Rreth 1600 persona të zhdukur me forcë gjatë luftës vazhdojnë të kërkohen në vendin tonë, ndërsa familjarët e tyre presin çdo ditë të mësojnë për fatin dhe vendndodhjen e tyre.

Me rastin e Ditës Ndërkombëtare të Viktimave të Zhdukjeve me Forcë, organizatat joqeveritare zhvilluan një diskutim publik. Në këtë aktivitet, të mbajtur nga organizatat ndërkombëtare me familjarët e të zhdukurve, u theksua se hapja e arkivave të Serbisë është e domosdoshme për gjetjen e rreth 1600 personave të zhdukur në luftën e fundit.

Prej 27 vjetësh, Bekim Gashi nga fshati Tërrnje i Suharekës kërkon nënën dhe katër motrat e tij. Ai ka kontrolluar për ta në çdo varrezë masive të hapur, duke ndjekur çdo gjurmë dhe informacion për personat e zhdukur.

Gashi deklaroi se e vetmja rrugë për zbardhjen e fatit të të pagjeturve është hapja e arkivave në Serbi. Duke iu referuar rastit të familjes së tij, ai tha se dihet që krimi është kryer nga Brigada 549 dhe se kjo brigadë posedon shënimet për vendndodhjen e trupave të njerëzve të tyre më të dashur.

Ai u bëri thirrje institucioneve dhe organizatave joqeveritare që të mos publikojnë emra pa i konfirmuar më parë. Sipas Gashit, për familjet e personave të zhdukur nuk ka gjë më të rëndë sesa marrja e një lajmi të pavërtetë.

Mjeku ligjor Dritor Haliti shpjegoi se procedura e ekzaminimit të ADN-së kërkon të paktën tre muaj.

Sipas Halitit, në fazën e parë Instituti merr menjëherë një mostër dhe e dërgon atë në Komisionin Ndërkombëtar për Persona të Zhdukur. Atje kryhen analiza sistematike për të krijuar profilin e ADN-së, i cili më pas krahasohet me të dhënat dhe mostrat e gjakut të familjarëve, përpara se të nxirret përfundimi.

Bekim Blakaj nga Fondi për të Drejtën Humanitare në Kosovë tha se familjarëve duhet t’u mundësohet të marrin çdo informacion lidhur me procesin.

Blakaj theksoi se familjet jo vetëm kanë të drejtë t’i varrosin me nderime të larta të afërmit e tyre, por duhet të dinë gjithçka për procedurën dhe arsyet pse gjetja e familjarëve të tyre është vonuar deri më tani.

The post Në Ditën Ndërkombëtare të të Zhdukurve kërkohet qasje në arkivat e Serbisë appeared first on Albeu.com.

Çdo mbrëmje, Flora Rrecaj shkon në parkun e madh me gjelbërim dhe lodra, që ndodhet në qendër të Skenderajt.

Aty prej disa vitesh është vendosur busti i babait të saj, Idriz Rrecajt, i cili rezulton i zhdukur që nga 19 prilli i vitit 1999.

Idriz Rrecaj, i nderuar në vitin 2019 me titullin “Hero i Kosovës”, ishte veprimtar politik. Ai u zhduk bashkë me 22 shqiptarë të tjerë, të njohur si “grupi i intelektualëve”, në periudhën kur lufta e forcave serbe në Kosovë ishte përshkallëzuar.

Flora Rrecaj në parkun që mban emrin dhe bustin e Idriz Rrecajt, babait të saj të zhdukur që nga 19 prilli i vitit 1999.

“Babai im nuk ka qenë vetëm prindi ynë… Ka qenë intelektual i shquar. Babai im ka qenë patriot. Ka qenë një person që krejt jetën e tij ia ka kushtuar këtij vendi dhe këtyre njerëzve”, i tha Flora Rrecaj Radios Evropa e Lirë.

