Partizani triumfoi me shifrat 1-3 në ndeshjen miqësore ndaj Elbasanit, të luajtur mbrëmjen e djeshme në stadiumin “Elbasan Arena”. Golat e fitores për të kuqtë u realizuan nga Keko, Sidibe dhe Doumbia. Në përfundim të takimit, trajneri i “Demave”, Florin Bratu, dha vlerësimin e tij.

“Para së gjithash dua të falënderoj futbollistët, pasi ishin ata që luajtën. Edhe pse bëhej fjalë për një miqësore, ne patëm përballë një skuadër shumë të mirë, një ekip europian. Ndihem gjithashtu krenar, sepse me trajnerin e Elbasanit kam luajtur te Dinamo në vitin 2007. Ta takoja përsëri tani ishte diçka interesante”, deklaroi Bratu.

Duke folur për punën që e pret Partizanin, tekniku theksoi se skuadra duhet të ndërtohet me synimin për t’u rikthyer te trofetë, pasi në tre sezonet e fundit nuk është fituar asgjë.

“Duhet të vazhdojmë punën për të formuar skuadrën, sepse gjatë tre viteve të fundit nuk kemi fituar asgjë dhe nuk kemi siguruar asnjë trofe. Për mua ka shumë rëndësi që këtë vit të reagojmë”, u shpreh ai.

Bratu komentoi edhe mundësinë e afrimeve të tjera gjatë merkatos, duke nënvizuar se aktualisht ka besim te grupi që drejton.

“Ekziston mundësia që të vijë një tjetër lojtar, por në këtë moment dua të them se u besoj futbollistëve të mi dhe kjo është e rëndësishme për mua. Nëse do të kem ndonjë kërkesë, do ta diskutoj me stafin drejtues të klubit”, përfundoi trajneri i Partizanit.

The post Bratu pas triumfit ndaj Elbasanit: U ndeshëm me një skuadër shumë të mirë, këtë vit Partizani duhet të reagojë appeared first on Albeu.com.

Nën drejtimin e Florin Bratut, Partizani po vijon me ritëm të lartë përgatitjet në Pogradec për sezonin e ri të “Abissnet Superiore”. Gjatë kësaj faze, tekniku rumun ka marrë vendime të prera për përbërjen e skuadrës.

Sipas informacioneve të “Newsport.al”, Adnard Mehmeti, Gjergji Kote dhe Besar Gudjufi janë larguar nga grumbullimi përgatitor i të kuqve. Asnjëri prej tyre nuk po stërvitet me ekipin, çka përbën një tregues të qartë se tre futbollistët nuk bëjnë pjesë në planet e “Demave”.

Qëndrimi i Bratut përputhet me vlerësimin e ish-trajnerit Oltijon Kërnaja. Edhe ky i fundit nuk i shihte tre lojtarët e përmendur si pjesë të skuadrës, ndërsa të njëjtën linjë po ndjek tashmë edhe trajneri i ri, Florin Bratu.

Mbetet për t’u parë se si do të zgjidhet e ardhmja e Mehmetit, Kotes dhe Gudjufit. Kote dhe Mehmeti aktivizohen në mesfushë, ndërsa Gudjufi luan në rolin e sulmuesit të krahut të djathtë.

The post Florin Bratu merr vendimin e prerë, përjashton 3 futbollistë nga faza përgatitore e Partizanit appeared first on Albeu.com.

Partizani triumfoi 2-0 ndaj Skënderbeut në provën e dytë miqësore nën drejtimin e Florin Bratut. Për trajnerin rumun, ky ishte testi i parë i një niveli të lartë, përballë një kundërshtari që do të garojë në Superiore gjatë sezonit të ri 2026/27.

Të kuqtë realizuan nga një gol në secilën pjesë. Xhuliano Skuka zhbllokoi takimin nga pika e bardhë, ndërsa Rowan Human vulosi rezultatin, në një ndeshje që i dha shumë sinjale teknikut rumun në kulmin e përgatitjeve për edicionin e ardhshëm.

Florin Bratu ka ende një rrugë të gjatë përpara dhe shumë punë për t’i zbatuar tërësisht idetë e tij te “Demat”, por para nisjes së Superiores është shfaqur tashmë shkëndija e parë.

Për trajnerin debutues, i cili mban mbi vete përgjegjësi të shumta, sfida kryesore mbetet krijimi i një Partizani të bashkuar dhe me synime të përcaktuara qartë, në mënyrë që skuadra të rikthehet te pretendimet e mëparshme, minimalisht te kupat e Europës.

GOLAT:

Goli i Skukës

Goli i Human

The post VIDEO/ Partizani i Florin Bratut gjen ritmin, sulmuesit i japin zemër rumunit para Superiores appeared first on Albeu.com.

Endri Çelaj ka firmosur sërish me Partizanin, duke nisur kështu aventurën e tij të dytë me klubin e kuq. Lojtari vjen pas një sezoni të zhvilluar në Rumani me FC Metaloglobus të Bukureshtit.

Sulmuesi 22-vjeçar, tashmë i kalitur dhe me një eksperiencë ndërkombëtare në bagazh, përfaqëson blerjen e dytë të “Demave” gjatë kësaj faze transferimesh. Ai pritet t’i japë një energji të re repartit ofensiv nën urdhrat e trajnerit Florin Bratu.

