Gola të rrallë, kthesa të pabesueshme në rezultat, fitore të vulosura në çastet e fundit dhe rezultate që pak kush mund t’i kishte parashikuar kanë shoqëruar deri tani Kupën e Botës 2026.

Tani që turneu po hyn në fazën e çerekfinaleve, po forcohet gjithnjë e më shumë diskutimi nëse ky është Botërori më i mirë i zhvilluar ndonjëherë.

Ky është edicioni i parë me 48 përfaqësuese dhe zhvillohet në Shtetet e Bashkuara të Amerikës, Kanada dhe Meksikë. Përmasat e tij kanë vendosur rekord, por edhe shifrat në fushë tregojnë se mund të kemi të bëjmë me një nga turnetë më tërheqës të historisë.

Shumë gola dhe ritëm sulmues

Në 96 nga 104 ndeshjet e planifikuara janë realizuar 280 gola, që do të thotë një mesatare prej 2.92 golash për takim.

Kjo përbën mesataren më të lartë në një Kupë Bote që prej Botërorit të vitit 1970 në Meksikë, i cili kishte 2.97 gola për ndeshje.

Krahasuar me edicionet e fundit, shifrat janë këto:

Katar 2022 – 2.69 gola për ndeshje

Rusia 2018 – 2.64

Brazili 2014 – 2.67

Afrika e Jugut 2010 – 2.27

Ndeshja që ka prodhuar më shumë gola deri tani është triumfi 7-1 i Gjermanisë ndaj Curaçaos. Përveç saj, shtatë sfida të tjera kanë nxjerrë nga gjashtë gola, ndërsa 13 përballje janë mbyllur me pesë gola.

Një tjetër element që nxjerr në pah lojën sulmuese është fakti se 74.6% e golave kanë ardhur nga aksioni i hapur. Vetëm 5% janë shënuar nga pika e bardhë, përqindja më e ulët ndonjëherë në historinë e Kupës së Botës.

Vendime në fund dhe përmbysje të mëdha

As ndeshjet me eliminim direkt nuk kanë munguar në dramë. Nga 24 duelet e kësaj faze, tetë janë zgjidhur me gol pas minutës së 85-të, ndërsa katër përballje kanë shkuar deri te penalltitë.

Goli i fitores që Enzo Fernandez shënoi ndaj Egjiptit ishte edhe goli i 10-të vendimtar i realizuar pas minutës së 90-të, një shifër rekord për një Kupë Bote.

Vetëm gjatë muajit korrik janë luajtur disa takime që tashmë po konsiderohen klasike.

Belgjika ktheu gjithçka ndaj Senegalit dhe fitoi 3-2.

Argjentina përmbysi Egjiptin dhe e mbylli ndeshjen me sukses 3-2.

Anglia mundi Meksikën 3-2, ndonëse luajti rreth 40 minuta me një lojtar më pak pas përjashtimit të Jarell Quansah.

Në veçanti, Belgjika dhe Argjentina arritën të rikuperonin një disavantazh prej dy golash, diçka që nuk kishte ndodhur më shumë se një herë në të njëjtin Botëror që nga viti 1970.

Edhe 0-0 kanë peshën e tyre

Turneu ka sjellë edhe tetë barazime pa gola, një rekord i ri në historinë e Kupës së Botës.

Megjithatë, shumë analistë nuk e lexojnë këtë si mungesë emocionesh, por si provë të balancës më të madhe mes ekipeve kombëtare.

Tribuna të mbushura dhe rivalitet i fortë mes yjeve

Edhe pse ka pasur kritika të vazhdueshme për çmimet e larta të biletave dhe shpenzimet e udhëtimit, stadiumet janë mbushur nga tifozët.

Sipas FIFA-s, janë zënë 99.7% e vendeve të disponueshme. Deri tani, turneu ka tërhequr mbi 6.2 milionë spektatorë, me një mesatare prej më shumë se 65 mijë tifozësh për ndeshje.

Në fushë, protagonistë kanë qenë edhe emrat më të mëdhenj të futbollit botëror.

Gara për Këpucën e Artë po konsiderohet një nga më të fortat që është parë ndonjëherë:

Lionel Messi – 8 gola

Kylian Mbappe – 7 gola

Erling Haaland – 7 gola

Harry Kane – 6 gola

Për herë të parë në historinë e Botërorit, tre lojtarë kanë arritur të shënojnë të paktën shtatë gola në të njëjtin turne.

Kombëtaret modeste kanë lënë gjurmë

Zgjerimi në 48 skuadra kishte ngritur dyshime se do të prodhonte shumë ndeshje të pabalancuara, por disa nga rrëfimet më të bukura të këtij edicioni kanë ardhur pikërisht nga ekipet më të vogla.

Curaçao, shteti më i vogël që është kualifikuar ndonjëherë në një Kupë Bote, reagoi pas humbjes 7-1 ndaj Gjermanisë duke marrë një barazim kundër Ekuadorit.

Katari, edhe pse u mund 6-0 nga Kanadaja, arriti të ndalte Zvicrën me një barazim 1-1.

Nga surprizat më të mëdha të turneut ka qenë edhe Kepi i Gjelbër.