Pa një varr ku familja e saj prej tetë anëtarësh të mund të kryente nderimet, parku në këtë qytet veriperëndimor të Kosovës është kthyer në të vetmin vend ku ajo ndien praninë e të atit dhe e përkujton atë.

Për 27 vjet, që prej zhdukjes së Idriz Rrecajt, Flora dhe pjesëtarët e tjerë të familjes e kanë kërkuar emrin e tij në listat e burgjeve në Serbi, në dëshmi, në informacione të pakonfirmuara dhe në zona ku janë zbuluar herë pas here mbetje mortore.

Tashmë, përveç parkut dhe bustit në Skenderaj, familja e saj ka edhe një tjetër pikë referimi: Zubin Potokun, komunë në veri të Kosovës, rreth 1 orë larg Skenderajt.

Në fshatrat Kalludër e Vogël dhe Jabukë, të banuara kryesisht nga serbë, autoritetet zbuluan së fundi varreza masive.

Fëmijët e Idriz Rrecajt pranë zonës së gërmimeve, ku dyshohet se ndodhen mbetjet mortore të babait të tyre të zhdukur.

Dyshimi i parë i autoriteteve është se mbetjet e nxjerra mund t’u përkasin 23 shqiptarëve të zhdukur, mes tyre edhe Idriz Rrecajt. Procesi i zhvarrimit përfundoi më 21 gusht.

Megjithatë, Kalludra e Vogël ishte përmendur edhe më herët në lidhje me këtë rast.

Fondit për të Drejtën Humanitare i rezulton se më 7 shkurt 2023, një dëshmitar serb u kishte përcjellë UNMIK-ut, Misionit të Organizatës së Kombeve të Bashkuara në Kosovë, dhe Policisë së Kosovës të dhëna për vrasjen e 23 civilëve shqiptarë dhe fshehjen e trupave të tyre në luginën e këtij fshati.

Kaluan më shumë se dy dekada deri sa kërkimet të përfundonin te varreza masive.

Idriz Rrecaj, i zhdukur gjatë luftës së fundit, në qendër të fotografisë me vajzat e tij, Florën dhe Valbonën. Fotografia është realizuar rreth vitit 1997.

“Përveç atij që e ka një familjar, apo një të afërm të zhdukur, askush nuk mund ta përshkruajë këtë dhimbje, dëshpërim dhe pritje. Shumë shpesh jemi ndier të zhgënjyer, dhe të është dukur se askush nuk po bën asgjë. Nuk dua ta fajësoj askënd, apo t’ia drejtoj gishtin askujt, por e them me të drejtën e botës se ndoshta nuk është punuar sa duhet për këta njerëz”, u shpreh Rrecaj.

Sipas saj, pritja për një përgjigje përfundimtare mbart njëkohësisht shpresën se gjithçka mund të marrë fund dhe frikën se analizat e ADN-së mund të dëshmojnë se Idriz Rrecaj nuk ndodhet mes mbetjeve të zbuluara.

“Ta them troç, janë ndjenja të përziera. Janë ndjenjat e dhimbjes, ndjenjat e shpresës, por janë edhe ndjenjat e frikës. Pas kaq shumë vitesh, tash e ke një frikë prej përgjigjes. Por, megjithatë, është e domosdoshme dhe shumë e nevojshme të dihet e vërteta”, tha ajo.

Nga zbulimi i varrit te identifikimi: Proces që mund të zgjasë muaj ose vite

Institucionet theksojnë se gjetja dhe zhvarrosja e mbetjeve mortore përbëjnë vetëm fillimin e një procedure që mund të kërkojë muaj dhe, në rastet më të ndërlikuara, edhe vite.

Edhe para ndërhyrjes së fundit, autoritetet kishin kërkuar në zonën e Kalludrës së Vogël dhe Jabukës për të gjetur varrezën masive.

Agron Limani, kryesues i Komisionit Qeveritar kosovar për Persona të Zhdukur, i tha Radios Evropa e Lirë se hetimet e mëparshme kishin qenë pranë zonës së varreve, por nuk kishin identifikuar vendin e saktë.

