin në horizont. Gjithashtu, ai bëri me dije se Korporata Energjetike e Kosovës (KEK), me mbështetje nga Banka Gjermane për Zhvillim (KfW), ka shpallur tenderin për parkun e saj solar me kapacitet minimalisht 100 megavat.

Kurti nënvizoi rolin në rritje të burimeve të ripërtëritshme në peizazhin energjetik. Ai shpjegoi se këto teknologji, përveçse janë të pastra, vitet e fundit janë bërë gjithnjë e më konkurruese për nga kostoja. Burime si dielli dhe era, shtoi ai, janë të pashtershme dhe nuk kanë shpenzime lënde djegëse, duke kontribuar kështu në zvogëlimin e varësisë nga importi.

Më tej, ai zbuloi se Qeveria po investon në sisteme baterish për të ruajtur energjinë, me një grant prej 202 milionë dollarësh nga Korporata e Sfidave të Mijëvjeçarit (MCC). Ai shprehu mirënjohjen për administratën Trump, që vitin e kaluar vendosi të vazhdojë programin kompakt me Kosovën, dhe tha se pas këtij vendimi puna ka ecur me intensitet. Kurti njoftoi se gjatë muajit gusht pritet ofertimi nga kompanitë e kualifikuara amerikane për ndërtimin e sistemeve të baterive me kapacitet 170 megavat për dy orë – gjithsej 340 megavat-orë – dhe që ndërtimi do të fillojë vitin e ardhshëm.

Në fund, kryeministri në detyrë lidhi sigurinë energjetike me atë ekonomike dhe kombëtare, veçanërisht në kushtet e paqëndrueshmërisë gjeopolitike dhe luhatjeve të çmimeve në bursat ndërkombëtare. Ai argumentoi se çdo megavat-orë e prodhuar nga burimet e brendshme e zvogëlon ekspozimin ndaj krizave të jashtme dhe e forcon mbështetjen për një ekonomi në rritje.

The post Kurti: Po shqyrtohet mundësia e furnizimit me gaz të lëngëzuar nga SHBA appeared first on Albeu.com.

Anu Prattipati, E ngarkuara me Punë në Ambasadën e SHBA-së në Kosovë, ka përsëritur thirrjen që Kosova të diversifikojë burimet e saj të energjisë duke përfshirë gazin natyror të lëngshëm amerikan, si një hap për të garantuar investimet e ardhshme nga Shtetet e Bashkuara.

Këtë mesazh ajo e dha gjatë ceremonisë së ndarjes së Çmimit të Partneritetit SHBA-Kosovë.

Në të njëjtën kohë, Prattipati ka përshëndetur edhe vendimin e Kosovës për largimin e tarifave doganore ndaj mallrave amerikane.

Në një postim të ambasadës thuhet se “E Ngarkuara me Punë e SHBA-së, Anu Prattipati, mori pjesë në ceremoninë e ndarjes së Çmimit të Partneritetit SHBA-Kosovë, ku u vlerësuan anëtarët e Odës Ekonomike Amerikane në Kosovë për kontributin e tyre në forcimin e tregtisë mes Shteteve të Bashkuara dhe Kosovës.

Më tej, sipas këtij postimi, në fjalimin e saj ajo përshëndeti vendimin e Kosovës për heqjen e tarifave doganore për mallrat amerikane dhe kërkoi që vendi të diversifikojë furnizimin me energji përmes gazit natyror të lëngshëm (LNG) nga SHBA-ja, me synimin për të siguruar investimet e ardhshme amerikane”.

Disa javë më parë, përmes një editoriali, Prattipati i pati bërë thirrje Kosovës që të përfshihet në projektet amerikane të gazit natyror që janë planifikuar në Ballkan, në mënyrë që të garantojë të ardhmen e saj energjetike.

Ajo kishte theksuar se Kosova duhet të lëvizë shpejt për ta shfrytëzuar këtë mundësi, duke nënvizuar se koha në dispozicion po shkon drejt fundit.

Sipas saj, vendi mund të lidhet përmes projekteve rajonale, si Korridori Vertikal i Gazit dhe terminali lundrues i gazit natyror në Kroaci, ose përmes gazsjellësit që është në ndërtim për të lidhur terminalin e Gazit Natyror të Lëngshëm në Aleksandrupolis në Greqi me Shkupin në Maqedoninë e Veriut.