Me portierin 40-vjeçar Vozinha, përfaqësuesja afrikane barazoi me Spanjën, Uruguain dhe Arabinë Saudite për të kaluar fazën e grupeve. Më pas, në 1/16 e finales, i hapi shumë punë Argjentinës dhe u eliminua vetëm pas kohës shtesë me rezultatin 3-2.

Jo pa polemika

Pavarësisht ecurisë së suksesshme në aspektin sportiv, turneu është shoqëruar edhe me debate. Tifozët kanë renditur si kritikat kryesore çmimet e larta të biletave, hoteleve dhe transportit.

Në disa stadiume janë kundërshtuar edhe ndërprerjet për hidratim, sidomos në rastet kur ndeshjet janë zhvilluar në ambiente me çati të mbyllur ose me ajër të kondicionuar.

Po ashtu, janë ngritur shqetësime për ngarkesën fizike të futbollistëve, duke pasur parasysh se sezoni i ri i Ligës Premier nis vetëm një muaj pas finales së Botërorit.

Çështja Balogun hapi debat të madh

Një nga episodet që ka shkaktuar më shumë diskutime ka qenë ai i sulmuesit amerikan Folarin Balogun.

Pasi u ndëshkua me karton të kuq ndaj Bosnje dhe Hercegovinës, Balogun mori leje të luante në takimin e radhës kundër Belgjikës, sepse FIFA pezulloi dënimin duke u mbështetur në nenin 27 të Kodit Disiplinor.

Ky vendim u sulmua ashpër nga UEFA, Belgjika dhe trajneri i Anglisë, Thomas Tuchel. Ndërkohë, mediat raportuan se presidenti amerikan Donald Trump kishte zhvilluar një bisedë telefonike me presidentin e FIFA-s, Gianni Infantino, për këtë çështje.

Pavarësisht polemikave, për FIFA-n ky mund të konsiderohet një nga Botërorët më të suksesshëm të organizuar ndonjëherë.

Spektakli në fushë, stadiumet e mbushura, atmosfera elektrizuese dhe prania e yjeve më të mëdhenj të futbollit kanë krijuar një turne që tashmë po krahasohet me edicionet më të mira në histori.

Me Argjentinën, Spanjën, Francën dhe Anglinë ende në garë dhe të vendosura në çerekfinale të ndryshme, pjesa përmbyllëse e turneut premton edhe më shumë emocione.

Nëse ndeshjet që kanë mbetur do të ruajnë të njëjtin nivel spektakli, Botërori 2026 mund të mbetet përgjithmonë në histori si edicioni më i mirë i zhvilluar ndonjëherë.

The post Botërori 2026 thyen rekorde, sjell surpriza dhe ndez debatin: a po shohim edicionin më spektakolar ndonjëherë? appeared first on Albeu.com.

Folarin Balogun ka thyer heshtjen për herë të parë pas vendimit shumë të debatueshëm të FIFA-s, i cili i dha mundësinë të aktivizohej në ndeshjen e 1/8 së finales së Kupës së Botës kundër Belgjikës, edhe pse në takimin pararendës kishte marrë karton të kuq.

Sulmuesi i Shteteve të Bashkuara u kthye në qendër të një prej diskutimeve më të nxehta të këtij Botërori, sepse fillimisht ishte ndëshkuar me përjashtim, ndërsa më pas pezullimi iu hoq papritur vetëm pak përpara duelit me Belgjikën në Seattle.

Ky zhvillim solli reagime të shumta dhe hapi shumë dyshime mbi mënyrën se si ishte marrë ky vendim.

Gjithsesi, Balogun nuk arriti të ndryshonte fatin e përfaqësueses së tij në atë përballje.

Në “Lumen Field”, Belgjika u shfaq qartësisht superiore dhe fitoi 4-1, rezultat që i dha fund rrugëtimit të Shteteve të Bashkuara në këtë turne.

Edhe pse gjithë vëmendja para ndeshjes ishte përqendruar te ai, Balogun u mbajt nën kontroll nga prapavija belge.

Pas daljes nga gara, ai komentoi për gjithçka që ndodhi dhe ndau mënyrën si e kishte përjetuar këtë periudhë.

“Për mua ishte shumë e thjeshtë. E pranova vendimin kur mora kartonin e kuq ndaj Bosnjës dhe në të njëjtën mënyrë e pranova edhe vendimin për anulimin e pezullimit dhe për të luajtur. Pastaj dolëm në fushë dhe Belgjika ishte thjesht më e mirë se ne”, deklaroi Balogun për Gazzetta dello Sport.

Ai pranoi gjithashtu se ende nuk arrin ta shpjegojë se si skuadra amerikane dha një paraqitje kaq të dobët pikërisht në një sfidë me kaq shumë peshë.

“Është e vështirë të thuash saktësisht se çfarë ndodhi, por nuk luajtëm mirë. Nuk e di si është e mundur të mos kesh energji në një ndeshje të 1/8 së finales së Kupës së Botës, por kjo na ndodhi. Tani duhet të presim edhe katër vite për një mundësi tjetër dhe kjo dhemb shumë”, u shpreh ai.