Zona e gërmimeve të varrit masiv në Zubin Potok.

Sipas Limanit, informacionet e siguruara nga Policia e Kosovës dhe arrestimi i tre të dyshuarve për përfshirje në krim ndihmuan në përcaktimin e tri lokacioneve të sakta, ku më pas u gjetën mbetjet mortore.

Edhe pas zbulimit të një varreze masive, kalimi nga eshtrat te identiteti i viktimave kërkon angazhimin e disa institucioneve dhe zhvillimin e një sërë etapash hetimore e shkencore.

Policia fillimisht e rrethon dhe e shenjëzon vendin. Më pas njoftohet Prokuroria Speciale, e cila i drejtohet gjykatës për autorizim për gërmime. Ekspertët e Institutit të Mjekësisë Ligjore kryejnë zhvarrimin, ekzaminojnë mbetjet, regjistrojnë gjendjen e tyre dhe marrin mostra nga eshtrat.

Mostrat dërgohen në laboratorin e Komisionit Ndërkombëtar për Persona të Zhdukur, ICMP, në Hagë të Holandës. Atje, profili i ADN-së së mbetjeve mortore krahasohet me profilet referuese të marra nga familjarët e personave të zhdukur.

“Pa analizën e ADN-së, dhe pa përputhjen e mostrave të mbetjeve eshtërore me mostrat e gjakut, nuk mund të thuhet me siguri 100 për qind [se kujt i përkasin]”, tha Limani.

Ai shpjegon se në rastin e Zubin Potokut, numri i mbetjeve, vendndodhja e tyre dhe dëshmitë e mbledhura kanë forcuar dyshimet se ato mund të jenë të “grupit të intelektualëve të Mitrovicës”.

“Rrethanat dhe dëshmitë përputhen me mbetjet mortore”, tha Limani.

Në zonën e gërmuar në Zubin Potok u zbuluan mbetje mortore që dyshohet se u përkasin personave të zhdukur gjatë luftës së fundit.

Samira Krehiq, udhëheqëse e ICMP-së për Ballkanin Perëndimor, thekson se identiteti i viktimave nuk mund të përcaktohet vetëm nga numri i mbetjeve, vendi ku u gjetën apo informacionet mbi mënyrën e zhdukjes.

Në një intervistë për Radion Evropa e Lirë, ajo tha se ICMP-ja e lëshon raportin e përputhjes vetëm kur lidhja mes ADN-së së mbetjeve dhe mostrave të familjarëve arrin një nivel sigurie mbi 99.95 për qind.

“Vetëm pasi ta dimë me siguri identitetin individual të të gjitha viktimave të gjetura, mund të fillojë rindërtimi i ngjarjes, jo anasjelltas”, theksoi Krehiq.

Institucionet nuk japin një afat të përcaktuar për përfundimin e kësaj procedure.

Kohëzgjatja ndikohet nga gjendja e mbetjeve, dëmtimi i ADN-së për shkak të kohës dhe mjedisit, fragmentimi ose përzierja e eshtrave, cilësia e mostrave dhe fakti nëse ICMP-ja disponon mjaftueshëm mostra referuese nga familjarët.

ICMP-ja bën të ditur se në raste të caktuara analizat mund të përsëriten ose mund të nevojitet marrja e një mostre tjetër nga eshtrat. Nëse familja nuk ka dhënë mostra të mjaftueshme, identifikimi mund të mbetet i papërfunduar deri në sigurimin e një mostre nga një i afërm tjetër.

Për Lutfije Ademi Vokshin, koha që kalon nga gjetja e eshtrave deri te konfirmimi i emrit është vetëm vazhdim i pritjes së nisur në vitin 1999.

Vëllai i saj, kirurgu Adem Ademi, ishte mes 23 personave të zhdukur. Për afro tri dekada, ajo nuk e kishte humbur plotësisht besimin se ai mund të ndodhej diku pranë fshatit Drenë të Zubin Potokut.