Prattipati ka paralajmëruar gjithashtu se çdo vonesë në marrjen e një vendimi të tillë mund ta lërë Kosovën të vetmin vend në Ballkanin Perëndimor pa qasje në gazin natyror të lëngshëm amerikan.

The post Prattipati kërkon që Kosova ta zgjerojë furnizimin energjetik me gaz natyror të lëngshëm nga SHBA-ja appeared first on Albeu.com.

Profesori amerikan Daniel Serwer vlerëson se projekti për gazin amerikan në Kosovë duhet shqyrtuar me kujdes të veçantë dhe mbi bazën e interesave strategjike të vendit.

Duke komentuar faktin që Qeveria e Kosovës ende nuk e ka pranuar këtë projekt, ai tha në intervistë se gazi amerikan është i kushtueshëm. Sipas tij, është e kuptueshme pse Shtetet e Bashkuara të Amerikës janë të interesuara për një marrëveshje të tillë, por nënvizoi se vendimi përfundimtar duhet të merret nga vetë Kosova.

“Gazi amerikan është shumë i shtrenjtë. E kuptoj pse amerikanët duan që Kosova ta marrë atë. Do të ndihmonte në plotësimin e pamjes në Ballkan. Dhe kjo administratë, kjo administratë amerikane, është një administratë transaksionale. Ajo dëshiron të bëjë marrëveshje. Kështu që mendoj se Kosova duhet të flasë me amerikanët, por gjithashtu mendoj se Kosova duhet të marrë në konsideratë interesat e veta dhe të marrë një vendim mbi këtë bazë”, tha ai.

Në pjesën e intervistës që lidhej me deklaratën e presidentit të Serbisë, Aleksandar Vuçiq, i cili ka mbrojtur Milan Radoiçiqin, Serwer u shpreh se ka besim tek sistemi gjyqësor për trajtimin e kësaj çështjeje, ndërsa komentet e Vuçiqit i cilësoi si të nxitura nga interesi politik.

“Kam besim të plotë në sistemin gjyqësor këtu për t’u marrë me këtë çështje. Mendoj se zoti Vuçiq po thotë gjëra për përfitimin e tij politik, në vend që të bëjë atë që duhet të bëjë, që është të heqë dorë nga incidenti i Banjskës dhe ta ndjekë penalisht vetë. Sistemi gjyqësor serb duhet t’i ndjekë penalisht autorët”, tha ai.

Serwer foli edhe për krizën institucionale në Kosovë, për të cilën tha se i ka kushtuar vendit kohë të rëndësishme për shkak të paqëndrueshmërisë politike dhe proceseve të gjata zgjedhore.

“Të gjithë janë të ngopur me krizën. Të gjithë mendojnë se kanë humbur diçka nga ky vit, një vit e gjysmë nga tre palë zgjedhje. Dhe mendoj se kjo është e vërtetë. Mendoj se nuk ka qenë një kohë produktive. Kjo ndodh veçanërisht në sistemet parlamentare. Sinqerisht, Shtetet e Bashkuara kanë pasur një kohë të vështirë edhe për një vit e gjysmë të fundit. Por është koha, e dini, që institucionet tona të jenë pak më të konsoliduara se institucionet e Kosovës.”, tha ai.

Në të njëjtën kohë, ai dha mesazhin se tashmë ka ardhur momenti që institucionet e Kosovës të tregojnë se janë në gjendje të funksionojnë, përmes zgjedhjes së një presidenti dhe formimit të një qeverie të re.

The post Kosova duhet të vendosë sipas interesave të saj për projektin e gazit amerikan, thotë Serwer appeared first on Albeu.com.

Ajo ka theksuar se pavarësia energjetike është pjesë përbërëse e pavarësisë shtetërore dhe se diskutimi për gazin amerikan përfshin sigurinë, ekonominë, diplomacinë, partneritetin strategjik dhe të ardhmen e vendit.

Çitaku ka kritikuar Lëvizjen Vetëvendosje, duke thënë se për vite me radhë ka kundërshtuar pothuajse çdo projekt që do t’i sillte Kosovës më shumë pavarësi energjetike, fillimisht në opozitë e më pas në qeveri, shpeshherë edhe përmes formave të dhunshme.