Anulimi i kartonit të kuq nxiti reagime të forta në gjithë botën, ndërsa FIFA u përball me akuza të shumta për favorizim dhe ndikime nga jashtë. I pyetur nëse e kishte menduar që situata do të merrte një përmasë kaq të madhe, Balogun u përgjigj me kujdes.

“Kur merr një karton të kuq, është normale të presësh që të mungosh në ndeshjen e ardhshme. Nëse një vendim i tillë ndryshon, është logjike që të ketë polemika. Por unë jam vetëm një futbollist. Detyra ime është të dal në fushë dhe të përqendrohem te puna ime”, tha ai.

Balogun nënvizoi se nuk kishte asnjë dijeni për atë që kishte ndodhur prapa skenave dhe se nuk kishte qenë pjesë e procedurave që çuan te ndryshimi i vendimit.

“E përsëris, unë vetëm respektova vendimet e FIFA-s. Nuk i dija detajet dhe nuk isha pjesë e asaj procedure. Kjo thjesht nuk kishte të bënte me mua”, shtoi sulmuesi amerikan.

Pavarësisht gjithë polemikave, në fund të ndeshjes ai u pa duke biseduar me trajnerin e Belgjikës, Rudi Garcia, të cilin e përgëzoi për fitoren.

“E njoh dhe shkova ta përgëzoj. Ai më tha se shpreson që e gjithë kjo situatë të mos e mbulojë një turne fantastik që kam zhvilluar. Më inkurajoi të qëndroj pozitiv. Kur emocionet të qetësohen, mendoj se do të mund të shikoj pas dhe të kuptoj se kemi pasur një verë të jashtëzakonshme. Kemi arritur të bashkojmë vendin dhe ta afrojmë futbollin me shumë njerëz”, tregoi Balogun.

Në përmbyllje, ai pranoi se kjo çështje do ta ndjekë edhe më tej.

“E di që do të më duhet të përballem me këtë situatë. Tani gjëja më e rëndësishme është të mbledh mendimet e mia dhe, kur të vijë koha e duhur, do të mund të flas për gjithçka me shumë më tepër qartësi”, përfundoi ai.

The post Balogun reagon për polemikat e kartonit të kuq, vendimin e FIFA-s dhe debatin e madh që pasoi appeared first on Albeu.com.

Rrugëtimi i Kombëtares së SHBA-së në Kupën e Botës 2026 u mbyll në mënyrë zhgënjyese, pasi amerikanoqët u mundën 1-4 nga Belgjika në fazën e 1/16-tës së finales.

Por vëmendja nuk mbeti vetëm te disfata në fushë. Dalja e SHBA-së nga turneu u shoqërua edhe me debat të fortë jashtë saj, sidomos për çështjen e sulmuesit Folarin Balogun.

Më herët, pezullimi i Balogun për sfidën me Belgjikën ishte hequr, pasi u raportua se presidenti amerikan Donald Trump kishte zhvilluar një telefonatë me presidentin e FIFA-s, Gianni Infantino. Sipas raportimeve, ai kishte argumentuar se ndëshkimi ishte i padrejtë dhe se lojtari i duhej ekipit për fazën me eliminim direkt.

Ky vendim solli reagime të shumta, ndërsa kritikët ngritën shqetësimin se një ndërhyrje politike mund të krijonte një precedent të rrezikshëm për vendimet disiplinore në futboll.

Pas eliminimit të amerikanëve, ironitë nuk munguan nga komentatorë të vendeve të ndryshme për gjithë këtë situatë.

Komentatori turk:

“Nëse nuk ka ndonjë ndryshim rregullash në minutën e fundit, SHBA-ja tashmë i ka dhënë lamtumirën Kupës së Botës”.

Komentatori holandez:

“Sot nuk do të jetë Amerika që fiton. Vetëm një mrekulli mund t’i shpëtonte, dikush me një shkop magjik… ose ndoshta dikush nga Shtëpia e Bardhë. Ky duket opsioni më i mundshëm”.

Këto komente ironike u përhapën me shpejtësi në rrjetet sociale, ku tifozë nga mbarë bota iu bashkuan humorit pas eliminimit të SHBA-së nga turneu.

The post Ironi edhe nga komentatorët turk e holandez për rastin Balogun pas daljes së SHBA-së nga Kupa e Botës appeared first on Albeu.com.

Pas debatit publik që shoqëroi vendimin e Komitetit të Pavarur Disiplinor për Folarin Balogun, presidenti i FIFA-s, Gianni Infantino, reagoi duke vënë theksin te rëndësia që ka pavarësia e organeve gjyqësore në futboll.

Sipas tij, strukturat disiplinore të FIFA-s funksionojnë plotësisht të pavarura dhe vendimet e tyre ndërtohen mbi rregulloret në fuqi dhe faktet e çdo rasti konkret.

Heqja e kartonit të kuq për Balogun u kundërshtua nga shumë emra të njohur të futbollit, si edhe nga Kombëtarja e Belgjikës.

“Organet gjyqësore të FIFA-s janë të pavarura. Ato zbatojnë Kodin Disiplinor dhe vendosin bazuar në rregulla dhe fakte. Pavarësia e tyre është thelbësore për integritetin e futbollit dhe duhet respektuar gjithmonë”, deklaroi ai.

