familjaret e viktimave Archives - Albeu.com

Djegia e spitalit modular në Tetovë, familjarë të viktimave dhe përkrahës të tyre para gjykatës

E B — Thu, 16 Feb 2023 10:13:37 +0000

Në Gjykatën Themelore në Tetovë, sot vazhdon gjykimi për zjarrin në spitalin modular të Tetovës. Para Gjykatës janë mbledhur dhjetëra familjarë të viktimave dhe përkrahës të tyre, të cilët kërkojnë drejtësi.

Më 31 janar ishte seanca e fundit në të cilën u dëgjuan shtatë dëshmitarë të propozuar nga Prokuroria.

Në pyetjen e prokurorëve, të gjykatësit dhe të avokatëve të të akuzuarve dhe të dëmtuarve u përgjigjën dy mjekë, një infermiere dhe katër persona të cilët në spitalin modular shoqëronin pacientët.

Gjykimi sot vazhdon me dëgjimin edhe të disa dëshmitarëve, ndërsa gjykatësi Jordan Vellkovski paralajmëroi se do të ftohen edhe ekspertët që e kanë përgatitur ekspertizën. Më pas do të ketë seanca dëgjimore të dëshmitarëve dhe dëshmi me shkrim të mbrojtjes.

Të akuzuarit, drejtorët Florin Besimi dhe Artan Etemi, mjeku Boban Vuçevski dhe përfaqësuesi i Spitalit Klinik të Tetovës si person juridik, në fillim të gjykimit theksuan se e kuptojnë akuzën, por nuk pranojnë fajin dhe se nuk i kanë kryer veprat për të cilat akuzohen.

Gjykimi për zjarrin që ndodhi më 8 shtator të vitit 2021, ku humbën jetën 14 persona, ndërsa dhjetëra u lënduan, filloi më 7 dhjetor të vitit 2022, pasi nga shtatori i vitit 2022 deri atëherë procesi gjyqësor disa herë u shty./tv21

The post Djegia e spitalit modular në Tetovë, familjarë të viktimave dhe përkrahës të tyre para gjykatës appeared first on Albeu.com.

Familjarët e viktimave të aksidentit tragjik në Bullgari të zhgënjyer nga vendimi i kreut të Kuvendit

E B — Wed, 06 Apr 2022 14:38:23 +0000

Familjarët e viktimave të aksidentit të autobusit me shtetas të Maqedonisë së Veriut në Bullgari më 23 nëntorit të vitit kaluar, janë të zhgënjyer nga vendimi i kryetarit të Kuvendit, Talat Xhaferi për të mos lejuar shqyrtimin e procedurës hetimore në Komisionin e përhershëm anketues, shkruan Alsat.

Ata thonë se ballafaqohen me mungesë informacioni mbi akuzat dhe procedurat dhe për këtë arsye kërkojnë që Kuvendi të japë më shumë informacione.

“Për këtë arsye edhe reaguam gjithë familjarët sepse ne me të vërtetë kemi problem dhe nuk e prisnim nga deputetë të reagojnë në mënyrë të tillë. Ne kemi vështirësi konkrete, nuk mund të arrijmë në informata. Ju e dini se Prokuroria në Bullgari e ka mbyllur rastin e tragjedisë duke fajësuar shoferin që nga 19 janari. Që atëherë dokumentacioni ndodhet ne Prokurorinë tonë, por neve as nuk e kemi parë dhe as nuk e kemi lexuar”, tha Muhedin Brava, Familjar i njërës nga viktimat e aksidentit.

Kuvendi nga ana tjetër akuzoi opozitën shqiptare për keqpërdorimin e tragjedive të Tetovës dhe atë në Bullgari për qëllime politike.

“Mendoj se është keqpërdorur fatkeqësia e qytetarëve tanë për qëllime politike ditore. Sot e tutje më nuk do të merrem me këto çështje. Unë nuk mund të lejoj që Parlamenti të lejohet në pazar politik. Nëse shkojmë me logjikën me të cilën mendon Halil Snopçe, atëherë në çka do të shndërrohet Parlamenti, 120 deputetë, 21 trupa pune, secili vetes t’i dërgojë materiale në këtë formë, atëherë pse duhet të ekziston Rregullorja?”, thonë nga Kuvendi.

Mbledhja e Komisionit të përhershëm anketues ishte thirrur për 25 mars, ndërsa me kërkesë të kryetarit, Halil Snopçe ishte kërkuar shtyrja e kësaj mbledhje për 5 prill.

Në rend dite ishin tre pika: kërkesa e qytetarit Muhaedin Bela për diskriminim në vendin e punës, pika e dytë kishte të bënte për hetimin në Spitalin Modular të Tetovës dhe pika e tretë për hetimin për aksidentin në Bullgari. / Alsat.mk

The post Familjarët e viktimave të aksidentit tragjik në Bullgari të zhgënjyer nga vendimi i kreut të Kuvendit appeared first on Albeu.com.

Familjarët e viktimave të tragjedisë në Bullgari: S’kemi asnjë informacion nga institucionet

E B — Tue, 23 Nov 2021 10:13:32 +0000

Xhelal Bakiu, familjar i një prej personave që ishte brenda në autobus është ankuar për mungesë informacionesh.

Ai ka thënë se ende nuk kanë asnjë informacion as nga institucionet e as nga agjencia për personat që ishin brenda autobusit.

“Ishte ora 6 e mëngjesit dhe e pash lajmin. Prej momentin që e pash këtë lajm kemi ardhur këtu sepse në autobus e kisha kushëririn. Deri tash nuk kemi informacion. Së paku duhet të na informojnë për ata persona se a janë mirë a kanë shpëtuar. Kushëriri im ishte vet dhe është 46-vjeçar. Ne e kërkojmë në rrjete sociale por nuk kemi asnjë informatë për të”, ka thënë ai.

The post Familjarët e viktimave të tragjedisë në Bullgari: S’kemi asnjë informacion nga institucionet appeared first on Albeu.com.