Në postimin e saj, ajo është shprehur se Kosova po përballet me një nga momentet më të rëndësishme strategjike që nga shpallja e pavarësisë.

Sipas saj, në një kohë kur siguria energjetike po merr peshë të njëjtë me sigurinë ushtarake, vendimet që merren sot do të ndikojnë jo vetëm në mirëqenien e qytetarëve, por edhe në pozitën e Kosovës në hartën gjeopolitike në dekadat e ardhshme.

Ajo ka nënvizuar se luftërat moderne nuk zhvillohen vetëm me tanke dhe armë, por edhe përmes energjisë, zinxhirëve të furnizimit, kontrollit mbi burimet strategjike dhe aftësisë së shtetit për t’i mbrojtur qytetarët nga krizat.

Prandaj, sipas Çitakut, kur bëhet fjalë për gazin amerikan, diskutimi nuk kufizohet vetëm te energjia, por prek drejtpërdrejt sigurinë, ekonominë, diplomacinë, partneritetin strategjik dhe të ardhmen e Kosovës.

Ajo ka thënë se tashmë po shihen pasojat e kësaj politike, duke shtuar se Kosova po e paguan energjinë më shtrenjtë se kurrë më parë, ndërsa importet e energjisë po rriten nga viti në vit.

Sipas saj, bizneset po dëmtohen, ndërsa familjet po përballen me fatura gjithnjë e më të larta dhe gjithnjë e më të papërballueshme.

Çitaku ka shtuar se, ndërsa vendet e rajonit po krijojnë lidhje të reja energjetike, po e diversifikojnë furnizimin dhe po e forcojnë sigurinë e tyre, Kosova ka mbetur jashtë.

Ajo ka deklaruar se vetëm Kosova vazhdon ta refuzojë një mundësi që, sipas saj, është mbështetur vazhdimisht nga aleati më i madh strategjik i vendit, Shtetet e Bashkuara të Amerikës.

Në fund, Çitaku ka theksuar se partneriteti me SHBA-në nuk dëshmohet vetëm me deklarata, por me vendime dhe projekte konkrete, duke shtuar se koha e izolimit duhet të marrë fund dhe se Kosova duhet të jetë pjesë e projekteve strategjike të Perëndimit, jo vetëm spektatore e tyre.

The post Çitaku: Debati për gazin amerikan lidhet me sigurinë kombëtare të Kosovës appeared first on Albeu.com.

Në një postim të publikuar në Facebook, Aliçkaj u shpreh se kundër gazit ekzistojnë shumë më tepër argumente sesa në favor të tij. Ai theksoi se në këtë debat nuk duhet të përdoren as dashuria për Amerikën dhe as akuzat për anti-amerikanizëm si bazë arsyetimi.

Sipas Aliçkajt, ky investim duhet të analizohet nga ekspertët e fushës, ndërsa vendimi përfundimtar të merret duke u mbështetur te interesi ekonomik dhe jo te llogaritjet politike. Po ashtu, ai vlerësoi se protestat pro ose kundër gazit do të ishin të panevojshme dhe hodhi kritika edhe ndaj një pjese të mediave për mënyrën se si po e trajtojnë këtë temë.

Postimi i Aliçkajt në Facebook:

Nuk është e vërtetë i nderuar #avdullahhoti! Ka shumë argumente kundër gazit dhe vetëm disa për gazin.

Dashuria për Amerikën nuk është arësye për qazin dhe “anti-amerikanizmi” i trilluar nuk është arësye kundër gazit. Është naivitet i skajshëm të pretendohet se një çështje e vetme i prishë marëdhëniet me Amerikën.

Mos të flasim për protesta pro ose kundër gazit. Do të ishin qesharake.

Ky investim duhet shqyrtuar nga ekspertët e lëmisë dhe pastaj të vendoset a të pranohet. Vendimi për këtë duhet të jetë interesi ekonomik, jo politik.

PS. Shumica e mediave dhe gazetarucave të tyre janë të shitur te forcat anti-shqiptare. Mos u bazo në to fare.

The post Aliçkaj i kundërpërgjigjet Hotit për projektin e gazit me qëndrim të prerë appeared first on Albeu.com.