Infantino u ndal edhe te kontaktet që ka pasur me liderë botërorë, duke pohuar se për çështje që lidhen me Kupën e Botës ka biseduar edhe me Presidentin e SHBA-së, Donald Trump, por sqaroi se vendimmarrja mbetet kompetencë e organeve përkatëse të FIFA-s.

“Është një proces ligjor që trajtohet nga organet e pavarura dhe vendimi merret prej tyre. Kështu funksionon sistemi i FIFA-s dhe unë do ta respektoj gjithmonë këtë parim”, shtoi Infantino.

Kreu i FIFA-s pranoi gjithashtu se jo në çdo rast bie dakord me vendimet e komisioneve disiplinore, por nënvizoi se respektimi i tyre nuk vihet në diskutim.

“Disa vendime më befasojnë, me disa pajtohem dhe me disa jo. Por gjithmonë i respektoj. Nëse na pëlqejnë apo jo, është e parëndësishme. Respekti për institucionet dhe sundimi i ligjit mbrojnë integritetin e garave tona”, përfundoi ai.

The post “Vendimet e FIFA-s duhet të respektohen”, Infantino komenton heqjen e pezullimit për Balogun appeared first on Albeu.com.

Vendimi i FIFA-s për ta pezulluar me kusht ndëshkimin e sulmuesit amerikan Folarin Balogun, pas kartonit të kuq që mori në fazën e 1/16 së finales së Kupës së Botës 2026 kundër Bosnje dhe Hercegovinës, ka ndezur polemika të forta në botën e futbollit.

Si pasojë e këtij vendimi, Balogun pritet të jetë i gatshëm për ndeshjen çerekfinale me Belgjikën, ndërsa reagimet kanë qenë të shumta dhe të ashpra.

Rudi Garcia, trajneri i Belgjikës, e cilësoi këtë zhvillim si një “shaka të 1 Prillit”, ndërsa në rrjetet sociale kanë qarkulluar edhe aludime se ndryshimi i vendimit mund të jetë ndikuar nga ndërhyrje në nivele të larta politike.

Megjithatë, historia e Kupës së Botës tregon se FIFA, në shumë raste të tjera, nuk ka bërë asnjë lëshim edhe kur në qendër kanë qenë yjet më të mëdhenj të futbollit.

Më poshtë janë 11 futbollistë të njohur që, pavarësisht përpjekjeve dhe apelimeve të federatave të tyre, u detyruan të mungonin në ndeshje vendimtare.

Leonardo (Brazili) – Botërori 1994

Braziliani u ndëshkua me karton të kuq në ndeshjen e 1/16 së finales kundër SHBA-së, pasi goditi me bërryl Tab Ramos dhe i shkaktoi frakturë në mollëz.

Federata braziliane mbrojti idenë se Leonardo thjesht po përpiqej të shkëputej nga kapja e kundërshtarit, por FIFA jo vetëm që e la në fuqi kartonin, por e dënoi edhe me katër ndeshje pezullim.

Për pasojë, ai mungoi në çerekfinale, në gjysmëfinale dhe në finalen e atij turneu.

Alessandro Costacurta (Italia) – Botërori 1994

Mbrojtësi i Italisë u ndëshkua me kartonin e dytë të verdhë në gjysmëfinalen ndaj Bullgarisë, pasi ndërhyri me faull ndaj Hristo Stoichkov.

Italianët kërkuan rishqyrtim të rastit, por FIFA nuk pranoi as ta marrë në konsideratë. Kështu, Costacurta e humbi finalen kundër Brazilit, ku Italia u mund pas penalltive.

Patrick Kluivert (Holanda) – Botërori 1998

Sulmuesi i Holandës u përjashtua me të kuq në takimin hapës përballë Belgjikës, pasi goditi me bërryl Lorenzo Staelens.

Federata holandeze argumentoi se futbollisti ishte provokuar rëndë, por FIFA vendosi ta pezullojë për tre ndeshje. Kluivert u kthye vetëm në çerekfinale, ku gjeti rrugën e rrjetës kundër Argjentinës.

Zinedine Zidane (Franca) – Botërori 1998

Francezi u ndëshkua pasi shkeli me dashje mbi Said Al-Owairan gjatë fazës së grupeve.

FIFA e la jashtë për dy ndeshje, çka bëri që Zidane të mungonte ndaj Danimarkës dhe Paraguait. Ai u rikthye në çerekfinale dhe më vonë realizoi dy herë në finalen me Brazilin.

Laurent Blanc (Franca) – Botërori 1998

Ky mbetet një nga kartonët e kuq më polemikë në historinë e Botërorëve. Blanc u përjashtua në gjysmëfinalen me Kroacinë pas një kontakti të lehtë me Slaven Bilic, i cili simuloi rëndë.

Edhe pse Franca protestoi dhe pamjet televizive ngritën dyshime të forta, FIFA nuk ndryshoi vendim dhe Blanc mbeti jashtë finales kundër Brazilit.

Ronaldinho (Brazili) – Botërori 2002

Në çerekfinalen e famshme me Anglinë, Ronaldinho dha asist, shënoi një gol spektakolar nga goditja e lirë dhe më pas mori karton të kuq pas një ndërhyrjeje ndaj Danny Mills.