Lutfije Ademi Vokshi gjatë vizitës në zonën e gërmimeve të varrit masiv, ku dyshohet se ndodhen edhe mbetjet mortore të vëllait të saj të zhdukur, Adem Ademit.

Kur mbetjet u gjetën në Kalludër të Vogël, rreth tre kilometra e gjysmë larg Drenës në vijë ajrore, Vokshi tregon se nuk kishte mundur të nxirrte asnjë fjalë dhe se vetëm kishte qarë.

Në një intervistë të mëparshme për Radion Evropa e Lirë, ajo kishte thënë se shpresonte të kishte më në fund një varr ku, për festa, ditëlindje apo Bajram, të vendoste lule dhe “të shkonte të fliste” me të vëllanë.

Megjithatë, derisa të dalin rezultatet e analizave, ajo pranon se Adem Ademi mund të mos jetë mes mbetjeve të gjetura.

Për familjet që kanë pritur prej 27 vjetësh, çdo shtyrje e mëtejshme nënkupton zgjatje të një ankthi që Agron Limani e përshkruan si “torturues”.

Limani e njeh nga afër këtë përvojë. Ai është nga Krusha e Vogël e Komunës së Prizrenit, ku mbi 60 persona vijojnë të figurojnë të zhdukur. Në mesin e tyre janë edhe tre familjarë të tij.

“Kemi pasur raste kur familjarët kanë thënë: ‘Dua ta kem së paku një gisht, një kockë të gishtit, ta varros dhe ta di ku e kam varrin e djalit, bashkëshortit apo vëllait. Ta di që, në çdo përvjetor apo festë, mund t’i respektojmë dhe t’i nderojmë”, tha ai.

Agron Limani, kryetar i Komisionit për Persona të Zhdukur në Kosovë.

Pas përfundimit të luftës, shumë familje, sipas Limanit, vazhdonin të besonin se të afërmit e zhdukur mund të ishin ende gjallë. Me kalimin e viteve, kjo shpresë u shndërrua në një pritje edhe më të dhimbshme: të gjendeshin të paktën eshtrat e tyre.

“Kur kjo pritje zgjat, ajo është torturuese për familjarët”, tha Limani.

Sipas Institutit të Krimeve të Kryera Gjatë Luftës në Kosovë, ende nuk dihet fati i 1.577 personave të zhdukur nga lufta e viteve 1998-1999. Në total, janë dokumentuar 12.230 viktima të luftës.

Kosova i ka kërkuar vazhdimisht Serbisë bashkëpunim për zbardhjen e fatit të të zhdukurve, si dhe qasje në arkivat ushtarake, të cilat, sipas autoriteteve, mund të ndihmojnë në gjetjen e lokacioneve ku mund të ndodhen varre të tjera.

The post Shpresë dhe frikë”: Familjet e të zhdukurve presin me ankth përgjigjet e analizave pas zhvarrimeve appeared first on Albeu.com.

Mes dhimbjes dhe lotëve, të afërm dhe banorë të zonës së ish Kënetës u dhanë lamtumirën e fundit dy vogëlushëve.

Në homazhe, ishte e pranishme edhe zëvendëskryeministrja Albana Koçiu, e cila teksa shprehu ngushëllimet, theksoi nevojën për arantohen standarde të larta sigurie në çdo hapësirë, duke mos lejuar asnjë neglizhencë.

NGJARJA

Aksidenti i rëndë u shënua mesditën e 3 majit në zonën e ish-kënetës në Durrës, ku Nikoll Radaçi, 57 vjeç, teksa drejtonte automjetin tip “Mercedes-Benz ML” me shpejtësi të lartë, përplasi tre fëmijët të moshave 8, 10 dhe 12 vjeç, që ndodheshin në trotuar. Dy prej tyre, 10 dhe 12 vjeçari, ndërruan jetë në vendngjarje, ndërsa 8-vjeçari u dërgua në gjendje të rëndë në spital.

