Gabriel Martinelli ka mbyllur kapitullin e tij te Arsenali, pasi sulmuesi brazilian është transferuar zyrtarisht te Al-Hilal për një shumë që shkon në rreth 70 milionë euro.

25-vjeçari ka firmosur një kontratë katërvjeçare me klubin saudit, i cili kryeson kampionatin së bashku me Al-Nassr të Cristiano Ronaldos.

Paketa e transferimit përbëhet nga një pagesë e garantuar, si edhe një klauzolë që i mundëson Arsenalit përfitime nga një shitje e ardhshme. Me këtë marrëveshje përfundon qëndrimi shtatëvjeçar i Martinellit në veri të Londrës.

Braziliani u transferua te Arsenali në vitin 2019, kur erdhi nga Ituano, ndërsa kontrata e tij me klubin londinez kishte ende 12 muaj afat.

Mikel Arteta, megjithatë, kishte sinjalizuar se sulmuesi nuk bënte pjesë në planet e tij për këtë sezon dhe se hapësirat për aktivizimin e tij do të ishin të kufizuara nëse do të qëndronte në skuadër.

Martinelli nuk u përfshi në dy listat e para të Arsenalit për ndeshjet e këtij sezoni, ndërsa mungesa e tij në sfidën hapëse kundër Coventryt nxiti kritika nga ish-sulmuesi i klubit, Ian Wright.

“Mënyra se si po trajtohet Martinelli aktualisht më bën të ndihem vërtet në siklet. E di që mund të duan që ai të largohet dhe shumë njerëz mund të thonë se ka ardhur koha për këtë. Por ka mënyra për ta bërë këtë dhe duhet të merret parasysh edhe mënyra se si ai dëshiron të largohet”, kishte thënë Wright.

Në videon e prezantimit të publikuar në rrjetet sociale të Al-Hilalit, lojtari u shpreh: “Jam krenar që jam blu, krenar që jam pjesë e Al-Hilal”.

Te skuadra e re, Martinelli do të luajë së bashku me sulmuesin anglez Ollie Watkins, i cili u bashkua me Al-Hilalin pas largimit nga Aston Villa për afërsisht 60 milionë euro.

Gjatë kësaj vere, klubi saudit ka afruar edhe anësorin holandez Crysencio Summerville nga West Ham, ndërsa në krye të ekipit ndodhet trajneri italian Simone Inzaghi.

Vlerësohet se paga e ofruar nga Al-Hilal është dukshëm më e lartë se ajo që Martinelli merrte te Arsenali, ku raportohej se përfitonte rreth 210 mijë euro në javë.

Në sezonin e kaluar, braziliani u aktivizua në 53 ndeshje në të gjitha kompeticionet dhe realizoi 11 gola. Në të njëjtin sezon, Arsenali fitoi titullin e Ligës Premier për herë të parë që nga viti 2004.

The post Zyrtare: Gabriel Martinelli transferohet te Al-Hilal në Arabinë Saudite appeared first on Albeu.com.

Gabriel Martinelli është shumë pranë largimit nga Arsenali, pasi Al Hilal ka arritur një marrëveshje verbale për transferimin e sulmuesit brazilian.

Fabrizio Romano raporton se operacioni kap vlerën e mbi 65 milionë eurove, ku përfshihen edhe bonuset dhe shtesat e përcaktuara në kontratë.

Gazetari i njohur për informacionet e merkatos ka bërë të ditur gjithashtu se marrëveshja ka marrë konfirmimin “Here We Go”, çka tregon se palët kanë dhënë miratimin për përmbylljen e saj.

25-vjeçari pritet të firmosë një kontratë afatgjatë me klubin që militon në Superligën e Arabisë Saudite.

Martinelli, i cili përfaqëson Brazilin, raportohet se ka marrë autorizimin për të udhëtuar drejt Arabisë Saudite brenda 24 orëve të ardhshme. Atje ai do të kryejë procedurat e fundit për të mbyllur transferimin.

Lajmi është konfirmuar edhe nga Matteo Moretto, ndërsa mbeten për t’u realizuar vetëm hapat e fundit për zyrtarizimin e lëvizjes.

Kalimi i tij do të sillte një ndryshim të rëndësishëm në repartin e sulmit të Arsenalit.