Brazili kërkoi heqjen e pezullimit me argumentin se ndërhyrja nuk kishte qenë e qëllimshme, por FIFA mbajti të njëjtin qëndrim. Ronaldinho mungoi në gjysmëfinalen kundër Turqisë.

Michael Ballack (Gjermania) – Botërori 2002

Mesfushori gjerman u ndëshkua me karton të verdhë në gjysmëfinalen përballë Koresë së Jugut pas një faulli taktik, duke plotësuar limitin e kartonëve.

Ndonëse më pas shënoi golin e suksesit, Ballack nuk luajti në finalen me Brazilin.

Rasti i tij ndikoi më vonë që FIFA të ndryshonte rregulloren dhe t’i fshinte kartonët pas çerekfinaleve.

Deco (Portugalia) – Botërori 2006

Në sfidën famëkeqe Portugali-Holandë, të njohur si “Beteja e Nurembergut”, Deco u përjashtua pas kartonit të dytë të verdhë për vonesë loje.

Federata portugeze pretendoi se arbitri e kishte humbur kontrollin e ndeshjes, por FIFA e hodhi poshtë apelimin. Deco mungoi në çerekfinalen kundër Anglisë.

Luis Suarez (Uruguai) – Botërori 2010

Në çerekfinalen ndaj Ganës, Suarez ndali topin me dorë mbi vijën fatale në minutën e 120-të.

Ai u përjashtua dhe nuk luajti në gjysmëfinalen përballë Holandës. FIFA nuk e fali pezullimin dhe madje mori në shqyrtim edhe mundësinë e një dënimi më të rëndë.

Thiago Silva (Brazili) – Botërori 2014

Kapiteni i Brazilit mori kartonin e dytë të verdhë në turne pas një pengimi të panevojshëm ndaj portierit David Ospina.

Federata Braziliane kërkoi anulimin e ndëshkimit, duke theksuar se kontakti ishte minimal, por FIFA e refuzoi kërkesën. Thiago Silva mungoi në gjysmëfinalen historike me Gjermaninë, ku Brazili u mund 7-1.

Jerome Boateng (Gjermania) – Botërori 2018

Boateng u përjashtua me kartonin e dytë të verdhë në fitoren dramatike ndaj Suedisë.

Gjermania apeloi duke argumentuar se kartoni i dytë ishte i ashpër, por FIFA nuk e ndryshoi vendimin. Pa Boateng, kampionët në fuqi u eliminuan pas humbjes 2-0 ndaj Koresë së Jugut.

Rasti i Garrinchës, përjashtimi historik

Përpara Balogun, historia kishte regjistruar vetëm një precedent të ngjashëm.

Në Botërorin e vitit 1962, Garrincha u përjashtua në gjysmëfinalen kundër Kilit. Në atë kohë, kartonët e kuq nuk përdoreshin fizikisht dhe pezullimet përcaktoheshin nga komisioni disiplinor.

Brazili ndërmori një fushatë të madhe për ta shpëtuar yllin e vet. Politikanë, tifozë kilianë dhe figura të tjera kërkuan faljen e tij, ndërsa raporti vendimtar i gjyqtarit anësor nuk mbërriti asnjëherë në komision.

Për shkak të mungesës së provave të plota, FIFA vendosi ta lejonte Garrinchën të luante në finale.

Për më shumë se gjashtë dekada, ky mbeti i vetmi rast kur një karton i kuq u fal para një finaleje të Kupës së Botës.

Vendimi më i fundit për Folarin Balogun e ka rikthyer sërish në qendër të vëmendjes këtë precedent historik dhe ka hapur debat të gjerë mbi mënyrën se si FIFA i zbaton rregullat disiplinore në turneun më të madh të futbollit.

The post Nga Zidane te Suarez, 11 emra të mëdhenj që munguan në duele vendimtare, në të kundërt të Balogun appeared first on Albeu.com.

Donald Trump, presidenti i Shteteve të Bashkuara, mësohet se ka hyrë personalisht në këtë çështje duke komunikuar me presidentin e FIFA-s, Gianni Infantino, për të kërkuar rishqyrtimin e pezullimit të sulmuesit Folarin Balogun. Kjo ndërhyrje, sipas raportimeve, ndodhi vetëm disa orë pasi futbollisti i SHBA-së u ndëshkua me karton të kuq në përballjen ndaj Bosnjë e Hercegovinës.

“The New York Times” raporton se Trump e telefonoi Infantinon dhe i kërkoi të merrte në shqyrtim rastin e Balogunit, i cili në bazë të rregullave duhej të mungonte në ndeshjen e 1/16 së finales ndaj Belgjikës.

Më pas, të dielën, FIFA mori një vendim që u konsiderua befasues, duke pezulluar zbatimin e dënimit dhe duke bërë të ditur se Balogun do të ishte i lejueshëm për të luajtur kundër Belgjikës.

Një hap i tillë cilësohet jashtëzakonisht i rrallë, pasi për herë të parë që nga viti 1962 një lojtar lejohet të aktivizohet në Kupën e Botës, ndonëse ishte pezulluar automatikisht pas një kartoni të kuq.