Drejtuesi i mjetit rezultoi në gjendje të dehur në momentin e aksidentit. Pas ngjarjes, ai u largua nga vendi i aksidentit, por u vu në pranga më pas nga policia. 57-vjeçari rezultoi se ishte ndëshkuar më parë për shkelje të rregullave të qarkullimit rrugor, përfshirë parakalime të gabuara dhe tejkalim shpejtësie ndërsa i ishte pezulluar patenta nga 1 muaj.

Ndaj tij rëndojnë akuzat për “Shkelje të rregullave të qarkullimit rrugor” me pasojë vdekjen e dy personave, “Drejtim i automjetit në gjendje të dehur” dhe “Largim nga vendi i aksidentit”.

The post Pamje të trishta pas tragjedisë në Durrës, familjarët përcjellin në banesën e fundit dy fëmijët që humbën jetën (VIDEO) appeared first on Albeu.com.

Në një deklaratë të gjatë të publikuar në “InstaStory”, familjarët kanë hedhur poshtë kategorikisht akuzat për dhunë apo sjellje të papërshtatshme nga ana e Mateos.

Ata e kanë argumentuar reagimin e Brikenës, e cila u mbyll në tualet në një gjendje të rënduar, si një reagim normal të një vajze që vihet në siklet, por që është amplifikuar nga presioni i kamerave dhe ditët e gjata të izolimit.

Në reagimin e tyre theksohet: “Ajo që u pa nuk është dramë, por një reagim krejtësisht normal. Në jetën e përditshme, çdo vajzë mund të ndihet në siklet në një moment dhe të reagojë duke u tërhequr apo duke u emocionuar. Diferenca këtu është se gjithçka ndodh nën presionin e kamerave. Ajo nuk ka pasur më parë përvojë me ekspozim të privatësisë në publik dhe është e natyrshme që kjo situatë ta ketë ngarkuar emocionalisht. Të qenit 90 ditë e izoluar dhe nën vëzhgim të vazhdueshëm vetëm sa e shton këtë presion”.

Më tej, ata i kanë dalë në mbrojtje të hapur Mateos, duke etiketuar komentet e rrjetit si keqdashëse:

“Gjithashtu, duam të theksojmë qartë se Mateo nuk është treguar ‘i pasjellshëm’ dhe ‘i dhunshëm’ ndaj saj. Ju lutem interpretimet e tilla janë të padrejta dhe keqdashëse. Kjo është thjesht një situatë mes dy të rinjve që po përjetojnë emocione në një ambient jo normal. Ju ftojmë për më shumë mirëkuptim dhe me pak paragjykim”.

Deklarata përfundon me thirrjen “Respekt dhe dashni për të gjithë”, e shoqëruar me një fotografi të Mateos dhe Brikenës teksa formojnë një zemër me duart e tyre.

Ky reagim pritet të qetësojë ujërat jashtë shtëpisë, ndërsa mbetet për t’u parë se si do të trajtohet kjo ngjarje nga vetë dyshja në spektaklin e radhës.

The post Mateo e puthi me forcë në buzë, reagojnë familjarët e Brikenës (FOTO) appeared first on Albeu.com.

Lidhja e gjakut shpesh na shtyn të tregojmë më shumë durim, të falim më shumë seç do të bënim në çdo raport tjetër vetëm për të mbrojtur marrëdhëniet me njerëz që ne i konsiderojmë të shtrenjtë.

Por sado ta dëshirojmë, kjo jo gjithmonë është e mundur.

Ka disa konflikte të cilat nuk është e lehtë të lihen pas krahëve e me sa duket kjo gjë u ka ndodhur edhe disa VIP-ave në Shqipëri, të cilët për arsye nga më të ndryshmet kanë vendosur herë përkohësisht e herë të tjera përgjithmonë, të shkëpusin lidhjet me familjarët.