Braziliani u shndërrua në një prej futbollistëve kryesorë të ekipit të drejtuar nga Mikel Arteta pas transferimit nga Ituano në vitin 2019.

Pas shtatë sezonesh në veri të Londrës, Martinelli ndodhet pranë nisjes së një etape të re në karrierën e tij.

Ai po largohet nga Arsenali pasi kontribuoi në triumfin e klubit në Ligën Premier sezonin e kaluar.

Ndërkohë, Al Hilal po forcon ndjeshëm repartin ofensiv. Martinelli pritet të luajë së bashku me sulmuesin e Aston Villës, Ollie Watkins, i cili gjithashtu është pjesë e projektit të klubit saudit.

The post Martinelli pranë transferimit te Al Hilal, marrëveshja kalon 65 milionë euro appeared first on Albeu.com.

Al-Hilal ka përshpejtuar kontaktet me Arsenalin në përpjekje për të siguruar transferimin e sulmuesit brazilian Gabriel Martinelli.

Eksperti i transferimeve, Ben Jacobs, bën të ditur se klubi nga Arabia Saudite beson se mund të arrijë së afërmi një akord me Arsenalin për 25-vjeçarin.

Propozimi i fundit i paraqitur nga Al-Hilal arrin në 55 milionë euro, ndërsa përfshin edhe 4 milionë euro të tjera në bonuse të mundshme.

Bisedimet mes klubeve janë përqendruar te mënyra e strukturimit të marrëveshjes. Paralelisht, Al-Hilal po negocion me Martinellin edhe kushtet personale të kontratës së tij.

Raportohet se braziliani e konsideron të mundshëm kalimin në Arabinë Saudite, pasi edhe në të kaluarën ka qenë objekt interesi nga klube të këtij vendi.

Megjithatë, Arsenali synon të përfitojë një shumë më të lartë, afërsisht 60 milionë euro, për të pranuar largimin e sulmuesit.

Martinelli u transferua te Arsenali nga Ituano në vitin 2019. Që prej atëherë, ai ka regjistruar 278 paraqitje dhe ka realizuar 62 gola për klubin londinez.

The post Al-Hilal shton përpjekjet për marrëveshjen e Gabriel Martinellit appeared first on Albeu.com.

Arsenali po zhvillon bisedime me Al-Hilalin për transferimin e Gabriel Martinellit, i cili mund të largohet nga klubi londinez në ditët e fundit të afatit kalimtar. Skuadra saudite e ka vendosur brazilianin 25-vjeçar ndër objektivat kryesorë të saj për këtë periudhë.

Sipas David Ornstein, Arsenali e vlerëson Martinellin rreth 70 milionë euro, ndërsa futbollisti është i gatshëm të marrë në konsideratë një transferim në Arabinë Saudite.

Diskutimet mes dy klubeve vijojnë, megjithatë ende nuk është arritur një marrëveshje përfundimtare.

Nëse transferimi realizohet për një shumë të përafërt me vlerësimin e Arsenalit, klubi do të regjistronte shitjen më të shtrenjtë në historinë e tij.

Aktualisht, rekordi i përket Alex Oxlade-Chamberlain, i cili në vitin 2017 kaloi te Liverpooli për rreth 38 milionë euro.

Martinelli iu bashkua Arsenalit në vitin 2019, pasi u transferua nga Ituano. Në aventurën e tij në Londër, braziliani ka realizuar 62 gola në 278 paraqitje.

E ardhmja e tij te “Topçinjtë” është vënë në pikëpyetje të fortë, veçanërisht pasi ai nuk ishte pjesë e skuadrës as në Community Shield dhe as në ndeshjen e parë të Premier Ligës.

Më herët, braziliani kishte hedhur poshtë mundësinë e transferimit te Galatasaray, por qëndrimi i tij duket se ka ndryshuar dhe tani ai është i hapur për një kalim te Al-Hilali.

Një marrëveshje pranë shumës së kërkuar nga Arsenali do ta kthente Martinellin në shitjen rekord të klubit, duke rrëzuar një rekord të vendosur në vitin 2017 dhe që ka mbijetuar për 9 vjet.

Përveç thyerjes së rekordit, të ardhurat nga shitja e sulmuesit brazilian do t’i krijonin Arsenalit mundësi të reja financiare për të synuar përforcime të tjera përpara përfundimit të afatit kalimtar.