Sipas të njëjtit raportim, pas daljes me të kuq të Balogunit, zyrtarë të lartë të administratës amerikane, mes tyre sekretari i Tregtisë Howard Lutnick dhe Andrew Giuliani, u përfshinë së bashku me avokatë për të ndihmuar Federatën Amerikane të Futbollit në apelimin e çështjes, edhe pse rregulloret e FIFA-s nuk parashikojnë një procedurë të tillë.

Thelbi i argumentimit ishte se kartoni i kuq ishte akorduar gabimisht, pasi arbitri kishte përdorur pamjet me lëvizje të ngadaltë gjatë verifikimit me VAR.

Raporti thekson gjithashtu se Trump rikujtoi pretendime të mëhershme ndaj arbitrit brazilian Raphael Claus, i cili më parë ishte akuzuar publikisht për manipulim ndeshjesh në Brazil. Megjithatë, as autoritetet braziliane dhe as FIFA nuk kanë gjetur prova që t’i mbështesin këto akuza.

Pasi Balogun u rikthye në dispozicion, Trump zhvilloi edhe një tjetër telefonatë me Infantinon, të cilin e përgëzoi për vendimin. Ai kontaktoi po ashtu trajnerin e SHBA-së, Mauricio Pochettino, për t’i uruar fat për sfidën ndaj Belgjikës.

Ky vendim i FIFA-s solli reagim të fortë nga Federata e Futbollit e Belgjikës, e cila u shpreh se ishte “e habitur” nga ky zhvillim dhe bëri të ditur se po shqyrton të gjitha mundësitë ligjore.

Në sqarimin e saj zyrtar, FIFA bëri të ditur se pezullimi i Balogunit është shtyrë për një periudhë prove njëvjeçare. Në rast se sulmuesi amerikan kryen një shkelje të ngjashme gjatë kësaj kohe, dënimi do të zbatohet automatikisht, përveç çdo mase tjetër ndëshkimore që mund të vijë për incidentin e ri.

Ngjarja ka ndezur një debat të gjerë në botën e futbollit mbi raportin mes Infantinos dhe Trumpit, ndërsa shumë drejtues futbolli kanë ngritur dyshime nëse është vendosur një precedent që mund të shfrytëzohet edhe nga përfaqësuese të tjera në situata të ngjashme.

The post Zbardhen prapaskenat: Donald Trump ndërhyri për heqjen e kartonit të kuq të Folarin Balogun appeared first on Albeu.com.

Rudi Garcia ka shpërthyer kundër FIFA-s, pasi institucioni vendosi t’i japë mundësi Folarin Balogun të aktivizohet në ndeshjen e 1/8 së finales së Kupës së Botës përballë Belgjikës, edhe pse sulmuesi i SHBA-së ishte ndëshkuar me karton të kuq në takimin paraardhës.

Balogun u nxor me të kuq në triumfin 2-0 të Shteteve të Bashkuara të Amerikës ndaj Bosnjës dhe Hercegovinës, pasi arbitri, pas verifikimit me VAR, vendosi ta ndëshkonte direkt për një ndërhyrje ndaj Tarik Muharemovic. Në rrethana normale, rregullorja parashikon që lojtari të mungojë automatikisht në ndeshjen pasuese.

Por FIFA zgjodhi të zbatojë Nenin 27 të Kodit të saj Disiplinor, duke e pezulluar me kusht dënimin për një afat njëvjeçar. Kjo nënkupton se Balogun mund të luajë kundër Belgjikës, ndërsa pezullimi do të zbatohet vetëm në rast se ai përsërit një shkelje të ngjashme gjatë kësaj periudhe.

Ky zhvillim ka sjellë pakënaqësi të madhe te Belgjika. Gjatë konferencës për shtyp në Seattle, Garcia e komentoi vendimin me ironi: “Nuk e dija që ishte 1 prilli dita e gënjeshtrave më 5 korrik në Kupën e Botës”, tha Garcia me ironi.

Ai sqaroi se kundërshtimi i federatës belge nuk ka të bëjë thjesht me interesin sportiv të përfaqësueses së tij, por me vetë bazat mbi të cilat duhet të mbështetet futbolli.

“Ne nuk po mbrojmë ekipin kombëtar apo federatën. Ne po mbrojmë futbollin, integritetin dhe etikën e tij”, deklaroi ai.

Sipas Garcias, bëhet fjalë për një rast të paprecedentë në historinë e Kampionatit Botëror. Në të njëjtën linjë reagoi edhe Federata Belge e Futbollit, e cila në një komunikatë u shpreh e “habititur” nga veprimi i FIFA-s dhe solli në vëmendje Nenin 66.4 të Kodit Disiplinor, ku përcaktohet se një karton i kuq direkt sjell pezullim automatik për ndeshjen e ardhshme.

“Mendoj se kjo është hera e parë në historinë e Kupës së Botës që merret një vendim i tillë”, tha Garcia.

Ndërkohë, Belgjika ka bërë të ditur se po shqyrton të gjitha alternativat e mundshme për të mbrojtur të drejtat e ekipeve kombëtare dhe parimin e lojës së ndershme, teksa çështja Balogun pritet të vazhdojë të ndezë debat para përballjes mes Belgjikës dhe SHBA-së.

