Fondi i Pensioneve dhe Sigurimit Invalidor transferon çdo vit rreth 13,7 miliardë denarë, shumë kjo që tejkalon 220 milionë euro, drejt Fondit të Sigurimit Shëndetësor për të mbuluar shpenzimet shëndetësore të pensionistëve, bëri të ditur drejtori i fondit, Nikolla Memov.

Memov vlerëson se kjo mënyrë financimi duhet të rishikohet dhe që në të ardhmen shpenzimet të mos mbulohen më nga kontributet pensionale të punonjësve aktualë.

Aktualisht, për sigurimin shëndetësor të pensionistëve përdoret 11,8% e pensioneve neto. Deri më 31 dhjetor 2025, kjo normë ishte 13%, sqaroi drejtori i Fondit Pensional.

“Në nivel vjetor, kjo shumë arrin në 13,7 miliardë denarë, pra mbi 220 milionë euro”, deklaroi Memov.

Sipas tij, këto mjete sigurohen përmes kontributeve të sigurimit pensional të paguara nga të punësuarit, çka krijon një ngarkesë shtesë për fondin.

“Duhet të ketë ndryshim dhe të gjendet një mënyrë tjetër për financimin e sigurimit shëndetësor të pensionistëve, jo siç është tani – nga kontributet e sigurimit pensional”, shtoi ai.

Sistemi pensional në Maqedoni bazohet në solidaritetin ndër-gjeneracional, ku kontributet e punonjësve përdoren për financimin e të drejtave të pensionistëve aktualë. Kontributi për sigurimin pensional dhe invalidor është 18% e pagës bruto, ndërsa për personat e përfshirë në sistemin me dy shtylla, gjashtë pikë përqindje transferohen në shtyllën e dytë.

Propozimi i Memovit nuk synon të ulë koston e sigurimit shëndetësor për pensionistët, por të ndryshojë burimin nga i cili financohet kjo kosto.

Një ndryshim i tillë do të mundësonte që një pjesë e fondeve të mbetej në fondin pensional. Megjithatë, Memov nuk ka përcaktuar ende se cili do të ishte burimi alternativ për sigurimin e këtyre 220 milionë eurove.

The post Memov: Mbi 220 milionë euro transferohen çdo vit për sigurimin shëndetësor të pensionistëve, kërkohet ndryshimi i skemës së financimit appeared first on Albeu.com.

Prej nesër, 26 gusht, pacientët me organe të transplantuar do të përfitojnë pa pagesë shtesë ilaçin Myfortic (mycophenolic acid) në dozat 180 mg dhe 360 mg. Medikamenti do të jetë i disponueshëm në barnatoret kontraktuese të Fondit për Sigurim Shëndetësor.

Sipas FSHS-së, janë përmbyllur të gjitha hapat e nevojshëm për zbatimin e kësaj mase. Bordi Drejtues ka dhënë miratimin, është përditësuar Kodifikimi i barnave dhe barnatoret kontraktuese janë informuar për procedurën e re të lëshimit të terapisë.

Si rezultat, pacientët nuk do të paguajnë më 615 denarë për paketimin Myfortic 180 mg dhe 1.439 denarë për atë 360 mg.

Fondi bëri të ditur se Myfortic është një terapi veçanërisht e rëndësishme për personat me organe të transplantuar. Trajtimi përdoret për një periudhë të gjatë dhe furnizimi i pandërprerë me të është thelbësor.

Vendimi u mor pasi FSHS u njoftua se alternativat e barnave që ofroheshin falas nuk ishin të pranishme në tregun vendor për shkak të problemeve teknike në prodhim. Për të mos ia kaluar pacientëve barrën financiare të kësaj situate, u vendos që ilaçi origjinal Myfortic të jepej pa pagesë shtesë.

Çështja u trajtua si prioritet me iniciativën e drejtorit të Fondit, Zlatko Perinski, në bashkëpunim me Ministrinë e Shëndetësisë dhe shërbimet profesionale të FSHS-së. Sipas institucionit, zgjidhja tashmë është zbatuar plotësisht dhe mund të përdoret në barnatore.

FSHS vlerëson se masa sjell dy përfitime: pacientët do të kenë terapi të rregullt pa shpenzime shtesë, ndërsa do të ruhet edhe efekti i uljes së mëparshme të çmimit të barit.

Çmimi i Myfortic 180 mg është ulur me 291 denarë, ndërsa ai i dozës 360 mg me 2.012 denarë. Për shkak të këtyre uljeve, kursimi i parashikuar për Fondin gjatë gjysmës së dytë të vitit 2026 është rreth një milion denarë.

The post FSHS: Myfortic do të merret pa pagesë nga pacientët e transplantuar duke nisur nga 26 gushti appeared first on Albeu.com.