The post Martinelli drejt Al-Hilalit, Arsenali pranë thyerjes së rekordit 9-vjeçar të shitjeve appeared first on Albeu.com.

Al Hilal ka nisur lëvizjet për të siguruar shërbimet e anësorit të Arsenalit, Gabriel Martinelli, raporton gazetari i njohur David Ornstein.

Skuadra saudite ka kontaktuar përfaqësuesit e 25-vjeçarit për të diskutuar mundësinë e një transferimi. Ende nuk është arritur asnjë marrëveshje, por kontaktet mes palëve vazhdojnë, ndërsa braziliani është i gatshëm të vlerësojë këtë opsion.

Për ta lejuar largimin e Martinellit, Arsenali kërkon afërsisht 60 milionë euro. Braziliani është nën kontratë me “Topçinjtë” deri në vitin 2027, me një klauzolë që mundëson zgjatjen e marrëveshjes edhe për një vit.

Gjatë kësaj vere, e ardhmja e sulmuesit ka qenë objekt i shumë zërave. Më parë, Arsenali kishte pranuar ofertën prej 45 milionë eurosh të Galatasarayt, por përfaqësuesit e futbollistit e kishin informuar klubin londinez se Martinelli nuk dëshironte të transferohej në Turqi.

Ai nuk u përfshi as në grupin e Arsenalit për dy përballjet e para të sezonit: fitoren kundër Manchester Cityt në Community Shield dhe ndeshjen e parë të Ligës Premier ndaj Coventry Cityt.

Klubi londinez do ta shesë brazilianin nëse paraqitet një ofertë që përmbush vlerësimin e tij, ndonëse vetë Martinelli nuk po ushtron presion për t’u larguar nga “Emirates”.

Sezoni 2025/26 rezultoi i ngjeshur për Martinellin, i cili luajti 53 ndeshje. Arsenali fitoi titullin e parë të Ligës Premier që nga sezoni 2003/04, si edhe mbërriti në finalen e Ligës së Kampionëve.

Që nga ardhja e tij nga Ituano në vitin 2019, Martinelli ka grumbulluar 278 paraqitje me ekipin e parë të Arsenalit dhe ka realizuar 62 gola.

The post Al Hilal hap bisedimet për Gabriel Martinellin, Arsenali kërkon 60 milionë euro appeared first on Albeu.com.

Gabriel Martinelli nuk e konsideron mundësinë e kalimit te Galatasaray këtë verë, edhe pse klubi turk ka bërë një ofertë për anësorin brazilian.

Gazeta “The Athletic” raporton se në drejtim të Arsenalit ka mbërritur një propozim prej 45 milionë eurosh nga Galatasaray, por 25-vjeçari nuk është i interesuar të transferohet në Turqi.

Marrëveshja aktuale e Martinellit me “Topçinjtë” përfundon në vitin 2027. Klubi londinez zotëron gjithashtu të drejtën për ta zgjatur kontratën deri në vitin 2028, ndonëse bisedimet për rinovim ende nuk kanë filluar.

Arsenali e ka brazilianin mes futbollistëve për të cilët mund të marrë në shqyrtim oferta, nëse paraqitet një shumë e konsiderueshme. Pavarësisht kësaj, vetë Martinelli nuk dëshiron të largohet nga “Emirates”.

Gjatë merkatos së kësaj vere, Arsenali siguroi shërbimet e anësorit grek Christos Tzolis nga Club Brugge. Klubi provoi gjithashtu të transferonte Vinicius Junior, por braziliani më pas rinovoi kontratën me Real Madridin.

Nevoja për të ekuilibruar financat bëri që “Topçinjtë” ta nisnin afatin kalimtar me synimin për të shitur disa lojtarë. Leandro Trossard kaloi te Besiktas për 20 milionë euro, ndërsa Christian Norgaard u bashkua me Evertonin për rreth 8.1 milionë euro.

Drejtuesit e Arsenalit, megjithatë, vlerësojnë se para përfundimit të afatit kalimtar duhet të realizohen edhe disa largime të tjera.

Martinelli mbërriti në Londër nga Ituano në vitin 2019. Që prej transferimit të tij, ai ka regjistruar 278 paraqitje me Arsenalin dhe ka realizuar 62 gola.