Dafina Zeqiri:

Dafina Zeqiri dhe motra e saj, Besa, nuk kanë pasur marrëdhënie me babain e tyre që nga fëmijëria. Motra e saj deklaroi vite më parë se i ati i braktisi në moshë shumë të vogël.

Ajo tha se ai nuk ishte interesuar për to për 21 vjet me radhë, derisa më pas i ka kontaktoi papritur, por gjatë deklaratës la të nënkuptohej se nuk kishin ndërmend ta falnin.

Xhensila Myrtezaj:

Këngëtarja foli për divorcin mes prindërve gjatë një interviste në emisionin “Mirëmbrëma Yje” me Arbana Osmanin. Ajo tregoi se kur ishte 6 vjeç ka parë babain duke goditur me thikë nënën e saj, kjo e fundit si pasojë e sulmit me thikë humbi krahun.

E gjitha skena ishte parë nga Xhensila, e cila e përshkroi si ngjarjen më traumatike të jetës së saj, por ndonëse kjo ishte një ngjarje mjaft e rëndë, këngëtarja theksoi se ai mbetet babai i saj, ndërsa shtoi se vetëm e ëma ka zgjedhur ta falë.

Ermal Meta:

Këngëtari i njohur Ermal Meta ka folur në intervista të ndryshme për një marrëdhënie të vështirë me familjen gjatë viteve të hershme të jetës së tij.

Ai ka treguar se është rritur në kushte të vështira dhe se ka pasur periudha të gjata distancimi emocional nga familjarët, sidomos me babain me të cilin e shmangte komunikimin edhe gjatë kohës kur jetonin bashkë.

Në një intervistë për Corriere Della Sera ai u shpreh se kishte një familje të tmerrshme.

“Unë kisha një familje tradicionale që ishte e tmerrshme. Babai im nuk ishte njeri i mirë, do të kisha preferuar një mijë herë diçka ndryshe.”

The post Cilët nga VIP-at kanë shkëputur marrëdhëniet familjare dhe e kanë pohuar publikisht? Ja disa prej tyre… appeared first on Albeu.com.

Katër foshnjet kanë nevojë urgjente për t`u dërguar për operacion jashtë vendit, pasi rrezikojnë të humbasin shikimin përgjithmonë.

Dy prej tyre kanë hemorragji në sy për shkak të çarjes së arterieve, ndërsa dy bebet e tjera rrezikojnë po të njëjtat pasoja nëse nuk ndërhyhet në kohë.

Për shkak të shpenzimeve të mëdha dhe pamundësisë për t’i mbuluar të gjitha vetë, familjarët kërkojnë ndihmën e shqiptarëve.

Nëpërmjet hapjes së një GoFundMe, Geraldo dhe Rozefa, kërkojnë të plotësojnë shumën e 100 mijë eurove dhe t’i sigurojnë katërnjakëve trajtimin e duhur përpara se të jetë shumë vonë për ta.

The post Katërnjakët me hemorragji në sy, familjarët kërkojnë ndihmë: Kanë nevojë të operohen urgjent appeared first on Albeu.com.

Ai ka akuzuar kryebashkiakun Rexhë Byberi, se vtëm një vetëm një javë pas daljes nga arresti shtëpiak, ka shpërdoruar sërish detyrën për të favorizuar familjarët e tij në një procedurë tenderimi.

Balliu tha se kompania e kushëririt të Byberit ka fituar tenderin me vlerë 82,911,061 lekë, pas skualifikimit të 10 kompanive të tjera me oferta më të ulëta për ndërtimin e një rruge që sipas deputetit nuk ka asnjë prioritet zhvillimor për Tropojën.

“Sipas dokumentacionit të tenderit, rruga kalon përmes Parkut Kombëtar të Valbonës dhe Parkut Natyror të Lumës e Gashit – zona të mbrojtura pyjore të cilat do të pësojnë dëmtime të rënda mjedisore. Ky projekt shkon drejt një destinacioni absurd: fshati Bradoshnicë, i braktisur prej vitesh, pa asnjë banor të përhershëm dhe me përdorim minimal vetëm gjatë verës. Ndërkohë, banorët e qytetit të Bajram Currit vazhdojnë të vuajnë mungesën e ujit të pijshëm, kanalet vaditëse janë lënë në degradim, dhe fshatra të tëra të banuara nuk kanë rrugë të kalueshme“, tha Balliu ndër të tjera.