Çmimet e gazit me shumicë në Evropë u rritën të enjten në nivelin më të lartë që nga tetori i vitit 2023. Rritja ndodhi pas vendimit të Ukrainës që ndaloi kalimin tranzit të gazit rus përmes territorit të saj drejt Evropës nga 1 janari. Moska do të humbasë mbi 5 miliardë dollarë në vit. Ukraina do të humbasë rreth 800 milionë dollarë që i siguronte nga tarifat. Megjithatë, ndikimi në Evropë do të jetë i kufizuar, thotë analisti Thomas O’Donnell.

“Të gjithë kanë qenë të përgatitur për këtë. Sigurisht, ka fitues dhe humbës deri në një pikë të caktuar. Disa vende si Sllovakia, Hungaria dhe Austria janë më të varura nga kjo se të tjerat. Ato nuk do të kenë mungesa gazi, por do të duhet të paguajnë më shumë, siç po bëjnë gjithë të tjerët”, thotë zoti O’Donnell nga Qendra ‘Wilson’.

Presidenti ukrainas Volodymyr Zelensky tha muajin e kaluar se ai nuk do t’i jepte më Rusisë “mundësinë për të fituar miliarda dollarë”, ndërsa forcat e saj vazhdojnë agresionin në tokën e Ukrainës. Kryeministri sllovak Robert Fico është i afërt me Presidentin rus Vladimir Putin. Të dy u takuan në Moskë muajin e kaluar.

Kryeministri Fico e kundërshton mbështetjen perëndimore për Kievin. Gjatë një fjalimi që mbajti të mërkurën, pasi Ukraina ndërpreu kalimin e gazit rus, zoti Fico akuzoi bllokun evropian për sakrifikimin e interesave të anëtarëve më të vegjël për ato që ai i quajti qëllime “të pakuptimta” gjeopolitike.

“Kjo do të ketë ndikim drastik për të gjithë ne në Bashkimin Evropian, por jo për Federatën Ruse”, tha kryeministri Fico.

Në realitet, Bashkimi Evropian e ka ulur tejmase varësinë e tij nga gazi rus, pjesërisht falë rritjes së madhe të importeve të gazit nga Shtetet e Bashkuara. Në vitin 2024 importet e gazit rus përmes Ukrainës përbënin rreth 5% të furnizimeve totale të Evropës. Një pjesë e gazit u dërgua në Evropën Perëndimore përmes Sllovakisë që, sipas analistit O’Donnell, shpjegon shqetësimet e kryeministrit sllovak.

“Sllovakia fitonte rreth gjysmë miliardë dollarë nga tarifat e kalimit të gazit rus përmes sistemit sllovak të tubacioneve”, thotë zoti O’Donnell nga qendra ‘Wilson’.

Përpara fillimit të agresionit rus në Ukrainë, në shkurt të vitit 2022, firma shtetërore ruse ‘Gazprom’ ishte furnizuesi më i madh i gazit në Evropë. Sipas analistit O’Donnell, udhëheqësi rus Putin e llogariti gabim përgjigjen e Evropës ndaj luftës në Ukrainë.

“Presidenti Putin e portretizon veten si një nacionalist i madh rus. Ky nacionalist i madh rus sapo humbi një nga bizneset më të mëdha që Rusia ka pasur ndonjëherë”.

Rrugët e tjera të furnizimit të Moskës për në Evropë janë të kufizuara. Tubacioni ‘Yamal-Evropë’, përmes Bjellorusisë, u mbyll në vitin 2022. Disa muaj më vonë, gazsjellësi ‘Nord Stream’ nën Detin Baltik për në Gjermani u sabotua. Rusia është ende në gjendje të furnizojë me gaz Hungarinë, Turqinë dhe Serbinë përmes tubacionit ‘TurkStream’./ VOA

The post Ukraina bllokon kalimin e gazit rus në Evropë, rriten çmimet e gazit appeared first on Albeu.com.

“Kur Putin është bërë president i Rusisë më shumë se 25 vjet më parë, sasia e gazit natyror që ka kaluar përmes Ukrainës në Evropë, ka qenë më shumë se 130 miliardë metra kub në vit. Tani është zero”, ka thënë Zelensky në X – platormë e njohur më parë si Twitter.

