Një përzgjedhje që do të nxisë debate të ashpra vjen nga gazeta prestigjioze franceze L’Equipe, e cila ka hartuar formacionin më të mirë të të gjitha kohërave në Kupën e Evropës dhe Ligën e Kampionëve, por në të mungon Cristiano Ronaldo.

Vendimi është marrë nga gazetari i mirënjohur Vincent Duluc dhe ka lënë jashtë pikërisht lojtarin që mban rekordin absolut të golave në këtë kompeticion, një figurë që ka ripërcaktuar standardet e suksesit në turneun më elitar të kontinentit.

Ajo që e bën këtë zgjedhje edhe më tronditëse është palmarja e jashtëzakonshme e sulmuesit portugez. Ai ka ngritur trofeun pesë herë — një herë me fanellën e Manchester United dhe katër herë radhazi me Real Madridin — dhe ka grumbulluar gjithsej 140 gola, më shumë se çdo lojtar tjetër në histori. Për më tepër, Ronaldo kryeson statistikat për numrin më të madh të ndeshjeve të luajtura, golave në fazat me eliminim direkt dhe një sërë rekordesh të tjera individuale që duken të pathyeshme.

Megjithatë, Duluc ka pranuar hapur se ky vendim mund të provokojë “zemërim dhe pakënaqësi” te tifozët, por ka qëndruar pas zgjedhjes së tij.

Logjika pas përjashtimit dhe alternativa e diskutueshme

Sipas arsyetimit të gazetarit francez, kriteret e përzgjedhjes nuk u kufizuan vetëm te shifrat dhe trofetë. Ai argumentoi se në vitet e fundit të karrierës, Ronaldo nuk ruante më të njëjtin nivel kreativiteti dhe aftësie në driblim që e karakterizonte në fillimet e tij.

Për repartin ofensiv, Duluc zgjodhi kombinimin George Best, Lionel Messi, Johan Cruyff dhe Alfredo Di Stéfano, duke e vendosur Bestin pikërisht në pozicionin që shumëkush do t’ia rezervonte Ronaldos.

Këtu lind kontradikta më e habitshme: a është e justifikueshme të përjashtosh një atlet që ka dominuar Ligën e Kampionëve në aspektin e golave, ka fituar garën pesë herë dhe ka qenë protagonist vendimtar në disa nga netët më të paharrueshme evropiane?

Formacioni i plotë dhe polemikat shtesë

Në këtë listë, Duluc ka përfshirë edhe Luka Modrićin, i cili mban gjashtë trofe të Champions-it me Real Madridin. Mesfushori kroat është vendosur në qendër së bashku me Andres Iniestan, me vlerësim të veçantë për mënyrën si kontrollon tempin dhe dinamikën e një sfide. Megjithatë, prania e tij nuk ka gjeneruar aq shumë reagime sa mungesa e Ronaldos.

11-shja e plotë e përzgjedhur nga L’Equipe përbëhet nga: Ray Clemence në portë; Dani Carvajal, Franz Beckenbauer, Franco Baresi dhe Paolo Maldini në mbrojtje; Luka Modrić dhe Andres Iniesta në mesfushë; ndërsa në sulm janë Lionel Messi, Johan Cruyff, George Best dhe Alfredo Di Stéfano. Në krye të skuadrës qëndron Brian Clough, trajneri që udhëhoqi Nottingham Forest drejt dy Kupave të Evropës.

Vlen të theksohet se në këtë formacion nuk figuron asnjë lojtar francez — duke lënë jashtë legjenda si Zinedine Zidane dhe Michel Platini — çka dëshmon se Duluc e mbështeti përzgjedhjen në një perceptim personal për ndikimin e futbollistëve, jo thjesht në numrin e trofeve.

Mund të debatohet gjatë nëse Ronaldo ishte lojtari më i talentuar, më vizionar apo më estetik në historinë e këtij turneu. Por ta përjashtosh atë nga një formacion ideal i një kompeticioni për të cilin ai është golashënuesi rekordmen, pesë herë kampion dhe një nga figurat më përcaktuese të momenteve kyçe, është një veprim që me siguri nuk do të kalojë pa shkaktuar diskutime të nxehta.

The post Golashënuesi më i mirë i historisë së Champions-it, i përjashtuar nga formacioni ideal i L’Equipe appeared first on Albeu.com.

Franco Baresi u nda sot nga jeta në moshën 66-vjeçare, pas një përballjeje të gjatë me një sëmundje të rëndë që kishte prekur mushkëritë. Futbolli humbi një prej figurave të tij më të mëdha, ndërsa kujtimi për të do të mbetet i gjallë për shumë gjatë.

Gjatë gjithë karrierës, Baresi mbrojti ngjyrat kuqezi të Milanit, skuadrës së madhe që me të në formacion ndërtoi një epokë suksesi dhe koleksionoi trofe të rëndësishëm. Paraqitjet e tij e kthyen në një emër të admiruar nga tifozët, por edhe të lakmuar nga rivalët.

Roli i tij nuk u kufizua vetëm te një mbrojtës i jashtëzakonshëm. Baresi u shndërrua në një pikë referimi për breza të tërë futbollistësh dhe në “profesorin” e një grupi yjesh ku bënin pjesë Paolo Maldini, Filippo Goali, Alessandro Costacurta, Mauro Tassotti, Demetrio Albertini dhe Christian Panucci.

Autoriteti dhe klasi i treguar në fushë e çuan gjithashtu në një arritje historike individuale. Baresi u rendit i dyti në garën për “Topin e Artë”, pas bashkëlojtarit të tij te Milani, Marco van Basten.