DEKLARATË E KLEVIS BALLIUT:

Partia Demokratike denoncon publikisht një tjetër skandal të rëndë korruptiv në Bashkinë e Tropojës, ku kryetari i saj, Rexhe Byberaj, vetëm një javë pas daljes nga arresti shtëpiak, ka shpërdoruar sërish detyrën për të favorizuar familjarët e tij në një procedurë tenderimi flagrante.

Më datë 15 korrik 2025, Bashkia Tropojë ka zhvilluar tenderin me objekt “Ndërtim Rruga Auto Kika – Gjarpri i Dragobisë – Qafë Paje”, me vlerë 82,911,061 lekë pa TVSH (99,493,273 lekë me TVSH), referencë REF-52709-06-27-2025, procedurë e publikuar në Open Procurement Albania.

Në këtë garë morën pjesë 11 kompani, prej të cilave 10 u skualifikuan, duke shpallur fitues bashkimin e operatorëve ekonomikë BOE GRIALD & INA & VLLAZNIMI me ofertë 63,823,998 lekë pa TVSH (76,588,797 lekë me TVSH). Gjysma e këtij bashkimi operatorësh, kompania Vllaznimi shpk, drejtohet nga Bashkim Byberi – djali i xhaxhait të Rexhe Byberajt – duke krijuar një konflikt interesi të hapur dhe të rëndë.

Skualifikimi i 10 operatorëve të tjerë, përfshirë kompani me oferta dukshëm më të ulëta, tregon qartë se kjo procedurë nuk kishte si qëllim interesin publik, por përfitimin personal të kryetarit të bashkisë.

Më shqetësuese është fakti se ndërtimi i kësaj rruge nuk ka asnjë prioritet zhvillimor për Tropojën.

Sipas dokumentacionit të tenderit, rruga kalon përmes Parkut Kombëtar të Valbonës dhe Parkut Natyror të Lumës e Gashit – zona të mbrojtura pyjore të cilat do të pësojnë dëmtime të rënda mjedisore.

Ky projekt shkon drejt një destinacioni absurd: fshati Bradoshnicë, i braktisur prej vitesh, pa asnjë banor të përhershëm dhe me përdorim minimal vetëm gjatë verës. Ndërkohë, banorët e qytetit të Bajram Currit vazhdojnë të vuajnë mungesën e ujit të pijshëm, kanalet vaditëse janë lënë në degradim, dhe fshatra të tëra të banuara nuk kanë rrugë të kalueshme.

Fakti që Bashkia Tropojë, e zhytur në borxhe, angazhon fonde për tre vite radhazi për një rrugë që “çon tek askush”, tregon se prioritet i vërtetë nuk është zhvillimi, por pasurimi personal dhe justifikimi për lirimin e Byberajt nga burgu.

Partia Demokratike dënon këto akte flagrante korruptive dhe i bën thirrje organeve të drejtësisë dhe institucioneve të monitorimit dhe të prokurimeve publike, nëse ka mbetur ndonjë, që të hetojnë menjëherë këtë aferë, të ndalojnë dëmtimin e pasurisë natyrore dhe të ndëshkojnë çdo zyrtar që abuzon me fondet publike për interesa familjare e klienteliste.

The post Klevis Balliu: Rexhë Byberaj, një javë pas arrestit shtëpiak, favorizon familjarët me tender 1 miliard lekë appeared first on Albeu.com.

Ky pretendim, u bë viral pas një story që Egli publikoi dy vite më parë në “Instagram”, ku ajo përshkruante një moment të dhimbshëm dhe të ngarkuar emocionalisht.