“Kjo është një prej humbjeve më të mëdha të Moskës. Si rezultat i shfrytëzimit të energjisë si armë, nga ana e Rusisë, dhe shantazhimit të partnerëve, Moska e ka humbur një prej tregjeve më profitabile dhe të qasshme gjeografikisht”, ka thënë ai.

Komentet e Zelenskyt kanë ardhur pasi gjiganti shtetëror rus, Gazprom, ka thënë se i ka pezulluar furnizimet me gaz në Evropë përmes gazsjellësit që kalon nëpër Ukrainë, pasi Kievi ka refuzuar të vazhdojë kontratën e nënshkruar para se Moska të niste luftën në Ukrainë, në shkurt të vitit 2022.

Kjo do të thotë se Ukraina do të humbë 800 milionë dollarë në vit që i siguronte nga tarifat e transitit.

Gazpromi, në anën tjetër, do të humbë gati 5 miliardë dollarë, në mungesë të shitjes së gazit.

Zelensky ka thënë se shumica e shteteve evropiane u janë përshtatur ndryshimeve, por ka përmendur që Ukraina dhe aleatët duhet ta mbështesin Moldavinë në periudhën e transformimit energjetik.

Moldavia është ende pjesërisht e varur prej gazit rus.

Zelensky ka thënë se Ukraina shpreson në rritjen e furnizimeve me gaz amerikan në Evropë, dhe që presidenti i zgjedhur amerikan, Donald Trump, veçse e ka përmendur këtë mundësi.

“Sa më shumë gaz i qasshëm në tregje për partnerët e vërtetë të Evropës, aq më shpejt do të eliminohet varësia ndaj Rusisë”, ka thënë ai.

Ky vendim i Gazpromit, i bërë publik më 1 janar përmes një postimi në Telegram, nuk pritet të shkaktojë probleme të mëdha te konsumatorët evropianë, për shkak të përpjekjeve të tyre afatgjata që t’i shmangen varësisë nga gazi rus.

Sllovakia, Hungaria, Austria, dhe disa vende të Ballkanit kanë vazhduar të blejnë gazin rus përmes Ukrainës – ndonëse të sasi të zvogëluara – edhe pas nisjes së luftës.

Shumë vende evropiane u janë kthyer burimeve alternative, duke përfshirë blerjen e gazit të lëngshëm natyror nga Shtetet e Bashkuara, Katari dhe Norvegjia.

Lufta në Ukrainë ka nisur më 24 shkurt të vitit 2022.

Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL

The post Zelensky: Dhënia fund e transitit të gazit rus është humbje për Moskën appeared first on Albeu.com.

Mediat greke shkruajnë se një 16-vjeçar ka humbur jetën për shkak të asfiksimit nga gazi në banesë, ndërsa motrat tij janë dërguar me urgjencë në spital. Sipas autoriteteve, tragjedia u shmang falë nënës 47-vjeçare të familjes, e cila zbriti në katin e poshtëm të banesës për të zgjuar fëmijët e saj dhe i gjeti ata të gjithë në gjendje të rëndë nga një rrjedhje gazi.

Sipas mediave, babai i fëmijëve i cili flinte në katin e dytë është gjetur në gjendje të mirë dhe nuk ka kërkuar shtrimin në spital, ndërsa nëna është dërguar në spital, por është në gjendje të mirë.

Hetimet për rrethanat që çuan në këtë tragjedi po kryhen nga Policia e Ksantit, në bashkëpunim me Shërbimin Zjarrfikës. Në kuadër të hetimeve paraprake, është dhënë urdhri për kryerjen e një ekspertize mjeko-ligjore për trupin e 16-vjeçarit, si dhe një ekspertizë toksikologjike.

Po ashtu, janë kërkuar ekspertiza teknike për instalimin e botit të gazit pranë banesës së tyre, që dyshohet të jetë vendosur 24 orë para ngjarjes fatale. Burime policore kanë bërë me dije se ishte krijuar një mjedis mbytës në zonën ku ndodheshin dhomat e gjumit të fëmijëve, dhe se një ditë më parë ishte punuar jashtë shtëpisë për vendosjen e një boti gazi.

The post TRAGJIKE/ Asfiksohen nga gazi 4 fëmijët e një familjeje, humb jetën 16-vjeçari, në gjendje kritike motrat e tij appeared first on Albeu.com.