Me 719 ndeshje të zhvilluara dhe 33 gola të shënuar, ai fitoi gjithsej 22 trofe. Bilanci i tij përfshin 6 tituj kampionë në Itali, 4 Superkupa, 3 Superkupa Europiane, 3 Champions League dhe 1 Botëror për klube. Një pasuri e jashtëzakonshme për një figurë që u bë pjesë e pandashme e historisë së Milanit.

Edhe kombëtarja italiane përfitoi nga prania e një personaliteti të përmasave të tij. Në vitin 1982, Baresi u shpall kampion bote kur ishte vetëm 22 vjeç. Ndërsa në Botërorin e vitit 1990, të zhvilluar në Itali, “Azzurrët” e përfunduan turneun në vendin e tretë.

Katër vjet më vonë, ai dhe shokët e skuadrës arritën deri në finalen e madhe të luajtur në Shtetet e Bashkuara të Amerikës, por e mbyllën kompeticionin si nënkampionë. Në atë turne, Baresi dha gjithçka për të neutralizuar një sulmues të rrezikshëm si Romario, megjithatë trofeu përfundoi në duart e Brazilit.

Me përfundimin e rrugëtimit të tij profesional dhe personal, Baresi la pas një trashëgimi të çmuar. Emri i tij do të vazhdojë të jetojë me nderim, si një prej figurave që “stampuan” historinë e futbollit botëror.

The post Franco Baresi, legjenda e Milanit që la gjurmë të pashlyeshme në historinë e futbollit appeared first on Albeu.com.

Bota e futbollit është tronditur nga lajmi për ndarjen nga jeta të Franco Baresit, ish-kapitenit të Milanit dhe kombëtares italiane. Ai konsiderohet një prej mbrojtësve më të mirë të të gjitha kohërave dhe ndër figurat më të rëndësishme në historinë e këtij sporti.

Baresi u shua në moshën 66-vjeçare, pas një përballjeje të gjatë me një sëmundje të rëndë në mushkëri. Për shkak të saj, ai iu nënshtrua edhe një ndërhyrjeje kirurgjikale vitin e kaluar, por nuk mundi ta fitonte betejën.

Vdekja e legjendës italiane ka shkaktuar dhimbje të madhe në familjen e futbollit. Ndërkohë, mijëra tifozë kanë filluar të grumbullohen në stadiumin San Siro për t’i dhënë lamtumirën e fundit.

AC Milani, klubi ku Baresi ndërtoi statusin e tij si legjendë, reagoi me këtë mesazh: “Historia e AC Milanit vajton ndarjen nga jeta të Franco Baresi. Shembulli i tij personal dhe gjurma që la do ta shoqërojnë klubin përgjithmonë”.

The post Futbolli botëror në zi, shuhet në moshën 66-vjeçare ikona e Milanit, Franco Baresi appeared first on Albeu.com.

AC Milan ka hedhur poshtë zyrtarisht raportimet e përhapura në rrjetet sociale, sipas të cilave legjenda e klubit, Franco Baresi, kishte ndërruar jetë.

Reagimi i klubit italian u publikua të mërkurën në mbrëmje, pasi informacionet e pavërteta për 66-vjeçarin u shpërndanë me shpejtësi në disa platforma dhe shkaktuan shqetësim mes tifozëve dhe familjarëve të tij.

Në deklaratën e tij, klubi theksoi: “AC Milan mohon kategorikisht lajmet e rreme për Franco Baresin që kanë filluar të qarkullojnë në minutat e fundit. Franco po kalon një periudhë të vështirë dhe delikate, ndërsa klubi qëndron plotësisht pranë tij dhe familjes së tij. U bëjmë thirrje të gjithëve të respektojnë privatësinë e tyre dhe të mos përhapin informacione krejtësisht të pabazuara”.

Baresi po përballet me probleme shëndetësore

Gjatë vitit të fundit, Baresi ka kaluar një periudhë të vështirë për sa i përket shëndetit. Fituesi i Kupës së Botës njoftoi në gusht të vitit 2025 se kishte kryer një operacion për heqjen e një noduli pulmonar.

Pas ndërhyrjes kirurgjikale, ai filloi trajtimin me imunoterapi, të cilin vijon ta marrë edhe aktualisht.

Besohet se pikërisht problemet e tij shëndetësore favorizuan përhapjen e shpejtë të lajmit të rremë për vdekjen, duke bërë që shumë persona ta konsideronin atë të vërtetë.

Simbol i përjetshëm i Milanit

Franco Baresi vlerësohet si një prej mbrojtësve më të mëdhenj që ka njohur historia e futbollit, si dhe si një figurë simbolike e Milanit. Ai bën pjesë mes futbollistëve të paktë që e zhvilluan të gjithë karrierën e tyre me të njëjtin klub.

Paraqitjen e parë me skuadrën e parë të Milanit e regjistroi në vitin 1977, ndërsa fanellën kuqezi e veshi deri kur u tërhoq nga futbolli në vitin 1997.

Në 20 vitet e kaluara në “San Siro”, Baresi luajti 716 ndeshje, realizoi 33 gola dhe dha 24 asistime. Së bashku me Paolo Maldinin, Alessandro Costacurtan dhe Mauro Tassottin, ai krijoi një nga repartet mbrojtëse më të njohura në historinë e futbollit.

Me Milanin, gjatë karrierës së tij, ai siguroi tre Liga të Kampionëve, gjashtë tituj të Serie A, dy Kupa Interkontinentale, tre Superkupa të Evropës dhe katër Superkupa të Italisë. Këto arritje e kanë mbajtur atë mes personaliteteve më të respektuara në historinë e klubit.

The post Milani përgënjeshtron zyrtarisht lajmet në rrjetet sociale për vdekjen e Franco Baresit appeared first on Albeu.com.