Në sezonin e fundit, braziliani zhvilloi 53 ndeshje në të gjitha kompeticionet, duke kontribuar me 11 gola dhe shtatë asistime. Paraqitjet e tij ndihmuan Arsenalin të fitonte titullin e Ligës Premier dhe të kualifikohej në finalen e Ligës së Kampionëve.

The post Galatasaray ofron 45 milionë euro, por Gabriel Martinelli nuk pranon të largohet nga Arsenali appeared first on Albeu.com.

Arsenali, kampioni i Anglisë, dhe Galatasaray, kampioni i Turqisë, mund të realizojnë një prej shkëmbimeve më të mëdha në historinë e futbollit. Në operacion mund të përfshihen tre lojtarë me vlerë të përgjithshme prej 155 milionë eurosh.

Fillimisht, Galatasaray kishte shfaqur interesim për Gabriel Martinellin, por brenda 24 orëve situata mori një tjetër rrjedhë dhe u ndërlikua më tej.

Sipas The Guadian, Arsenalit i është ofruar mundësia që braziliani të bëhet pjesë e marrëveshjes për sulmuesin nigerian Victor Osimhen. Ky opsion mund ta tërheqë klubin londinez, i cili është në kërkim të një numri 9 të ri.

Faqja e specializuar Transfermarkt e vlerëson Osimhenin në 75 milionë euro, kurse vlera e Martinellit llogaritet në 45 milionë euro.

Përmasat e shkëmbimit të mundshëm mund të rriten edhe më shumë me përfshirjen e Ethan Nwanerit, kartoni i të cilit vlerësohet nga Transfermarkt në 35 milionë euro.

Në këtë mënyrë, vlera e kombinuar e tre futbollistëve që mund të bëhen pjesë e marrëveshjes arrin në 155 milionë euro, duke e kthyer operacionin potencialisht spektakolar në njërin prej shkëmbimeve më të mëdha në historinë e futbollit.

The post Arsenali mund ta transferojë Osimhenin përmes një shkëmbimi gjigant prej 155 milionë eurosh appeared first on Albeu.com.

Mikel Arteta e ka zhvendosur fokusin te largimet nga skuadra, ndërsa mediat raportojnë se Arsenali është i hapur të marrë në konsideratë oferta për të paktën pesë futbollistë gjatë kësaj vere.

Katër përforcime janë vënë këtë verë nën urdhrat e trajnerit të “Topçinjve”. Mes tyre është kapiteni i Newcastle, Bruno Guimaraes, për të cilin u paguan rreth 86 milionë euro.

Christos Tzolis mbërriti nga Club Brugge për afro 40 milionë euro, kurse Illan Meslier u afrua si alternativë në portë pasi i përfundoi kontrata me Leeds.

Pas huazimit të suksesshëm gjatë sezonit të kaluar, Arsenali kompletoi edhe transferimin përfundimtar të Piero Hincapie nga Bayer Leverkusen. Marrëveshja kap vlerën e rreth 39 milionë eurove, pa përfshirë bonuset.

Pavarësisht këtyre shpenzimeve, Arteta synon ta përmirësojë më tej ekipin. Prioritet mbetet sulmi, pasi klubi nuk arriti të siguronte yllin e Real Madridit, Vinicius Junior, ndërsa në planet e merkatos mund të përfshihet edhe një qendërmbrojtës.

BBC Sport bën të ditur se Gabriel Martinelli mund të largohet nëse Arsenali merr një ofertë të kënaqshme për të, pas kthimit të lojtarit nga angazhimet me Brazilin në Kupën e Botës.

Mundësinë për të gjetur një klub tjetër e ka edhe bashkëkombësi i tij, Gabriel Jesus. Në të njëjtën pozitë ndodhet gjithashtu mesfushori portugez Fabio Vieira.

Vieira nuk është aktivizuar me Arsenalin që prej vitit 2024, ndërsa gjatë kësaj periudhe ka luajtur në formë huazimi te Porto dhe Hamburgu.

Mes emrave që mund t’i japin lamtumirën klubit londinez figuron edhe 19-vjeçari Ethan Nwaneri, i cili është kthyer pas huazimit te Marseille.

Një tjetër largim i mundshëm është ai i Reiss Nelson, me West Ham që shfaqet si destinacion i mundshëm. Ky klub sapo ka rënë nga Liga Premier.

