Sipas projektit që është publikuar, në të gjithë zonën, do të ndërtohen plot 22 ndërtesa deri në 15 kate, të cilat do të “rrethojnë” atë pak sipërfaqe ujore që është aktualisht dhe që përdoret për varka dhe jahte. E ndërtuar si një domosdoshmëri për anijet e vogla, Marina administrohej deri pak vite më parë nga një firmë italiane.

Në foto: Gjendja aktuale e Marinës së Orikumit, ku janë vetëm 2 ndërtesa nga 3 kate secila

Në zonë u ndërtuan dy godina nga 3 kate secila, pjesë e administratës së Marinës. Por duke parë simotrat e porteve në Shqipëri, kryesisht Portin e Durrësit apo edhe vetë Portin e Vlorës, ku po ndërtohen resorte, hotele, restorante, bare etj, edhe Marina e Orikumit do të ketë të njëjtin fat.

Por, ndryshe nga dy të parat, historia e kësaj Marine është tepër e dyshimtë, pasi me vendime “nën rrogoz” apo me influenca, pronarët e rinj ia kanë dalë mbanë që të marrin leje nga Këshilli Kombëtar i Territorit dhe Ujit për të ngritur në atë vend plot 22 ndërtesa.

Leja ende nuk është zbardhur nga KKTU-ja, por kjo s’e ka penguar firmën “Marina Orikum”, ku vëllezërit Dulaku kanë 51 % të aksioneve dhe 49 % i ka Fatjon Veizaj, ish-deputet i Partisë Demokratike, të reklamojnë në internet të gjithë projektin.

Në foto: Maketi i ndërtimeve në Marinën e Orikumit, me 22 ndërtesa deri në 15 kate

E gjithë zona ka një sipërfaqe të stërmadhe, prej 143 mijë metrash katrorë, teksa nga ajo që shihet në fotot, duket se ndërtimet do të jenë edhe në breg të detit, një pronë ekskluzive shtetërore. Ligji e përcakton qartë se sipërfaqja ujore apo edhe bregu i detit janë shtetërore dhe nuk mund të tjetërsohen, por ligji është vetëm një copë letër.

Por, si qëndron e vërteta e Marinës së Orikumit?!

VoxNews ka hulumtuar dhjetëra dokumente zyrtare, bankare, noteriale apo administrative, që hedhin dritë mbi transaksionet tepër të dyshimta për të zaptuar një pronë ekskluzive, që dikur është dhënë në përdorim (me koncesion) një firme italiane.

Faksimile: Në vitin 2021, vëllezërit Dulaku e blejnë Marinën e Orikumit për 400 mijë euro

Sipas dokumentit, shitësi është pronar i një kuote pjesëmarrjeje të barabartë me 100% të kapitalit themeltar të shoqërisë tregtare “Giorgi Alfo” sh.p.k., me seli në Vlorë,  në adresën Porti i Jahteve, Orikum. “Çmimi total për shitjen e kuotës është 400.210 euro, shumë e cila do të paguhet nga blerësi në momentin e nënshkrimit të kësaj kontrate” thuhet në dokumente.

Faksimile: Kontrata që firma Concord Investment mori kredi në Bankën Amerikane të Investimeve (ABI BANK)

Në këtë mënyrë, një pronë e stërmadhe u mor në administrim nga një familje që vitet e fundit janë njohur për ndërtime të shumta në bregdet. Madje, në muajin tetor 2025 u raportuar se SPAK-u kreu kontrolle në banesën e Artan Dulakut, në lidhje me fitimin e koncesionit të portit të Limionit në Sarandë, dikur një bazë ushtarake.

Por, larg zhurmës së Sarandës apo edhe të lejeve të tjera në mbarë Shqipërinë, vëllezërit Dulaku papritur u bënë pronar të një prone tepër të lakmueshme, buzë detit Jon. Dhe këtu filloi edhe ambicia e tyre për të ndërtuar dhe tjetërsuar të gjithë zonën.

Sipas dokumenteve, firma Concord pasi shtiu në dorë Marinën, mori një kredi te Banka Amerikane e Investimeve (ABI BANK), një bankë e cila njihet për pronarët e saj që veprojnë në parajsa fiskale. Shuma që vëllezërit Dulaku morën kredi është plot 3 milionë euro.

Faksimile: Kontrata e shitjes së 49 % të aksioneve nga Concord te RDA e Fatjon Veizajt

Koha kaloi dhe vijmë në janar 2023. Megjithëse s’ka lidhje të drejtpërdrejta me firmën, apo menaxhimin e Marinës, një lajm bëri bujë në atë muaj. Deputeti i Partisë Demokratike, Fatjon Veizaj, dha dorëheqjen nga mandati. Një veprim që, nëse do të shohim letrat, duhet të ketë lidhje pikërisht me pronën gjigande.

Sipas dokumenteve që ka hulumtuar VoxNews, në datën 22 qershor 2023, është bërë një tjetër kontratë shitje kuotash. Pala shitëse në këtë rast është Concord Investment, e cila i shet aksionet firmës RDA.