Në postimin e saj, Egli shkruante: “Ky ishte vendi ku ti mbroheshe, flije dhe ku pushove në paqe! Vendosa të të mbaj këtu përgjithmonë, ta mbaj këtë vend mbushur me ty, njësoj si zemrën time! Till we meet each other again snow. Mami të do!”.

Ky mesazh i ngarkuar emocionalisht, ka ngritur dyshime dhe ka bërë që disa individë të spekulonin se ai mund të ishte një aludim, për një humbje fëmijësh të mundshme.

Megjithatë, reagimi i familjarëve të këngëtares ka qenë i fortë dhe i drejtpërdrejtë. Ata, të cilët aktualisht menaxhojnë profilin zyrtar të Eglit në “Instagram”, kanë mohuar kategorikisht këto thashetheme, duke i quajtur ato spekulime të pabaza dhe të pavërtetuara.

Ata gjithashtu, kërkuan që përhapja e këtyre thashethemeve të ndalohej menjëherë, pasi ato cenojnë jetën private të Eglit dhe ndodhin në një moment të ndjeshëm për të.

Në një reagim të ashpër, familjarët e këngëtares shkruan: “Lat nam. Zotin ju kemi lënë se ju qenkeni fundi, s’ka më keq!”,

Ky reagim është një apel për të ndaluar përhapjen e spekulimeve të dëmshme dhe për të mbrojtur privatësinë dhe dinjitetin e Eglit.

Në këtë situatë, Egli është e mbyllur në shtëpinë e “Big Brother VIP Albania”, dhe për shkak të rregullave të këtij programi, ajo nuk ka mundësi të reagojë direkt.

Kjo ka shtuar edhe më shumë tensionin dhe ka nxitur reagime të forta nga familjarët e saj, të cilët kanë kërkuar respekt për të dhe për jetën e saj personale.

The post Egli Tako ka humbur një fëmijë gjatë lidhjes me Olsi Bylykun? Reagojnë ashpër familjarët e banores appeared first on Albeu.com.

Veliaj u arrestua të hënën e kaluar, ndërsa të mërkurën Gjykata e Posaçme, konfirmoi për kryebashkiakun masën e sigurisë Arrest me burg.

Të enjten u krye transferimi i tij nga blloku i sigurisë te Mine Peza, në paraburgimin e Durrësit.

The post SPAK lejon familjarët të vizitojnë Erion Veliajn në burg appeared first on Albeu.com.

Qeveria njoftoi më 5 nëntor se brenda dhjetorit, do të bëjë publik vendimin për uljen e çmimit të energjisë për vitin 2025, por Enti Rregullator nuk ka ende një vendim.

Aktualisht, çmimi i energjisë per familjet është 9.5 lekë për kilovat pa TVSH, ndërsa me TVSH arrin në 11.4 lekë.

Ky çmim është fiksuar në vitin 2014 pasi u hoq tarifimi me dy fasha dhe prej një dekade ka mbetur i pandryshuar. Burime nga Enti Rregullator i Energjisë bëjnë të ditur se rishikimi i çmimit të energjisë është në proces trajtimi me OSHEE, por nëse procesi është ende në vijim, ka shumë pak dite kohë që të përmbyllet Brenda këtij viti.

Sipas procedurave të mëparshme Furnizuesi i Shërbimit Universal që është një nga kompanitë e OSHEE-së që dorëzon një aplikim pranë Entit Rregullator të energjisë, duke listuar tarifat e reja së bashku me treguesit ekonomikë.

Më pas, Bordi i Entit Rregullator mblidhet për të shqyrtuar kërkesën e OSHEE-së, për të dalë me një vendim për çmimin.

Një mundësi është që nëse ky vendim do të merret brenda këtij viti, të prezantohet nga kryeministri Rama në konferencën e tij të fundit që zakonisht e zhvillon në 31 dhjetor.

The post Çmimi i energjisë për familjarët/ Qeveria premton uljen e tij, por ende nuk ka vendim appeared first on Albeu.com.