Pas takimit me kryetarin e Lidhjes Demokratike të Kosovës (LDK), Lumir Abdixhiku, kryeministri në detyrë Albin Kurti deklaroi se ka vërejtur gatishmërinë e kësaj partie për t’i siguruar vendit një president të ri.

Sipas Kurtit, takimi u zhvillua në një klimë konstruktive dhe u përqendrua te kriteret që duhet të përmbushë figura e ardhshme presidenciale.

“Takimi u zhvillua në frymë konstruktive dhe pashë vullnetin e LDK-së që vendit t’ia sjellim një president të ri, pa qenë nevoja për zgjedhje të reja. Duhet të garantojmë funksionimin demokratik të shtetit dhe, për këtë, duhet të krijojmë mirëbesim. Biseduam për kriteret e figurës së presidentit apo presidentes nga këndvështrime dhe nivele të ndryshme, veçanërisht për vlerat, meritat dhe kontributet në shoqëri, për kombin në tërësi dhe në profesione të caktuara”, tha Kurti pas takimit.

Kreu i LVV-së nënvizoi se synimi i tyre është zgjedhja e një presidenti ose presidenteje me meritë, në përputhje me Kushtetutën, që mishëron vlerat shoqërore dhe ka dhënë kontribut për popullin.

“Sa i përket figurës presidenciale, po e përsëris: duhet të marrim parasysh kriteret, parimet dhe rrethanat në të cilat gjendemi, si dhe figurat me vlerat, kontributet dhe meritat e tyre. Kërkojmë një president ose presidente meritore, kushtetuese, që pasqyron vlerat e shoqërisë sonë dhe që ka kontribuar për popullin”, u shpreh Kurti.

Takimi i zhvilluar ishte i katërti ndërmjet Lëvizjes Vetëvendosje dhe LDK-së, në kuadër të përpjekjeve për të gjetur një marrëveshje lidhur me zgjedhjen e presidentit.

Kurti tha se gatishmëria e shprehur nga palët për të arritur marrëveshje për presidentin është një arsye për të qenë optimistë.

The post Kurti pas takimit me LDK-në: Diskutuam për kriteret dhe figurën e presidentit appeared first on Albeu.com.