Sipas The Athletic, Arsenali ka nisur bisedimet me “Çekanët”, pasi trajneri Nuno Espirito Santo dëshiron të shtojë alternativa në repartin ofensiv.

The post Arteta përgatit largimin e pesë lojtarëve nga Arsenali pas investimeve milionëshe appeared first on Albeu.com.

Gabriel Martinelli është nxjerrë në shitje nga Arsenali për këtë verë, ndërsa sulmuesi anësor brazilian u është propozuar klubeve në disa tregje. Kështu raporton gazetari brazilian Bruno Andrade.

Kontrata e Martinellit me Arsenalin është e vlefshme edhe për dy vjet, çka, sipas Andrades, i vendos “Topçinjtë” përballë një momenti “tani ose kurrë”.

Nëse braziliani qëndron në Londër edhe sezonin e ardhshëm, ai do të futet në vitin e fundit të marrëveshjes. Në këtë skenar, Arsenali mund ta ketë më të vështirë të sigurojë një shumë të konsiderueshme nga transferimi i tij.

Për kartonin e Martinellit, klubi anglez raportohet se kërkon të paktën rreth 50 milionë euro dhe ka shqyrtuar mundësinë e gjetjes së një blerësi jashtë Ligës Premier.

Mes klubeve të kontaktuara janë edhe ato turke, përfshirë Galatasarayn. Ato besohet se kanë shfaqur interes për një marrëveshje me vlerë rreth 50 milionë euro, por Martinelli nuk dëshiron të vazhdojë karrierën në Turqi.

Si alternativë e mundshme janë marrë në konsideratë edhe skuadrat e Superligës së Arabisë Saudite, por futbollisti 24-vjeçar e ka refuzuar gjithashtu këtë destinacion.

“Ai iu ofrua Arabisë Saudite, por Martinelli tha jo. Arabia Saudite nuk është një opsion për të”, deklaroi Andrade.

Në këto rrethana, Arsenali ndodhet në një pozitë të ndërlikuar: klubi kërkon ta shesë Martinellin, ndërsa zgjedhjet e lojtarit zvogëlojnë numrin e destinacioneve të afta për të përmbushur vlerësimin prej 50 milionë eurosh.

The post Arsenali synon largimin e Martinellit, braziliani kundërshton transferimin në Turqi ose Arabinë Saudite appeared first on Albeu.com.

Galatasaray ka dorëzuar sot një ofertë zyrtare në vlerën e 45 milionë eurove për Gabriel Martinellin, raporton Sky Sports.

Klubi londinez nuk është shprehur ende rreth propozimit dhe deri tani as nuk e ka pranuar, as nuk e ka refuzuar atë. Sulmuesi brazilian përbën objektivin kryesor të klubit turk gjatë këtij afati kalimtar.

Në ditët e fundit, Galatasaray e ka shtuar ndjeshëm interesimin për Martinellin. Më parë ishte raportuar se klubi turk po konsideronte një ofertë prej 40 milionë eurosh ose se kishte nisur kontaktet e para për transferimin e tij, pasi nuk arriti të përparonte në përpjekjet për të marrë Rafael Leaon nga Milani.

Tashmë, interesimi është konkretizuar me një ofertë zyrtare për Martinellin, e cila është më e lartë se shuma e shqyrtuar fillimisht.

Reprezentuesi i Brazilit ndodhet në vitin e fundit të marrëveshjes së tij me Arsenalin, por klubi anglez zotëron një opsion për zgjatjen e kontratës.

Martinelli ishte pjesë e ekipit të Arsenalit që fitoi titullin e Ligës Premier sezonin e kaluar, edhe pse pati më pak minuta në dispozicion si titullar. Në të njëjtën kohë, londinezët kanë shtuar alternativa të reja në sulm dhe po vazhdojnë të vëzhgojnë mundësi të tjera për përforcimin e krahut të majtë.

Pavarësisht ofertës së Galatasarayt, Arsenali e çmon lojtarin shumë më tepër se 45 milionë euro dhe nuk pritet të miratojë largimin e tij pa gjetur më parë një zëvendësues të përshtatshëm.

The post Galatasaray paraqet ofertë zyrtare prej 45 milionë eurosh për yllin e Arsenalit appeared first on Albeu.com.