The post Rudi Garcia kritikon FIFA-n: Vendimi për Balogun krijon një precedent të rrezikshëm në futboll appeared first on Albeu.com.

SHBA-ja ka marrë një zhvillim shumë të rëndësishëm përpara ndeshjes me Belgjikën në fazën e 1/8-tës të Kupës së Botës 2026, pasi Folarin Balogun është lejuar të aktivizohet edhe pse u ndëshkua me karton të kuq në takimin e fundit.

“The Athletic” raporton se FIFA ka vendosur të pezullojë dënimin me një ndeshje për sulmuesin e Monacos, çka e bën atë të gatshëm për përballjen e së hënës.

Në sfidën ndaj Bosnje dhe Hercegovinës, Balogun u ndëshkua drejtpërdrejt me karton të kuq pas një ndërhyrjeje ndaj Tarik Muharemoviqit dhe, sipas rregullave të FIFA-s, ai pritej të mungonte automatikisht në ndeshjen pasuese.

Megjithatë, institucioni më i lartë i futbollit ka vendosur të ndalojë zbatimin e këtij dënimi duke iu referuar Nenit 27 të Kodit Disiplinor.

Bëhet fjalë për një vendim me kusht, që nënkupton se masa ndëshkuese mund të hyjë sërish në fuqi nëse Balogun bën një shkelje të ngjashme gjatë periudhës së provës.

Ky zhvillim vjen edhe pse më herët disa zyrtarë të FIFA-s kishin sinjalizuar se as kartoni i kuq dhe as ndëshkimi pas tij nuk mund të apeloheshin.

Balogun ka qenë ndër lojtarët më vendimtarë të SHBA-së në këtë edicion të Kupës së Botës. Në ndeshjen hapëse ndaj Paraguait ai shënoi dy gola, ndërsa më pas realizoi edhe një tjetër kundër Bosnje dhe Hercegovinës.

Deri në këtë pikë të turneut, sulmuesi ka dhënë të paktën një gol ose asistim në çdo ndeshje të Botërorit ku është aktivizuar.

Mungesa e tij e mundshme kishte hapur debat të madh, ndërsa trajneri Mauricio Pochettino kishte mbrojtur idenë se ndërhyrja ishte aksidentale.

“Nuk ishte kurrë për karton të kuq”, deklaroi tekniku argjentinas.

Kundër vendimit të arbitrave reagoi edhe kapiteni Christian Pulisic.

“Ishte një vendim shumë i ashpër”, u shpreh ai.

Prania e Balogun i jep një shtysë të madhe repartit ofensiv të SHBA-së për duelin ndaj Belgjikës, ku amerikanët synojnë kualifikimin në çerekfinalen e Kupës së Botës 2026./

The post FIFA pezullon dënimin e Balogun, sulmuesi i SHBA-së i gatshëm për sfidën me Belgjikën appeared first on Albeu.com.

Pas përfundimit të ndeshjes së tensionuar të fazës së 1/16-tës në Kupën e Botës 2026 mes Portugalisë dhe Kroacisë, e fituar 2-1, ish-mbrojtësi i kombëtares së SHBA-së, Marcelo Balboa, dha vlerësimin e tij për ndikimin e teknologjisë në futboll.

Moment kyç i debatit u bë goli i Kroacisë në minutën e 103-të, i cili fillimisht vlejti si barazim, por më pas u anulua pas kontrollit me VAR. Pas një krosimi nga krahu, topi preku fare pak flokun e Igor Matanovicin dhe më pas devijoi drejt Mario Pasalic, i cili ndodhej në pozicion jashtë loje. Pas rishikimit të pamjeve, gjyqtari Espen Eskas vendosi ta anulonte golin.

Balboa kujtoi se dikur diskutohej për mënyra që të kishte më shumë gola në futboll, ndërsa tani, sipas tij, situata ka shkuar në skajin tjetër. “Më kujtohen ditët kur njerëzit thoshin se donin të siguroheshin që të kishte më shumë gola. Dhe tani, ti vendos një copë brenda topit, dhe nëse mezi prek një fije floku në bishtalec, goli hiqet. Një pozicion jashtë loje përcaktohet nga një thoi i madh i këmbës. A po përpiqemi ta ndihmojmë futbollin apo ta dëmtojmë atë?”, ka thënë fillimisht Balboa.

I pyetur nëse përdorimi i vazhdueshëm i teknologjisë e bën sistemin më të drejtë, ai vijoi sërish me kritika ndaj mënyrës se si po zbatohet VAR-i.

“Kemi folur për VAR-in. Në ndeshjen e fundit të SHBA-së, VAR-i e dërgoi gjyqtarin te monitori dhe gjyqtari mori një vendim (kartoni i kuq i Folarin Balogun). Epo, le të fillojmë ta përdorim atë në çdo goditje nga këndi atëherë. E pamë sot – lojtarët u kapën dhe u rrëzuan përtokë. Do të duhej të jepje një penallti në secilin prej atyre momenteve”.

