Familja e Haki Imerit ka reaguar ndaj zhvillimeve të fundit politike dhe vendimit të gjashtë deputetëve të LDK-së për të mos mbështetur procesin e zgjedhjes së presidentit të Kosovës.

Njëkohësisht, familja Imeri i ka shprehur përkrahje kryetarit të LDK-së, Lumir Abdixhiku, duke theksuar se ai nuk duhet të tërhiqet përballë qëndrimit të këtyre deputetëve.

Sipas familjes së Haki Imerit, veprimet e gjashtë deputetëve nuk pasqyrojnë agjendën e LDK-së. Në reagim ngrihen akuza për ndikime të jashtme dhe interesa që, siç pretendohet, synojnë dëmtimin e procesit të shtetndërtimit të Kosovës, përcjell “Bota sot”.

Reagimi i plotë

Miq,

Lumir Abdixhiku nuk duhet të dorëzohet. Ai kishte të drejtë kur tha se qëndrimi i 6 deputetëve të LDK-së nuk përfaqëson agjendën e LDK-së.

Kjo do të thotë se agjenda e tyre është ajo e SHIK-ut dhe e kreut të NPK-së, i cili, sipas këtij reagimi, ka mbetur peng i krimeve të veta.

Po ashtu, kjo është agjendë e Serbisë, me synim dëmtimin e procesit të shtetbërjes së Kosovës.

Gjashtë deputetët që e bllokuan Kosovën, shumica prej tyre, janë pjesë e partisë së Bujar Bukoshit, Prekut, të themeluar nga Hashim Thaçi për ta dëmtuar Rugovën dhe LDK-në.

Nëse Lumiri qëndron në pozicionin e shprehur prej tij, elektorati rugovian do ta vlerësojë drejt këtë qëndrim dhe mbështetja në zgjedhjet e ardhshme nuk do të mungojë.

Ata që shpresojnë se pas 16 shtatorit situata do të ndryshojë në favor të krimit të organizuar, po presin më kot.

The post Familja e Haki Imerit mbështet Abdixhikun dhe akuzon 6 deputetë të LDK-së për bllokimin e Kosovës appeared first on Albeu.com.

Familja e Haki Imerit ka reaguar me tone të ashpra për situatën politike dhe ngërçin institucional në Kosovë, duke kritikuar udhëheqjen e LDK-së dhe duke e akuzuar atë për afrimitet me PDK-në.

Përmes një reagimi të publikuar në Facebook, familjarët e Imerit pretendojnë se interesat personale të disa drejtuesve të LDK-së janë në përputhje me ato të PDK-së. Sipas tyre, PDK-ja fshihet pas pengesave, vonesave dhe bllokadës që po pamundësojnë krijimin e institucioneve. Familja i kërkon LDK-së të vendosë nëse do të kontribuojë në formimin e institucioneve të Kosovës apo do të ndjekë interesat e ngushta të disa prej krerëve të saj, përcjell “Bota sot”.

Reagimi i plotë

Familja e Haki Imerit shprehet se ata që besojnë se mund të kërkojnë më shumë nga sa u ka dhënë qytetari duhet ta dinë se kjo sjellje do të ketë një kosto të lartë.

Sipas tyre, bëhet fjalë për drejtuesit e lodhur të LDK-së, të cilët, siç pretendojnë, e morën partinë me ndërskamca dhe po e mbajnë përmes dredhive e lojërave të ndyra, duke i shërbyer në fund Shikut.

Familja thekson se po bëhet gjithnjë e më e dukshme përputhja mes interesave personale të një pjese të krerëve të LDK-së dhe atyre të PDK-së.

PDK-ja, vijon reagimi, duket se ndodhet prapa pengesave, zvarritjeve dhe ngërçeve që po e mbajnë të bllokuar formimin e institucioneve.

Sipas këtij qëndrimi, synimi është që institucionet të mos krijohen dhe bllokada të vazhdojë deri në “lirimin” e Hashim Thaçit nga burgu, çka do të thotë se pritja mund të zgjasë mjaft.

Familja e Imerit paralajmëron se, nëse LDK-ja e refuzon sërish koalicionin, qytetarët do të kërkojnë përgjigje për arsyen pse drejtuesit e saj po veprojnë njësoj si PDK-ja.

Në reagim thuhet se pazaret me PDK-në i kanë kushtuar dhe po i kushtojnë vazhdimisht LDK-së, deri në shpërbërjen e saj.

Ndërsa Kosova vijon të mbetet peng, familja shprehet se qytetari nuk është më ai i dikurshmi. Ai po i vëren zhvillimet, po i lidh faktet dhe, kur të vijë dita e llogaridhënies, nuk do të harrojë asgjë.

Në përfundim, LDK-së i kërkohet të zgjedhë mes krijimit të institucioneve të Kosovës dhe interesave të ngushta të disa prej drejtuesve të saj.

The post Familja e Haki Imerit sulmon drejtuesit e LDK-së: “Qytetari nuk do të harrojë asgjë appeared first on Albeu.com.