Herën e fundit, Çelaj veshi fanellën e ekipit kryeqytetas në intervalin 2022-2024. Në këtë rikthim, ai synon të japë gjithçka nga vetja për të ndihmuar skuadrën në përmbushjen e objektivave të vendosura për këtë sezon.

The post Rikthim i bujshëm në Superiore nga Rumania, 22-vjeçari vishet sërish me fanellën e kryeqytetasve appeared first on Albeu.com.

Të dielën, Partizani do të zhvillojë ndeshjen e dytë miqësore nën drejtimin e trajnerit të ri Florin Bratu, duke u ndeshur me Skënderbeun, një kundërshtar që do ta takojnë edhe në sezonin e ardhshëm 2026/27 të Superiores.

Pavarësisht humbjes në paraqitjen e parë kundër Besës së Kavajës, tekniku rumun shpreh besimin se skuadra e tij do të tregojë një fytyrë tjetër dhe do të japë një shfaqje bindëse në fushë, përpara se të fillojë kampionati.

Takimi do të mbahet në stadiumin “Gjorgji Kyçyku” dhe do të startojë në orën 18:00.

The post Provë e vërtetë për trajnerin Florin Bratu, Partizani përballet me rivalin e Superiores në miqësore appeared first on Albeu.com.

Partizani do të luajë pas pak minutash kundër Besës së Kavajës në testin e parë miqësor të fazës përgatitore për sezonin e ri. Përpara sfidës, trajneri Florin Bratu dha një prononcim të shkurtër.

Tekniku theksoi se edhe një ndeshje miqësore ka peshë të veçantë në këtë periudhë. Sipas tij, synimi është krijimi i një skuadre ku mbizotërojnë grupi, empatia dhe vullneti për të luftuar për njëri-tjetrin, me qëllim ndërtimin e një të ardhmeje edhe më të fortë e më të sigurt.

Bratu u ndal edhe te puna e zhvilluar në stërvitje, si në fushë ashtu edhe në palestër. Ai vlerësoi se ky është momenti i përgatitjeve dhe se skuadra duhet të arrijë nivelin e duhur fizik e teknik.

Trajneri deklaroi se futbollistët po punojnë shumë mirë, si për nga intensiteti ashtu edhe për ritmi, ndërsa po fitojnë edhe duelet. Duke qenë se Partizani ka shumë lojtarë në dispozicion, Bratu bëri të ditur se dëshiron t’u ofrojë hapësirë të gjithëve. Për këtë arsye, miqësorja me Besën e Kavajës është zgjedhur për të vlerësuar gjendjen e ekipit.

The post Florin Bratu prezanton idenë te Partizani: Synojmë një ekip të bashkuar, çdo lojtar do të marrë mundësinë e tij appeared first on Albeu.com.

Partizani do të zhvillojë këtë të shtunë, duke nisur nga ora 18:00, përballjen e parë miqësore. Të kuqtë do të masin forcat me Besën e Kavajës në stadiumin “Luz i Vogël”.

Ky takim do t’i shërbejë trajnerit Florin Bratu për të parë nga afër formën e lojtarëve, mes tyre edhe futbollistët e afruar së fundmi në grup. Një prej tyre është Rrok Toma, i cili është kthyer te “Demat” pas një qëndrimi të shkurtër te Vllaznia gjatë kualifikueseve të Conference League, kompeticion nga i cili shkodranët u eliminuan.

Siç raportoi të premten “Newsport.al”, sulmuesi 22-vjeçar bën pjesë në planet e rumunit, të paktën përgjatë kësaj periudhe të rëndësishme përgatitore. Më 20 korrik, kryeqytetasit do të udhëtojnë drejt Pogradecit për vijimin e programit, përpara nisjes së sezonit të ri në “Abissnet Superiore”.

Miqësorja e sotme pritet të tregojë nëse Bratu do ta aktivizojë sulmuesin e Kombëtares shqiptare U-21 në paraqitjen e parë me të kuqtë. Mbetet gjithashtu për t’u kuptuar se çfarë projekti ka 46-vjeçari për talentin e dalë nga akademia e klubit.

The post Pas eksperiencës te rivalët, Rrok Toma rikthehet te Partizani dhe synon të bindë Florin Bratun appeared first on Albeu.com.

Florin Bratu u prezantua sot si trajneri i ri i Partizanit. Pas takimit të parë me futbollistët, rumuni 46-vjeçar dha edhe deklaratën e tij të parë, teksa theksoi se do të bëjë maksimumin që skuadra të shpallet kampione në fund të sezonit të ardhshëm.

“Së pari përshëndetje të gjithëve. Falënderoj presidentin, të gjithë bordin dhe një përshëndetje të veçante për tifozët e Partizanit. Jam krenar që jam këtu dhe i lumtur sepse Partizani është nga klubet më të mëdha të futbollit shqiptar.

Kam ardhur këtu me shumë eksperiencë, dua të ndërtoj diçka speciale me këtë skuadër. E di shumë mirë që nuk do të jetë e lehtë se është klub ku të gjithë kërkojnë rezultate më të mira. Unë do të jap maksimumin që në fund të këtij sezoni të jemi kampionë”, ka deklaruar Bratu.

The post Bratu merr drejtimin e Partizanit dhe vendos objektivin: Do të jap gjithçka për titullin kampion appeared first on Albeu.com.