Faksimile: Pronari i RDA është Fatjon Veizaj, i cili rimori aksionet pasi la mandatin e deputetit

Në këtë kohë, Fatjon Veizaj ishte “në hije” në këtë firmë, duke vendosur si administrator dhe pronar me letra dy miq të tij. Në dokument përcaktohet se çmimi i shitjes nga Dulakët te Veizaj të 49% të kuotave, u bë për 196.103 euro.

RDA lë peng aksionet dhe merr edhe ajo kredi

Firma RDA ka vijuar me procedurat dhe pasi mori 49 % të aksioneve, mori një kredi në bankë, duke vendosur si kolateral pikërisht kuotat. Një vendim në mbrojtje, pasi megjithëse s’ka mazhorancën, RDA-ja mbrohet pikërisht nga banka, e cila nëse s’paguan këstet apo detyrimet, mund të shesë asetet që zotëron Marina Orikum.

Faksimile: Rendi i ditës i KKTU-së, i datës 24 dhjetor 2024 kishte në pikën 12 edhe lejen e zhvillimit për objektin “Orikum Marina Resort”

Sërish larg syve kureshtarë, tashmë me dy ortakë të fuqishëm, majtas dhe djathtas, Dulakët dhe Veizaj vijuan veprimet, duke synuar që në gjithë atë sipërfaqe të bënin ndërtime shumëkatëshe.

Sipas dokumentit më sipër, i cili është rendi i ditës i mbledhjes së Këshillit Kombëtar të Territorit dhe Ujit në datën 24 dhjetor 2024, në pikën 12 është edhe një leje zhvillimi në Orikum.

“Leje zhvillimi për objektin ‘Orikum Marina Resort, Hotel dhe Struktura akomoduese rezidenciale’, me vendndodhje në Orikum, Bashkia Vlorë, me subjekt zhvillues shoqërinë ‘Marina Orikum’ sh.p.k” thuhet në dokument.

Deri më sot, leja nuk është zbardhur nga KKTU-ja, por lejen e kanë “zbardhur” pronarët e saj. Dulakët dhe Veizaj kanë filluar që t’a reklamojnë projektin.

Në foto: Maketi i ndërtimeve në Marinën e Orikumit, me 22 ndërtesa deri në 15 kate

Gjatë hulumtimeve që ka kryer VoxNews, firma shkruan se në zonën në fjalë do të ndërtohen plot 22 godina, deri në 15 kate. Do të ketë vila, restorante, hotele e shumë apartamente. Por ajo që bie në sy është se ndërtimet do të shtrihen në një sipërfaqe prej 143 mijë m2 buzë detit Jon.

Asnjë institucion shtetëror nuk ka dhënë informacion për tjetërsimin e kësaj marine; Kush është pronari i truallit? Çfarë kishte nën administrim firma italiane? Si u zgjerua projekti në 143 mijë m2? A nuk është pronë shtetërore uji dhe bregu i detit? A duhej të ishte rishtetëzuar Marina e Orikumit? /voxnews

The post Si u tjetërsua Marina Orikum: Nga italianët, te Dulakët dhe Veizaj (ish-deputet) që zaptuan 143 mijë m2 buzë detit appeared first on Albeu.com.

Prej 9 vitesh, disa biznesmenë të mëdhenj nga Katari apo vendet e tjera arabe, janë munduar që të ecin përpara me projektin, i cili kap vlerën e 216 milionë eurove. Fillimisht ata u “ndeshën” me grupe të “fortësh” në zonë, ku u penguan në çdo mënyrë që të ecnin përpara.

Megjithëse kishin ardhur me “rekomandime nga lart”, sërish arabët s’po çanin dot “tregun” shqiptar, për të bërë të mundur marrjen e lejeve. Ata e nisën projektin shumë kohë para projekteve të tjera në Gjirin e Lalzit, të ndërtuara nga shqiptarët.

Por, këta të fundit vijuan të ndërtojnë dhe, nga zonë të pyllëzuar, kanë ndërtuar mijëra vila, dhjetëra htoele e qindra lokale. Ndërkohë, arabët vijonin me procedura burokratike.

Në vitin 2021, pas shumë përpjekjesh të kota, ata vendosën që të bëjnë transaksione, duke shitur përqindje të firmës. Disa biznesmenë të fuqishëm, apo edhe personazhe të njohur të politikës, iu afruan dhe bën biznese me ta.

Fillimisht bleu aksione firma “KLAR”, me pronar z. Shkëlqim Beshirin, i njohur edhe si pronar i një firme kafeje. Më pas vëllezërit Arian dhe Besnik Leskaj, teksa mori aksione edhe firma “RDA”, e biznesmenit dhe ish-deputetit të Partisë Demokratike, Fatjon Veizaj.