Sipas Balboas, VAR-i ishte menduar fillimisht për të ndihmuar në rastet vendimtare që lidhen me golat, jo për të evidentuar detaje minimale si një bërryl apo një pozicion jashtë loje të përcaktuar nga lidhëset e këpucëve. “VAR u krijua për të ndihmuar në situatat përfundimtare të golave. Nuk u përdor për të kapur një bërryl ose një pozicion jashtë loje me lidhëse këpucësh. Mendoj se jemi larguar shumë”.

Në fund, ai theksoi se vendimi në vetvete ishte korrekt, por jo domosdoshmërisht në përputhje me frymën për të cilën u soll teknologjia në lojë. “Shikoni, mendoj se vetë vendimi ishte i saktë. Është mirë që ata dhanë të dhënat [që vërtetojnë kontaktin me topin], përndryshe do të kisha pyetur: ‘Çfarë po ndodh në botë?’ Por besoj se VAR u prezantua për të ndihmuar lojën, jo për ta dëmtuar. Dhe tani për tani, mendoj se po e dëmton pak”, përfundoi Balboa. //

The post “Po e përmirësojmë lojën apo po e dëmtojmë?”, Marcelo Balboa sulmon teknologjinë që sinjalizon edhe ‘lidhëset e këpucëve dhe bishtalecin’ për pozicion jashtë loje appeared first on Albeu.com.

Fitorja 2-0 e SHBA-së ndaj Bosnjë-Hercegovinës në Kupën e Botës e ktheu Folarin Balogun në një nga emrat më të komentuar të mbrëmjes në Amerikë.

Edhe pse tifozët e futbollit në SHBA e njihnin prej kohësh, pas asaj që ndodhi në këtë takim ai mori një vëmendje shumë më të madhe nga publiku i gjerë amerikan.

Në San Jose, mijëra persona e ndoqën ndeshjen në sheshin “San Pedro”, ndërsa shumë prej tyre nuk kishin njohuri të plota për sulmuesin amerikan me numrin 20.

Gjithçka ndryshoi në fundin e pjesës së parë, kur Balogun realizoi golin e parë të ndeshjes dhe bëri që emri i tij të përhapej menjëherë më gjerë.

Pas realizimit, ai festoi me gjestin e famshëm “The Silencer”, një mënyrë feste që përdoret shpesh nga LeBron James. Për publikun amerikan, ky ishte një detaj që u kuptua menjëherë, duke qenë se basketbolli ka një ndikim të jashtëzakonshëm në vend.

Pikërisht ky festim e afroi edhe më shumë Balogunin me tifozët. Momenti u shpërnda me shpejtësi në rrjetet sociale, u diskutua gjerësisht dhe e ktheu sulmuesin e SHBA-së në një nga figurat më të pëlqyera të mbrëmjes.

Balogun kishte gjetur më herët rrugën e rrjetës gjatë ndeshjes, por ai gol nuk u quajt. Megjithatë, në minutën e 45-të ai shënoi sërish dhe përsëriti festimin e frymëzuar nga LeBron James, duke ndezur entuziazmin e tifozëve amerikanë.

Në pjesën e dytë, mbrëmja mori një zhvillim krejt tjetër për të. Pas ndërhyrjes së VAR-it, sulmuesi u ndëshkua me karton të kuq për një kontakt me mbrojtësin boshnjak Tarik Muharemovic.

Ky vendim solli reagime të shumta në rrjetet sociale. Shumë tifozë amerikanë, që vetëm pak më parë kishin nisur ta njihnin më mirë Balogunin, dolën në mbrojtje të tij dhe e cilësuan vendimin e arbitrit tepër të ashpër.

Kartoni i kuq do ta mbajë Balogunin jashtë ndeshjes së raundit të 16-të kundër Belgjikës në Seattle, një mungesë e rëndësishme për SHBA-në, duke qenë se ai ka qenë një nga lojtarët më të rëndësishëm të skuadrës në këtë turne.

Historia e tij është po aq interesante sa edhe paraqitja në fushë. Balogun ka lindur në Brooklyn, është rritur në Londër nga prindër nigerianë dhe në nivelet e moshave ka përfaqësuar Anglinë, ndërsa kishte të drejtë të luante edhe për Nigerinë.

Ai kaloi 12 vite në akademinë e Arsenalit përpara se të ngjitej te ekipi i parë. Më pas, në vitin 2023, firmosi me Monacon dhe po atë vit zgjodhi të përfaqësojë Kombëtaren e SHBA-së.

Në këtë Kupë Bote, Balogun ka realizuar dy gola në fazën e grupeve dhe është shfaqur si një nga futbollistët më të spikatur të ekipit amerikan.

Me golin ndaj Bosnjë-Hercegovinës, me festimin e lidhur me LeBron James dhe me debatin që pasoi kartonin e kuq, Folarin Balogun u shndërrua në një figurë shumë më të madhe për publikun amerikan.

Brenda vetëm pak çastesh, falë një goli dhe një feste që bashkoi futbollin me basketbollin, ai arriti të fitojë simpatinë e miliona tifozëve. Tani, Amerika e njeh emrin e tij.

The post Goli, festimi në stilin e LeBron dhe përjashtimi pas VAR-it: Folarin Balogun u bë menjëherë i njohur në SHBA appeared first on Albeu.com.