Tre emra me shumë peshë në Shqipëri, me lidhje politike nga të gjitha krahët dhe me fuqi të mëdha të parasë. Papritmas, këta biznesmenë morën mazhorancën e aksioneve në një projekt shumë të kushtueshëm, që deri në ato kohëra do të ndërtohej nga arabët. Deri në ato momente, megjithëse arabët lobuan shumë fort deri në kupolën qeverisëse, ata nuk arritën që të merrnin lejet përkatëse dhe projekti po ngadalësohej nga simotrat e saj në Gjirin e Lalzit, që vijonin të ngriheshin në pjesën e pyllëzuar. Madje, ndërtime pati në Hamallaj, San Pietro dhe vetë Gjirin e Lalzit, por jo në zonën ku “Omnix” do të ndërtonte.

Të gjitha transaksionet, ku shqiptarët arritën të marrin plot 70 % të aksioneve të firmës “Omnix” përfunduan në datën 18 korrik 2022. Kontrata e fundit ishte ajo mes arabëve dhe firmës “Klar”, ku u modifikuan disa pasazhe nga kontrata e mëparshme. Në këtë datë që është shumë e rëndësishme u ra dakort që arabët do të merrnin edhe 2.5 milionë euro për disa aksione.

Por, çfarë ndodhi tjetër në atë datë?!

Sipas dokumenteve që ka hulumtuar VoxNews, po në datën 18 korrik 2022, Komiteti i Investimeve Strategjike i dha statusin si investitor strategjik firmës “Omnix” për “resort turistik me vendndodhje në Gjirin e Lalëzit”. Në dokumente shkruhet se është një “investitor i huaj”, por në fakt aksionet u blenë në mazhorancë nga shqiptarët.

Në dokumente theksohet se projekti është për turizëm dhe do investohen 216 milionë euro dhe do të hapen 252 vende pune.

Një koiçidencë e madhe, pasi në momentin që shqiptarët “zhvatën” 70 % të aksioneve, qeveria i shpalli investitor. Pas këtij vendimi me të drejtë lindin shumë pyetje; Përse u ndaluan arabët të vijonin më tej investimin? Kush ndërhyri deri sipër në qeveri që, pas transaksioneve, firma të merrte statusin e investitorit?!

Një mori pikëpyetjesh, pasi arabët u rrahën dhe u zhvatën për vite me radhë dhe në fund, në gjithë projektin 216 milionë euro, kanë vetëm 30 % të aksioneve.

Pas kësaj date, kur Omnix mori statusin e investitorit, pati të tjera transaksione, ku vëllezërit Leskaj ndanë aksionet nga 17.5 % secili apo edhe rimarrja e aksioneve nga ish-deputeti Fatjon Veizaj, pas dorëheqjes nga posti në Parlament.

Ndërkohë, në vitin 2025, Këshilli Kombëtar i Territorit dhe Ujit miratoi edhe “leje zhvillimi për objektin ‘Lalzi Bay Resort’, Kompleks Turistik dhe Rezidencial, me vendndodhje në Gjirin e Lalzit, Bashkia Durrës, me subjekt zhvillues shoqërinë ‘Omnix Albania’ sh.p.k”.

Mësohet se firma propozon zhvillimin e një investimi në bregdetin e Gjirit të Lalëzit, pranë Draç Durrës. “Projekti prek një sipërfaqe prej 145,400 m2 në pronësi të subjektit aplikues, lloji i pasurisë pyll. Gjithashtu projekti ka edhe një sipërfaqe prej 92,225 m2 në pronësi shtet si dhe 81,000 m2 plazh. “Nga sipërfaqja e lart përmendur që prek projekti, kërkohet të hiqet nga fondi pyjor dhe kullosor 60,000 m2 e cila është sipërfaqe e truallit e zënë nga gjurma. Kjo sipërfaqe prej 60,000 m2 është e ndarë në pasuritë pronë shtetërore me sipërfaqe 15,800 m2 dhe pasuritë pronë private në pronësi të “Omnix Albania” sh.p.k. sipërfaqja 44,200 m2” thuhet në vendim.

Si u mor pasuria shtetërore? Në dokumentet që ka hulumtuar VoxNews shkruhet se në zonën e zhvillimit të projektit, ndodhet një sipërfaqe trualli dhe fondi pyjor, në pronësi shtet, pjesë e ngastrës nr. 70 abcd, e cila i është dhënë me qira shoqërisë nëpërmjet kontratë qiraje e vitit 2011 me palë “Drejtoria e Shërbimit Pyjor Durrës” dhe Shoqëria “Omnix Albania” sh.p.k. për dhënie në përdorim sipërfaqen 28,018 ha për përdorim dhe sipërfaqe për rrugë kalimi. /VoxNews

The post Pas transaksioneve nga arabët te shqiptarët, qeveria miraton lejen e zhvillimit për projektin 216 mln euro “Lalzi Bay Resort” appeared first on Albeu.com.

Ndërsa Veizaj u dorëhoq, pyetja është se cili do të jetë deputeti që do të ulet në vend të tij, në Kuvend.

Sipas listës së kandidatëve për deputetë në zgjedhjet e 2021 mandati i kalon Gëzim Ademajt. Nëse dhe ky nuk e pranon, sipas radhës i kalon Jolio Dines.

The post EMRI/ Veizaj dha dorëheqje, kush pritet ta marrë mandatin e deputetit të PD-së në qarkun Vlorë appeared first on Albeu.com.